LA VIZINA, EN MI CHIKES por Nissim Ashkenazi

karos todos

El meoyo muestro es una misteria, ay kozas ulvidadas i ay kozas, ke afilu ke ya pasaron mas de setenta anyos, estan en la memoria, i de ves en kuando te akodras, o kon sonriza, o,kon pena.

Uno de estos rekordos, es mi vizina de la chikes la tiya G’ang’a Grotas d.b.m. no era mi tiya, ama por respekto diziyamos tiya.

Los Selaniklis ke suvieron a Israel para enreziar el porto de Haifa, al anyo 1933 (en ondas), arkilaron kazas en la kaledja Hashomer. No aviya bastante kazas disponibles, koza ke mos yevo a bivir dos famiyas en un apartamento de dos udas (kamaretas), kada famiya una uda i balkoniko, la kuzina, banyo, i kabine, endjuntos…

Mi famiya eramos sesh personas, i la famiya Grotas eran siete personas. Paso tiempo i la vizina se enbivdo, i teniya kuatro mansevos grandes, i una ija (Elda) serka de vente anyos.

G’ang’a era kapache, lijera i rezia, era delgadika, bashika, espalda derecha, siempre kon faldar largo (de ropa espesa) i siempre kon devantal, era seria, kaveos kurtos i avlava en forma de konfidensia i determinasion, komo en los djuzgos, dizen, i esto es…

Era asertiva i pronta kon kovdos i unyas, para engrandeser i protejar su famiya. Yo me akavidava de eya, i la respektava de londje. En vezes, las tadres, estavamos en la kuzina kumiendo pepitas, i yo, ijo de diez anyos, les meldava konsejas de la bibilia de un livro en ebreo. En una fraza aviya la palavra Matris… la vizina se alevanto i exklamo; este livro no es bueno para el ninyo. Se eskapo i nunka mas no les meldi.

Mi madre d.b.m era mas kalma i avlava kon boz basha, i no kieriya pelear, o diskosyones. Un dia vine de la kaye  i kieriya lavar las manos, avri la puerta del banyo, i Elda de vente anyos estava al banyo deznuda, lavandose… El grito de la vizina me danyo, aserri la puerta i empesaron los gritos i chiyos… eya disho ke lo fize mahsus (kon kavana), i yo dishe ke no saviya ke Elda esta aya. Yo estava en shok de dos partes, una ke la vide, i dos de los gritos. Mi madre vino ayudarme i disho; deke Elda no aserro la puerta kon la yave? i se developo pleito grande, i yo en medio…

Este insidente me akodro bueno asta oy, i ambezi ke siempre devemos avlar kon polites i respekto, sin ke aiga diferensia si es persona grande o chika, todos tienen alma i meresen konsiderasion. I segunda koza es: repuesta kalma aflosha aravias. En ebreo se dize: מענה רך ישיב חימה

kon amista.