Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 9 VAYESHEV (37 a 40)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

9 – VAYESHEV

37

¹I moro Yaakov en la tyerra de la pelegrinasyon de su padre, en la tyerra de Kenaan. ²Estos son los djerenansyos de Yaakov, Yosef syendo de edad de dyez i syete anyos, apasentava las ovejas kon sus ermanos; i el muchacho estava kon los ijos de Bil’ha, i kon los ijos de Zilpa, mujeres de su padre; i traia Yosef la mala fama de eyos a su padre. ³I Yisrael amava a Yosef mas ke a todos sus ijos, porke le era el ijo de su vejez, i le izo una tonga de listas. ⁴I vyendo sus ermanos ke su padre lo amava mas ke a todos sus ermanos, lo aborresian, i no lo podian avlar en paz.

⁵I sonyo Yosef un suenyo, i lo konto a sus ermanos; i anyadyeron a aborreserlo mas. ⁶I les disho: oid agora este suenyo ke sonyi. ⁷I ek, atavamos gaviyas en medyo del kampo, i ek, se levantava mi gaviya, i tambyen se parava, i ek, vuestras gaviyas se rodeavan i se enkorvavan a mi gaviya. ⁸I sus ermanos le disheron: ¿enreynar enreynaras sovre nozotros? ¿i podestar podestaras sovre nozotros? i anyadyeron a aborreserlo por kavza de sus suenyos i de sus palavras.

⁹I sonyo mas otro suenyo, i lo konto a sus ermanos, i disho: ek, sonyi otro suenyo, i ek, el sol, i la luna, i onze estreyas se enkorvavan a mi. ¹⁰I le konto a su padre, i a sus ermanos; i su padre lo kastigo, i le disho: ¿ke es este suenyo ke sonyaste? ¿tenemos ke bivir yo i tu madre, i tus ermanos, i enkorvarnos a ti a tyerra? ¹¹I sus ermanos lo enbidyaron, ma su padre parava myentes a la koza.

¹²I anduvyeron sus ermanos a apasentar las ovejas de su padre en Shehem. ¹³I disho Yisrael a Yosef: ¿no apasyentan tus ermanos en Shehem? ven, i te enbiare a eyos. I el le disho: ekme. ¹⁴I le disho: va agora, mira komo estan tus ermanos, i komo estan las ovejas, i traeme respuesta. I lo enbio del vaye de Hevron, i vino a Shehem. ¹⁵I lo topo un varon, i ek, el estava ereado en el kampo; i le demando el varon, dizyendo: ¿ke bushkas? ¹⁶I el disho: bushko a mis ermanos: te rogo ke me mostres onde apasyentan. ¹⁷I disho el varon: partyeron de aki; porke los oi dizir: vamos a Dotan. I Yosef fue detras de sus ermanos, i los topo en Dotan. ¹⁸I komo lo vyeron de leshos, antes ke se aserkara a eyos, se enkonsejaron kontra el para matarlo. ¹⁹I disheron el uno al otro: ek, vyene este sonyador. ²⁰I agora, venid, i lo matemos, i lo echemos en uno de los pozos, i diremos: alguna animalya mala lo komyo; i veremos ke seran sus suenyos. ²¹I lo oyo Reuven, i lo eskapo de sus manos, i disho: no lo matemos. ²²I les disho Reuven: no vertash sangre; echaldo en este pozo ke esta en el dizyerto, i no pongash mano en el; por eskaparlo de sus manos, para azerlo tornar a su padre.

²³I fue, ke komo Yosef vino a sus ermanos, desnudaron a Yosef de su tonga, la tonga de listas ke tenia sovre si; ²⁴i tomaron, i lo echaron en el pozo; ma el pozo estava vazio, no avia en el agua. ²⁵I se asentaron a komer pan; i alsaron sus ojos i miraron, i ek, una karavana de Yishmaelitas venia de Gilad, i sus kameyos kargados de espesyas i triaka, i almasiga, i ivan a yevarlo a Ayifto. ²⁶I disho Ye’huda a sus ermanos; ¿ke provecho ke matemos a nuestro ermano, i kuvramos su sangre? ²⁷venid, i lo vendamos a los Yishmaelitas, i no sea nuestra mano sovre el; porke nuestro ermano i nuestra karne es. I se kontentaron sus ermanos. ²⁸I pasaron varones Midyanitas, merkadores; i sontrusheron i alsaron a Yosef del pozo, i vendyeron a Yosef a los Yishamelitas por vente pezos de plata; i trusheron a Yosef a Ayifto.

²⁹I torno Reuven al pozo, i ek, Yosef no estava en el pozo; i razgo sus vestidos. ³⁰I torno a sus ermanos, i disho: el ninyo no se topa; i yo, ¿onde ire yo? ³¹i tomaron la tonga de Yosef, i degoyaron un kavrito de las kavras, i entenyeron la tonga en la sangre. ³²I enbiaron la tonga de listas, i la trusheron a su padre, i disheron: esta topimos; konose agora si es la tonga de tu ijo, o no. ³³I la konosyo, i disho: la tonga de mi ijo es; una animalya mala se lo komyo; por syerto Yosef esta arrevatado. ³⁴I Yaakov razgo sus vestidos, i puzo sako sovre sus lumbos, i se alimunyo por su ijo muchos dias. ³⁵I se levantaron todos sus ijos i todas sus ijas para konortarlo; ma no kijo ser konortado, i disho: porke desendere limunyozo por mi ijo a la fuesa. I lo yoro su padre. ³⁶I los Midyanitas lo vendyeron en Ayifto a Potifar, eunuko de Paro, [1]mayoral de los degoyadores.

[1] kapitan de los de la guardya

38

¹I akontesyo en akel tyempo, ke Ye’huda desendyo de kon sus ermanos, i akosto a un varon Adulamita, i su nombre Hira. ²I vido ayi la ija de un varon Kenaanio, i su nombre Shua; i la tomo i vino a eya. ³I se ensinto, i paryo un ijo, i yamo su nombre Er. ⁴I se ensinto otra vez, i paryo un ijo, i yamo su nombre Onan. ⁵I otra vez mas se ensinto i paryo un ijo, i yamo su nombre Shela: i el estava en Keziv kuando lo paryo. ⁶I Ye’huda tomo mujer para Er su primodjenito, i su nombre Tamar. ⁷I Er, primodjenito de Ye’huda fue malo en los ojos de A’; i lo mato A’. ⁸I Ye’huda disho a Onan: ven a la mujer de tu ermano, akunyadeala i levanta semen a tu ermano. ⁹I Onan supo ke el semen no seria suyo; i era ke kuando venia a la mujer de su ermano, vertia en tyerra, por no dar semen a su ermano. ¹⁰I pezo en ojos de A’ lo ke izia, i lo mato tambyen a el. ¹¹I disho Ye’huda a Tamar su nuera: estate bivda en kaza de tu padre, asta ke se engrandeska Shela mi ijo; porke disho: no sea ke muera tambyen el komo sus ermanos. I se fue Tamar i estuvo en kaza de su padre.

¹²I pasaron muchos dias i muryo la ija de Shua, mujer de Ye’huda; i Ye’huda se konorto, i suvyo a los traskiladores de sus ovejas a Timnat, el i Hira su amigo el Adulamita. ¹³I fue dado avizo a Tamar, dizyendo: ek, tu suegro suve a Timnat para traskilar sus ovejas. ¹⁴I eya kito los vestidos de su bivdez de sovre si, i se kuvryo kon un velo, i se enbolvyo i se asento en la puerta de Eynayim, ke esta djunto al kamino de Timnat; porke vido ke se engrandesyo Shela, i eya no fue dada a el por mujer. ¹⁵I la vido Ye’huda, i la tuvo por eskarada; porke avia kuvryerto sus fases. ¹⁶I akosto a eya por el kamino, i disho: ven agora yo vendre a ti; porke no savia ke era su nuera. I eya disho: ¿ke me daras para ke vengas a mi? ¹⁷i el disho: te enbiare un kavrito de las kavras del revanyo. I eya disho: ¿me daras prenda asta ke los enbies? ¹⁸i el disho ¿ke prenda te dare? i eya disho: tu seyo, i tu kordon, i tu vara ke esta en tu mano. I el se lo dyo, i vino a eya, i se ensinto de el. ¹⁹I se levanto, i se fue, i kito su velo de sovre si, i se vistyo los vestidos de su bivdez. ²⁰I Ye’huda enbio el kavrito de las kavras por mano de su amigo el Adulamita, para tomar la prenda de mano de la mujer; ma no la topo. ²¹I pregunto a los varones de su lugar, dizyendo: ¿onde esta la eskarada, ke estava en Eynayim djunto al kamino? i disheron: no uvo aki eskarada. ²²I se torno a Ye’huda i disho: no la topi; i tambyen los varones del lugar disheron: no uvo aki eskarada. ²³I disho Ye’huda: tomeselo para eya, porke no seamos menospresyados; ek enbii este kavrito, i tu no la topaste.

²⁴I fue ke despues de unos tres mezes, fue dado avizo a Ye’huda, Tamar tu nuera a eskarado, i tambyen, ek esta prenyada de eskaramyentos. ²⁵I disho Ye’huda: sakalda, i sea kemada. Eya, kuando fue sakada, enbio a su suegro, dizyendo: del varon de kyen son estos, yo estoy prenyada. I disho mas: konose agora de kyen son estos, el seyo, i el kordon, i la vara. ²⁶I Ye’huda los konosyo, i disho: mas djusta es ke yo, por kuanto yo no la di a Shela mi ijo. I nunka mas la konosyo.

²⁷I fue, ke al tyempo de su parir, ek, avia melisyos en su vyentre. ²⁸I fue, ke kuando paria, dyo la mano el uno, i la komadre tomo i ato sovre su mano en ilo de grana, dizyendo: este salyo primero. ²⁹I fue, ke komo retiro su mano, ek, salyo su ermano; i eya disho: ¿ke aportiyaste sovre ti portiyo? i se yamo su nombre Perets. ³⁰I despues salyo su ermano ke tenia sovre su mano el ilo de grana; i se yamo su nombre Zerah.

39

¹I Yosef fue yevado a Ayifto, i lo kompro Potifar, eunuko de Paro, mayoral de los degoyadres, varon Aisyano, de mano de los Yishmaelitas, ke lo avian yevado aya. ²I A’ fue kon Yosef, i fue varon prosperado; i estavan en la kaza de su amo el Aisyano. ³I vido su amo ke A’ era kon el, i ke todo lo ke azia, A’ lo prosperava en su mano. ⁴I ayo Yosef grasya en sus ojos, i le servia, i el lo izo rejidor sovre su kaza, i todo lo ke tenia entrego en su mano. ⁵I akontesyo, ke dezde el tyempo le le dyo el kargo de su kaza, i de todo lo ke tenia, A’ bendisho la kaza del Aisyano por kavza de Yosef; i la bendisyon de A’ fue sovre todo lo ke tenia en la kaza i en el kampo. ⁶I desho todo lo ke tenia en mano de Yosef, i no savia kon el ninguna koza sino el pan ke komia. I Yosef era ermozo de forma, i ermozo de vista.

⁷I akontesyo despues de estas kozas, ke la mujer de su amo also sus ojos en Yosef, i disho: yaz konmigo. ⁸Ma el no kijo, i disho a la mujer de su amo: ek, mi amo no save konmigo lo ke ay en la kaza, i todo lo ke tyene entrego en mi mano. ⁹No ay mas grande ke yo en esta kaza; i no me defendyo ninguna koza sino a ti, por lo ke tu eres su mujer. ¿komo pues are yo este grande mal, i pekare kontra el Dyo? ¹⁰I fue, ke avlando eya a Yosef kada dia, no la eskucho el para yazer serka de eya, para estar kon eya. ¹¹I akontesyo serka de este tyempo, ke el entro en la kaza para azer su ovra, i no avia ninguno de los varones de la kaza ayi adyentro. ¹²I eya lo travo por su ropa, dizyendo: yaz konmigo. I el desho su ropa en su mano, i fuyo, i se salyo afuera. ¹³I fue, ke komo eya vido ke desho su ropa en su mano, i fuyo afuera. ¹⁴Yamo a los varones de su kaza, i les avlo, dizyendo: mirad, nos trusho un varon Ebreo para burlarse de nozotros; vino a mi para yazer konmigo, i yo griti kon boz grande. ¹⁵I fue, ke komo oyo ke yo alsava mi boz i gritava, desho su ropa djunto a mi, i fuyo, i se salyo afuera. ¹⁶I eya puzo su ropa djunto a si, asta ke vino su amo a su kaza. ¹⁷I eya le avlo palavras komo estas, dizyendo: vino a mi el syervo Ebreo, ke nos trushiste, para burlarse de mi. ¹⁸I fue, ke komo alsi mi boz i griti, desho su ropa djunto a mi, i fuyo afuera. ¹⁹I fue, ke komo su amo oyo las palavras de su mujer ke le avlo, dizyendo: tales kozas me izo tu syervo, se ensendyo su fulor. ²⁰I al amo de Yosef lo tomo, i lo metyo en la kaza de la karsel, el lugar onde estavan los aprezados del rey enkarselados; i estuvo ayi en la kaza de la karsel. ²¹Ma A’ fue kon Yosef, i estendyo a el mersed, i dyo su grasya en ojos del mayoral de la kaza de la karsel. ²²I el mayoral de la kaza de la karsel entrego en mano de Yosef todos los aprezados ke estavan en la kaza de la karsel; i todo lo ke azian ayi, el lo azia. ²³No veia el mayoral de la kaza de la karsel ninguna koza ke estava en su mano; porke A’ era kon el, i lo ke azia, A’ lo prosperava.

40

¹I akontesyo despues de estas kozas, ke el eskansyano del rey de Ayifto, i el panadero pekaron kontra su senyor, el rey de Ayifto. ²I Paro se ensanyo kontra sus dos eunukos, kontra el mayoral de los eskansyanos, i kontra el mayoral de los panaderos. ³I los metyo en guardya en la kaza del mayoral de los degoyadores, en la kaza de la karsel, el lugar onde Yosef estava enkarselado. ⁴I el mayoral de los degoyadores dyo kargo de eyos a Yosef, i el los servia; i estuvyeron dias en guardya.

⁵I sonyeron suenyo ambos eyos, kada uno su suenyo en una mizma noche, kada uno segun la soltura de su suenyo, el eskansyano i el panadero del rey de Ayifto, ke estavan enkarselados en la kaza de la karsel. ⁶I vino a eyos Yosef por la manyana, i los miro, i ek, estavan tristes. ⁷I demando a los eunukos de Paro, ke estavan kon el en la guardya de la kaza de su amo, dizyendo: ¿porke estan vuestras karas malas oy? ⁸I le disheron: sonyimos suenyo, i no ay kyen lo solte. I Yosef los disho: ¿no son del Dyo las solturas? kontandmelos agora. ⁹I el mayoral de los eskansyanos konto su suenyo a Yosef, i le disho. En mi suenyo, ek , una vid estava delante de mi; ¹⁰i en la vid tres sarmyentos; i eya komo ke floresia, kresia su flor, i madrugaron sus razimos de uvas. ¹¹I el vazo de Paro estava en mi mano, i tomava yo los uvas, i las esprimia en el vazo de Paro, i dava yo el vazo en mano de Paro. ¹²I Yosef le disho: esta es su soltura: los tres sarmyentos son tres dias. ¹³De aki a tres dias alsara Paro tu kavesa, i te ara tornar a tu asyento; i daras el vazo de Paro en su mano, segun la uzansa primera kuando eras su eskansyano. ¹⁴Ma ke te akordes de mi kontigo kuando sera byen a ti, i te rogo ke azes mersed konmigo, i me enmentes a Paro, i me sakes de esta kaza. ¹⁵Porke en verdad fui rovado de la tyerra de los Ebreos; i tambyen aki no ize ninguna koza para ke me metyeran en la prizyon. ¹⁶I vyendo el mayoral de los panaderos ke avia soltado para byen, disho a Yosef: tambyen yo vide en mi suenyo, i ek, tenia tres sestos [1]blankos sovre mi kavesa. ¹⁷I en el sesto mas alto avia de todo komida de Paro, echura de panadero; i las aves las komian del sesto de sovre mi kavesa. ¹⁸I respondyo Yosef i disho: esta es su soltura: los tres sestos son tres dias, ¹⁹De aki a tres dias alsara Paro tu kavesa de sovre ti, i te kolgara sovre la forka, i las aves komeran tu karne de sovre ti.

²⁰I fue el terser dia, el dia del nasimyento de Paro, ke izo konbite a todos sus syervos; i also la kavesa del mayoral de los eskansyanos, i la kavesa del mayoral de los panaderos entre sus syervos. ²¹I izo tornar al mayoral de los eskansyanos a su eskansyania; i dyo el vazo en su mano de Paro: ²²ma al mayoral de los panaderos enforko, komo les avia soltado Yosef. ²³I el mayoral de los eskansyanos no se akordo de Yosef, sino ke se olvido de el.

[1] o burakados

Continúa >> 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.