eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
16 – BESHALAH
17I akontesyo ke kuando Paro solto al puevlo, el Dyo no los gio por el kamino de la tyerra de los Pelishtios, aunke era serka; porke disho el Dyo: no sea ke se arrepyenta el puevlo kuando vyeren gerra, i se tornen a Ayifto. 18Ma el Dyo izo rodear al puevlo por el kamino del dizyerto del mar ruvyo. I suvyeron los ijos de Yisrael de la tyerra de Ayifto en ordenansas. 19I tomo Moshe kon el los guesos de Yosef; porke kondjurar avia kondjurado a los ijos de Yisrael, dizyendo: vijitar vos vijitara el Dyo, i aresh suvir mis guesos de aki kon vozotros. 20I partyeron de Sukot, i pozaron en Etam en el kavo del dizyerto. 21I A’ andava delante de eyos, de dia en pilar de nuve para giarlos en el kamino, i de noche en un pilar de fuego para alumbrarles, para andar de dia i de noche. 22No se tiro el pilar de la nuve de dias, ni el pilar de fuego de noche, de delante del puevlo.
14
1I avlo A’ a Moshe, dizyendo: 2avla a los ijos de Yisrael, ke se buelvan i pozen de delante de Pi-‘Hahirot, entre Migdol i la mar, delante de Baal-Tsefon eskuentra de el pozaresh, serka de la mar. 3Porke Paro dira de los ijos de Yisrael: embruyados estan en la tyerra, los enserro el dizyerto. 4I enduresere el korason de Paro, i persegira detras de eyos; i sere onrado en Paro, i en todo su fonsado, i savran los Aisyanos ke yo soy A’. I izyeron ansi.
5I fue dado avizo al rey de Ayifto ke el puevlo se fuia; i el korason de Paro i de sus syervos se torno kontra el puevlo, i disheron: ¿ke es esto ke izimos, ke soltimos a Yisrael de servirnos? 6I ato su kuatrigua, i tomo su puevlo konsigo. 7I tomo seshsyentas kuatriguas eskojidas, i todas las kuatriguas de Ayifto, i kapitanes sovre todas eyas. 8I enduresyo A’ el korason de Paro, rey de Ayifto, i persigyo detras de los ijos de Yisrael; ma los ijos de Yisrael salian kon mano alta. 9I persigyeron los Aisyanos detras de eyos, todos los kavayos i kuatriguas de Paro, i sus kavayeros, i su fonsado, i los alkansaron pozantes serka de la mar, djunto a Pi-‘Hahirot delante de Baal-Tsefon.
10I komo Paro se ayego, los ijos de Yisrael alsaron sus ojos, i ek, los Aisyanos se movian detras de eyos; i temyeron mucho, i esklamaron los ijos de Yisrael a A’. 11I disheron a Moshe: ¿por no aver fuesas en Ayifto nos tomaste para murir en el dizyerto? ¿ke es esto ke nos iziste por sakarnos de Ayifto? 12No es esta la palavra ke te avlavamos en Ayifto, dizyendo: deshanos, para ke servamos a los Aisyanos? Porke mejor nos fuera servir a los Aisyanos, ke murir nozotros en el dizyerto. 13I disho Moshe al puevlo: no temash, estadvos firmes, i ved la salvasyon de A’, ke el ara oy kon vozotros; porke los Aisyanos ke vistesh oy, nunka mas para syempre los veresh. 14A’ peleara por vozotros, i vozotros kayaresh. 15I disho A’ a Moshe: ¿por ke esklamas a mi? avla a los ijos de Yisrael ke se adelanten. 16I tu alsa tu vara, i estyende tu mano sovre la mar, i partela; i entren los ijos de Yisrael en medyo de la mar por lo seko. 17I yo, ek, yo enduresere el korason de los Aisyanos, i entraran detras de eyos; i sere onrado en Paro, i en todo su fonsado, en sus kuatriguas, i en sus kavayeros. 18I savran los Aisyanos ke yo soy A’, kuando sere onrado en Paro, en sus kuatriguas, i en sus kavayeros.
19I el andjel del Dyo, ke iva delante del real de Yisrael, se movyo i anduvo detras de eyos; i se movyo el pilar de la nuve de delante de eyos, i se paro detras de eyos: 20i vino entre el real de los Aisyanos i el real de Yisrael; i era nuve i eskuridad para akeyos, i alumbrava a Yisrael de noche; i no se ayego el uno al otro toda la noche. 21I estendyo Moshe su mano sovre la mar, i izo A’ ke la mar se retirara por un fuerte vyento solano toda la noche, i torno la mar en seko, i las aguas fueron partidas. 22I los ijos de Yisrael entraron en medyo de la mar por lo seko; i las aguas les eran por muraya a su derecha i a su izkyerda.
23I persigyeron los Aisyanos, i entraron detras de eyos asta el medyo de la mar, todos los kavayos de Paro, sus kuatriguas, i sus kavayeros. 24I akontesyo en la guardya de la manyana, ke miro A’ al real de los Aisyanos por el pilar de fuego i nuve, i desbarato el real de los Aisyanos. 25I kito las ruedas de sus kuatriguas, i los gio kon pezgadumbre. I disheron los Aisyanos: fuygamos de delante de Yisrael; porke A’ pelea por eyos kontra los Aisyanos.
26I disho A’ a Moshe: estyende tu mano sovre la mar, i las aguas se tornaran sovre los Aisyanos, sovre sus kuatriguas, i sovre sus kavayeros. 27I estendyo Moshe su mano sovre la mar, i se torno la mar a su fortaleza al amaneser, i los Aisyanos fueron a su enkuentro; i sakudyo A’ a los Aisyanos en medyo de la mar. 28I tornaron las aguas, i kuvryeron las kuatriguas, i los kavayeros, i todo el fonsado de Paro ke entraron detras de eyos en la mar; no kedo de eyos ni uno. 29I los ijos de Yisrael anduvyeron por lo seko en medyo de la mar; i las aguas les eran por muraya a su derecha i a su izkyerda. 30I salvo A’ akel dia a Yisrael de mano de los Aisyanos; i Yisrael vido los Aisyanos muertos sovre la oriya de la mar. 31I vido Yisrael akel grande echo ke izo A’ en los Aisyanos; i el puevlo temyeron a A’, i kreyeron a A’, i a Moshe su syervo.
15
1Entonses kanto Moshe i los ijos de Yisrael esta kantiga a A’, i disheron ansi:
Kantare a A’, porke enalteser se enaltesyo;
Al kavayo i a su kavayador arrojo en la mar
2A’ es mi fortaleze i mi kantar, i a sido a mi por salvasyon:
Este es mi Dyo, i lo afermoziguare;
El Dyo de mi padre, i lo enshalshare.
3A’ varon de pelea: A’ es su nombre.
4I las kuatriguas de Paro, i su fonsado echo en la mar;
I sus kapitanes eskojidos fueron ondidos en el mar ruvyo.
5Los abismos los kuvryeron; desendyeron a los profundos komo una pyedra.
6Tu derecha, ¡o A’! es gloryoza en poder;
Tu derecha, ¡o A’! kevranta al enemigo;
7I kon la muchedumbre de tu losania trastornas a los ke se levantan kontra ti;
Enbias tu fulor, ke los konsume komo koskoja.
8I kon el suflo de tus narizes se amontonaron las aguas;
Se pararon las koryentes komo un monton;
Se akojaron los abismos en medyo de la mar.
9Disho el enemigo: persegire, alkansare,
Espartire espojo, se inchira de eyos mi alma;
Dezvaygare mi espada, los desterrara mi mano.
10Suflaste kon tu vyento, los kuvryo la mar;
Se ondyeron komo plumo en las aguas fuertes.
11¿Kyen komo tu, ¡o A’! entre los dyozes?
¿Kyen komo tu, gloryozo en santidad, temerozo en loores, azedor de maraviyas?
12Estendiste tu derecha, los englutyo la tyerra.
13Giaste kon tu mersed al puevlo ke regmiste;
Los giaste kon tu fortaleza a tu morada santa.
14Oeran los puevlos, i se estremeseran;
Dolor travara a los moradores de Pelashet.
15Entonses se atorvaran los kondes de Edom;
Los senyores de Moav, temblor los travara;
Se dezleiran todos los moradores de Kenaan.
16Kaera sovre eyos myedo i espanto;
Por la grandeza de tu braso se kayearan komo una pyedra;
Asta ke pase tu puevlo, ¡o A’!
Asta ke pase el puevlo ke tu kompraste.
17Tu los traeras, i los plantaras en el monte de tu eredad;
En el lugar ke iziste para tu morada, ¡o A’!
En el santuvaryo, ¡o Adonay! ke kompozyeron tus manos.
18A’ enreynara para syempre i syempre
19Porke entro el kavayo de Paro kon sus kuatriguas i kon sus kavayeros en la mar, i A’ izo tornar sovre eyos las aguas de la mar. Ma los ijos de Yisrael anduvyeron por lo seko en medyo de la mar.
20I Miryam la profetiza, ermana de A’haron, tomo el pandero en su mano; i todas las mujeres salyeron detras de eya kon panderos i kon bayles.21I Miryam les respondyo:
Kantar a A’, porke enalteser se enaltasyo;
Al kavayo i a su kavayador arrojo en la mar
22I Moshe izo partir a Yisrael del mar ruvyo, i salyeron al dizyerto de Shur; i anduvyeron tres dias en el dizyerto, i no toparon aguas. 23I vinyeron a Mara, i no pudyeron bever las aguas de Mara, porke eran amargas; por tanto se yamo su nombre Mara. 24I el puevlo murmuraron kontra Moshe, dizyendo: ¿ke beveremos? 25I el esklamo a A’; i A’ le mostro un arvol, i lo echo en las aguas, i las aguas se adulsaron. Ayi le ordeno fuero i djuisyo, i ayi lo prevo. 26I disho: si oir oyeres a la boz de A’ tu Dyo, i izyeres lo derecho en sus ojos, i eskuchares a sus enkomendansas, i guardares todos sus fueros, ninguna enfermedad de las ke puzi sovre los Aisyanos pondre sovre ti; porke yo soy A’ tu melezinador.
27I vinyeron a Elim, onde avia dodje fuentes de aguas, i setenta tamarales; i pozaron ayi djunto a las aguas.
16
1I partyeron de Elim, i toda la kompanya de los ijos de Yisrael vinyeron al dizyerto de Sin, ke esta entre Elim i Sinay, a los kinze dias del segundo mez despues de su salida de la tyerra de Ayifto. 2I toda la kompanya de los ijos de Yisrael murmuraron kontra Moshe i A’haron en el dizyerto. 3I les disheron los ijos de Yisrael: ¡kyen dyese ke uvyeramos muerto por mano de A’ en la tyerra de Ayifto, kuando nos asentavamos a las oyas de la karne, kuando komiamos pan a la artura! porke nos sakastesh a este dizyerto para matar de ambre a toda esta kompanya.
4I disho A’ a Moshe: ek, yo vos are yuvar pan de los syelos; i el puevlo saldra, i akojeran la porsyon de un dia en su dia, para ke yo lo preve si andara en mi ley, o no. 5I sera, ke en el dia sejeno, aparejaran lo ke traeran; i sera dos tantos de lo ke akojeran kada dia. 6I disho Moshe i A’haron a todos los ijos de Yisrael: a la tarde, entonses savresh ke A’ vos sako de la tyerra de Ayifto: 7i a la manyana, entonses veresh la onra de A’; porke el a oido vuestras murmurasyones kontra A’; i nozotros, ¿ke somos, ke murmurash kontra nozotros? 8I disho Moshe: esto sera, kuando A’ vos dara a la tarde karne para komer, i a la manyana pan para artar, en oyendo A’ vuestras murmurasyones ke murmurash kontra el; i nozotros, ¿ke somos? vuestras murmurasyones no son kontra nozotros, sino kontra A’. 9I disho Moshe a A’haron: di a toda la kompanya de los ijos de Yisrael: ayegadvos delante de A’; porke a oido vuestra murmurasyones. 10I fue, ke komo avlava A’haron a toda la kompanya de los ijos de Yisrael, miraron al dizyerto, i ek, la onra de A’ se aparesyo en la nuve.
11I avlo A’ a Moshe, dizyendo: 12oi las murmurasyones de los ijos de Yisrael. Avlales, dizyendo: entre las tardes komeresh karne, i a la manyana vos artaresh de pan; i savresh ke yo soy A’ vuestro Dyo. 13I akontesyo ke a la tarde suvyeron kodornizes, i kuvryeron el real; i a la manyana avia yazidura de rosio al derredor del real. 14I kuando suvyo la yazedura de rosio, ek, sovre las fases del dizyerto avia una koza minuda, redonda, minuda komo yelada sovre la tyerra. 15I kuando lo vyeron los ijos de Yisrael, disheron el uno al otro: ¿ke es esto? porke no savian ke era. I Moshe les disho: este es el pan ke A’ vos da para komer. 16Esta es la koza ke A’ enkomendo: akojed de el kada uno segun su komer, un omer por kavesa segun el numero de vuestras almas; tomaresh kada uno para los ke estan en su tyenda. 17I los ijos de Yisrael izyeron ansi, i akojyeron, unos mas, i otros menos. 18I lo mezuraron kon el omer, i no sovrava al ke akojyo mucho, ni faltava al ke akojyo poko; kada uno segun su komer akojyeron. 19I Moshe les disho: ninguno deshe de eyo asta la manyana. 20Ma no eskucharon a Moshe, i algunos desharon de eyo asta la manyana, i krio guzanos, i se fedyo; i se ensanyo kontra eyos Moshe. 21I lo akojean kada manyana, kada uno segun su komer; i kuando el sol eskayentava, se deritia.
22I fue, ke en el dia sesheno akojyeron dos tantos de pan, dos omeres para kada uno; i todos los mayorales de la kompanya vinyeron, i kontaron a Moshe. 23I el les disho: esto es lo ke avlo A’: manyana es la olgansa de shabat santo a A’: lo ke tenesh ke kozer, kozeldo oy, i lo ke tenesh ke kozinar, kozinaldo, i todo lo ke sovrare, deshaldo para vozotros en guardya asta la manyana. 24I lo desharon asta la manyana, komo Moshe enkomendo, i no se fedyo, ni uvo en eyo guzano. 25I disho Moshe: komeldo oy; porke oy es shabat a A’; oy no lo toparesh en el kampo. 26Sesh dias lo akojeresh, ma en el dia seteno, ke es shabat, en el no avra. 27I akontesyo, ke en el dia seteno salyeron algunos del puevlo para akojer, i no toparon. 28I disho A’ a Moshe: ¿asta kuandono no keresh guardar mis enkomendansas i mis leyes? 29Mirad ke A’ vos dyo el shabat; por tanto vos da en el dia sesheno el pan de dos dias; estese kada uno en su lugar, no salga ninguno de su lugar en el dia seteno. 30I el puevlo olgaron en el dia seteno. 31I la kaza de Yisrael yamo su nombre man.; i era komo simyente de kulantro, blanko, i su savor komo benmuelo kon myel.
32I disho Moshe: esta es la koza ke A’ enkomendo: inche un omer de eyos para ke sea guardado para vuestros djerenansyos, para ke vean el pan ke vos di a komer en el dizyerto, kuando vos saki de la tyerra de Ayifto. 33I disho Moshe a A’haron: toma una ridoma, i mete en eya un omer yeno de man, i ponlo delante de A’, para ke sea guardado para vuestros dedjerenansyos. 34Komo A’ enkomendo a Moshe, ansi A’haron lo puzo delante del Testimonyo para ser guardado. 35I los ijos de Yisrael komyeron el man kuarenta anyos, asta ke vinyeron a la tyerra povlada; el man komyeron asta ke vinyeron al borde de la tyerra de Kenaan. 36I el omer es el dyezmo del epa.
17
1I partyeron toda la kompanya de los ijos de Yisrael del dizyerto de Sin, segun sus viajes, por orden de A’, i pozaron en Refidim; i no avia agua para ke el puevlo bevyera. 2I barajo el puevlo kon Moshe, i disheron: dadnos agua para ke bevamos. I Moshe les disho: ¿por ke barajash konmigo? ¿por ke prevash a A’? 3I el puevlo tuvo ayi sed de agua; i murmuro el puevlo kontra Moshe, i disho: ¿por ke nos iziste suvir de Ayifto, para matarnos de sed a nozotros, i a nuestros ijos, i a nuestros ganados? 4I esklamo Moshe a A’, dizyendo: ¿ke are kon este puevlo? de aki a un poko i me apedrearan. 5I disho A’ a Moshe: pasa delante del puevlo, i toma kontigo de los vyejos de Yisrael; i tu vara, kon la kual eriste el rio, toma en tu mano, i anda. 6Ek, yo estare delante de ti ayi sovre la penya en Horev; i eriras la penya, i saldran de eya aguas, para ke beva el puevlo. I Moshe izo ansi a vista de los viejos de Yisrael. 7I yamo el nombre del lugar Masa, i Meriva, por la baraja de los ijos de Yisrael, i por ke prevaron a A’, dizyendo: ¿esta A’ entre nozotros, o no?
8I vino Amalek, i peleo kon Yisrael en Refidim. 9I disho Moshe a Ye’hoshua: eskojenos varones, i sal, pelea kon Amalek. Manyana yo estare sovre la kavesera de la kuesta, i la vara del Dyo en mi mano. 10I izo Ye’hoshua komo le disho Moshe, peleando kon Amalek; i Moshe, A’haron, i Hur suvyeron a la kavesera de la kuesta. 11I era ke kuando alsava Moshe su mano, se mayorgava Yisrael; ma kuando abashava su mano, se mayorgava Amalek. 12I las manos de Moshe eran pezgadas, i tomaron una pyedra, i la puzyeron debasho de el, i se asento sovre eya. I A’haron i Hur asofrian sus manos, el uno de una parte, i el otro de otra parte; i uvo en sus manos firmeza asta ke se puzo el sol. 13I enflakesyo Ye’hoshua a Amalek i a su puevlo a tajo de espada.
14I disho A’ a Moshe: eskrive esto por membrasyon en el livro, i ponlo en las orejas de Ye’hoshua; porke arrematar arrematare la membrasyon de Amalek de debasho de los syelos. 15I Moshe fraguo ara, i yamo su nombre A’-Nisi. 16I disho: porke [1]djuro A’ ke A’ tendra gerra kon Amalek de djerenansyo a djerenansyo.
[1] Ebreo: la mano sovre la siya de A’
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
