Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 8 VAYISHLAH (33 a 36)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

8 VAYISHLAH

⁴I enbio Yaakov mensajeros delante de si a Esav su ermano, a la tyerra de Seir, kampo de Edom. ⁵I les enkomendo, dizyendo, ansi diresh a mi senyor Esav; ansi dize tu syervo Yaakov, kon Lavan pelegrini, i me detardi asta agora. ⁶I tengo bueyes, i aznos, ovejas, i syervos, i syervas; i enbii a avizar a mi senyor por ayar grasya en tus ojos. ⁷I los mensajeros tornaron a Yaakov, dizyendo, venimos a tu ermano Esav, i tambyen el vyene a enkontrarte, i kuatrosyentos varones kon el. ⁸I temyo Yaakov mucho, i se angustyo; i partyo el puevlo ke estava kon el, i las ovejas, i las vakas, i los kameyos, en dos reales; i disho, ⁹si vinyere Esav al un real, i lo eryere, entonses el real ke keda sera eskapado.

¹⁰I disho Yaakov, Dyo de mi padre Avra’ham, i Dyo de mi padre Yitshak, A’ ke me dishiste, tornate a tu tyerra, i a tu parentesko, i yo te are byen: ¹¹menor soy yo ke todas las mersedes, i ke toda la verdad ke iziste kon tu syervo; porke kon mi vara pase este Yarden, i agora estoy en dos reales. ¹²Eskapame, te rogo, de la mano de mi ermano, de la mano de Esav; porke le temo, no sea ke venga i me fyera, la madre kon los ijos. ¹³I tu dishiste, syertamente te are byen, i pondre tu semen komo la arena de la mar, ke no se puede kontar por muchedumbre.

¹⁴I repozo ayi akeya noche, i tomo de lo ke le vino a la mano un prezente para Esav su ermano: ¹⁵dossyentas kavras, i vente kavrones, dossyentas ovejas, i vente karneros, ¹⁶trenta kameyas alechaderas kon sus ijos, kuarenta vakas, i dyez toros, vente aznas, i dyez borrikos. ¹⁷I los dyo en mano de sus syervos, kada revanyo aparte; i disho a sus syervos, pasad delante de mi, i poned espasyo entre ravanyo i revanyo, ¹⁸i enkomendo al primero, dizyendo kuando te enkontrare Esav mi ermano, i te preguntare, dizyendo, ¿de kyen eres?, ¿i onde vas? ¿i de kyen son estos delante de ti? ¹⁹entonses diras, son de tu syervo Yaakov; prezente es enbiado a mi senyor Esav; i ek, tambyen el vyene detras de nozotros. ²⁰I enkomendo tambyen al segundo, tambyen al tersero, tambyen a todos los ke avian detras de los revanyos, dizyendo, segun esta palavara avlaresh a Esav, kuando lo toparesh. ²¹I diresh tambyen, ek, tu syervo Yaakov vyene detras de nozotros. Porke disho, lo afalagare kon el prezente ke ve delante de mi, i despues vere sus fases; kizas me resivira kon agrado. ²²I paso el prezente delante de el; i el repozo akeya noche en el real. ²³I se levanto akeya noche, i tomo sus dos mujeres, i sus dos syervas, i sus onze ninyos, i paso el pasaje de Yebok. ²⁴I los tomo , i los izo pasar el arroyo, i izo pasar lo ke tenia.

²⁵I se kedo Yaakov solo; i lucho kon el un varon asta ke suvia la manyana. ²⁶I komo vido ke no podia kon el, toko la palma de su anka, i se la deskondjunto la palma de la anka de Yaakov, myentras ke luchava kon el. ²⁷I disho, deshame ir, porke suve la manyana. I el disho, no te deshare ir si no me bendigas. ²⁸I le disho ¿ke es tu nombre? i el disho Yaakov. ²⁹I disho, no sera dicho mas tu nombre Yaakov, sino Yisrael porke mayorgaste kon el Dyo, i kon los varones, i pudiste. ³⁰I Yaakov pregunto, i disho, dime agora tu nombre, I el disho, ¿para ke es ke preguntas por mi nombre? i lo bendisho ayi. ³¹I yamo Yaakov el nombre del lugar Peniel: porke vido el Dyo kara a kara, i fue eskapada mi alma. ³²I se le esklaresyo el sol kuando paso a Penuel, i el kosheava de su anka. ³³Por tanto no komen los ijos de Yisrael el nyervo enkojido, ke esta sovre la palma de la anka, asta este dia; porke toko la palma de la anka de Yaakov en el nyervo enkojido.

33

¹I also Yaakov sus ojos, i miro, i ek, venia Esav, i kon el kuatrosyentos varones. I espartyo los ninyos entre Lea, i Rahel, i las dos syervas. ²I puzo las syervas i sus ninyos primeros, i a Lea i sus ninyos postreros, i a Rahel i a Yosef postremeros. ³I el paso delante de eyos, i se enkorvo a tyerra syete vezes, asta ke se ayego a su ermano. ⁴I Esav korryo a su enkuentro, i lo abraso, i se echo sovre su serviz, i lo bezo; i yoraron, ⁵I also sus ojos, i vido las mujeres i los ninyos, i disho, ¿kyen son estos kontigo? i el disho, los ninyos ke el Dyo engrasyo a tu syervo. ⁶I se ayegaron las syervas, eyas i sus ninyos, i se enkorvaron. ⁷I se ayego tambyen Lea i sus ninyos, i se enkorvaron: i despues se ayego Yosef i Rahel, i se enkorvaron. ⁸I disho ¿ke idea tyenes por todo este real ke enkontri? i el disho, por ayar grasya en los ojos de mi senyor. ⁹I disho Esav, tengo bastante, mi ermano; sea para ti ke es tuyo. ¹⁰I disho Yaakov, no, te rogo, si agora ayi grasya en tus ojos, toma mi prezente de mi mano; ke por tanto vide tu kara, komo se uvyera visto la kara del Dyo, i me enveluntaste. ¹¹Te rogo ke tomes mi bendisyon ke fue traida a ti; porke me engrasyo el Dyo, i porke tengo bastante. I porfio kon el, i la tomo, ¹²I disho, movamos, i andemos, i yo ire delante de ti. ¹³I el le disho, mi senyor save ke los ninyos son tyernos, i las ovejas i las vakas paridas estan konmigo: i si las fatigaren un dia, murira todo el revanyo. ¹⁴Pasa agora mi senyor delante de su syervo; i yo me giare a mi vagar al paso de la azyenda ke va delante de mi, i al paso de los ninyos, asta ke venga a mi senyor a Seir. ¹⁵I Esav disho. deshare agora kontigo del puevlo ke esta konmigo. I el disho ¿para ke esto? ke ayi yo grasya en los ojos de mi senyor.

¹⁶I se torno Esav en akel dia por su kamino a Seir. ¹⁷I partyo Yaakov a Sukot, i fraguo para si kaza, i para su ganado izo kavanyas: por tanto yamo el nombre del lugar Sukot.

¹⁸I vino Yaakov salvo a la sivdad de Shehem, ke es en la tyerra de Kenaan, kuando venia de Padan-Aram, i pozo delante de la sivdad. ¹⁹I kompro una parte del kampo, onde tendyo su tyenda, de mano de los ijos de Hamor, padre de Shehem, por syen pyezas de moneda. ²⁰I paro ayi ara, i yamo, El-Elo’hey-Yisrael.

34

¹I salyo Dina, ija de Lea, ke paryo a Yaakov, para ver las ijas de la tyerra. ²I la vido Shehem, ijo de Hamor el Hivio, mayoral de la tyerra, i la tomo, i yazyo kon eya, i la afrio. ³I se apego su alma a Dina, ija de Yaakov; i amo a la mosa. ⁴I avlo al korason de la mosa. I avlo Shehem a Hamor su padre, dizyendo, tomame esta mosa por mujer. ⁵I Yaakov oyo ke avia enkonado a Dina su ija; i sus ijos estavan kon su ganado en el kampo, i se kayo Yaakov asta ke vinyeron. ⁶I salyo Hamor padre de Shehem, a Yaakov por avlar kon el. ⁷I los ijos de Yaakov vinyeron del kampo kuando lo oyeron, i se atristaron los varones, i se ensanyaron mucho, porke izo vileza en Yisrael en yazyendo kon la ija de Yaakov, i ansi no se devia de azer. ⁸I Hamor avlo kon eyos, dizyendo, el alma de Shehem mi ijo kovdisya a vuestra ija: vos rogo ke se la desh por mujer, ⁹I konsograd kon nozotros; dad a nozotros vuestras ijas, i nuestras ijas tomad para vozotros. ¹⁰I moraresh kon nozotros, i la tyerra estara delante de vozotros; morad i merkadead en eya, i aposesyonadvos en eya. ¹¹I disho Shehem a su padre i a sus ermanos, ke aye yo grasya en vuestros ojos, i dare lo ke me disheres. ¹²Muchiguad sovre mi mucho ashugar i dadiva, i dare kuanto me disheresh; i dadme la mosa por mujer. ¹³I respondyeron los ijos de Yaakov a Shehem i a Hamor su padre kon arte, i avlaron, por lo ke enkono a Dina su ermana, ¹⁴I les disheron, no podemos azer esta koza, de dar nuestra ermana a varon ke tyene serradura; porke esto es repudyo a nozotros. ¹⁵I solamente kon esto konvendremos kon vozotros; si fueresh komo nozotros, ke sea sirkunsido entre vozotros todo macho; ¹⁶entonses daremos nuestras ijas a vozotros, i vuestras ijas tomaremos para nozotros, i moraremos kon vozotros, i seremos un puevlo. ¹⁷I si no nos oyeresh, para sirkunsirvos; entonses tomaremos nuestra ija, i nos iremos. ¹⁸I sus palavras plazyeron a Hamor, i a Shehem, ijo de Hamor. ¹⁹I no detadro el moso de azer la koza, porke envelunto en la ija de Yaakov; i el era el mas onrado de toda la kaza de su padre.

²⁰I vino Hamor i Shehem su ijo a la puerta de su sivdad, i avlaron a los varones de su sivdad, dizyendo, ²¹estos varones son pasifikos kon nozotros; moren pues en la tyerra, i trafiken en eya; i la tyerra, ek es ancha de lugares delante de eyos; sus ijas tomaremos a nozotros por mujeres, i nuestras ijas daremos a eyos. ²²Solamente kon esto konvendran los varones kon nozotros para morar kon nozotros, para ke seamos un puevlo, si se sirkunsyere todo varon entre nozotros, ansi komo eyos son sirkunsidos. ²³Su ganado, i su azyenda, i todas sus kuatropeas, ¿no seran nuestras? solamente konvengamos kon eyos, i moraran kon nozotros. ²⁴I eskucharon a Hamor, i a Shehem su ijo, todos los ke salian por la puerta de su sivdad; i fueron sirkunsidos todos los machos, todos los ke salian por la puerta de su sivdad.

²⁵I fue ke al terser dia, kuando estavan doloryozos, dos ijos de Yaakov, Shimon i Levi, ermanos de Dina, tomaron kada uno su espada, i vinyeron sovre la sivdad a figusya, i mataron a todo macho, ²⁶I a Hamor, i a Shehem su ijo, mataron a tajo de espada, i tomaron a Dina de kaza de Shehem, i salyeron. ²⁷Los ijos de Yaakov vinyeron sovre los matados, i prearon la sivdad, por lo ke avian enkonado su ermana. ²⁸Sus ovejas, i sus vakas, i sus aznos, i lo ke avia en la sivdad, i lo ke avia en el kampo, tomaron. ²⁹I toda su azyenda, i todos sus ninyos, i sus mujeres, kativaron, i prearon; i todo lo ke avia en kaza.

³⁰I disho Yaakov a Shimon i a Levi, me avesh turvado. Azyendome afedeser kon los moradores de la tyerra, kon el Kenaanio, i kon el Perizio: i tenyendo yo pokos varones si djuntaran kontra mi, i me eriran; i sere destruido yo i mi kaza. ³¹I disheron, ¿avia el de tratar a nuestra ermana komo a una eskarada?

35

¹I disho el Dyo a Yaakov: levantate, suve a Bet-El, i estate ayi; i az ayi ara al Dyo, ke se aparesyo a ti kuando fuias de las fases de Esav tu ermano. ²I disho Yaakov a los de su kaza, i a todos los ke estavan kon el: kitad los dyozes estranyos ke ay entre vozotros, i alimpyadvos, i mudad vuestros vestidos. ³I nos levantemos, i suvamos a Bet-El; i are ayi ara al Dyo, ke me respondyo en el dia de mi angustya, i fue konmigo en el kamino ke anduvi. ⁴I dyeron a Yaakov todos los dyozes estranyos ke avia en su mano, i los anyazmes ke tenian en sus orejas; i Yaakov los eskondyo debasho del pino ke estava djunto a Shehem. ⁵I partyeron; i el kevranto del Dyo fue sovre las sivdades ke avia en sus derredores, i no persigyeron detras de los ijos de Yaakov. ⁶I vino Yaakov a Luz, ke es en la tyerra de Kenaan, esta es Bet-El, el i todo el puevlo ke kon el estava. ⁷I fraguo ayi ara, i yamo el lugar El-Bet-El; porke ayi se le aparesyo el Dyo, kuando fuia de las fases de su ermano. ⁸I muryo Devora, alechadera de Rivka, i fue enterrada debasho de Bet-El, debasho de una enzina; i se yamo su nombre Alon-Bahut.

⁹I se aparesyo otra vez el Dyo a Yaakov, kuando vino de Padan-Aram, i lo bendisho. ¹⁰I le disho el Dyo: tu nombre es Yaakov; no sera yamado mas tu nombre Yaakov, sino Yisrael sera tu nombre; i yamo su nombre Yisrael. ¹¹I le disho el Dyo: yo soy el Dyo Todopoderozo; fruchiguate i muchiguate; djente, i kompanya de djentes, sera de ti, i reyes saldran de tus lumbos. ¹²I la tyerra ke di a Avra’ham i a Yitshak, a ti le dare, i a tu semen despues de ti dare la tyerra. ¹³I suvyo de kon el el Dyo en el lugar onde avlo kon el. ¹⁴I Yaakov paro una estansya en el lugar onde avlo kon el, una estansya de pyedra; i templo sovre eya templasyon, i vazyo sovre eya azeyte. ¹⁵I yamo Yaakov el nombre del lugar onde el Dyo avlo kon el, Bet-El.

¹⁶I partyeron de Bet-El, i avia solamente komo medida de tyerra para venir a Efrat; i paryo Rahel, i se enduresyo en su parir. ¹⁷I fue, ke komo se enduresyo en su parir, le disho la komadre: no temas porke tambyen este ijo tendras. ¹⁸I fue, ke en salyendo su alma, porke muryo, yamo su nombre Ben-Oni; ma su padre yamo Binyamin. ¹⁹I muryo Rahel, i fue enterrada en el kamino de Efrat, esta es Bet-Lehem. ²⁰I paro Yaakov una estansya sovre su fuesa; esta es la estansya de la fuesa de Rahel asta oy. ²¹I partyo Yisrael, i tendyo su tyenda de la otra parte de Migdal-Eder. ²²I fue ke morando Yisrael en akeya tyerra, anduvo Reuven, i yazyo kon Bil’ha la donzeya de su padre; i lo oyo Yisrael.

²³I los ijos ijos de Yaakov fueron dodje. Los ijos de Lea: Reuven, el primodjenito de Yaakov, i Shimon, i Levi, i Ye’huda, i Yissahar, i Zevulun. ²⁴Los ijos de Rahel; Yosef i Binyamin. ²⁵I los ijos de Bil’ha, syerva de Rahel; Dan i Naftali. ²⁶I los ijos de Zilpa, syerva de Lea; Gad i Asher. Estos son los ijos de Yaakov, ke le nasyeron en Padan-Aram. ²⁷I vino Yaakov a Yitshak su padre a Mamre, sivdad de Arba, esta es Hevron, onde pelegrino Avra’ham i Yitshak. ²⁸I fueron los dias de Yitshak syento i ochenta anyos. ²⁹I se transyo Yitshak, i muryo, i fue apanyado a sus puevlos, vyejo, i arto de dias; i lo enterraron Esav i Yaakov sus ijos.

36

¹I estos son los djerenansyos de Esav, el kual es Edom. ²Esav tomo sus mujeres de las ijas de Kenaan; i Ada, ija de Elon el Hitio, i a O’holivama, ija de Ana, ija de Tsiveon el Hivio; ³i a Basmat, ija de Yishmael, ermana de Nevayot. ⁴I Ada paryo a Esav a Elifaz; i Basmat paryo a Reuel, ⁵i O’holivama paryo a Yeush, i a Yalam, i a Korah. Estos son los ijos de Esav, ke le nasyeron en la tyerra de Kenaan. ⁶I Esav tomo sus mujeres, i sus ijos, i sus ijas, i todas las personas de su kaza, i su ganado, i todas sus kuatropeas, i toda su azyenda ke avia ganado en la tyerra de Kenaan, i se fue a otra tyerra de delante de Yaakov su ermano. ⁷Porke la ganansya de eyos era tanta ke no podian morar djuntos; i la tyerra de sus pelegrinasyones no los podia soportar por kavza de su ganados. ⁸I moro Esav en el monte de Seir: Esav es Edom.

⁹I estos son los djerenansyos de Esav, padre de Edom, en el monte de Seir. ¹⁰I estos son los nombres de los ijos de Esav; Elifaz, ijo de Ada, mujer de Esav, Reuel, ijo de Basmat, mujer de Esav. ¹¹I los ijos de Elifaz fueron Teman, Omar, Tsefo, i Gatam, i Kenaz. ¹²I Timna fue donzeya de Elifaz, ijo de Esav, i paryo a Elifaz a Amalek. Estos fueron los ijos de Ada, mujer de Esav. ¹³I estos son los ijos de Reuel; Nahat, i Zerah, Shama, i Miza. Estos fueron los ijos de Basmat, mujer de Esav. ¹⁴I estos fueron los ijos de O’holivama, ija de Ana, ija de Tsiveon, mujer de Esav; i paryo a Esav a Yeush, i a Yalam, i a Korah.

¹⁵Estos son los kondes de los ijos de Esav: los ijos de Elifaz, primodjenito de Esav; konde Teman, konde Omar, konde Tsefo, konde Kenaz, ¹⁶konde Korah, konde Gatam, konde Amalek. ¹⁷Estos son los kondes ke salyeron de Elifaz en la tyerra de Edom; estos fueron los ijos de Ada. ¹⁷I estos son los ijos de Reuel, ijo de Esav; konde Nahat, konde Zerah, konde Shama, konde Miza. Estos son los kondes ke salyeron de Reuel en la tyerra de Edom; estos son los ijos de Basmat, mujer de Esav. ¹⁸I estos son los ijos de O’holivama, mujer de Esav; konde Yeush, konde Yalam, konde Korah. Estos son los kondes ke salyeron de O’holimava, ija da Ana, mujer de Esav. ¹⁹Estos son los ijos de Esav, i estos son sus kondes, el es Edom.

²⁰Estos son los ijos de Seir el Horio, moradores de la tyerra; Lotan, i Shoval, i Tsiveon, i Ana, ²¹i Dishon, i Etser, i Dishan. Estos son los kondes de los Horios, ijos de Seir, en la tyerra de Edom. ²²I los ijos de Lotan fueron Hori i ‘Hemam; i la ermana de Lotan fue Timna. ²³I estos fueron los ijos de Shoval; Alvan, i Manahat, i Eval, Shefo, i Onam. ²⁴I estos fueron los ijos de Tsiveon; Aya, i Ana: este Ana es el ke topo los manantiales kayentes en el dizyerto, kuando apasentava los aznos de Tsiveon su padre. ²⁵I estos fueron los ijos de Ana; Dishon, i O’holivama, ijos de Ana. ²⁶I estos fueron los ijos de Dishon; Hemdan, i Eshban, i Yitran, i Keran. ²⁷Estos fueron los ijos de Etser: Bil’han, i Zaavan, i Akan. ²⁸Estos fueron los ijos de Dishan: Uts i Aran. ²⁹Estos fueron los kondes de los Horios ; konde Lotan, konde Shoval, konde Tsiveon, konde Ana, ³⁰konde Dishon, konde Etser, konde Dishan. Estos son los kondes de los Horios, por sus kondes en la tyerra de Seir.

³¹I estos fueron los reyes ke enreynaron en la tyerra de Edom, antes ke enreynara rey sovre los ijos de Yisrael. ³²I enreyno en Edom, Bela, ijo de Beor; i el nombre de su sivdad fue Din’hava. ³³I muryo Bela, i enreyno en su lugar Yovav, ijo de Zerah, de Botsra. ³⁴I Muryo Yovav, i enreyno en su lugar Husham, de la tyerra de Temani. ³⁵I muryo Husham, i enreyno en su lugar ‘Hadad, ijo de Bedad, el ke eryo a Midyan en el kampo de Moav; i el nombre de su sivdad fue Avit. ³⁶I muryo ‘Hadad, i enreyno en su lugar Samla de Masreka. ³⁷I muryo Samla, i enreyno en su lugar Shaul, de Rehovot del rio. ³⁸I muryo Shaul, i enreyno en su lugar Baal-Hanan, ijo de Ahbor. ³⁹I muryo Baal-Hanan, ijo de Ahbor, i enreyno en su lugar ‘Hadar; i el nombre de su sivdad fue Pau; i el nombre de su mujer, Me’hetavel, ija de Matred, ija de Me-Zahav.

⁴⁰I estos son los nombres de los kondes de Esav, por sus linajes, por sus lugares; konde Timna, konde Alva, konde Yetet, ⁴¹konde O’holivama, konde Ela, konde Pinon, ⁴²konde Kenaz, konde Teman, konde Mivtsar, ⁴³konde Magdiel, konde Iram. Estos son los kondes de Edom, segun sus moradas en la tyerra de su posesyon: el es Esav, padre de los Edomios.

Continúa >> 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.