Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 20 TETSAVE (28 a 30)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

20 – TETSAVE

²⁰I tu enkomendaras a los ijos de Yisrael ke te tomen azeyte de oliva, klaro, majado, para la lumbraria, para azer arder el kandel de kontino. ²¹En la tyenda del plazo afuera del velo, ke esta delante del Testimonyo, lo ordenara A’haron i sus ijos dezde la tarde asta la manyana delante de A’. Sera fuero de syempre por sus djerenansyos para los ijos de Yisrael.

28

¹I tu az ayegar a ti a A’haron tu ermano, i a sus ijos kon el, de entre los ijos de Yisrael, para servirme en el saserdosyo (ke’huna), A’haron, Nadav, i Avi’hu, Elazar i Itamar, ijos de A’haron. ²I aras vestidos santos para A’haron tu ermano, para onra i para ermozura. ³I tu avlaras a todos los savyos de korason, los kuales yo inchi de espirito de saveduria, ke agan los vestidos de A’haron para santifikarlo, para servirme en el saserdosyo. ⁴I estos son los vestidos ke aran: pechoral, i espaldar, i manto, i tonga bruslada, toka, i senyidero. I aran vestidos santos para A’haron tu ermano, i para sus ijos para servirme en el saserdosyo. ⁵I eyos tomaran el oro, i el kardeno, i la purpura, i el karmezi, i el lino fino.

⁶I aran el espaldar de oro, i kardeno, i purpura, i karmezi, i lino fino torsido, de echura de maestro. ⁷Tendra dos ombreras adjuntadas a sus dos kavos, i ansi sera adjuntado. ⁸I la sintura de su espaldar, ke esta sovre el, komo su echura sera, de lo mizmo, es a saver, de oro, kardeno, i purpura, i karmezi, i lino fino torsido. ⁹I tomaras dos pyedras de oniks, i kavakaras sovre eyas los nombres de los ijos de Yisrael: ¹⁰sesh de sus nombres sovre la una pyedra, i los nombres de los otros sesh sovre la otra pyedra, segun sus nasimyentos. ¹¹De echura de maestro de pyedra, komo kavakaduras de seyo, kavakaras las dos pyedras kon los nombres de los ijos de Yisrael; rodeadas de kastones de oro las aras. ¹²I pondras las dos pyedras sovre las ombreras del espladar por pyedras de membrasyon a los ijos de Yisrael; i A’haron yevara sus nombres delante de A’ sovre sus dos ombros por membrasyon. ¹³I aras kastones de oro. ¹⁴I dos kadenitas de oro fino; torsidas las aras, de echura de trensas; i meteras las kadenitas de trensas en los kastones.

¹⁵I aras el pechoral del djuisyo de echura de maestro; komo la echura del espaldar lo aras; de oro, de kardeno, i purpura, i karmezi, i lino fino torsido, lo aras. ¹⁶Kuadrado sera i dublado; un palmo sera su longura, i un palmo su anchura. ¹⁷I inchiras en el inchimyento de pyedras, kuatro ordenes de pyedras; el primer orden una kornelina, un topasyo, i una ezmeralda; este sera el primer orden. ¹⁸I el segundo orden un karvonklo, una safira, i un diamante. ¹⁹I el terser orden una ligura, una agata, i un ametisto. ¹⁹I el kuarto orden un krisolito, i un oniks, i un jaspe. ²⁰Seran enkastonadas en oro en sus inchimyentos. ²¹I las pyedras seran segun los nombres de los ijos de Yisrael, dodje segun sus nombres, komo kavakaduras de seyo; kada uno kon su nombre seran segun los dodje trivos. ²²I aras sovre el pechoral kadenitas torsidas de echura de trensas de oro fino. ²³I aras sovre el pechoral dos sortijas de oro, i pondras las dos sortijas sovre los dos kavos del pechoral. ²⁴I pondras las dos trensas de oro en las dos sortijas sovre los kavos del pechoral. ²⁵I los dos kavos de las dos trensas meteras en los dos kastones, i los pondras sovre las ombreras del espaldar a su delantera. ²⁶I aras otras dos sortijas de oro, i las pondras sovre los dos kavos del pechoral sovre su oriya ke esta a la parte de adyentro del espaldar. ²⁷I aras otras dos sortijas de oro i las pondras sovre las dos ombreras del espaldar por abasho, en la parte delantera, eskuentara su adjuntadura, ensima de la sintura del espaldar. ²⁸I adjuntaran el pechoral kon sus sortijas a las sortijas del espaldar kon un kordon de kardeno, para ke este sovre la sintura del espaldar, i no se kitara el pechoral de sovre el espaldar. ²⁹I yevara A’haron los nombres de los ijos de Yisrael en el pechoral del djuisyo sovre su korason, en su entrar en el lugar santo, por membrasyon delante de A’ de kontino. ³⁰I pondras en el pechoral del djuisyo los urim i los tumim; i estaran sovre el korason de A’haron en su entrar delante de A’; i le yevara A’haron el djuisyo de los ijos de Yisrael sovre su korason delante de A’ de kontino.

³¹I aras el manto del espaldar todo de kardeno. ³²I avra una avertura por arriva en medyo de el; avra un borde a su avertura al derredor de echura de teshidor, komo la averture de maya, para ke no se razge. ³³I sovre sus aldas aras granadas de kardeno i purpura, i karmezi, sovre sus aldas al derredor; i kampaniyas de oro entre eyas al derredor. ³⁴Una kampaniya de oro i una granada, una kampaniya de oro i una granada, sovre las aldas del manto al derredor. ³⁵I estara sovre A’haron para ministrar; i se oira su sonido en su entrar en el lugar santo delante de A’, i en su salir, para ke no muera.

³⁶I aras un frontal de oro fino, i kavakaras sovre el komo kavakaduras de seyo, santidad a A’. ³⁷I lo pondras sovre un kordon de kardeno, i estara sovre la toka; sovre la delantera de la toka estara. ³⁸I estara sovre la frente de A’haron, i yevara A’haron el delito de las kozas santas ke los ijos de Yisrael santifikaran en todas sus dadivas santas; i estara sovre su frente de kontino, para ke sean enveluntados delante de A’. ³⁹I broslaras la tonga de lino fino, i aras la toka de lino fino, i aras el senyidero de echura de rekamador.

⁴⁰I para los ijos i A’haron tongas, i les aras senyideros i kofyas les aras, por onra i por ermozura. ⁴¹I kon eyos vestiras a A’haron tu ermano, i a sus ijos kon el; i los untaras, i inchiras sus manos, i los santifikaras, para ke me servan en el saserdosyo. ⁴²I az para eyos panyetes de lino para kuvrir la karne de su desnudez; dezde los lumbos asta las ankas seran, ⁴³i estaran sovre A’haron i sovre sus ijos kuando entraran en la tyenda del plazo, i kuando se ayegaren al ara para ministrar en el lugar santo, para ke no yeven delito, i mueran. Fuero de syempre para el i para su semen despues de el.

29

¹I esta es la koza ke les aras para santifikarlos, para servirme en el saserdosyo (ke’huna): toma un toro, ijo de vaka, i dos barvezes sanos, ²i pan de sensenyas, i tortas de sensenyas enbueltas en azeyte, i benmuelos de sensenyas untados kon azeyte; de semola de trigo los aras. ³I los pondras en un sesto, i los ayegaras en el sesto, kon el toro i los dos barvezes. ⁴I a A’haron i a sus ijos ayegaras a la puerta de la tyenda del plazo, i los lavaras kon agua. ⁵I tomaras los vestidos, i vestiras a A’haron la tonga, i el manto del espaldar, i el espaldar, i el pechoral, i lo senyiras kon la sintura del espaldar. ⁶I pondras la toka sovre su kavesa, i pondras la korona santa sovre la toka. ⁷I tomaras el azeyte de la untasyon, i vazyaras sovre su kavesa, i lo untaras. ⁸I ayegaras a sus ijos, i los vestiras tongas. ⁹I los senyiras kon senyideros, a A’haron i a sus ijos, i les ataras kofyas; i tendran el saserdosyo por fuero de syempre; i inchiras la mano de A’haron i la mano de sus ijos. ¹⁰I ayegaras el toro delante de la tyenda del plazo, i A’haron i sus ijos pondran sus manos sovre la kavesa del toro. ¹¹I degoyaras el toro delante de A’, a la puerta de la tyenda del plazo. ¹²I tomaras de la sangre del toro, i pondras sovre los kuernos del ara kon tu dedo, i verteras toda la sangre al simyento del ara. ¹³I tomaras todo el sevo ke kuvre las entranyas, i el redanyo sovre el igado, i los dos rinyones, i el sevo ke esta sovre eyos, i los saumaras en el ara. ¹⁴Empero la karne del toro, i su kuero, i su fyenda kemaras en fuego afuera del real; sakrifisyo por pekado es. ¹⁵I tomaras el un barvez, i A’haron i sus ijos pondran sus manos sovre la kavesa del barvez. ¹⁶I degoyaras el barves, i tomaras su sangre, i esparziras sovre el ara al derredor. ¹⁷I desmembraras el barvez por sus myembros, i lavaras sus entranyas, i sus pyernas, i las pondras sovre sus myembros sovre su kavesa. ¹⁸I saumaras todo el barvez en el ara; alsasyon es a A’, guezmo resivivle, ofrenda kemada es a A’. ¹⁹I tomaras el segundo barvez, i A’haron i sus ijos pondran sus manos sovre la kavesa del barvez. ²⁰I degoyaras el barvez, i tomaras de su sangre, i pondras sovre la ternura de la oreja derecha de A’haron, i sovre la ternura de la oreja derecha de sus ijos, i sovre el pulgar de su mano derecha, i sovre el pulgar de su pye derecho, i esparziras la sangre sovre el ara al derredor. ²¹I tomaras de la sangre ke esta sovre el ara, i del azeyte de la untasyon, i esteyaras sovre A’haron, i sovre sus vestidos, i sovre sus ijos, i sovre los vestidos de sus ijos kon el; i sera santifikado el, i sus vestidos, i sus ijos, i los vestidos de sus ijos kon el. ²²I tomaras del barvez el sevo, i la kola, i el sevo ke kuvre las entranyas, i el redanyo del igado, i los dos rinyones, i el sevo ke esta sovre eyos, i la anka derecha; porke barvez de inchimyentos es: ²³i un pan redondo, i una torta de pan de azeyte, i un benmuelo del sesto de las sensenyas ke esta delante de A’. ²⁴I lo pondras todo sovre las palmas de A’haron, i sovre las palmas de sus ijos; i lo meseras por mesedura delante de A’. ²⁵I lo tomaras de sus manos, i lo saumaras en el ara sovre la alsasyon, por guezmo resivivle delante de A’; ofrenda kemada es a A’. ²⁶I tomaras el pecho del barvez de los inchimyentos ke es de A’haron, i lo meseras por mesedura delante de A’, i sera tu porsyon. ²⁷I santifikaras el pecho de la mesedura, i la anka de la levantadura, lo ke fue mesedo, i lo ke fue levantado del barvez de los inchimyentos, de lo ke es para A’haron, i de lo ke es para sus ijos. ²⁸I sera para A’haron i para sus ijos por fuero de syempre de kon los ijos de Yisrael; porke levantadura es, i levantadura sera de kon los ijos de Yisrael, tomada de los sakrifisyos de sus pases, su levantadura a A’. ²⁹I los vestidos santos ke son de A’haron seran para sus ijos despues de el, para ser untados en eyos, i para inchir sus manos en eyos. ³⁰Syete dias los vestira el saserdote de sus ijos, ke en su lugar vinyere a la tyenda del plazo para ministrar en el lugar santo. ³¹I tomaras el barvez de los inchimyentos, i kozinaras su karne en el lugar santo. ³²I A’haron i sus ijos komeran la karne del barvez, i el pan ke esta en el sesto, a la puerta de la tyenda del plazo. ³³I komeran las kozas kon ke fue echa ekspiasyon (kapara), para inchir sus manos para santifikarlos; ma no koma de eyas el estranyo; porke son santos. ³⁴I si sovrare algo de la karne de los inchimyentos, i del pan asta la manyana, kemaras al fuego lo ke uvyere sovrado; no se komera, porke koza santa es. ³⁵I ansi aras a A’haron, i a sus ijos, segun todo lo ke te enkomendi; syete dias inchiras sus manos. ³⁶I un toro de sakrifisyo por pekado aras kada dia por las ekspiasyones (kipurim); i alimpyaras el ara en tu azer ekspiasyon por eya, i la untaras para santifikarla. ³⁷Syete dias aras ekspiasyon por el ara, i la santifikaras; i sera el ara santisima; todo lo ke tokare al ara, sera santifikado.

³⁸I esto es lo ke aras sovre el aras sovre el ara: dos karneros de edad de un anyo kada dia de kontino. ³⁹El un karnero aras a la manyana; i el otro karnero aras entre las tardes. ⁴⁰I el dyezmo de una epa de semola enbuelta en la kuarta parte de un ‘hin de azeyte majado; i la templasyon la kuarta parte de un ‘hin de vino, para el un karnero. ⁴¹I el otro karnero aras entre las tardes, i segun el prezente de la manyana, i segun su templasyon le aras, por guezmo resivivle, ofrenda kemada a A’. ⁴²Esta sera alsasyon kontinua por vuestros djerenansyos a la puerta de la tyenda del plazo delante de A’, onde me aplazare a vozotros para avlar a ti ayi. ⁴³I me aplazare ayi a los ijos de Yisrael, i sera santifikada kon mi onra. ⁴⁴I santifikare la tyenda del plazo, i el ara; i a A’haron i a sus ijos santifikare, para servirme en el saserdosyo. ⁴⁵I morare entre los ijos de Yisrael, i les sere por Dyo. ⁴⁶I konoseran ke yo soy A’ su Dyo, ke los saki de la tyerra de Ayifto para morar entre eyos: yo A’ su Dyo.

30

¹I aras una ara para saumar saumeryo; de maderos de shitim la aras. ²Un kovdo sera su longura, i un kovdo su anchura; kuadrada sera; i dos kovdos sera su altura: sus kuernos seran de si mizma. ³I la kuvriras de oro fino, su tejado, i sus paredes al derredor, i sus kuernos; i le aras un serko de oro al derredor, ⁴i dos sortijas de oro le aras debasho de su serko, sovre sus dos kostados las aras, sovre sus dos lados; i seran por lugares para las varas para yevarla kon eyas. ⁵I aras las varas de maderos de shitim, i las kuvriras de oro. ⁶I la pondras delante de velo ke esta sovre el arka del Testimonyo, delante del kuvertero ke esta sovre el Testimonyo, onde sere aplazado a ti. ⁷I saumara sovre eya A’haron saumeryo golorozo kada manyana; kuando aderesare los kandeles lo saumara. ⁸I kuando A’haron ensyendyere los kandeles entre las tardes, lo saumara, saumeryo kontinuo delante de A’ por vuestros djerenansyos. ⁹No alsesh sovre eya saumeryo estranyo, ni alsasyon, ni prezente, i templasyon no templesh sovre eya. ¹⁰I A’haron ara ekspiasyon (kapara) sovre sus kuernos una vez en el anyo kon la sangre del sakrifisyo por pekado de las ekspiasyones; una vez en el anyo ara ekspiasyon sovre eya en vuestros djerenansisos: santisima sera a A’.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.