Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 17 YITRO (18 a 20)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

17 – YITRO

18

¹I oyo Yitro, saserdote de Midyan, suegro de Moshe, todo lo ke el Dyo avia echo a Moshe, i a Yisrael su puevlo, i komo A’ avia sakado a Yisrael de Ayifto. ²I tomo Yitro, suegro de Moshe, a Tsipora mujer de Moshe, despues ke el la enbio, i a sus dos ijos, ³de los kuales el nombre del uno era Gershom; porke disho, pelegrino fui en tyerra estranya: ⁴i el nombre del otro era Eliezer; porke disho, el Dyo de mi padre fue mi ayuda, i me eskapo de la espada de Paro. ⁵I vino Yitro, suegro de Moshe, i sus ijos, i su mujer, a Moshe al dizyerto onde el pozava, al monte del Dyo. ⁶I disho a Moshe: yo tu suegro Yitro vengo a ti, i tu mujer, i sus dos ijos kon eya. ⁷I Moshe salyo a resivir a su suegro, i se enkorvo, i lo bezo; i preguntaron el uno al otro komo estavan; i vinyeron a la tyenda. ⁸I Moshe konto a su suegro todo lo ke A’ avia echo a Paro i a los Aisyanos por kavza de Yisrael, i toda la kanserya ke les avia akontesido en el kamino, i komo A’ los avia eskapado. ⁹I se alegro Yitro por todo el byen ke A’ avia echo a Yisrael, al kual avia eskapado de mano de los Aisyanos. ¹⁰I disho Yitro: bendicho sea A’, ke vos eskapo de mano de los Aisyanos, i de mano de Paro, ke eskapo al puevlo de debasho de la mano de los Aisyanos. ¹¹Agora yo se ke A’ es grande mas ke todos los dyozes, aun en la koza en ke se sobervyaron sovre eyos. ¹²I tomo Yitro, suegro de Moshe, alsasyon i sakrifisyos para el Dyo, i vino A’haron, i todos los vyejos de Yisrael a komer pan kon el suegro de Moshe delante del Dyo.

¹³I akontesyo, ke al otro dia Moshe se asento a djuzgar al puevlo, i el puevlo estuvo delante de Moshe dezde la manyana asta la tarde. ¹⁴I vyendo el suegro de Mosher todo lo ke el azia al puevlo, disho: ¿ke es esta koza ke tu azes al puevlo? ¿por ke te asentas tu solo, i todo el puevlo parado delante de ti dezde la manyana asta la tarde? ¹⁵I disho Moshe a su suegro: porke el puevlo vyene a mi para rekerir al Dyo. ¹⁶Kuando tyenen alguna koza, vyenen a mi, i yo djuzgo entre el uno i el otro; i los ago saver los fueros del Dyo, i sus leyes. ¹⁷I el suegro de Moshe le disho: la koza ke azes no es buena. ¹⁸Kansar te kansaras tanto tu komo este puevlo ke esta kontigo; porke esta koza es demazyado pezgada para ti; no podras azerla tu solo. ¹⁹Eskucha agora a mi boz, yo te akonsejare, i el Dyo sera kontigo. Seas tu por el puevlo delante del Dyo, i traeras las kozas al Dyo: ²⁰i les anbezaras los fueros i las leyes i les aras saver el kamino en el kual tyenen ke andar, i el echo ke tyenen ke azer. ²¹I tu proveeras de todo el puevlo varones de virtud, temerozos del Dyo, varones de verdad, ke aborresen kovdisya; i pondras a sestos sovre eyos por kaporales de miles, kaporales de syentos, kaporales de sinkuentas, i kaporales de dyezes, ²²I djuzgen eyos al puevlo en todo tyempo; i sera, ke toda koza grande traeran a ti, i toda koza chika djuzgaran eyos; i alivyana la karga de sovre ti, i la yevaran kontigo. ²³Si izyeres esta koza, i el Dyo te la enkomendare, entonses podras sustenerte, i todo este puevlo tambyen se ira a su lugar en paz. ²⁴I eskucho Moshe a la boz de su suegro, i izo todo lo ke disho. ²⁵I eskojyo Moshe varones de virtud de todo Yisrael, i los puzo por kaveseras sovre el puevlo, kaporales de miles, kaporales de syentos, kaporales de sinkuentas, i kaporales de dyezes. ²⁶I djuzgavan al puevlo en todo tyempo: la koza fuerte traian a Moshe, i toda koza chika djuzgavan eyos. ²⁷I enbio Moshe a su suegro, i se fue a su tyerra.

19

¹I el terser mez de la salida de los ijos de Yisrael de la tyerra de Ayifto, en akel dia vinyeron al dizyerto de Sinay. ²I partyeron de Refidim, i vinyeron al dizyerto de Sinay, i pozaron en el dizyerto; i pozo ayi Yisrael delante del monte, ³I Moshe suvyo al Dyo, i A’ lo yamo del monte, dizyendo: ansi diras a la kaza de Yaakov, i denunsyaras a los ijos de Yisrael: ⁴vozotros vistesh lo ke ize a los Aisyanos, i komo vos yevi sovre alas de agilas, i vos trushe a mi. ⁵I agora si eskuchar eskucharesh a mi boz, i guardaresh mi firmamyento, vozotros seresh para mi tezoro mas ke todos los puevlos; porke toda la tyerra es mia. ⁶I vozotros seresh para mi reyno de saserdotes, i djente santa. Estas son las palavras ke avlaras a los ijos de Yisrael.

⁷I vino Moshe, i yamo a los vyejos del puevlo, i puzo delante de eyos todas estas palavras ke A’ le enkomendo. ⁸I respondyo todo el puevlo auna, i disheron: todo lo ke A’ avlo, aremos. I Moshe torno las palavras del puevlo a A’. ⁹I disho A’ a Moshe: ek, yo vengo a ti en una nuve espesa, para ke el puevlo oyga kuando avlo kontigo, i tambyen para ke te krean para syempre. I Moshe denunsyo las palavras del puevlo a A’.

¹⁰I disho A’ a Moshe: anda al puevlo ,i santifikalos oy i manyana, i laven sus vestidos. ¹¹I esten aparejados para el terser dia; porke en el terser dia A’ desendera a vista de todo el puevlo sovre el monte de Sinay. ¹²I meteras termino al puevlo al derredor, dizyendo: guardadvos de suvir en el monte, o de tokar en su kavo: todo el ke tokare al monte, matar sera matado. ¹³No lo toke mano, ma apedrear sera apedreado, o asaetear sera asaeteado; sea kuatropea o sea varon, no bivira. En sonado el kuerno, suviran al monte.

¹⁴I desendyo Moshe del monte del monte al puevlo, i santifiko al puevlo, i lavaron sus vestidos. ¹⁵I disho al puevlo: estad aparejados para el terser dia; no vos ayegesh a mujer. ¹⁶I akontesyo al terser dia kuando amanesyo, ke uvo truenos i relampagos, i nuve espesa sovre el monte, i un sonido de trompeta muy fuerte; i se estremesyo todo el puevlo ke estava en el real. ¹⁷I Moshe sako al puevlo del real al enkuentro del Dyo; i se pararon a lo basho del monte. ¹⁸I todo el monte de Sinay umeava, porke A’ desendyo sovre el en fuego; i su umo suvia komo el umo de un orno, i todo el monte se estremesyo mucho. ¹⁹I el sonido de la trompeta iva enfortesyendose mucho; Moshe avlava, i el Dyo le respondia en boz. ²⁰I desendyo A’ sovre el monte de Sinay, sovre la kavesera del monte; i yamo A’ a Moshe a la kavesera del monte, i Moshe suvyo. ²¹I disho A’ a Moshe desyende, enkomenda al puevlo, no sea ke derroken el termino para ver a A’, i kaygan muchos de eyos. ²²I tambyen los saserdotes ke se ayegan a A’, se santifiken, no sea ke A’ aportiye en eyos. ²³I disho Moshe a A’: el puevlo no podra suvir al monte de Sinay, porke tu nos enkomendaste, dizyendo: mete termino al monte, i santfikalo. ²⁴I A’ le disho: vate, desyende, i suviras tu, i A’haron kontigo; ma los saserdotes i el puevlo no derroken el termino por suvir a A’, no sea ke aportiye en eyos. ²⁵I desendyo Moshe al puevlo, i avlo kon eyos.

20

¹I avlo el Dyo todas estas palavras, dizyendo:

²Yo soy A’ tu Dyo, ke te saki de la tyerra de Ayifto, de la kaza de syervos. ³No tengas otros dyozes delante de mi.

⁴No agas a ti idolo, ni ninguna semejanse de lo ke ay en los syelos por arriva, ni de lo ke ay en la tyerra por abasho, ni de lo ke ay en las aguas debasho de la tyerra. ⁵No te enkorves a eyos, ni les servas; porke yo A’ tu Dyo soy Dyo zelozo, ke vijito el delito de los padres sovre los ijos, sovre los terseros i sovre los kuartos djerenansyos, a los ke me aborresen; ⁶i ke ago mersed a miles, a lo ke me aman, i ke guardan mis enkomendansas.

⁷No tomes el nombre de A’ tu Dyo, en vano; porke no livrara A’ al ke tomare su nombre en vano.

⁸Membra el dia del shabat, para santifikarlo. ⁹Sesh dias travajaras, i aras toda tu ovra: ¹⁰ma el dia seteno es shabat a A’ tu Dyo; no agas ninguna ovra, tu, ni tu ijo, ni tu ija, tu syervo, ni ti syerva, ni tu kuatropea, ni tu pelegrino ke esta adyentro de tus puertas: ¹¹porke en sesh dias izo A’ los syelos, i la tyerra, la mar, i todo le ke ay en eyos, i olgo en el dia seteno; por tanto bendisho A’ al dia del shabat, i lo santifiko.

¹²Onra a tu padre i a tu madre, para ke se alargen tus dias sovre la tyerra ke A’ tu Dyo te da.

¹³No mates.

^14[]No fornikes.

^15[]No roves.

^16[]No atestigues kontra tu kompanyero testimonyo falso.

^17[14]No kovdisyes la kaza de tu kompanyero, no kovdisyes la mujer de tu kompanyero, ni su syervo, ni su syerva, ni su buey, ni su azno, ni ninguna koza de lo ke es de tu kompanyero.

^18[15]I todo el puevlo veian los truenos, i los relampagos, i el sonido de la trompeta, i el monte umiando; i vyendolo el puevlo, se esmovyeron, i se pararon de leshos. ^19[16]I disheron a Moshe: avla tu kon nozotros, i oiremos; ma no avle el Dyo kon nozotros, no sea ke muramos. ^20[17]I disho Moshe al puevlo: no temash; porke para prevarvos vino el Dyo, i para ke su temor este delante de vuestras fases, para ke no pekesh. ^21[18]I el puevlo se paro de leshos, i Moshe se ayego a la espesa eskuridad onde estava el Dyo.

^22[19]I disho A’ a Moshe: ansi diras a los ijos de Yisrael: vozotros vistesh ke de los syelos avli kon vozotros. ^23[20]No agash konmigo dyozes de plata, ni dyozes de oro vos agash. ^24[21]Ara de tyerra aras para mi, i sakrifikaras sovre eya tus alsasyones i tus sakrifisyos de pazes, tus ovejas, i tus bueyes. En todo lugar onde enmentare mi nombre, vendre a ti, i te bendizire. ^25[22]I si me izyeres ara de pyedras, no la fragues de pyedras lavradas; porke si alsares tu piko sovre eya, tu la esbivlaras. ^26[23]I no suvas por gradas a mi ara, para ke tu desnudez no sea deskuvyerta sovre eya.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.