Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 6 TOLDOT (26 a 28)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

6 – TOLDOT

¹⁹I estos son los djerenansyos de Yitshak, ijo de Avra’ham: Avra’ham endjendro a Yitshak. ²⁰I era Yitshak de edad de kuarenta anyos kuando tomo por mujer a Rivka, ija de Betuel el Aramio de Padan-Aram, ermana de Lavan el Aramio. ²¹I izo Yitshak orasyon a A’ por su mujer, porke era manyera; i lo resivyo A’, i se ensinto Rivka su mujer. ²²I los ijos se kombatyeron adyentro de eya; i disho, si ansi es, ¿porke estoy ansi? i fue a rekerir a A’. ²³I le disho A’, dos djentes ay en tu vyentre, i dos djentios se espartiran de tus intestinas; i el un djentio se enfortesera mas ke el otro djentio; i el mayor servira al menor. ²⁴I se kumplyeron sus dias para parir, i ek, melisyos en su vyentre. ²⁵I salyo el primero ruvyo, todo el komo un manto peludo; i yamaron su nombre Esav. ²⁶I despues salyo su ermano, i su mano travava al karkanyal de Esav; i fue yamado su nombre Yaakov. I era Yitshak de edad de sesenta anyos kuando eya los paryo. ²⁷I se engrandesyeron los muchachos: i Esav fue varon savyo en la kasa, varon del kampo; i Yaakov fue varon kyeto, moran en tyendas. ²⁸I amo Yitshak a Esav, porke komia de su kasa; ma Rivka amava a Yaakov.

²⁹I gizo Yaakov un gizado: i vino Esav del kampo, i estava kansado. ³⁰I Esav disho a Yaakov, te rogo ke me des a komer de este vermejo, este vermejo, porke estoy kansado: por tanto fue yamado su nombre Edom. ³¹I disho Yaakov, vendeme oy tu primodjenitura. ³²I disho Esav, ek, yo me voy a murir, ¿i ke me servira la primodjenitura? ³³I disho Yaakov, djurame oy. I le djuro, i vendyo su primodjenitura a Yaakov. ³⁴Entonses Yaakov dyo a Esav pan i gizado de lentejas; i el komyo i bevyo, i se levanto i se fue. Ansi menospresyo Esav la primodjenitura.

27

¹I uvo ambre en la tyerra, afuera de la primera ambre ke fue en los dias de Avra’ham. I Yitshak se fue a Avimeleh, rey de los Pelishtios, a Gerar. ²I se le aparesyo A’, i disho no desyendas a Ayifto; mora en la tyerra ke yo te dire. ³Pelegrina en esta tyerra, i yo sere kontigo, i te bendizire; porke a ti, i a tu semen, dare todas estas tyerras, i afirmare la djura ke djuri a Avra’ham tu padre: ⁴i muchiguare tu semen komo las estreyas de los syelos, i dare a tu semen todas estas tyerras; i en tu semen seran bendichas todas las djentes de la tyerra; ⁵por lo ke ovedesyo Avra’ham a mi boz, i guardo mi guardya, mis enkomendansas, mis fueros, i mis leyes. ⁶I moro Yitshak en Gerar.

⁷I los varones del lugar le demandaron tokante a su mujer; i disho , mi ermana es: porke tuvo myedo de dizir , mi mujer es; kizas, disho el, los varones del lugar me mataran por kavza de Rivka, porke era ermoza de vista. ⁸I fue ke komo se le alargaron los dias ayi, Avimeleh, rey de los Pelishtios, miro por la ventana, i vido, i ek, Yitshak djugava kon Rivka su mujer. ⁹I yamo Avimeleh a Yitshak, i disho, ek, de syerto eya es tu mujer: ¿i komo dishiste, es mi ermana? i Yitshak le disho, porke dishe, no sea ke muera por kavza de eya. ¹⁰I disho Avimeleh, ¿ke es esto ke nos iziste? por poko uvyera yazido alguno del puevlo kon tu mujer, i uvyeras traido kulpa sovre nozotros. ¹¹I Avimeleh enkomendo a todo el puevlo, dizyendo, el ke tokare a este varon o a su mujer, matar sera matado.

¹²I sembro Yitshak en akeya tyerra, i topo en akel anyo syen tantos; i lo bendisho A’. ¹³I se engrandesyo el varon, i iva adelantando i engrandesyendose asta ke se engrandesyo mucho. ¹⁴I tenia ganado de ovejas, i ganado de vakas, i lavransa grande; i los Pelishtios lo enbidyaron. ¹⁵I todos los pozos ke avian kavado los syervos de su padre en los dias de Avra’ham su padre, los Pelishtios los serraron, i los inchyeron de polvo. ¹⁶I disho Avimeleh a Yitshak, vate de kon nozotros; porke te enfortesiste mas mucho ke nozotros. ¹⁷I Yitshak se fue de ayi, i pozo en el vaye de Gerar, i moro ayi. ¹⁸I torno Yitshak i kavo los pozos de agua, ke avian kavado en los dias de Avra’ham su padre; porke los Pelishtios los avian serrado despues de la muerte de Avra’ham; i los yamo nombres komo los nombres ke les avia yamado su padre. ¹⁹I los syervos de Yitshak kavaron en el vaye, i toparon ayi un pozo de aguas manantes. ²⁰I los pastores de Gerar barajaron kon los pastores de Yitshak, dizyendo, el agua es nuestara; i yamo el nombre del pozo Esek, porke disputaron kon el. ²¹I kavaron otro pozo, i barajaron tambyen sovre el; i yamo su nombre Sitna. ²²I se aparto de ayi, i kavo otro pozo, i no barajaron sovre el; i yamo su nombre Rehovot; i disho, porke agora izo enshanchar A’ a nozotros, i fruchiguaremos en la tyerra.

²³I suvyo de ayi a Beer-Sheva. ²⁴I se le aparesyo A’ en akeya noche, i disho, yo soy el Dyo de Avra’ham tu padre; no temas, porke yo soy kontigo, i te bendizire, i muchiguare tu semen por amor de Avra’ham mi syervo. ²⁵I fraguo ayi ara, i yamo en el nombre de A’, i tendyo ayi su tyenda; i kavaron ayi los syervos de Yitshak un pozo.

²⁶I Avimeleh vino a el dezde Gerar, i Ahuzat amigo suyo, i Pihol, mayoral de su fonsado. ²⁷I Yitshak les disho, ¿porke vinistesh a mi, syendo ke me aborresistesh, i me enbiastesh de entre vozotros. ²⁸I disheron, ver vemos ke A’ es kontigo, i dishimos ayga agora djura entre nozotros, entre nozotros i ti, i tajaremos firmamyento kontigo; ²⁹ke nos agas mal, komo nozotros no te tokimos, i komo solamente te izimos byen, i te enbiimos en paz: tu agora, bendicho de A’. ³⁰I les izo konbite, i komyeron i bevyeron. ³¹I madrugaron por la manyana, i djuraron el uno al otro, i Yitshak los enbio , i partyeron de el en paz. ³²I fue le en akel dia vinyeron los syervos de Yitshak. I le avizaron tokante al pozo ke avian kavado, i le disheron, topimos agua. ³³I lo yamo Shiva: por tanto el nombre de la sivdad es Beer-Sheva asta este dia.

³⁴I kuando Esav fue de edad de kuarenta anyos, tomo por mujer a Ye’hudit, ija de Beeri el Hitio, i a Basmat, ija de Elon el Hitio. ³⁵I fueron amargura de espirito a Yitshak i a Rivka.

27

¹I fue, ke komo Yitshak se envejesyo, i sus ojos se eskuresyeron de vista, yamo a Esav su ijo el mayor, i le disho, mi ijo. I el disho, ekme. ²I disho, ek agora, me envejesi; no se el dia de mi muerte. ³Agora, pues, te rogo, toma tus armas, tu karkash, i tu arko, i sal al kampo, i kasa para mi kasa; ⁴i azme mandjares, komo yo amo, i traeme, i komere, para ke te bendiga mi alma antes ke muera. ⁵I Rivka estava oyendo en lo ke avlava Yitshak a Esav su ijo. I se fue Esav al kampo para kasar kasa, i para traerla.

⁶I Rivka avlo a Yaakov su ijo dizyendo, ek, oi a tu padre avlar kon Esav tu ermano, dizyendo, ⁷traeme kasa, i azme mandjares, para ke koma, i te bendiga delante de A’, antes de mi muerte. ⁸Agora pues, mi ijo, ovedese a mi boz en lo ke te enkomendo. ⁹Va agora al revanyo, i tomame de ayi dos kavritos buenos de las kavras; i are de eyos mandjares para tu padre, komo el ama. ¹⁰I tu los traeras a tu padre, i komera para ke te bendiga antes de su muerte. ¹¹I Yaakov disho a su madre, ek, Esav mi ermano es varon peludo, i yo varon lizo: ¹²kizas me palpara mi padre, i sere en sus ojos komo enganyador, i traere sovre mi maldisyon, i no bendisyon. ¹³I su madre le disho, sovre mi sea tu maldisyon, ijo mio; solamente ovedese a mi boz, i va, tomamelos. ¹⁴I el fue, i tomo, i los trusho a su madre; i su madre izo mandjares komo los ke su padre amava. ¹⁵I tomo Rivka los vestidos de Esav su ijo mayor, los kovdisyados ke eya tenia konsigo en kaza, i vistyo a Yaakov su ijo menor. ¹⁶I los kueros de los kavritos de las kavras puzo sovre sus manos, i sovre la alizadura de su serviz. ¹⁷I dyo los mandjares i el pan, ke avia echo, en mano de su ijo Yaakov.

¹⁸I vino a su padre, i disho, padre mio. I el disho, ekme; ¿kyen eres, ijo mio? ¹⁹I Yaakov disho a su padre, yo soy Esav tu primodjenito. Yo ize komo me avlaste; levantate te rogo, asentate i kome de mi kasa, para ke me bendiga tu alma. ²⁰I Yitshak disho a su ijo ¿komo es ke la topaste tan presto, mi ijo? i el disho , porke A’ tu Dyo la izo enkontrar delante de mi. ²¹I Yitshak disho a Yaakov, ayegate agora i te palpare, mi ijo, si tu eres mi ijo mizmo Esav, o no. ²²I se ayego Yaakov a Yitshak su padre; i el lo palpo, i disho, la boz es la boz de Yaakov, ma las manos, las manos de Esav. ²³I no lo konosyo, porke sus manos eran peludas, komo las manos de Esav su ermano; i lo bendisho. ²⁴I disho, ¿eres tu mi ijo mizmo Esav? i el disho yo soy. ²⁵I disho, ayegamela, i komere de la kasa de mi ijo, para ke te bendiga mi alma; i la ayego a el, i komyo; i le trusho vino, i bevyo. ²⁶I Yitshak su padre le disho, ayegate agora, i bezame, ijo mio. ²⁷I se ayego, i lo bezo; i golyo el guezmo de sus vestidos, i lo bendisho, i disho, mira, el guezmo de mi ijo es komo el guezmo de un kampo ke A’ bendisho. ²⁸I el Dyo te de del rosio de los syelos, i del las grosuras de la tyerra, i muchedumbre de sivera i de mosto: ²⁹te servan puevlos, i se enkorven a ti nasyones: se senyor de tus ermanos, i se enkorven a ti los ijos de tu madre: maldichos sean los ke te maldisheren, i bendichos los ke te bendisheren.

³⁰I fue, luego ke Yitshak uvo akavado de bendizir a Yaakov, i solamente salyendo avia salido Yaakov de delante de Yitshak su padre, ke Esav su ermano vino de su kasa. ³¹I izo el tambyen mandjares, i trusho a su padre, i disho a su padre, levantese mi padre, i koma de la kasa de su ijo, para ke me bendiga tu alma. ³²I Yitshak su padre le disho, ¿kyen eres tu? i el le disho, yo soy tu ijo, tu primodjenito Esav. ³³I se estremesyo Yitshak kon estremisyon grande, i disho, ¿kyen pues el ke kaso kasa, i me trusho, i komi de toda antes ke vinyeses? i lo bendishe: tambyen bendicho sera. ³⁴Komo Esav oyo las palavras de su padre, esklamo kon esklamasyon muy grande i muy amarga, i disho a su padre, bendizeme tambyen a mi, padre mio. ³⁵I el disho, vino tu ermano kon arte, i tomo tu bendisyon. ³⁶I disho, ¿no se yamo byen su nombre Yaakov, syendo ke me enganyo estas dos vezes? mi primodjenitura tomo, i ek, agora tomo mi bendisyon. ³⁷I disho ¿no guardaste bendisyon para mi? i respondyo Yitshak i disho a Esav, ek, yo lo puzi por tu senyor, i a todos sus ermanos le di por syervos; i de sivera i de mosto lo asofri: i agora, ¿ke te are a ti, ijo mio? ³⁸I Esav disho a su padre, ¿no tyenes mas ke una sola bendisyon, padre mio? bendizeme tambyen a mi, padre mio. I also Esav su boz, i yoro. ³⁹I respondyo Yitshak su padre, i le disho, ek, de las grosuras de la tyerra ser a tu morada, i del rosio de los syelos de arriva; ⁴⁰i por tu espada biviras, i a tu ermano serviras; i sera ke kuando te apartares, deskargaras su yugo de sovre tu serviz.

⁴¹I aborresyo Esav a Yaakov por la bendisyon kon ke su padre lo bendisho, i disho Esav en su korason, se ayegaran los dias del limunyo de mi padre, i matare a Yaakov mi ermano. ⁴²I fueron dichas a Rivka las palavras de Esav su ijo mayor; i eya enbio, i yamo a Yaakov su ijo menor, i le disho, ek, Esav tu ermano konortase sovre ti kon la idea de matarte. ⁴³I agora, ijo mio, ovedese a mi boz, i levantate, i fuyete a Lavan mi ermano, a Haran. ⁴⁴I estate kon el unos kuantos dias, asta ke torne la sanya de tu ermano; ⁴⁵asta ke torne el fulor de tu ermano de ti, i se olvide de lo ke le iziste; i yo enbiare i te tomare de aya. ¿Porke sere desijada de vozotros ambos en un dia? ⁴⁶I disho Rivka a Yitshak, me enfastyi de mi vida por kavza de las ijas de Het; si Yaakov tomare mujer de las ijas de Het, komo estas, de las ijas de la tyerra, ¿para ke kyero la vida?

28

¹I Yitshak yamo a Yaakov, i lo bendisho, i le enkomendo, i le disho, no tomes mujer de las ijas de Kenaan. ²Levantate, va a Padan-Aram, a kaza de Betuel, padre de tu madre, i tomate de ayi mujer de las ijas de Lavan, ermano de tu madre. ³I el Dyo Abastado te bendiga, i te aga fruchiguar, i te muchigue, i seas por kompanya de puevlos: ⁴i te di la bendisyon de Avra’ham, a ti, i a tu semen kontigo; para ke eredes la tyerra de tus pelegrinasyones, ke el Dyo dyo a Avra’ham. ⁵I enbio Yitshak a Yaakov; i se fue a Padan-Aram, a Lavan, ijo de Betuel el Aramio, ermano de Rivka, madre de Yaakov i de Esav. ⁶I vido ke Yitshak avia bendicho a Yaakov, i lo avia enbiado a Padan-Aram, para tomar para si mujer de ayi; i ke en bendizyendolo le avia enkomendado, dizyendo, no tomes mujer de las ijas de Kenaan; ⁷i ke Yaakov avia ovedesido a su padre i a su madre, i se avia ido a Padan-Aram; ⁸vido tambyen Esav ke las ijas de Kenaan paresian mal a Yitshak su padre; ⁹i se fue Esav a Yishmael, i tomo para si por mujer a Mahalat, ija de Yishmael, ijo de Avra’ham, ermana de Nevayot, afuera de sus otras mujeres.

Continúa >> 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.