Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 3 LEH LEHA (12 a 17)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

3-LEH LEHA

12

¹I disho A’ a Avram, vate de tu tyerra, i de tu parentesko, i de la kaza de tu padre, a la tyerra ke te mostrare: ²i te are por djente grande, i te bendizire, i engrandesere tu nombre, i seras bendisyon. ³I bendizire a los ke te bendizen, i a los ke te maldizen maldizire; i seran bendichos en ti todos los linajes de la tyerra. ⁴I se fue Avram, komo A’ le avlo, i anduvo kon el Lot: i era Avram de edad de setenta i sinko anyos kuando salyo de Haran. ⁵I tomo Avram a Saray su mujer, i a Lot, ijo de su ermano, i toda su azyenda ke avian ganado, i las almas ke avian resivido en Haran, i salyeron para ir a tyerra de Kenaan; i a tyerra de Kenaan vinyeron. ⁶I paso Avram por la tyerra asta el lugar de Shehem, asta la enzina de More. I el Kenaanio estava entonses en la tyerra. ⁷I se aparesyo A’ a Avram, i disho, a tu semen dare esta tyerra. I fraguo ayi ara a A’ ke se le aparesyo. ⁸I partyo de ayi al monte al oryente de Bet-El, i tendyo su tyenda, tenyendo a Bet-El al oksidente, i a Ay al oryente: i fraguo ayi ara a A’, i yamo en el nombre de A’. ⁹I partyo Avram de ayi, kaminando i movyendose al sud.

¹⁰I uvo ambre en la tyerra; i desendyo Avram a Ayifto para pelegrinar ayi; porke era pezgada la ambre en la tyerra. ¹¹I akontesyo ke komo se aserko a entrar en Ayifto, disho a Saray su mujer, ek agora, yo se ke eres mujer ermoza de vista: ¹²i sera, ke kuando te veran los Aisyanos, diran, esta es su mujer; i me mataran a mi, i a ti te abidiguaran. ¹³Di, te rogo, ke eres mi ermana para ke sea byen a mi por amor de ti, i biva mi alma por tu kavza. ¹⁴I akontesyo, ke komo entro Avram en Ayifto, los Aisyanos vyeron la mujer ke era muy ermoza. ¹⁵I la vyeron los mayorales de Paro, i la alavaron a Paro: i fue tomada la mujer a kaza de Paro. ¹⁶I a Avram izo byen por kavza de eya: i tuvo ovejas, i vakas, i aznos, i syervos, i syervas, i aznas, i kameyos. ¹⁷Ma A’ yago a Paro i a su kaza kon yagas grandes por kavza de Saray, mujer de Avram. ¹⁸I Paro yamo a Avram, i disho, ¿ke es esto ke me iziste? ¹⁹¿Porke no me dishiste ke era tu mujer? ¿porke dishiste, mi ermana es, dando lugar a ke la tomara para mi por mujer? I agora, ek tu mujer, tomala, i vate. ²⁰I Paro enkomendo sovre el a varones, i akompanyeron a el, i a su mujer, i a todo lo ke tenia.

13

¹I suvyo Avram de Ayifto al sud, el, i su mujer, i todo le ke tenia, i Lot kon el. ²I Avram era muy riko en ganado, en plata, i en oro. ³I anduvo por sus viajes del sud asta Bet-El, asta el lugar onde estava su tyenda en el prinsipyo, entre Bet-El i Ay; ⁴al lugar del ara ke izo ayi en la primeria; i yamo ayi Avram en el nombre de A’.

⁵I tambyen Lot, ke andava kon Avram, tenia ovejas, i vakas, i tyendas. ⁶I la tyerra no los soportava para morar djuntos, porke su azyenda era mucha, i no podian morar auna. ⁷I uvo baraja entre los pastores del ganado de Avram, i los pastores del ganado de Lot. I el Kenaanio i el Perizio moravan entonses en la tyerra. ⁸I disho Avram a Lot, te rogo ke no ayga baraja entre mi i ti, i entre mis pastores i tus pastores; porke somos ermanos. ⁹¿No esta toda la tyerra delante de ti? apartate de mi, te rogo: si fueres a la izkyerda yo ire a la derecha; i si a la derecha, yo ire a la izkyerda. ¹⁰I also Lot sus ojos, i vido toda la yanura del Yarden, ke toda eya era byen arregada, antes ke destruyera A’ a Sedom i a Amora, komo un guerto de A’, komo la tyerra de Ayifto entrando en Tsoar. ¹¹I Lot eskojyo para si toda la yanura del Yarden; i partyo Lot al oryente; i se apartaron el uno del otro. ¹²Avram moro en la tyerra de Kenaan, i Lot moro en las sivdades de la yanura, i atendio asta Sedom. ¹³Ma los ombres de Sedom eran malos i pekadores kontra A’ en gran manera.

¹⁴I disho A’ a Avram, despues ke Lot se aparto de kon el, alsa agora tus ojos, i mira dezde el lugar onde estas al norte, i al sud, i al oryente, i al oksidente; ¹⁵porke toda la tyerra ke ves, a ti la dare, i a tu semen para syempre. ¹⁶I pondri tu semen komo el polvo de la tyerra, ke si alguno puede kontar el polvo de la tyerra, tambyen tu semen sera kontado. ¹⁷Levantate, kamina por la tyerra a su largura i a su anchura; porke a ti la dare. ¹⁸I Avram atendio, i vino, i moro en las enzinas de Mamre, ke es Hevron; i fraguo ayi ara a A’.

14

¹I akontesyo en los dias de Amrafel, rey de Shinar, Aryoh, rey de Elasar, Kedorlaomer, rey de Elam, i Tidal, rey de Goyim; ²ke estos izyeron gerra kon Bera, rey de Sedom, i kon Birsha, rey de Amora, Shinav, rey de Adma, i Shemever, rey de Tsevoyim, i el rey de Bela, la kual es Tsoar. ³Todos estos se djuntaron en el vaye de Sidim, el kual es el mar salado. ⁴Dodje anyos sirvyeron a Kedarlaomer, i en el tredjen anyo revelyaron. ⁵I en el katorzen anyo vino Kedarlaomer, i los reyes ke estavan kon el, i eryeron a los Refaim en Ashterot-Karnayim, i a los Zuzim en ‘Ham, i a los Emim en Shave-Kiryatayim, ⁶i a los Horim en su monte de Seir, asta El-Paran, ke esta djunto al dizyerto. ⁷I tornaron, i vinyeron a En-Mishpat, ke es Kadesh, i eryeron todo el kampo de los Amalekitas, i tambyen el Emorio ke morava en Hatsetson-Tamar. ⁸I salyo el rey de Sedom, i el rey de Amora, i el rey de Adma, i el rey de Tsevoyim, i el rey de Bela, ke es Tsoar, i ordenaron kontra eyos pelea en el vaye de Sidim: ⁹kontra Kedorlaomer, rey de Elam, i Tidal, rey de Goyim, i Amrafel rey de Shinar, i Aryoh, rey de Elasar; kuatro reyes kontra sinko. ¹⁰I el vaye de Sidim era yeno de pozos de barro, i fuyeron el rey de Sedom, i el rey de Amora, i kayeron ayi, i los ke remanesyeron fuyeron al monte. ¹¹I tomaron toda la azyenda de Sedom i de Amora, i todo su mantenimyento, i se fueron, ¹²I tomaron a Lot, ijo del ermano de Avram, ke morava en Sedom, i su azyenda, i se fueron. ¹³I vino uno ke avia eskapado, i dyo avizo a Avram el Ebreo, ke morava en las enzinas de Mamre el Emorio, ermano de Eshkol, i ermano de Aner: i estos estavan aunados en firmamyento kon Avram. ¹⁴I kuando oyo Avram ke su ermano fue kativado, armo sus kriados, nasidos en su kaza, tressyentos i dyez i ocho, i los persigyo asta Dan. ¹⁵I se espartyo sovre eyos, el i sus syervos, de noche, i los eryo, i los persigyo asta Hova, ke esta a la [1]izkyerda de Damesek. ¹⁶I torno toda la azyenda, i tambyen a Lot su ermano i su azyenda torno, i tambyen las mujeres i el puevlo.

¹⁷I salyo el rey de Sedom a resivirlo, despues ke torno de erir a Kedarlaomer i a los reyes ke estavan kon el, al vaye de Shave, ke es el vaye del rey. ¹⁸I Malki-Tsedek, rey de Shalem, sako pan i vino: i el era saserdote (ko’hen) del Dyo Altisimo. ¹⁹I lo bendisho, i disho, bendicho sea Avram del Dyo Altisimo, patron de los syelos i de la tyerra: ²⁰i bendicho sea el Dyo Altisimo, ke entrego tus enemigos en tu mano. I Avram le dyo dyezmo de todo. ²¹I el rey de Sedom disho a Avram, dame las personas, i toma para ti la azyenda. ²²I disho Avram al rey de Sedom, alsi mi mano a A’ Dyo Altisimo, patron de los syelos i de la tyerra, ²³ke dezde un ilo asta la korrea de un sapato no tomare de todo lo ke es tuyo, para ke no digas, yo enrikesi a Avram; ²⁴sino solamente lo ke komyeron los mansevos, i la parte de los varones ke fueron konmigo, Aner, Eshkol, i Mamre; eyos tomaran su parte.

[1] o norte

15

¹Despues de estas kozas fue la palavra de A’ a Avram en vizyon, dizyendo, no temas Avram: yo soy tu mamparo; tu gualardon sera muy grande. ²I disho Avram, A’ Dyo, ¿ke me daras, syendo ke ando sin ijo, i el ke tyene mando de mi kaza es Eliezer de Damesek? ³I disho Avram, ek, no me diste semen; i ek, el [2]syervo de mi kaza me ereda. ⁴I ek, la palavra de A’ fue a el, dizyendo, no te eredara este, sino el ke saldra de tus entranyas, el te eredara. ⁵I lo sako afuera, i disho, mira agora a los syelos, i konta las estreyas, si las puedes kontar: i le disho, ansi sera tu semen. ⁶I kreyo a A’, i lo konto a el por djustedad. ⁷I le disho, yo soy A’ ke te saki de Ur de los Kaldeos, para darte esta tyerra para eredarla. ⁸I el disho, A’ Dyo, ¿en ke savre ke la eredare? ⁹I le disho, tomate una bezerra de tres anyos, i una kavra de tres anyos, i un barvez de tres anyos, i un tortolo, i un palombino. ¹⁰I tomo a si todos estos, i los partyo por en medyo, i puzo kada parte una enfrente de otra, ma los pasharos no partyo. ¹¹I desendian aves de prea sovre los kuerpos muertos, i las echava Avram. ¹²I kuando el sol estava para ponerse, adormemyento kayo sovre Avram, i ek, un espanto de eskuridad grande kayo sovre el. ¹³I disho a Avram, saver sepas ke tu semen sera pelegrino en tyerra ke no es suya, i los aran servir, i los afriiran kuatrosyentos anyos. ¹⁴I tambyen a la djente a kyen serviran, djuzgare yo, i despues de esto saldran kon ganansya grande. ¹⁵I tu vendras a tus padres en paz, seras enterrado en buena vejez. ¹⁶I en el kuarto djerenansyo tornaran aki; porke no se kumpliyo el delito del Emorio asta aki. ¹⁷I akontesyo, ke kuando se puzo el sol, uvo eskuridad, i ek, un orno de umo, i un tizon de fuego ke paso entre estos tajos. ¹⁸En akel dia tajo A’ firmamyento kon Avram, dizyendo, a tu semen tengo dado esta tyerra, dezde el rio de Ayifto asta el rio grande, el rio Eufrates: ¹⁹al Kenio, i al Kenizio, i al Kadmonio, ²⁰i al Hitio, i al Perizio, i a los Refaim, ²¹i al Emorio, i al Kenaanio, i al Girgashio, i al Yevusio.

[2] Ebreo:  ijo

16

¹I Saray, mujer de Avram, no le paria: i eya tenia una syerva Aesyana, i su nombre ‘Hagar. ²I disho Saray a Avram, ek agora, me detuvo A’ de parir; te rogo ke vengas a mi syerva; kizas sere aijada de eya. ³I eskucho Avram a la boz de Saray, i Saray, mujer de Avram, tomo a ‘Hagar, la Aesyana, su syerva, al kavo de dyez anyos ke avia morado Avram en la tyerra de Kenaan, i la dyo a Avram su marido por mujer. ⁴I el vino a ‘Hagar, i eya se ensinto: i kuando vido ke se avia ensintado; su sinyora fue menospresyada en sus ojos. ⁵I disho Saray a Avram, mi indjurya sea sovre ti; yo puzi mi syerva en tu seno, i kuando vido ke avia ensintado, yo fui menospresyada en sus ojos; djuzge A’ entre mi i ti. ⁶I disho Avram a Saray, ek, tu syerva esta en tu mano; az kon eya lo ke te plaze. I Saray la afrio, i eya fuyo de sus fases.

⁷I el andjel de A’ la topo al lado de una fuente de agua en el dizyerto, al lado de la fuente en el kamino de Shur: ⁸i disho, ‘Hagar, syerva de Saray, ¿de onde vyenes, i onde vas? i eya disho, fuygo de las fases de Saray mi sinyora. ⁹I le disho el andjel de A’, tornate a tu sinyora, i sodjiftate debasho de sus manos. ¹⁰I le disho el andjel de A’, muchiguar muchiguare tu semen, ke no sera kontado pur muchedumbre. ¹¹I le disho el andjel de A’, ek, tu estas prenyada, i pariras un ijo, i yamaras su nombre Yishmael; porke oyo A’ tu afriisyon. ¹²I el sera ombre zevro; su mano kontra todos, i la mano de todos kontra el, i delante de todos sus ermanos morara. ¹³I yamo el nombre de A’ ke avlo kon eya, tu eres el Dyo de mi vista: porke disho ¿tambyen aki vide despues de mi vizyon? ¹⁴por tanto yamo al pozo Beer-Lahay-Roi, ek, esta entre Kadesh i Bered. ¹⁵I paryo ‘Hagar a Avram un ijo, i yamo Avram el nombre de su ijo, ke paryo ‘Hagar, Yishmael. ¹⁶I Avram era de edad de ochenta anyos, kuando paryo ‘Hagar a Yishmael a Avram.

17

¹I kuando fue de edad de noventa i nueve anyos, se aparesyo A’ a Avram, i le disho, yo soy el Dyo Todo Poderozo. Anda delante de mi, i se perfekto. ²I pondre mi firmamyento entre mi i ti, i te muchiguare muy mucho. ³I se echo Avram sovre sus fases; i el Dyo avlo kon el, dizyendo, ⁴yo, ek, mi firmamyento esta kontigo, i seras por padre de muchedumbre de djentes. ⁵I no sera yamado mas tu nombre Avram, ma sera tu nombre Avra’ham; porke por padre de muchdeumbre de djentes te puzi. ⁶I te are fruchiguar muy mucho, i te pondre por djentes; i reyes saldran de ti. ⁷I afirmare mi firmamyento entre mi i ti, i tu semen despues de ti, en sus djerenansyos, por firmamyento de syempre, para ser a ti por Dyo, i a tu semen despues de ti. ⁸I dare a ti, i a tu semen despues de ti, la tyerra de tus pelegrinasyones, toda la tyerra de Kenaan, por posesyon de syempre; i sere a eyos por Dyo. ⁹I disho el Dyo a Avra’ham, tu empero guardaras mi firmamyento, tu i tu semen despues de ti en sus djerenansyos. ¹⁰Este es mi firmamyento ke guardaresh entre mi i vozotros, i tu semen despues de ti; sera sirkunsido todo macho entre vozotros. ¹¹I sirkunseresh la karne de vuestra serradura, i sera por senyal del firmamyento entre mi i vozotros. ¹²I de edad de ocho dias sera sirkunsido entre vozotros todo macho en vuestros djerenansyos, el nasido en kaza, i el komprado kon moneda de kualkyer estranjero, ke no fuere de tu semen. ¹³Sirkunser sera sirkunsido el nasido en tu kaza , i el komprado kon tu moneda; i estara mi firmamyento en vuestra karne por firmamyento de syempre. ¹⁴I el macho serrado ke no uvyere sirkunsido la karne de su serradura, akeya persona sera tajada de sus puevlos; baldo mi firmamyento.

¹⁵I disho el Dyo a Avra’ham, a Saray tu mujer, no yamaras su nombre Saray, ma Sara sera su nombre, ¹⁶I la bendizire, i tambyen te dare de eya un ijo, i la bendizire, i sera madre de djentes: reyes de puevlos seran de eya. ¹⁷I se echo Avra’ham sovre sus fases, i se rio, i disho en su korason, ¿a ombre de edad de syen anyos sera nasido ijo? ¿i Sara, ya de edad de noventa anyos, a de parir? ¹⁸I disho Avra’ham al Dyo, ¡kyen dyese ke Yishmael biva delante de ti! ¹⁹I disho el Dyo, syertamente Sara tu mujer te parira un ijo, i yamaras su nombre Yitshak: i afirmare mi firmamyento kon el por firmamyento de syempre a su semen despues de el. ²⁰I por Yishmael tambyen te oi; ek; lo bendishi, i lo are fruchiguar, i lo muchiguare muy mucho: dodje mayorales endjendrara, i lo pondre por djente grande. ²¹Ma mi firmamyento afirmare kon Yitshak, ke te parira Sara a este plazo al otro anyo. ²²I akavo de avlar kon el, i suvyo el Dyo de kon Avra’ham.

²³I tomo Avra’ham a Yishmael su ijo, i a todos los nasidos en su kaza, i a todos los komprados kon su moneda, a todo macho entre los varones de la kaza de Avra’ham, i sirkunsyo la karne de su serradura en akel mizmo dia, komo le avlo el Dyo. ²⁴I era Avra’ham de edad de noventa i nueve anyos, kuando sirkunsyo la karne de su serradura. ²⁵I Yishmael su ijo era de edad de tredje anyos, kuando fue sirkunsida la karne de su serradura. ²⁶En akel mizmo dia fue sirkunsido Avra’ham i Yishmael su ijo: ²⁷i todos los varones de su kaza, el nasido en kaza, i el komprado kon moneda del estranjero, fueron sirkunsidos kon el.

Continúa >>

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.