Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 14 VAERA (7 a 9)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

14 – VAERA

²I avlo el Dyo a Moshe, i le disho: yo soy A’. ³I me aparesi a Avra’ham, a Yitshak, i a Yaakov, por el nombre de El-Shaday ma por mi nombre A’ no me di a konoser a eyos. ⁴I tambyen afirmi mi firmamyento kon eyos, para darles la tyerra de Kenaan, la tyerra de sus pelegrinasyones, en la kual pelegrinaron. ⁵I tambyen yo oi el chemido de los ijos de Yisrael, a los kuales los Aisyanos azen servir, i membri mi firmamyento. ⁶I por tanto di a los ijos de Yisrael: yo soy A’, i vos sakare de debasho de las lazeryas de los Aisyanos, i vos eskapare du su servidumbre, i vos regmire kon braso estendido, i kon djuisyos grandes. ⁷I vos tomare a mi por puevlo, i sere a vozotros por Dyo; i savresh ke yo soy A’ vuestro Dyo, ke vos sako de debasho de las lazeryas de los Aisyanos. ⁸I vos traere a la tyerra por la kual alsi mi mano ke la daria a Avra’ham, a Yitshak, i a Yaakov; i yo vo la dare por eredad. Yo A’. ⁹I Moshe avlo ansi a los ijos de Yisrael; ma no eskucharon a Moshe por kavza de la angustya de espirito, i de la dura servidumbre.

¹⁰I avlo A’ a Moshe , dizyendo: ¹¹entra, avla a Paro, rey de Ayifto, ke solte a los ijos de Yisrael de su tyerra. ¹²I avlo Moshe delante de A’, dizyendo: ek, los ijos de Yisrael no me eskucharon, ¿i komo me eskuchara Paro, syendo yo serrado de lavyos? ¹³I avlo A’ a Moshe i a A’haron, i les dyo mandamyento para los ijos de Yisrael, i para Paro, rey de Ayifto, para sakar a los ijos de Yisrael de la tyerra de Ayifto.

¹⁴Estas son las kaveseras de las kazas de sus padres: los ijos de Reuven el primodjenito de Yisrael; Hanoh i Palu, Hetsron i Karmi: estos son los linajes de Reuven. ¹⁵I los ijos de Shimon; Yemuel, i Yamin, i O’had, i Yahin, i Tsohar, i Shaul ijo de la Kenaanita: estos son los linajes de Shimon. ¹⁶I estos son los nombres de los ijos de Levi por sus djerenansyos: Gershon, i Ke’hat, i Merari. I los anyos de la vida de Levi fueron syento i trenta i syete anyos. ¹⁷Los ijos de Gershon; Livni, i Shimi, por sus linajes. ¹⁸I los ijos de Ke’hat; Amram, i Yits’har, i Hevron, i Uziel. I los anyos de la vida de Ke’hat fueron syento i trenta i tres anyos. ¹⁹I los ijos de Merari; Mahli, i Mushi. Estos son los linajes de Levi por sus djerenansyos. ²⁰I Amram tomo para si a Yoheved su tia por mujer; i le paryo a A’haron i Moshe. I los anyos de la vida de Amram fueron syento i trenta i syete anyos. ²¹I los ijos de Yits’har; Korah, i Nefeg, i Zihri. ²²I los ijos de Uziel; Mishael, i Eltsafon, i Sitri. ²³I A’haron tomo para si por mujer a Elisheva, ija de Aminadav, ermana de Nahshon; i le paryo a Nadav, i a Avi’hu, i Elazar, i a Itamar. ²⁴I los ijos de Korah; Asir, i Elkana, i Aviasaf: estos son los linajes de los Korahitas, ²⁵I Elazar, ijo de A’haron, tomo para si por mujer una de las ijas de Putiel; i le paryo a Pinhas. Estos son las kaveseras de los padres de los Levitas por sus linajes. ²⁶Este es A’haron i Moshe, a los kuales A’ disho: sakad a los ijos de Yisrael de la tyerra de Ayifto por sus fonsados. ²⁷Estos son los ke avlaron a Paro, rey de Ayifto, para sakar a los ijos de Yisrael de Ayifto: este es Moshe i A’haron.

²⁸I fue en el dia ke avlo A’ a Moshe en la tyerra de Ayifto, avlo A’ a Moshe dizyendo: yo soy A’. ²⁹Avla a Paro , rey de Ayifto, todo lo ke yo te avlo. ³⁰I disho Moshe delante de A’: ek, yo soy serrado de lavyos, ¿i komo me eskuchara Paro?

7

¹I disho A’ a Moshe: mira yo te puzi por Dyo a Paro, i A’haron tu ermano sera tu profeta. ²Tu avlaras todo lo ke te enkomendare, i A’haron tu ermano avlara a Paro, ke solte a los ijos de Yisrael de su tyerra. ³I yo enduresere el korason de Paro, i muchiguare mis senyales i mis maraviyas en la tyerra de Ayifto. ⁴I Paro no vos eskuchara, i pondre mi mano sovre Ayifto, i sakare mis fonsados, mi puevlo, los ijos de Yisrael de la tyerra de Ayifto, kon djuisyos grandes. ⁵I savran los Aisyanos ke yo soy A’, kuando estendyere mi mano sovre Ayifto, i sakare a los ijos de Yisrael de entre eyos. ⁶I izo Moshe i A’haron komo A’ les enkomendo; ansi izyeron. ⁷I Moshe era de edad de ochenta anyos, i A’haron de edad de ochenta i tres anyos, kuando avlaron a Paro.

⁸I avlo A’ a Moshe i a A’haron, dizyendo: ⁹kuando Paro vos avlare, dizyendo: mostrad por vozotros un milagro, entonses diras a A’haron: toma tu vara, i echala delante de Paro, i se ara kulevro.

¹⁰I vino Moshe i A’haron a Paro i azyeron komo A’ avia enkomendado. I echo A’haron su vara delante de Paro, i delante de sus syervos, i se izo kulevro. ¹¹I yamo tambyen Paro a los savyos i a los echizeros; i izyeron ansi tambyen eyos, los magos de Ayifto, kon sus enkantamyentos. ¹²I echaron kada uno su vara, i se izyeron kulevros; ma la vara de A’haron englutyo sus varas, ¹³i se enduresyo el korason de Paro, i no los eskucho, komo A’ avia avlado.

¹⁴I disho A’ a Moshe: el korason de Paro esta apezgado, no kyere soltar al puevlo. ¹⁵Anda a Paro por la manyana; ek, el sale a las aguas; i te pararas a su enkuentro sovre la oriya del rio; i la vara ke se torno en kulevro tomaras en tu mano. ¹⁶I le diras: A’, el Dyo de los Ebreos me enbio a ti, dizyendo: solta a mi puevlo, para ke me servan en el dizyerto; i ek, asta agora no eskuchaste. ¹⁷Ansi dize A’: en esto savras ke yo soy A’: ek, yo erire kon la vara ke esta en mi mano sovre las aguas ke estan en el rio, i seran tornadas en sangre. ¹⁸I el peshe ke ay en el rio murira, i el rio se federa, i los Aisyanos tendran asko de bever el agua del rio.

¹⁹I disho A’ a Moshe: di a A’haron, toma tu vara, i estyende tu mano sovre las aguas de Ayifto, sovre sus rios, sovre sus arroyos, i sovre sus pilagos, i sovre todos sus apanyamyentos de aguas, i se aran sangre, i avra sangre en toda la tyerra de Ayifto, tanto en los atuendos de madero komo en los de pyedra. ²⁰I Moshe i A’haron izyeron ansi, komo A’ enkomendo; i also la vara, i eryo las aguas ke avia en el rio, a vista de Paro, i a vista de sus syervos; i todas las aguas ke avia en el rio fueron tornadas en sangre. ²¹I el peshe ke avia en el rio muryo, i el rio se fedyo, i los Aisyanos no podian bever el agua del rio; i uvo sangre en toda la tyerra de Ayifto. ²²I los magos de Ayifto izyeron ansi kon sus enkantamyentos. I se enduresyo el korason de Paro, i no los eskucho, komo A’ avia avlado. ²³I se bolvyo Paro, i entro en su kaza, i no puzo su korason tambyen a esto. ²⁴I todos los Aisyanos kavaron al derredor del rio por agua para bever; porke no podian bever el agua del rio. ²⁵I se kumplyeron syete dias, despues ke A’ eryo el rio. ²⁶I disho A’ a Moshe: entra a Paro, i dile: ansi dize A’: solta a mi puevlo para ke me servan. ²⁷I si no lo kijyeres soltar, ek, yo erire todo tu termino kon ranas. ²⁸I el rio kriara ranas, i suviran, i entraran en tu kaza, i en la kamara de tu kama, i sovre tu kama, i en la kaza de tus syervos, i en tu puevlo, i en tus ornos, i en tus amasaderas. ²⁹I sovre ti, i sovre tu puevlo, i sovre todos tus syervos, suviran las ranas.

8

¹I disho A’ a Moshe: di a A’haron: estyende tu mano kon tu vara sovre los rios, sovre los arroyos, i sovre los pilagos, i aga suvir las ranas sovre la tyerra de Ayifto. ²I A’haron estendyo su mano sovre las aguas de Ayifto; i suvyeron las ranas, i kuvryeron la tyerra de Ayifto. ³I los magos izyeron ansi kon sus enkantamyentos, i izyeron suvir ranas sovre la tyerra de Ayifto.

⁴I yamo Paro a Moshe i a A’haron, i disho: azed orasyon a A’, ke kite las ranas de mi, i de mi puevlo; i soltare al puevlo para ke sakrifiken a A’. ⁵I disho Moshe a Paro: senyalame kuando are orasyon por ti , i por tus syervos, i por tu puevlo, para tajar las ranas de ti i de tus kazas, ke solamente en el rio se keden. ⁶I el disho: manyana. I Moshe disho: sea segun tu palavra, para ke sepas ke no ay komo A’ nuestro Dyo. ⁷I se kitaran las ranas de ti, i de tus kazas, i de tus syervos, i de tu puevlo; solamente en el rio se kedaran. ⁸I salyo Moshe i A’haron de kon Paro. I esklamo Moshe a A’, por kavza de las ranas ke avia puesto a Paro. ⁹I izo A’ segun la palavra de Moshe, i las ranas muryeron de las kazas, de los kortijos, i de los kampos. ¹⁰I las akojyeron a montones, i se fedyo la tyerra. ¹¹I vyendo Paro ke avia espasyo, apezgo su korason, i no los eskucho, komo A’ avia avlado.

¹²I disho A’ a Moshe: di a A’haron: estyende tu vara, i ere el polvo de la tyerra, i se ara [1]piojos en toda la tyerra de Ayifto. ¹³I izyeron ansi; i A’haron estendyo su mano kon su vara, i eryo el polvo de la tyerra, i uvo piojambre en el ombre i en la kuatrapea; todo el polvo de la tyerra se izo piojos en toda la tyerra de Ayifto, ¹⁴i los magos izyeron ansi kon sus enkantamyentos para sakar piojos, ma no pudyeron. I avia piojambre en el ombre, i en la kuatropea. ¹⁵Entonses disheron los magos a Paro: dedo del Dyo es este. I se enduresyo el korason de Paro, i no los eskucho, komo A’ avia avlado.

¹⁶I disho A’ a Moshe: madruga por la manyana, i parate delante de Paro; ek, el sale a las aguas; i dile: ansi dize A’: solta a mi puevlo para ke me servan. ¹⁷Porke si no soltares a mi puevlo, ek, yo enbiare sovre ti, i sovre tus syervos, i sovre tu puevlo, i en tus kazas, [2]una meskla de moshkas; i las kazas de los Aisyanos se inchiran de la meskla de moshkas, i tambyen la tyerra onde eyos estuvyeren. ¹⁸I apartare en akel dia la tyerra de Goshen, en la kual mi puevlo mora, para ke no ayga ayi meskla de moshkas, a fin ke sepas ke yo soy A’ en medyo de la tyerra. ¹⁹I pondre regmisyon entre mi puevlo i tu puevlo. Manyana sera esta senyal. ²⁰I A’ izo ansi: i vino una meskla pezgada de moshkas en kaza de Paro, i en kaza de sus syervos, i en toda la tyerra de Ayifto: la tyerra fue danyada por kavza de la meskla de moshkas.

²¹I yamo Paro a Moshe i a A’haron, i disho: andad, sakrifikad a vuestro Dyo en la tyerra. ²²I disho Moshe: no konvyene azer ansi: porke sakrifikaremos la abominasyon de los Aisyanos a A’ nuestro Dyo. Ek, si sakrifikaremos la abominasyon de los Aisyanos delante de sus ojos, ¿no nos apedrearan? ²³Kamino de tres dias andaremos en el dizyerto, i sakrifikaremos a A’ nuestro Dyo, komo el nos dira. ²⁴I disho Paro: yo vos soltare para ke sakrifikesh a A’ vuestro Dyo en el dizyerto; solamente aleshar no vos aleshesh en andar; azed orasyon por mi. ²⁵I disho Moshe: ek, yo salgo de kontigo, i are orasyon a A’ ke la meskla de moshkas se kite de Paro, de sus syervos, i de su puevlo manyana; empero no kontinue Paro a enganyarnos en no soltando al puevlo para sakrifikar a A’. ²⁶I salyo Moshe de kon Paro, i izo orasyon a A’. ²⁷I A’ izo segun la palavra de Moshe, i kito la meskla de moshkas de Paro, de sus syervos, i de su puevlo; no kedo ni una. ²⁸I Paro apezgo su korason tambyen esta vez, i no solto al puevlo.

[1] o moshkitos

[2] o moshkas de kavayo

9

¹I disho A’ a Moshe: entra a Paro, i dile: ansi dize A’, el Dyo de los Ebreos: solta a mi puevlo para ke me servan. ²Porke si no los kyeres soltar, i dainda los detuvyeres, ³ek, la mano de A’ sera sovre tu ganado ke esta en el kampo, sovre los kavayos, sovre los aznos, sovre los kameyos, sovre las vakas, i sovre las ovejas kon mortaldad muy pezgada. ⁴I apartara A’ entre el ganado de Yisrael i el ganado de Ayifto, i nada murira de todo lo ke es de los ijos de Yisrael. ⁵I apunto A’ plazo, dizyendo: manyana ara A’ esta koza en la tyerra. ⁶I A’ izo esta koza al otro dia, i muryo todo el ganado de los Aisyanos; ma del ganado de los ijos de Yisrael no muryo ni uno. ⁷I enbio Paro para ver, i ek, del ganado de los ijos de Yisrael no avia muerto ni uno. I se apezgo el korason de Paro, i no solto al puevlo.

⁸I disho A’ a Moshe i a A’haron: tomadvos vuestros punyos yenos de seniza de la ornaya, i la esparza Moshe a los syelos a vista de Paro. ⁹I se ara polvo sovre toda la tyerra de Ayifto; i sovre el ombre i sovre la kuatropea, se ara sarna ke ara kreser veshigas, en toda la tyerra de Ayifto. ¹⁰I tomaron seniza de la ornaya, i se pararon delante de Paro, i la esparzyo Moshe a los syelos; i uvo sarna ke azia kreser veshigas en el ombre i en la kuatropea. ¹¹I los magos no podian estar delante de Moshe por kavza de la sarna; porke avia sarna en los magos, i en todos los Aisyanos. ¹²I A’ enduresyo el korason de Paro, i no los eskucho, komo A’ avia avlado a Moshe.

¹³I disho A’ a Moshe: madruga por la manyana, i parate delante de Paro, i dile: ansi dize A’, el Dyo de los Ebreos: solta a mi puevlo para ke me servan. ¹⁴Porke en esta vez enbiare todas mis yagas a tu korason, i en tus syervos, i en tu puevlo, para ke sepas ke no ay komo yo en toda la tyerra. ¹⁵Porke agora estendere mi mano, i erire a ti i a tu puevlo kon mortaldad, i seras tajado de la tyerra. ¹⁶I a la verdad por esto te ize estar, para mostrar en ti mi poder, i para ke mi nombre sea rekontado en toda la tyerra. ¹⁷¿Dainda te enshalshas kontra mi puevlo para no soltarlos? ¹⁸Ek, a esta ora manyana, yo are yover pedrisko muy pezgado, ke nunka uvo tal komo el en Ayifto del dia ke se asemento asta agora. ¹⁹I agora enbia, rekoje tu ganado, i todo lo ke tyenes en el kampo; porke todo ombre i kuatropea ke se topare en el kampo i no fuere rekojido en kaza, el pedrisko desendera sovre eyos, i muriran. ²⁰El de los syervos de Paro ke temyo la palavra de A’, izo fuir sus syervos i su ganado en las kazas: ²¹i el ke no puzo su korason a la palavra de A’, desho sus syervos i su ganado en el kampo.

²²I disho A’ a Moshe: estyende tu mano a los syelos, i avra pedrisko en toda la tyerra de Ayifto, sovre el ombre, i sovre la kuatropea, i sovre toda yerva del kampo en la tyerra de Ayifto. ²³I estendyo Moshe su vara a los syelos, i A’ izo truenos i pedrisko, i fuego deskorria por la tyerra; i A’ izo yover pedrisko sovre la tyerra de Ayifto. ²⁴I uvo pedrisko i fuego mezklado entre el pedrisko, muy pezgado, ke nunka uvo tal komo el en toda la tyerra de Ayifto dezde ke se izo nasyon. ²⁵I el pedrisko eryo en toda la tyerra de Ayifto todo lo ke estava en el kampo, dezde el ombre asta la kuatropea; i eryo el pedrisko toda yerva del kampo, i kevro toda arvol del kampo. ²⁶Solamente en la tyerra de Goshen, onde los ijos de Yisrael estavan, no uvo pedrisko.

²⁷I enbio Paro, i yamo a Moshe i a A’haron, i les disho: peki esta vez. A’ es el djusto, i yo i mi puevlo los malos. ²⁸Azed orasyon a A’, i baste de ser truenos del Dyo i pedrisko; i vos soltare, i no estaresh mas aki. ²⁹I le disho Moshe: en salyendo yo de la sivdad, espandire mis palmas a A’; i los truenos se vedaran , i no avra mas pedrisko, para ke sepas ke de A’ es la tyerra. ³⁰I tu i tus syervos, yo se ke dainda no temeresh delante de A’ Dyo. ³¹I el lino i la sevada fueron eridos; porke la sevada estava en espiga, i el lino en kanya. ³²Ma el trigo i la espelta no fueron eridos, porke eran tadrios. ³³I salyo Moshe de kon Paro de la sivdad, i espandyo sus palmas a A’, i se vedaron los truenos i el pedrisko, i la luvya no fue vazyada sovre la tyerra. ³⁴I vyendo Paro ke se vedo la luvya, i el pedrisko, i los truenos, kontinuo a pekar, i apezgo su korason, el i sus syervos. ³⁵I se enduresyo el korason de Paro, i no solto a los ijos de Yisrael, komo A’ avia avlado por mano de Moshe.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.