Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 7 VAYETSE (29 a 32)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

7 VAYETSE

¹⁰I salyo Yaakov de Beer-Sheva, i se fue a Haran. ¹¹I enkontro kon un lugar, i repozo ayi, porke se avia puesto el sol; i tomo de las pyedras de akel lugar, i puzo a sus kavesales, i yazyo en akel lugar. ¹²I sonyo, i ek, una eskalera parada en tyerra, i su punta alkansava a los syelos; i ek, andjeles del Dyo suvian i desendian por eya. ¹³I ek, A’ estava ensima de eya, i disho, yo soy A’, el Dyo de Avra’ham tu padre, i el Dyo de Yitshak: la tyerra sovre la kual yazes, a ti la dare, i a tu semen; ¹⁴i sera tu semen komo el polvo de la tyerra, i te espandiras al oksidente, i al oryente, i al norte, i al sud; i en ti i en tu semen seran bendichos todos los linajes de la tyerra. ¹⁵I ek, yo soy kontigo, i te guardare por donde kyera ke anduvyeres, i te are tornar a esta tyerra; porke no te deshare, asta ke ayga echo lo ke te avli. ¹⁶I se desperto Yaakov de su suenyo, i disho, de syerto A’ esta en este lugar, i yo no lo savia. ¹⁷I temyo, i disho, ¡kuan espantozo es este lugar! esto no es otro ke kaza del Dyo, esta es puerta de los syelos.

¹⁸I madrugo Yaakov por la manyana, i tomo la pyedra ke avia puesto a sus kavesales, i la puzo por estansya, i vazyo azeyte sovre su punta. ¹⁹I yamo el nombre de akel lugar Bet-El, aunke Luz era el nombre de akeya sivdad en la primeria. ²⁰I prometyo Yaakov promesa, dizyendo, si fuere el Dyo konmigo, i me guardare en este kamino ke voy, i me dyere pan para komer, i vestido para vestir; ²¹i si tornare en paz a kaza de mi padre, A’ sera mi Dyo: ²²i esta pyedra ke puzi por estansya sera kaza del Dyo, i de todo lo ke me dyeres, dyezmar lo dyezmare para ti.

¹⁹I estos son los djerenansyos de Yitshak, ijo de Avra’ham: Avra’ham endjendro a Yitshak. ²⁰I era Yitshak de edad de kuarenta anyos kuando tomo por mujer a Rivka, ija de Betuel el Aramio de Padan-Aram, ermana de Lavan el Aramio. ²¹I izo Yitshak orasyon a A’ por su mujer, porke era manyera; i lo resivyo A’, i se ensinto Rivka su mujer. ²²I los ijos se kombatyeron adyentro de eya; i disho, si ansi es, ¿porke estoy ansi? i fue a rekerir a A’. ²³I le disho A’, dos djentes ay en tu vyentre, i dos djentios se espartiran de tus intestinas; i el un djentio se enfortesera mas ke el otro djentio; i el mayor servira al menor. ²⁴I se kumplyeron sus dias para parir, i ek, melisyos en su vyentre. ²⁵I salyo el primero ruvyo, todo el komo un manto peludo; i yamaron su nombre Esav. ²⁶I despues salyo su ermano, i su mano travava al karkanyal de Esav; i fue yamado su nombre Yaakov. I era Yitshak de edad de sesenta anyos kuando eya los paryo. ²⁷I se engrandesyeron los muchachos: i Esav fue varon savyo en la kasa, varon del kampo; i Yaakov fue varon kyeto, moran en tyendas. ²⁸I amo Yitshak a Esav, porke komia de su kasa; ma Rivka amava a Yaakov

29

¹I also Yaakov sus pyes, i se fue a la tyerra de la djente del oryente. ²I miro, i ek, un pozo en el kampo, i ek ayi tres revanyos de ovejas ke yazian serka de el; porke de akel pozo abevravan los revanyos; i avia una pyedra grande sovre la boka del pozo. ³I se apanyavan ayi todos los revanyos; i rebolvean la pyedra de sovre la boka del pozo, i abevravan las ovejas, i tornavan la pyedra sovre la boka del pozo a su lugar. ⁴I Yaakov les disho, mis ermanos, ¿de onde sosh? i disheron, de Haran somos. ⁵I les disho , ¿konosesh a Lavan, ijo de Nahor? i disheron, lo konosemos. ⁶I les disho, ¿esta bueno? i disheron bueno esta; i ek Rahel su ija vyene kon las ovejas. ⁷I el disho, ek, dainda el dia es grande; no es tyempo de rekojer el ganado; abevrad las ovejas, i andad, apasentad. ⁸I disheron, no podemos, asta ke se apanyan todos los revanyos, i rebuelvan la pyedra de sovre la boka del pozo; entonses abevraremos las ovejas.

⁹Estando el dainda avlando kon eyos, Rahel vino kon las ovejas de su padre; porke eya era pastora. ¹⁰I fue, ke komo Yaakov vido a Rahel, ija de Lavan, ermano de su madre, i a las ovejas de Lavan, ermano de su madre, se ayego Yaakov, i rebolvyo la pyedra de sovre la boka del pozo. I abevro las ovejas de Lavan, ermano de su madre. ¹¹I Yaakov bezo a Rahel, i also su boz, i yoro. ¹²I Yaakov informo a Rahel ke el era ermano de su padre, i ke era ijo de Rivka: i eya korryo, i dyo avizo a su padre. ¹³I fue ke komo oyo Lavan las nuevas de Yaakov, ijo de su ermana, korryo a resivirlo, i lo abraso, i lo bezo, i lo trusho a su kaza. I el konto a Lavan todas estas kozas. ¹⁴I Lavan le disho, de syerto gueso mio, i karne mia eres. Estuvo kon el un mez de tyempo.

¹⁵I disho Lavan a Yaakov, ¿por ser tu mi ermano, tyenes ke servirme de baldes? dime ke sera tu paga. ¹⁶I Lavan tenia dos ijas: el nombre de la mayor era Lea, i el nombre de la menor Rahel. ¹⁷I los ojos de Lea eran tyernos, ma Rahel era ermoza de forma, i ermoza de vista. ¹⁸I Yaakov amo a Rahel, i disho, te servire syete anyos por Rahel tu ija menor. ¹⁹I disho Lavan, mejor es ke te la de a ti, mas ke darla a otro varon: estate konmigo. ²⁰I sirvyo Yaakov por Rahel syete anyos; i le paresyeron komo pokos dias, por el amor ke le tenia.

²¹I disho Yaakov a Lavan, dame mi mujer porke se kumplyeron mis dias, para ke venga a eya. ²²I apanyo Lavan a todos los varones del lugar, i izo konbite. ²³I fue, ke en la tarde, tomo a Lea su ija, i la trusho a el; i vino a eya. ²⁴I dyo Lavan a Zilpa su syerva a Lea su ija por syerva. ²⁵I fue en la manyana, ek, ke era Lea. I el disho a Lavan, ¿Ke es esto ke me iziste? ¿no servi kontigo por Rahel? ¿i porke me enganyaste? ²⁶I disho Lavan, no se aze ansi en nuestro lugar, ke se de la menor antes de la mayor. ²⁷Kumple la semana de esta, i te daremos a esta tambyen por el servisyo ke serviras konmigo otros syete anyos mas. ²⁸I izo Yaakov ansi, i kumplyo la semana de akeya; i el le dyo a Rahel su ija por mujer. ²⁹I dyo Lavan a su syerva Bil’ha a Rahel su ija por syerva. ³⁰I vino tambyen a Rahel, i amo tambyen a Rahel mas ke a Lea, i sirvyo kon el otros syete anyos mas.

³¹I vido A’ ke Lea era aborresida i avryo su bulba; ma Rahel era manyera. ³²I se ensinto Lea, i paryo un ijo, i yamo su nombre Reuven; porke disho, porke vido A’ mi afriisyon; por tanto agora me amara mi marido. ³³I se ensinto otra vez, i paryo un ijo, i disho porke oyo A’ ke yo era aborresida, me dyo tambyen este: i yamo su nombre Shimon. ³⁴I se ensinto otra vez, i paryo un ijo, i disho, agora esta vez se adjuntara mi marido konmigo, porke le pari tres ijos: por tanto yamo su nombre Levi. ³⁵I se ensinto otra vez, i paryo un ijo, i disho, esta vez loare a A’: por tanto yamo su nombre Ye’huda; i desho de parir.

30

¹I kuando vido Rahel ke no paria a Yaakov, Rahel tuvo enbidya de su ermana, i disho a Yaakov, dame ijos, i si no me muere. ²I se ensendyo el fulor de Yaakov kontra Rahel; i disho, ¿soy yo en lugar del Dyo, ke vedo de ti el fruto del vyentre? ³I disho, ek, mi syerva Bil’ha, ven a eya, i parira sovre mis rodiyas, para ke sea yo tambyen aijada de eya. ⁴I le dyo a Bil’ha su syerva por mujer; i Yaakov vino a eya. ⁵I se ensinto Bil’ha, i paryo a Yaakov un ijo. ⁶I disho Rahel, me djuzgo el Dyo, i tambyen oyo mi boz, i me dyo un ijo: por tanto yamo su nombre Dan. ⁷I se ensinto otra vez Bil’ha, syerva de Rahel, i paryo ijo segundo a Yaakov. ⁸I disho Rahel kon luchas del Dyo luchi kon mi ermana, tambyen vensi: i yamo su nombre Naftali. ⁹I vyendo Lea ke avia deshado de parir, tomo a Zilpa su syerva, i la dyo a Yaakov por mujer. ¹⁰I Zilpa, syerva de Lea paryo a Yaakov un ijo. ¹¹I disho Lea, vino buena ventura, i yamo su nombre Gad. ¹²I Zilpa, syerva de Lea, paryo ijo segundo a Yaakov. ¹³I disho Lea, para byenaventurarme; porke las ijas me yamaran byenventurada: i yamo su nombre Asher.

¹⁴I fue Reuven en los dias de la segada de los trigos, i topo mandragolas en el kampo, i las trusho a Lea su madre. I disho Rahel a Lea, te rego ke me des de las mandragolas de tu ijo. ¹⁵I eya le disho, ¿es poko ke tomaste a mi marido, ke kyeres tomar tambyen las mandragolas de mi ijo? I disho Rahel, por tanto yazera kontigo esta noche por las mandragolas de tu ijo. ¹⁶I kuando Yaakov venia del kampo a la tarde, salyo Lea a resivirlo, i disho, a mi tyenes ke venir; porke alkilar te alkili por las mandragolas de mi ijo. I yazyo kon eya akeya noche. ¹⁷I oyo el Dyo a Lea, i se ensinto, i paryo a Yaakov el ijo kinto. ¹⁸I disho Lea me dyo el Dyo mi paga por lo ke di mi syerva a mi marido: i yamo su nombre Yissahar. ¹⁹I se ensinto Lea otra vez, i paryo el ijo sejeno a Yaakov. ²⁰I disho Lea, el Dyo me dyo buen fado; esta vez morara konmigo mi marido, porke le pari sesh ijos: i yamo su nombre Zevulun. ²¹I despues paryo una ija, i yamo su nombre Dina.

²²I se akordo el Dyo de Rahel, i la oyo el Dyo, i avryo su bulba. ²³I se ensinto, i paryo un ijo; i disho, kito el Dyo mi repudyo: ²⁴i yamo su nombre Yosef, dizyendo, me anyadira A’ otro ijo.

²⁵I akontesyo, ke kuando Rahel paryo a Yosef, disho Yaakov a Lavan, enbiame, i me ire a mi lugar, i a mi tyerra. ²⁶Dame mis mujeres i mis ninyos, por las kuales te servi, i me ire; porke tu saves mi servisyo ke te servi. ²⁷I Lavan le disho, si agora ayi grasya en tus ojos, kedate; adivini ke A’ me bendisho por tu kavza. ²⁸I disho, deklarame tu paga, i la dare. ²⁹I el le disho, tu saves komo te servi, i komo fue tu ganado konmigo. ³⁰Porke poko era lo ke tenias antes de mi venida, i kresyo a muchedumbre; i te bendisho A’ dezde mi venida: i agora, ¿kuando tengo de azer tambyen yo por mi propya kaza? ³¹I el disho, ¿ke te dare? I disho Yaakov, no me des nada: si izyeres por mi esta koza, tornare a apasentar tus ovejas, i las guardare. ³²Yo pasare por todo tu revanyo oy, kitando de ayi todo karnero pintado i manchado, i todo karnero moreno en las ovejas, i lo manchado i pintado en las kavras; i esto sera mi paga. ³³I atestiguara por mi mi djustedad manyana, kuando vendra por mi paga delante de ti: todo lo ke no fuere pintado ni manchado en las kavras, i moreno en las ovejas, esto sera kontado por rovado konmigo. ³⁴I disho Lavan, ek, ya sea segun tu palavra. ³⁵I aparto en akel dia los kavrones fashados i manchados, i todas las kavras pintadas i manchadas, todo lo ke tenia en si algo de blanko, i todo lo moreno en las ovejas, i lo dyo en mano de sus ijos. ³⁶I puzo kamino de tres dias entre si i Yaakov; i Yaakov apasentava el resto de las ovejas de Lavan.

³⁷I tomo a si Yaakov varas de alamo verde, i de aviyano, i de kastanyo; i deskostro en eyas kostras blankas, deskuvryendo lo blanko ke avia sovre las varas. ³⁸I inko las varas ke avia deskostrado en las pilas delante de las ovejas en las abevraderas del agua, onde las ovejas venian a bever, i se eskayentavan kuando venian a bever. ³⁹I se eskayentavan las ovejas delante de las varas, i parian las ovejas fashados, pintados, i manchados. ⁴⁰I apartava Yaakov los korderos, i ponia las fases de la ovejas a lo fashado, i todo lo moreno en las ovejas de Lavan; i ponia sus propyos revanyos aparte, i no los ponia kon las ovejas de Lavan. ⁴¹I era, ke todas las vezes ke se eskayentavan las ovejas tempranas, Yaakov ponia las varas a vista de las ovejas en las pilas, para ke se eskayentaran kon las varas. ⁴²I kuando tardavan las ovejas, no las ponia: ansi eran las tardias para Lavan, i las tempranas para Yaakov. ⁴³I kresyo el varon muy mucho, i tuvo muchas ovejas, i syervas, i syervos, i kameyos, i aznos.

31

¹I oyo las palavras de los ijos de Lavan, ke dizian, tomo Yaakov todo lo ke era de nuestro padre, i de lo ke era de nuestro padre izo toda esta grandeza. ²I vido Yaakov la kara de Lavan, i ek, no era kon el komo ayer i anteayer. ³I disho A’ a Yaakov, tornate a la tyerra de tus padres, i a tu parentesko, i yo sere kontigo. ⁴I enbio Yaakov, i yamo a Rahel i a Lea al kampo, a sus ovejas. ⁵I les disho, yo veo la kara de vuestro padre ke no es konmigo komo ayer i anteayer; ma el Dyo de mi padre a sido konmigo. ⁶I vozotros savesh ke kon toda mi fuersa servi a vuestro padre. ⁷I vuestro padre me enganyo, i troko mi paga dyez vezes; ma el Dyo no lo desho a azerme mal. ⁸Si dizia ansi, los pintados seran tu paga, entonses todas las ovejas parian pintados: i si dizia ansi, los fashados seran tu paga, entonses todas las ovejas parian fashados. ⁹Ansi aparto el Dyo el ganado de vuestro padre, i lo dyo a mi. ¹⁰I fue ke al tyempo ke se eskayentavan las ovejas, alsi mis ojos, i vide en suenyo, i ek, los machos ke suvian sovre las ovejas eran fashados, pintados, i pedriskados. ¹¹I me disho el andjel del Dyo en suenyo, Yaakov. I yo dishe, ekme. ¹²I disho, alsa agora tus ojos, i ve, todos los machos ke suven sovre las ovejas son fashados, pintados, i pedriskados: porke yo vide todo lo ke te aze Lavan. ¹³Yo soy el Dyo de Bet-El, onde untaste la estansya, onde me prometeste promesa; agora levantate sal de esta tyerra, i tornate a la tyerra de tu parentesko. ¹⁴I respondyo Rahel i Lea, i le disheron, ¿Ya tenemos parte i eredad en la kaza de nuestro padre? ¹⁵¿No somos kontados por estranyas kon el? porke nos vendyo, i komer tambyen komyo nuestro presyo. ¹⁶Porke toda la rikeza ke el Dyo aparto de nuestro padre, nuestra es, i de nuestros ijos. I agora, todo le ke te disho el Dyo, az.

¹⁷Entonses Yaakov se levanto, i also a sus ijos i a sus mujeres sovre los kameyos; ¹⁸i gio toda su ganada ke avia ganado, el ganado de su ganansya ke avia ganado en Padan-Aram, para venir a Yitshak su padre en la tyerra de Kenaan. ¹⁹I Lavan se avia ido a traskilar sus ovejas: i Rahel rovo los terafim ke tenia su padre. ²⁰I rovo Yaakov el korason de Lavan el Aramio, en lo ke no le izo saver ke se fuia. ²¹I fuyo el kon todo lo ke tenia; i se levanto i paso el rio, i puzo sus fases al monte de Gilad.

²²I fue dado avizo a Lavan al terser dia ke Yaakov se avia fuido. ²³I tomo a sus ermanos konsigo, i persigyo detras de el kamino de syete dias, i lo alkanso en el monte de Gilad. ²⁴I vino el Dyo a Lavan el Aramio en suenyo de la noche, i le disho, guardate ke no avles a Yaakov ni byen ni mal. ²⁵I alkanso Lavan a Yaakov. I Yaakov avia inkado su tyenda en el monte: i Lavan inko kon sus ermanos en el monte de Gilad. ²⁶I disho Lavan a Yaakov, ¿ke iziste ke rovaste mi korason, i yevaste mis ijas komo kativas de espada? ²⁷¿Porke te eskondiste para fuir, i me rovaste, i no me izisite saver, para ke yo te enbiara kon alegria, i kon kanteres, kon pandero, i kon arpa? ²⁸I no me deshaste a bezar a mis ijos i a mis ijas. Agora enlokesiste en azyendo ansi. ²⁹Ay poder en mi mano para azervos mal; ma el Dyo de vuestro padre me avlo anoche, dizyendo, guardate de avlar a Yaakov byen o mal. ³⁰I agora, aunke andar anduviste, porke dezear dezeaste la kaza de tu padre, ¿porke rovaste mis dyozes? ³¹I respondyo Yaakov, i disho a Lavan, porke tuve myedo: porke dishe, no sea ke me rovaras tus ijas. ³²Kon kyen ayares tus dyozes, no biva: delante de nuestros ermanos konose lo tuyo ke esta konmigo, i tomatelo; i no savia Yaakov ke Rahel los avia rovado, ³³I entro Lavan al a tyenda de Yaakov, i en la tyenda de Lea, i en la tyenda de las dos syervas, i no los ayo. I salyo de la tyenda de Lea, i entro en la tyenda de Rahel. ³⁴I Rahel avia tomado los terafim, i los puzo en la albarda de un kameyo, i se asento sovre eyos. I palpo Lavan toda la tyenda i no los ayo. ³⁵I eya disho a su padre, no se enoje mi senyor ke no puedo levantarme delante de ti; porke tengo la kostumbre de las mujeres. I el eskudrinyo, ma no ayo los terafim.

³⁶I se aravyo Yaakov, i barajo kon Lavan: i respondyo Yaakov, i disho a Lavan, ¿ke es mi revilyo? ¿ ke es mi pekado, ke kon tanta kemasyon viniste detras de mi? ³⁷Pues ke palpaste todos mis atuendos, ¿ke ayaste de todos los atuendos de tu kaza? ponlo aki delante de mis ermanos i de tus ermanos, i djuzgen entre nozotros ambos. ³⁸Estos vente anyos estuve kontigo; tus ovejas i tus kavras no se desijaron, i los barvezes de tu revanyo no komi. ³⁹Lo arrevatado no trushe a ti; yo tenia el danyo, de mi mano lo bushkavas, rovado de dia o rovado de noche. ⁴⁰Ansi era yo, de dia me konsumia el kalor, i de noche la yelada, i mi suenyo se fuia de mis ojos. ⁴¹Ansi estuve vente anyos en tu kaza; katorze anyos te servi por tus dos ijas, i sesh anyos por tus ovejas; i trokaste mi paga dyez vezes, ⁴²Si el Dyo de mi padre, el Dyo de Avra’ham, i el temor de Yitshak, no fuera konmigo, de syerto me embiarias agora vazio. Mi afriisyon i la lazerya de mis palmas vido el Dyo, i te kastigo anoche.

⁴³I respondyo Lavan i disho a Yaakov, las ijas son mis ijas, i los ijos son mis ijos, i las ovejas son mis ovejas, i todo lo ke tu ves, mio es: i a estas mis ijas ¿ke are oy, o a sus ijos ke paryeron? ⁴⁴I agora ven, tajaremos firmamyento yo i tu; i sera por testigo entre mi i ti. ⁴⁵I Yaakov tomo una pyedra, i la also por estansya. ⁴⁶I disho Yaakov a sus ermanos, kojed pyedras. I tomaron pyedras, i izyeron un monton; i komyeron ayi sovre el monton. ⁴⁷I Lavan lo yamo Yegar-Sa’haduta: i Yaakov lo yamo Galed. ⁴⁸I disho Lavan, este monton es testigo entre mi i ti oy. ⁴⁹Por tanto se yamo su nombre Galed; i Mitspa; porke disho, atalaye A’ entre mi i ti, kuando seremos apartados el uno del otro. ⁵⁰Si afriires a mis ijas, i si tomares mujeres afuera de mis ijas, no ay varon kon nozotros; mira, el Dyo es testigo entre mi i ti. ⁵¹I disho Lavan a Yaakov. Ek este monton, i ek la estansya ke echi entre mi i ti. ⁵²Testigo sea este monton, i testiga sea esta estansya, ke yo no pasare este monton a ti, i ke tu no pasaras este monton i esta estansya a mi para mal. ⁵³El Dyo de Avra’ham i el Dyo de Nahor , el Dyo de su padre, djuzge entre nozotros. I djuro Yaakov por el temor de su padre Yitshak. ⁵⁴I sakrifiko Yaakov sakrifisyo en el monte, i yamo a sus ermanos a komer pan; i komyeron pan, i repozaron en el monte.

32

¹I madrugo Lavan por la manyana, i bezo a sus ijos i a sus ijas, i los bendisho: i Lavan se fue, i se torno a su lugar. ²I Yaakov se fue a su kamino, i enkontararon kon el andjeles del Dyo. ³I disho Yaakov kuando los vido, el real del Dyo es este: i yamo el nombre de akel lugar Mahanayim.

Continúa >>

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.