eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
2-NOAH
9Estos son los djerenansyos de Noah: Noah, varon djusto, prenizmo fue en sus djerenansyos: kon el Dyo kamino Noah. 10I endjendro Noah tres ijos, a Shem, a Ham, i a Yefet. 11I se danyo la tyerra delante del Dyo, i se inchyo la tyerra de adolme. 12I vido el Dyo la tyerra, i ek, fue danyada; porke toda karne avia danyado su kamino sovre la tyerra.
13I disho el Dyo a Noah, el fin de toda karne vino delante de mi; porke se inchyo la tyerra de adolme por kavza de eyos, i ek, yo los destruire kon la tyerra. 14Azte una arka de maderos de sipros; kamaras aras en el arka, i la empezaras por adyentro i por afuera kon pez. 15I de esta manera la aras: tressyentos kovdos sera la longura del arka, sinkuenta kovdos su anchura, i trenta kovdos su altura. 16Una ventana aras al arka, i a un kovdo la kumpliras por arriva; i la puerta del arka pondras en su lado: de andares bashos, segundos, i terseros la aras. 17I yo, ek, yo traygo un deluvyo de agua sovre la tyerra, para destruir toda karne en ke ay espirito de vida de debasho de los syelos; todo lo ke ay en la tyerra se transera. 18Ma afirmare mi firmamyento kontigo, i vendras en el arka tu, i tus ijos, i tu mujer, i las mujeres de tus ijos kontigo. 19I de todo lo ke bive de toda karne, dos de kada manera traeras en el arka, para abidiguarlos kontigo; macho i embra seran. 20De las aves segun su manera, i de las kuatropeas segun su manera, de toda removilya de la tyerra segun su manera, dos de kada manera vendran a ti, para abidiguarse. 21I tu tomate de toda komida ke es de komer, i la apanyaras a ti, i sera para ti i para eyos por komida. 22I izo Noah segun todo lo ke le enkomendo el Dyo; ansi izo.
7
1I disho A’ a Noah, entra tu i toda tu kaza en el arka; porke a ti vide djusto delante de mi en este djerenansyo. 2De toda kuatropea limpya tomaras a ti syete a syete, macho i su embra: i de las kuatropeas ke no son limpyas, dos, macho i su embra. 3Tambyen de las aves de los syelos, syete a syete, macho i embra: para abidiguar semen sovre las fases de toda la tyerra. 4Porke de aki a syete dias, yo are yover sovre la tyerra kuarenta dias i kuarenta noches; i arrematare toda sustansya ke ize de sovre las fases de la tyerra. 5I izo Noah segun todo lo ke le enkomendo A’. 6I Noah era de edad de seshsyentos anyos kuando el deluvyo de las aguas fue sovre la tyerra. 7I entro Noah, i sus ijos, i su mujer, i las mujeres de sus ijos kon el en el arka, por kavza de las aguas del deluvyo. 8De las kuatropeas limpyas, i de las kuatropeas ke no son limpyas, i de las aves, i de todo lo ke se remoeve sovre la tyerra, 9dos a dos entraron a Noah en el arka, macho i embra, komo enkomendo el Dyo a Noah.
10I fue ke a los syete dias las aguas del deluvyo fueron sovre la tyerra. 11En el anyo seshsyentos de la vida de Noah, en el mez segundo, a los dyez i syete dias del mez, en akel dia fueron partidas todas las fuentes del abismo grande, i las ventanas de los syelos fueron avyertas: 12i fue la luvya sovre la tyerra kuarenta dias i kuarenta noches. 13En este mizmo dia entro Noah i Shem, i Ham, i Yefet, ijos de Noah, i la mujer de Noah, i las tres mujeres de sus ijos kon eyos, en el arka: 14eyos i todo animal sugun su manera, i toda kuatropea segun su manera, i toda removilya ke se remoeve sovre la tyerra sugun su manera, i toda ave segun su manera, todo pasharo de toda ala. 15I entraron a Noah en el arka, dos a dos de toda karne, en ke avia espirito de vida. 16I los ke entraron, macho i embra de toda karne entraron, komo le enkomendo el Dyo: i serro A’ sovre el. 17I fue el deluvyo kuarenta dias sovre la tyerra; i se muchiguaron las aguas, i alsaron el arka, i fue levantada de sovre la tyerra. 18I se mayorgaron las aguas, i se muchiguaron mucho sovre la tyerra; i andava el arka sovre las fases de las aguas. 19I se mayorgaron las aguas muy mucho sovre la tyerra; i fueron kuvyertos todos los montes altos ke avia debasho de todos los syelos. 20Kinze kovdos arriva se mayorgaron las aguas, i fueron kuvyertos los montes. 21I se transyo toda karne ke se remoeve sovre la tyerra, en las aves, i en las kuatropeas, i en los animales, i en toda syerpe ke arrastra sovre la tyerra; i todos los ombres: 22todo lo ke tenia areflo de espirito de vida en sus narizes, de todo lo ke avia en lo seko, muryo. 23I arremato toda la sustansya ke avia sovre las fases de la tyerra, dezde el ombre asta la kuatropea, asta la removilya, i asta el ave de los syelos; i fueron arrematados de la tyerra; i kedo solamente Noah, i los ke estavan kon el en el arka. 24I se mayorgaron las aguas sovre la tyerra syento i sinkuenta dias.
8
1I se akordo el Dyo de Noah, i de todos los animales, i de todas las kuatropeas ke estavan kon el en el arka: i izo pasar el Dyo un vyento sovre la tyerra, i se akedaron las aguas. 2I se serraron las fuentes del abismo, i las ventanas de los syelos, i la luvya de los syelos fue detenida. 3I tornaron las aguas de sovre la tyerra, andando i bolvyendo; i se menguaron las aguas al kavo de syento i sinkuenta dias. 4I repozo el arka en el mez seteno, a los dyez i syete dias del mez, sovre los montes de Ararat. 5I las aguas fueron andando i menguando asta el mez dezeno; en el mez dezeno, al primer dia del mez, se aparesyeron las puntas de los montes. 6I fue ke al kavo de kuarenta dias, Noah avryo la ventana del arka ke avia echo: 7i solto el kuervo, el kual salyo, salyendo i tornando, asta ke se sekaron las aguas de sovre la tyerra. 8Tambyen solto la palomba de kon el, para ver si las aguas se avian alivyanado de sovre las fases de la tyerra: 9I no ayo la palomba olgansa por la planta de su pye, i torno a el al arka, porke las aguas estavan sovre las fases de toda la tyerra: i el estendyo su mano, i la tomo, i la trusho a si en el arka. 10I espero otros syete dias mas, i solto otra vez la palomba del arka. 11I la palomba vino a el a la ora de la tarde, i ek, una oja de olivo arrankada en su boka; i supo Noah ke las aguas se avian alivyanado de sovre la tyerra. 12I espero otros syete dias mas, i solto la palomba, i no torno a el mas. 13I fue, ke en el anyo seshsyentos i uno de Noah, en el mez primero, el primer dia del mez, se enshugaron las aguas de sovre la tyerra; i kito Noah la kuvyerta del arka, i miro, i ek, las fases de la tyerra estavan enshutas. 14I en el mez segundo, a los vente i syete dias del mez, se seko la tyerra.
15I avlo el Dyo a Noah, dizyendo, 16sal del arka tu, i tu mujer, i tus ijos, i las mujeres de tus ijos kontigo. 17Todo animal ke esta kontigo de toda karne, de aves, i de kuatropeas, i de toda removilya ke se remoeve sovre la tyerra, saka kontigo, i se multipliken en la tyerra, i fruchiguen, i muchiguen sovre la tyerra 18i salyo Noah, i sus ijos, i su mujer, i las mujeres de sus ijos kon el: 19todo animal, toda removilya, i toda ave, todo lo ke se remoeve sovre la tyerra, segun sus rasas, salyeron del arka.
20I fraguo Noah ara a A’; i tomo de todo animal limpyo, i de toda ave limpya, i also alsasyones sovre el ara. 21I golyo A’ guezmo resivivle; i disho A’ en su korason, no tornare mas a maldizir la tyerra por kavza del ombre, aunke el apetite del korason del ombre es malo dezde su mosedad; i no tornare mas a erir todo bivo, komo ize. 22En adelante todos los dias de la tyerra, sementera i segada, i frio i kalor, i verano i invyerno, i dia i noche, no se baldaran.
9
1I bendisho el Dyo a Noah i a sus ijos, i les disho, fruchiguad i muchiguad, i inchid la tyerra. 2I vuestro temor i vuestro myedo sera sovre todo animal de la tyerra, i sovre toda ave de los syelos, en todo lo ke se removera en la tyerra, i en todos los peshes de la mar; en vuestra mano son entregados. 3Toda removilya, ke es biva, vos sera por komida; komo la yerva verde vos di lo todo. 4Solamente karne kon su vida, ke es su sangre, no komash. 5I de syerto vuestra sangre de vuestra vida rekerire; de mano de todo animal la rekerire, i de mano del ombre; de mano del varon su ermano rekerire la vida del ombre. 6El ke vyerte sangre del ombre, por el ombre su sangre sera vertida; porke en la forma del Dyo izo al ombre. 7I vozotros, fruchiguad i muchiguad, i multiplikadvos en la tyerra, i muchiguadvos en eya.
8I avlo el Dyo a Noah, i a sus ijos kon el, dizyendo, 9i yo, ek, yo afirmo mi firmamyento kon vozotros, i kon vuestro semen despues de vozotros; 10i kon toda alma biva ke esta kon vozotros, de aves, i de kuatropeas i de todo animal de la tyerra kon vozotros, de todos los ke salyeron del arka asta todo animal de la tyerra. 11I afirmare mi firmamyento kon vozotros, i no sera tajada mas toda karne por aguas de deluvyo, i no avra mas deluvyo para destruir la tyerra. 12I disho el Dyo, esta es la senyal del firmamyento ke yo doy entre mi i vozotros, i toda alma biva ke esta kon vozotros, por djerenansyos de syempre: 13yo pongo mi arko en la nuve, i sera por senyal de firmamyento entre mi i la tyerra. 14I sera, ke kuando yo anuvlare nuves sovre la tyerra, se aparesera el arko en la nuve; 15i me akordare de mi firmamyento ke esta entre mi i vozotros, i toda alma biva de toda karne; i no seran mas las aguas por deluvyo para destruir toda karne. 16I estara el arko en la nuve, i lo vere para akordarme del firmamyento de syempre entre el Dyo i toda alma biva de toda karne ke esta sovre la tyerra. 17I disho el Dyo a Noah, esta es la senyal del firmamyento ke afirmi entre mi i toda karne ke esta sovre la tyerra.
18I los ijos de Noah, ke salyeron del arka, fueron Shem, i Ham, i Yefet: i Ham es el padre de Kenaan. 19Estos tres son los ijos de Noah; i de estos fue povlada toda la tyerra. 20I empeso Noah a ser lavrador de la tyerra, i planto una vinya. 21I bevyo del vino, i se emborracho, i estava deskuvyerto en medyo de su tyenda. 22I Ham padre de Kenaan, vido la desnudez de su padre, i lo konto a sus dos ermanos afuera. 23I tomo Shem i Yefet un panyo, i lo puzyeron sovre los ombros de ambos eyos, i kaminaron atras, i kuvryeron la desnudez de su padre, i syendo sus fases atras, no vyeron la desnudez de su padre. 24I se desperto Noah de su vino, i supo lo ke le avia echo su ijo pekenyo. 25I disho, maldicho sea Kenaan, syervo de syervos sera a sus ermanos. 26I disho, bendicho sea A’ Dyo de Shem; i sea Kenaan syervo a el. 27Ensanche el Dyo a Yefet, i more en las tyendas de Shem; i sea Kenaan syervo a el. 28I bivyo Noah despues del deluvyo tressyentos i sinkuenta anyos 29i fueron todos los dias de Noah novesyentos i sinkuenta anyos i muryo.
10
1I estos son los djerenansyos de los ijos de Noah, Shem, Ham, i Yefet; i les nasyeron ijos despues del deluvyo. 2Los ijos de Yefet: Gomer, i Magog, i Maday, i Yavan, i Tuval, i Mesheh, i Tiras. 3I los ijos de Gomer: Ashkenaz, i Rifat, i Togarma. 4I los ijos de Yavan: Elisha, i Tarshish, Kitim, i Dodanim. 5Por estos fueron espartidas las izlas de las djentes en sus tyerras, kada uno segun su linguaje, segun sus linajes en sus nasyones. 6I los ijos de Ham: Kush, i Mitsrayim, i Put, i Kenaan. 7I los ijos de Kush: Seva, i Havila, i Savta, i Raama, i Sabteha: i los ijos de Raama; Sheva, i Dedan. 8I Kush endjendro a Nimrod; el empeso a ser barragan en la tyerra. 9El fue barragan de kasa delante de A’: por tanto se dize, komo Nimrod, barragan de kasa delante de A’. 10I el prinsipyo de su reyno fue Babel, i Ereh, i Akad, i Kalne en la tyerra de Shinar. 11De akeya tyerra salyo Ashur, i fraguo a Nineve, i la sivdad de Rehovot, i Kalah. 12I a Resen, entre Ninve i Kalah; esta es sivdad grande. 13I Mitsrayim endjendro a Ludim, i a Anamim, i a Le’havim, i a Naftuhim. 14I a Patrusim, i a Kasluhim; de onde salyeron Pelishtim, i a Kaftorim.
15I Kenaan endjendro a Tsidon su primodjenito, i a Het. 16I al Yevusio; i al Emorio, i al Girgashio, 17i al Hivio, i al Arkio, i al Sinio. 18I al Arvadio, i al Tsemario, i al Hamatio: i despues se esparzyeron los linajes de los Kenaanios. 19I fue el termino de los Kenaanios dezde Tsidon, vinyendo a Gerar, asta Aza, vinyendo a Sedom i Amora i Adma, i Tsevoyim asta Lasha. 20Estos son los ijos de Ham, por sus linajes, por sus linguajes, en sus tyerras, en sus nasyones.
21I le nasyeron ijos tambyen a Shem, padre de todos los ijos de Ever i ermano mayor de Yefet. 22Los ijos de Shem; Elam, i Ashur, i Arpahshad, i Lud, i Aram. 23I los ijos de Aram: Uts, i Hul, i Geter, i Mash. 24I Arpahshad endjendro a Shelah, i Shelah endjendro a Ever. 25I a Ever nasyeron dos ijos: el nombre del uno fue Peleg; porke en sus dias fue espartida la tyerra; i el nombre de su ermano, Yoktan. 26I Yoktan endjendro a Almodad, i a Shelef, i a Hatsarmavet, i a Yerah, 27i a ‘Hadoram, i a Uzal, i a Dikla, 28i a Oval, i a Avimael, i a Sheva, 29i a Ofir, i a Havila, i a Yovav: todos estos fueron ijos de Yoktan. 30I fue su morada dezde Mesha, vinyendo a Sefar, monte del oryente. 31Estos fueron los ijos de Shem segun sus linajes, segun sus linguajes, en sus tyerras, por sus nasyones. 32Estos son los linajes de los ijos de Noah por sus djerenansyos, en sus nasyones: i de estos fueron espartidas las djentes en la tyerra despues del deluvyo.
11
1I era toda la tyerra de una avla, i de unas mizmas palavras. 2I akontesyo ke komo partyeron del oryente, ayaron una vega en la tyerra de Shinar, i moraron ayi. 3I disheron kada uno a su kompanyero, vamos, agamos ladriyos, i los kememos kon fuego. I les fue el ladriyo en lugar de pyedra, i el lodo les fue en lugar de barro. 4I disheron, vamos, fraguemos para nos una sivdad i una torre, i alkanse su punta asta los syelos; i agamos para nos fama, no sea ke seamos esparzidos sovre las fases de toda la tyerra. 5I desendyo A’ para ver la sivdad i la torre ke fraguavan los ijos del ombre. 6I disho A’, ek, el puevlo es uno, i la avla de todos eyos es una. I esto es el empesejo de su azer, i agora nada les sera vedado de lo ke pensaron de azer. 7Vamos, desendamos, i rebolvamos ayi su avla, para ke no entyendan kada uno la avla de su kompanyero. 8I los esparzyo A’ de ayi sovre las fases de toda la tyerra; i desharon de fraguar la sivdad. 9Por tanto fue yamado su nombre Bavel, porke ayi rebolvyo A’ la avla de toda la tyerra, i de ayi los esparzyo A’ sovre las fases de toda la tyerra.
10Estos son los djerenansyos de Shem: Shem de edad de syen anyos, endjendro a Arpahshad, dos anyos despues del deluvyo. 11I bivyo Shem, despues ke endjendro a Arpahshad, kinyentos anyos, i endjendro ijos i ijas.
12I Arpahshad bivyo trenta i sinko anyos, i endjendro a Shelah. 13I bivyo Arpahshad, despues ke endjendro a Shelah, kuatrosyentos i tres anyos, i endjendro ijos i ijas.
14I bivyo Shelah trenta anyos, i endjendro a Ever. 15I bivyo Shelah, despues ke endjendro a Ever, kuatrosyentos i tres anyos, i endjendro ijos i ijas.
16I bivyo Ever trenta i kuatro anyos, i endjendro a Peleg. 17I bivyo Ever, despues ke endjendro a Peleg, kuatrosyentos i trenta anyos, i endjendro ijos i ijas.
18I bivyo Peleg trenta anyos, i endjendro a Reu. 19I bivyo Peleg, despues ke endjendro a Reu, dossyentos i nueve anyos, i endjendro ijos i ijas.
20I bivyo Reu trenta i dos anyos, i endjendro a Serug. 21I bivyo Reu, despues ke endjendro a Serug, dossyentos i syete anyos, i endjendro ijos i ijas.
22I bivyo Serug trenta anyos, i endjendro a Nahor. 23I bivyo Serug, despues ke endjendro a Nahor, dossyentos anyos, i endjendro ijos i ijas.
24I bivyo Nahor vente i nueve anyos, i endjendro a Terah. 25I bivyo Nahor, despues ke endjendro a Terah, syento i dyez i nueve anyos, i endjendro ijos i ijas.
26I bivyo Terah setenta anyos, i endjendro a Avram, i Nahor, i a ‘Haran. 27I estos son los djerenansyos de Terah: Terah endjendro a Avram, a Nahor, i a ‘Haran; i ‘Haran endjendro a Lot. 28I muryo ‘Haran delante de Terah su padre, en la tyerra de su nasimyento, en Ur de los Kaldeos. 29I tomaron Avram i Nahor para si mujeres: el nombre de la mujer de Avram fue Saray, i el nombre de la mujer de Nahor, Milka, ija de ‘Haran, padre de Milka i padre de Yiska. 30Ma Saray fue manyera; no tenia ijo. 31I tomo Terah a Avram su ijo, i a Lot, ijo de ‘Haran, ijo de su ijo, i a Saray su nuera, mujer de Avram su ijo; i salyeron kon eyos de Ur de los Kaldeos para ir a la tyerra de Kenaan, i vinyeron asta Haran i moraron ayi. 32I fueron los dias de Terah dossyentos i sinko anyos, i muryo Terah en Haran.
Continúa >>
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
