eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
18 – MISHPATIM
21
1I estos son los djuisyos ke ordenaras delante de eyos. 2Kuando komprares syervo Ebreo, sesh anyos servira; i en el seteno saldra forro debaldes; 3Si entro solo, solo saldra; si era marido de mujer, entonses saldra su mujer kon el. 4Si su amo le uvyere dado mujer, i eya uvyere parido ijos o ijas, la mujer i sus ninyos seran de su amo, i el saldra solo. 5I si el syervo dizir dishere: yo amo a mi senyor, a mi mujer, i a mis ninyos, no saldre forro: 6entonses su amo lo ara ayegar a los djuezes, i lo ara ayegar a la puerta, o al poste; i su amo burakara su oreja kon una lezna, i le servira para syempre.
7I kuando alguno vendyere su ija por syerva, no saldra komo salen los syervos. 8Si no agradare a su senyor, ke la despozo para si mizmo, entonses la deshara ser regmida; no tendra poder de venderla a puevlo estranyo, syendo ke falso kon eya. 9Ma si la uvyere despozado kon su ijo, ara kon eya segun la kostumbre de las ijas. 10Si tomare otra mujer para si, su mantenimyento, su vestido, i su ora, no menguara. 11I si no le izyere estas tres kozas, entonses eya saldra debaldes sin moneda.
12El ke eryere a alguno de modo ke muryere, matar sera matado. 13Ma el ke no aselado, sino ke el Dyo lo entrego en su mano, yo te pondre lugar al kual fuyira.
14I kuando alguno se sobervyare kontra su kompanyero, para matarlo kon arte, de mi ara lo tomaras para murir.
15I el ke eryere a su padre, o a su madre, matar sera matado.
16I el ke rovare un ombre, i lo vendyere, o se fuere ayado en su mano, matar sera matado.
17I el ke maldishere a su padre, o a su madre, matar sera matado.
18I kuando ombres barajaren, i alguno eryere a su kompanyero kon pyedra, o kon el punyo, i no muryere, ma kayere en kama: 19si se levantare, i anduvyere por la kaye sovre su muleta, el eridor sera livre; solamente dara por la baldadura de su tyempo, i melezinar ara ke se melezine.
20I kuando alguno eryere a su syervo o a su syerva, kon palo, i muryere debasho de su mano, vengar sera vengado. 21Empero si durare un dia o dos, no sera vengado; porke su moneda es.
22I kuando algunos barajaren, i eryeren a mujer prenyada, i salyeren sus kriaturas, ma no akontesyere dezastre, apenar sera apenado segun lo ke el marido de la mujer puzyere sovre el, i dara por sentensya de los djuezes. 23Ma si akontesyere dezastre, entonses daras vida por vida, 24ojo por ojo, dyente por dyente, mano por mano, pye por pye. 25Kemadura por kemadura, pesilgo por pesilgo, tolondro por tolondro.
26I kuando alguno eryere el ojo de su syervo, o el ojo de su syerva, i lo danyare, lo soltara forro por su ojo. 27I si echare el dyente de su syervo, o el dyente de su syerva, lo soltara forro por su dyente.
28I kuando un buey akorneare varon o mujer, de modo ke muryere, apedrear sera apedreado el buey, i su karne no sera komida, i el duenyo del buey sera livre. 29Ma si el buey era akorneador dezde ayer i anteayer, i fue atestiguado a su duenyo, i no lo uvyere guardado, i matare varon o mujer, el buey sera apedreado, i tambyen su duenyo sera matado. 30Si presyo fuere puesto sovre el, entonses dara por el reskate de su vida kuanto fuere puesto sovre el. 31Si uvyere akorneado ijo, i si uvyere akorneado ija, segun este djuisyo sera echo a el. 32Si el buey akorneare syervo o syerva, dara trenta siklos de plata a su senyor, i el buey sera apedreado.
33I kuando alguno avryere pozo, o kuando alguno kavare pozo, i no lo kuvryere ,i kayere ayi buey o azno, 34el duenyo del pozo pagara, i tornara moneda a su duenyo, i el muerto sera suyo.
35I kuando el buey de alguno eryere al buey de su kompanyero, i muryere, entonses venderan el buey bivo, i espartiran la moneda de el, i tambyen el muerto espartiran. 36I si era savido ke el buey era akorneador de ayer i anteayer, i su duenyo no lo uvyere guardado, pagar pagara buey por buey, i el muerto sera suyo.
37Kuando alguno rovare buey o karnero, i lo degoyare, i lo vendyere, sinko bueyes pagara por el buey, i kuatro ovejas por el karnero.
22
1Si el ladron fuere ayado en el burako, i fuere erido, i muryere, el eridor no sera kulpozo de sangre. 2Si el sol uvyere esklarasido sovre el, sera kulpozo de sangre. El ladron pagar pagara; si no tuvyere, sera vendido por su rovo. 3Si ayar fuere ayado el rovo en su mano, sea buey, o azno, o karnero, bivos, dos tantos pagara.
4Kuando alguno izyere apasentar kampo o vinya i soltare su bestya, i pasyere en el kampo de otro, de lo mejor de su kampo, i de lo mejor de su vinya pagara.
5Kuando salyere fuego, i ayare espinos, o fuere kemada asina, o myes, o kampo, el ke ensendyo el fuego pagar pagara.
6Kuando alguno dyere a su kompanyero plata o atuendos a guardar, i fuere rovado de la kaza del varon; si el ladron fuere ayado, pagara dos tantos. 7Si el ladron no fuere ayado, entonses el duenyo de la kaza sera ayegado a los djuezes para djurar si no estendyo su mano a la azyenda de su kompanyero. 8Sovre todo modo de revilyo, sovre buey, sovre azno, sovre karnero, sovre vestido, sovre toda koza perdida, de la kual alguno dishere, esto es mio; la kavza de ambos eyos vendra delante de los djuezes, i el ke los djuezes kondenaren pagara dos tantos a su kompanyero.
9Kuando alguno dyere a su kompanyero azno, o buey, o karnero, o kualker kuatropea a guardar, i muryere, o fuere kevrado, o fuere kativado sin verlo ninguno: 10djura de A’ sera entre ambos eyos, ke no estendyo su mano a la azyenda de su kompanyero; i su duenyo resivira la djura, i el otro no pagara. 11I si rovar fuere rovado de el, pagara a su duenyo. 12Si arrevatar fuere arrevatado, lo traera por testigo, i no pagara lo arrevatado.
13I kuando alguno tomare emprestado de su kompanyero, i fuere kevrado o muryere, su duenyo no estando kon el, pagar pagara. 14Si su duenyo estuvyere kon el, no pagara; se era akilado, vino por su presyo.
15I kuando alguno sombayere a una eskosa ke no fuere despozada, i yazyere kon eya, dotar la dotara por su mujer. 16Si su padre no kijyere darsela, le pezara plata segun la dota de las eskosas.
17A la echizera no abidigues.
18Todo el ke yazyere kon kuatropea, matar sera matado.
19El ke sakrifikare a los dyozes, sino a A’ solo, sera destruido.
20I al pelegrino no oprimas, ni lo apretes; porke pelegrinos fuistesh en la tyerra de Ayifto.
21No afriash ninguna bivda ni guerfano. 22Si afriir lo afriires, i si el esklamar esklamare a mi, oir oire su esklamasyon; 23i se ensendera mi fulor, i vos matare kon espada, i vuestras mujeres seran bivdas, i vuestros ijos guerfanos.
24Si emprestares moneda a mi puevlo, al povre ke esta kontigo, no sea a el komo logrero, no pongas sovre el logro. 25Si tomares en prenda el vestido de tu kompanyero, al ponerse el sol se lo tornaras: 26porke solo akeyo es su kuvyerta, es su vestido para su kuero; ¿en ke durmira? i sera, ke kuando esklamare a mi, yo oire porke soy piadozo.
27No desonres a los djuezes, ni maldigas al mayoral en tu puevlo. 28No detardes de traer [1]tus primisyas i tus vendimyas. El primodjenito de tus ijos daras a mi. 29Ansi aras kon tu buey, i kon tu oveja. Syete dias estara kon su madre, i al dia ochavo lo daras a mi. 30I seresh varones santos a mi. I karne arrevatada en el kampo no komash; al perro la echaresh.
[1] Ebreo: tu yena i tu lagrima
23
1No resivas oida falsa. No pongas tu mano kon el malo para ser testigo indjusto. 2No vayas detras de los muchos para azer mal; i no respondas en baraja, akostandote detras de los muchos para atorser. 3I al povre no afermozigues en su baraja.
4Kuando enkontrares el buey de tu enemigo, o su azno trasyerrado, tornar se lo tornaras. 5Kuando vyeres el azno de del ke te aborrese echado debasho de su karga, i te vedares de ayudarlo, ayudar ayudaras kon el.
6No atuersas el djuisyo de tu menesterozo en su baraja. 7De palavra falsa aleshate; i al inosente i al djusto no mates; porke no djustifikare al malo. 8I no tomes [1]koecho porke el koecho syega a los ke ven, i atorse las palavras de los djustos. 9I al pelegrino no apretes; pues ke vozotros savesh el alma del pelegrino, porke pelegrino fuistesh en la tyerra de Ayifto.
10I sesh anyos sembraras tu tyerra, i apanyaras su renuevo. 11Ma al seteno la soltaras i la desharas, para ke koman los menesterozos de tu puevlo; i lo ke kedare komeran los animales del kampo: ansi aras kon tu vinya i kon tu olivar. 12Sesh dias aras tus echos, i en el dia seteno olgaras, para ke deskanse tu buey, i tu azno, i repoze el ijo de tu syerva, i el pelegrino. 13I en todo lo ke vos dishe, seash guardados; i nombre de otros dyozes no enmentesh, ni sea oido de tu boka. 14Tres vezes en el anyo me aras fyesta. 15La fyesta de la sensenyas guardaras: syete dias komeras sensenyas, komo te enkomendi, al plazo del mez Aviv; porke en el saliste de Ayifto; i no se apareska ninguno delante de mi vazio. 16I la fyesta de la segada, las [2]primisyas de tus travajos ke uvyeres sembrado en el kampo; i la fyesta del apanyamyento, a la salida del anyo, kuando avras apanyado tus travajos del kampo. 17Tres vezes en al anyo se aparesera todo macho tuyo delante del Senyor A’. 18No sakrifikes sovre levdo la sangre de mi sakrifisyo; ni kede el sevo de mi karnero asta la manyana. 19Las primeras de las primisyas de tu tyerra traeras a la kaza de A’ tu Dyo. No kozines el kavrito kon la leche de su madre.
20Ek yo enbio un andjel delante de ti, para guardarte en el kamino, i para traerte al lugar ke apareji. 21Guardate delante de el, i ovedese a su boz, no reveyes kontra el, porke no perdonara vuestro revilyo; porke mi nombre esta en el. 22Empero si ovedeser ovedesyeres a su boz, i izyeres todo lo ke yo avlare, yo sere enemigo a tus enemigos, i angustyare a tus angustyadores. 23Porke mi andjel andara delante de ti, i te traera al Emorio, i al Hitio, i al Perizio, i al Kenaanio, i al Hivio, i al Yevusio; i yo los tajare. 24No te enkorves a sus dyozes, ni los servas, ni agas komo sus echos, sino ke derrokar los derrokaras, i kevrar kevraras sus estansyas. 25I serviresh a A’ vuestro Dyo, i el bendizira tu pan, i tus aguas; i yo kitare enfermedad de en medyo de ti. 26No avra desijada ni manyera en tu tyerra; el numero de tus dias yo kumplire. 27Enbiare mi myedo delante de ti, i konsumire a todo el puevlo a los kuales vendras, i te dare la serviz de todos tus enemigos. 28I enbiare la abisba delante de ti, i desterrara al Hivio, al Kenanio, i al Hitio, de delante de ti. 29No los desterrare de delante de ti en un anyo, para ke la tyerra no sea desolada, i se muchiguen sovre ti los animales del kampo. 30Poko a poko los desterrare de delante de ti, asta ke fruchigues, i eredes la tyerra. 31I pondre tu termino dezde el mar ruvyo asta el mar de los Pelishtios, i dezde el dizyerto asta el rio; porke entregare en vuestra mano los moradores de la tyerra, i los desterraras de delante de ti. 32No tajes firmamyento kon eyos, ni kon sus dyozes. 33No moren en tu tyerra, no sea ke te agan pekar kontra mi; porke si sirvyeres a sus dyozes, de syerto te sera por enkampamyento.
[1] dadiva para atorser
[2] primeros frutos
24
1I a Moshe disho: suve a A’, tu i A’haron, Nadav i Avi’hu, i setenta de los vyejos de Yisrael; i vos enkorvaresh de leshos. 2I Moshe solo se ayegara a A’, i eyos no se ayegen, ni suvan kon el el puevlo. 3I vino Moshe, i konto al puevlo todas las palavras de A’, i todos los djuisyos. I respondyo todo el puevlo a una boz, i disheron: todas las palavras ke avlo A’, aremos. 4I Moshe eskrivyo todas las palavras de A’, i madrugo por la manyana, i fraguo ara al pye del monte, i dodje estansyas segun los dodje trivos de Yisrael. 5I enbio mansevos de los ijos de Yisrael, i alsaron alsasyones, i sakrifikaron sakrifisyos de pases a A’, toros. 6I Moshe tomo la mitad de la sangre, i la puzo en basinas; i la mitad de la sangre esparzyo sovre el ara, 7i tomo el livro del firmamyento, i meldo a oidos del puevlo; i disheron: todo lo ke avlo A’, aremos, i ovedeseremos. 8I Moshe tomo la sangre, i esparzyo sovre el puevlo, i disho: ek, la sangre del firmamyento ke A’ tajo kon vozotros sovre todas estas palavras.
9I suvyo Moshe i A’haron, Nadav i Avi’hu, i setenta de los vyejos de Yisrael. 10I vyeron al Dyo de Yisrael, i avia debasho de sus pyes komo la echura de lajado de safira, i komo los syelos mizmos por klareza. 11I sovre los senyores de los ijos de Yisrael no estendyo su mano; i vyeron al Dyo, i komyeron i bevyeron.
12I disho A’ a Moshe: suve a mi al monte, i estate ayi, i te dare tavlas de pyedra, i la ley, i la enkomendansa ke eskrivi para anbezarlos. 13I se levanto Moshe, i Ye’hoshua su ministro; i Moshe suvyo al monte del Dyo. 14I disho a los vyejos: esperadnos aki, asta ke tornemos a vozotros; i ek, A’haron i Hur estan kon vozotros; el ke tuvyere echos, se ayege a eyos.
15I suvyo Moshe al monte, i una nuve kuvryo el monte. 16I la onra de A’ pozo sovre el monte de Sinay, i la nuve lo kuvryo sesh dias; i al dia seteno yamo a Moshe de en medyo de la nuve. 17I la vista de la onra de A’ era komo fuego kemante en la kavesera del monte, a ojos de los ijos de Yisrael. 18I entro Moshe en medyo de la nuve, i suvyo al monte; i estuvo Moshe en el monte kuarenta dias i kuarenta noches.
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
