Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 5 HAYEY SARA (23 a 25)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

5 – HAYEY SARA

23

¹I fue la vida de Sara syento i vente i syete anyos; tantos fueron los anyos de la vida de Sara. ²I muryo Sara en Kiryat-Arba, ke es Hevron en la tyerra de Kenaan: i vino Avra’ham a endechar a Sara, i a yorarla. ³I Avra’ham se levanto de delante de su muerto, i avlo a los ijos de Het, dizyendo, ⁴pelegrino i moradizo soy kon vozotros: dadme posesyon de fuesa kon vozotros, i enterrare mi muerto de delante de mi. ⁵I respondyeron los ijos de Het a Avra’ham, dizyendole, oyinos mi senyor; ⁶un prinsipe del Dyo eres entre nozotros; en la eskojedura de nuestras fuesas entyerra tu muerto; ninguno de nozotros te empedira su fuesa para ke entyerres tu muerto. ⁷I Avra’ham se levanto, i se enkorvo al puevlo de la tyerra, a los ijos de Het. ⁸I avlo kon eyos, dizyendo, si tenesh veluntad ke entyerre mi muerto de delante de mi, oidme, i rogad por mi kon Efron, ijo de Tsohar, ⁹ke me de la kueva de Mahpela ke tyene, ke esta en el kavo de su kampo; por presyo djusto ke me la de entre vozotros por posesyon de fuesa. ¹⁰I Efron morava entre los ijos de Het. I respondyo Efron el Hitio a Avra’ham en oidos de los ijos de Het, de todos los ke entravan por la puerta de su sivdad, dizyendo, ¹¹no mi senyor, oyeme: el kampo te doy, i la kueva ke esta en el, te la doy; delante de los ijos de mi puevlo te la doy: entyerra tu muerto. ¹²I Avra’ham se enkorvo delante del puevlo de la tyerra. ¹³I avlo a Efron en oidos de puevlo de la tyerra, dizyendo, ma si te plaze, te rogo ke me oygas: yo dare plata por el kampo; tomala de mi, i enterrare mi muerto ayi. ¹⁴I respondyo Efron a Avra’ham dizyendole, mi senyor, eskuchame: ¹⁵la tyerra vale kuatrosyentos siklos de plata, ¿ke es esto entre mi i ti? entyerra pues tu muerto. ¹⁶I eskucho Avra’ham a Efron; i pezo Avra’ham a Efron la plata ke avia dicho en oidos de los ijos de Het, kuatrosyentos siklos de plata, ke pasava entre los merkaderes. ¹⁷I el kampo de Efron ke estava en Mahpela enfrente de Mamre, el kampo i la kueva ke estava en el, i todos los arvoles ke avia en el kampo, ke avia en todo su termino al derredor, fue afirmado ¹⁸a Avra’ham por posesyon komprada a vista de los ijos de Het, de todos los ke entravan por la puerta de su sivdad. ¹⁹I despues de esto enterro Avra’ham a Sara su mujer en la kueva del kampo de Mahpela enfrente de Mamre, ke es Hevron en la tyerra de Kenaan. ²⁰I se afirmo el kampo, i la kueva ke estava en el, a Avra’ham, por posesyon de fuesa de kon los ijos de Het.

24

¹I Avra’ham era vyejo, entrado en dias: i A’ avia bendicho a Avra’ham en todo. ²I disho Avra’ham a su syervo el mas vyejo de su kaza, el ke podestava sovre todo lo ke tenia, pon agora tu mano debasho de mi anka; ³i te kondjurare por A’, Dyo de los syelos, i Dyo de la tyerra, ke no tomes mujer para mi ijo de las ijas de los Kenaanios, entre los kuales yo moro: ⁴sino ke andaras a mi tyerra, i a mi parentesko, i tomaras mujer para mi ijo Yitshak. ⁵I el syervo le disho, kizas la mujer no kera andar detras de mi a esta tyerra; ¿tornar tornare a tu ijo a la tyerra de onde saliste? ⁶I Avra’ham le disho, guardate ke no tornes a mi ijo aya. ⁷A’ Dyo de los syelos, ke me tomo de la kaza de mi padre, i de la tyerra de mi nasimyento, i ke me avlo, i ke me djuro, dizyendo, a tu semen dare esta tyerra; el enbiara su andjel delante de ti, i tomaras de aya mujer para mi ijo. ⁸I si la mujer no kijyere andar detras de ti, entonses seras livre de esta mi djura; solamente ke no tornas a mi ijo aya. ⁹I el syervo puzo su mano debasho de la anka de Avra’ham su senyor, i le djuro sovre esta koza.

¹⁰I el syervo tomo dyez kameyos de los kameyos de su senyor, i se fue; porke todo el byen de su senyor tenia en su mano; i se levanto i se fue a Aram-Na’harayim, a la sivdad de Nahor. ¹¹I izo arrodiyar los kameyos afuera de la sivdad a un pozo de agua, a la ora de la tarde, a la ora ke salen las mujeres para sakar agua. ¹²I disho: A’, Dyo de mi senyor Avra’ham, dame te rogo, buen enkuentro oy, i az mersed kon mi senyor Avra’ham. ¹³Ek, yo estoy al lado de la fuente de agua, i las ijas de los varones de la sivdad salen para sakar agua. ¹⁴Sea pues, ke la mosa a kyen yo dishere, abasha tu kantaro, te rogo, para ke yo beva; i eya dishere, beve, i abevrare tambyen tus kameyos; ke sea esta la ke aparejaste para tu syervo Yitshak; i kon esto savre ke iziste mersed kon mi senyor.

¹⁵I akontesyo, ke antes ke uvyera akavado de avlar, ek, Rivka, ke nasyo a Betuel, ijo de Milka, mujer de Nahor, ermano de Avra’ham, salia kon su kantaro sovre su ombro. ¹⁶I la mosa era muy ermoza de vista, eskosa, i varon no la avia konosido: i desendyo a la fuente, i inchyo su kantaro, i suvyo. ¹⁷I el syervo korryo a enkontrarla, i disho, te rogo ke me des a bever un poko de agua de tu kantaro. ¹⁸I eya disho, beve, mi senyor, i se apresuro, i abasho su kantaro sovre su mano, i le dyo a bever. ¹⁹I kuando akavo de darle a bever, disho, tambyen para tus kameyos sakare agua, asta ke akaven de bever. ²⁰I se apresuro, i vazyo su kantaro en la pila, i korryo otra vez al pozo para sakar agua, i sako para todos sus kameyos. ²¹I el varon estava maraviyado de eya, kayandose, para saver si A’ avia prosperado su kamino, o no.

²²I fue, ke komo los kameyos akavaron de bever, el varon tomo un anyazme de oro del pezo de medyo siklo, i dos maniyas por sus manos del pezo de dyez siklos de oro; ²³i disho: ¿ija de kyen eres? te rogo ke me digas; ¿ay lugar por nozotros en la kaza de tu padre para repozar? ²⁴I eya le disho, yo soy ija de Betuel, ijo de Milka, ke paryo a Nahor. ²⁵I le disho mas, tambyen ay paja i mucha sevada kon nozotros, i tambyen lugar para repozar. ²⁶I el varon se umilyo, i se enkorvo a A’. ²⁷I disho, bendicho sea A’, Dyo de mi senyor Avra’ham, ke no kito su mersed i su verdad de mi senyor; estando yo en el kamino, me gio A’ a la kaza de los ermanos de mi senyor. ²⁸I la mosa korryo, i anonsyo en kaza de su madre estas kozas.

²⁹I Rivka tenia un ermano, i su nombre Lavan: i Lavan korryo afuera al varon, a la fuente, ³⁰I fue, ke komo vido el anyazme i las maniyas sovre las manos de su ermana, i komo oyo las palavras de Rivka su ermana, ke dizia, ansi me avlo el varon, vino al varon; i ek, estava djunto a los kameyos al lado de la fuente. ³¹I disho, ven, bendicho de A’; ¿porke estas afuera? i yo eskombri la kaza, i lugar para los kameyos, ³²I el varon vino a kaza: i Lavan desato los kameyos, i dyo paja i sevada a los kameyos, i agua para lavar los pyes de el, i los pyes de los varones ke estavan kon el. ³³I fue puesto delante de el ke komer; ma el disho, no komere asta ke ayga avlado mis palavras, i le disho, avla.

³⁴I disho, yo soy syervo de Avra’ham, ³⁵i A’ bendisho mucho a mi senyor, i se engrandesyo; i le dyo ovejas i vakas, i plata i oro, i syervos i syervas, i kameyos i aznos. ³⁶I Sara, mujer de mi senyor, paryo un ijo a mi senyor despues de su vejez; i a dado a el todo lo ke tyene. ³⁷I me kondjuro mi senyor, dizyendo, no tomes mujer para mi ijo de las ijas de los Kenaanios, en la tyerra de los kuales yo moro: ³⁸sino ke andaras a la kaza de mi padre, i a mi linaje, i tomaras mujer para mi ijo. ³⁹I yo dishe a mi senyor, kizas la mujer no andara detras de mi. ⁴⁰I el me disho, A’ delante del kual yo anduve, enbiara su andjel kontigo, i prosperara tu kamino; i tomaras mujer para mi ijo de mi linaje i de la kaza de mi padre. ⁴¹Entonses seras livre de mi djura, kuando vinyeres a mi linaje; i si no te dyeren mujer, seras livre de mi djura. ⁴²I vine oy a la fuente, i dishe: A’, Dyo de mi senyor Avra’ham, si agora tu estas prosperando mi kamino por el kual ando; ⁴³ek, yo estoy al lado de la fuente de agua; sea pues ke la mosa ke salyere para sakar agua, a la kual yo dishere, dame a bever, te rogo, un poko de agua de tu kantaro; ⁴⁴i eya me dishere, beve tu, i tambyen para tus kameyos sakare agua; ke sea esta la mujer ke aparejo A’ para el ijo de mi senyor. ⁴⁵I antes ke yo uvyera akavado de avlar en mi korason, ek, Rivka, salia kon su kantaro sovre su ombro; i desendyo a la fuente i sako agua; i yo le dishe, te rogo ke me des a bever. ⁴⁶I eya se apresuro, i abasho su kantaro de sovre si, i disho, beve, i abevrare tus kameyos tambyen, i bevi, i abevro tambyen los kameyos. ⁴⁷I lo pregunti, i dishe, ¿ija de kyen eres? i eya disho, ija de Betuel, ijo de Nahor, ke le paryo Milka. I puzi el anyazme sovre su nariz, i las maniyas sovre sus manos. ⁴⁸I me umilyi, i me enkorvi a A’, i bendishe a A’, Dyo de mi senyor Avra’ham, ke me avia giado por kamino de verdad para tomar la ija del ermano de mi senyor para su ijo. ⁴⁹I agora, si vozotros azesh mersed i verdad kon mi senyor, dizedmele, i si no dizedmele, i me bolvere a la derecha, o a la izkyerda.

⁵⁰Entonses Lavan i Betuel respondyeron i disheron, de A’ salyo la koza; no podemos avlarte mal ni byen. ⁵¹Ek, Rivka, esta delante de ti, tomala i vate, i sea mujer al ijo de tu senyor, komo avlo A’. ⁵²I fue, ke komo el syervo de Avra’ham oyo sus palavras, se enkorvo a tyerra a A’, ⁵³i sako el syervo djoyas de plata, i djoyas de oro, i vestidos, i dyo a Rivka; i kozas presyadas dyo a su ermano, i a su madre. ⁵⁴I komyeron i bevyeron, el i los varones ke estavan kon el, i repozaron. I se levantaron de manyana; i el disho, enbiadme a mi senyor. ⁵⁵I disho su ermano i su madre, ke este la mosa kon nozotros a lo manko dyez dias: despues andara. ⁵⁶I el les disho, no me detengash, syendo ke A’ prospero mi kamino; enbiadme para ke me vaya a mi senyor. ⁵⁷I disheron yamaremos a la mosa, i demandaremos a su boka. ⁵⁸I yamaron a Rivka, i le disheron, ¿andaras kon este varon? i eya disho, andare. ⁵⁹I enbiaron a Rivka su ermana, i a su alechadera, i al syervo de Avra’ham, i a sus varones. ⁶⁰I bendisheron a Rivka, i le disheron , nuestra ermana eres, seas por madre de miles de milaryas, i erede tu semen la puerta de sus aborresedores.

⁶¹I se levanto Rivka, i sus mosas, i kavayaron sovre los kameyos, i anduvyeron detras del varon; i el syervo tomo a Rivka, i se fue. ⁶²I Yitshak venia de la entrada del pozo Lahay-Roi; porke el morava en la tyerra del sud. ⁶³I salyo Yitshak para azer orasyon en el kampo a la ora de la tarde; i also sus ojos, i vido, i ek, kameyos venian. ⁶⁴I Rivka also sus ojos, i vido a Yitshak, i se echo de sovre el kameyo. ⁶⁵Porke avia dicho al syervo ¿kyen es este varon ke vyene en el kampo a enkontararnos? i el syervo avia dicho, es mi senyor: i eya tomo el velo, i se kuvryo. ⁶⁶I el syervo konto a Yitshak todas las kozas ke avia echo. ⁶⁷I la trusho Yitshak a la tyenda de su madre Sara, i tomo a Rivka, i fue a al por mujer; i la amo. I se konorto Yitshak despues de la muerte de su madre.

25

¹I otra vez Avra’ham tomo mujer, i su nombre Ketura. ²I lo paryo a Zimran, i a Yoksan, i a Medan, i a Midyan, i a Yishbak, i a Shuah. ³I Yoksan endjendro a Sheva, i a Dedan. I los ijos de Dedan fueron Ashurim, i Letushim, i Leumim. ⁴I los ijos de Midyan: Efa, i Efer, i Hanoh, i Avida, i Eldaa. Todos estos fueron ijos de Ketura. ⁵I dyo Avra’ham todo lo ke tenia a Yitshak. ⁶I a los ijos de las donzeyas ke tenia Avra’ham, dyo Avra’ham dadivas, i los enbio de serka de Yitshak su ijo, myentras ke el bivia, al oryente, a la tyerra oryental.

⁷I estos son los dias de los anyos de la vida de Avra’ham ke bivyo, syento i setenta i sinko anyos. ⁸I se transyo, i muryo Avra’ham en buena vejez, vyejo i arto; i fue apanyado a sus puevlos. ⁹I lo enterraron Yitshak i Yishmael sus ijos en la kueva de Mahpela, en el kampo de Efron, ijo de Tsohar el Hitio, ke esta enfrente de Mamre; ¹⁰el kampo ke kompro Avra’ham de los ijos de Het: ayi fue enterrado Avra’ham, i Sara su mujer. ¹¹I fue, ke despues de la muerte de Avra’ham bendisho el Dyo a Yitshak su ijo: i moro Yitshak djunto al pozo de Lahay-Roi.

¹²I estos son los djerenansyos de Yishmael, ijo de Avra’ham, ke paryo ‘Hagar la Aesyana, syerva de Sara, a Avra’ham. ¹³I estos son los nombres de los ijos de Yishmael, por sus nombres, segun sus djerenansyos: el primodjenito de Yishamel, Nevayot; i Kedar, i Adbeel, i Mivsam. ¹⁴I Mishma, i Duma, i Masa, ¹⁵Hadad, i Tema, Yetur, Nafish, i Kedma. ¹⁶Estos son los ijos de Yishmael, i estos sus nombres, por sus aldeas, i por sus palasyos; dodje mayorales segun sus djentios. ¹⁷I estos son los anyos de la vida de Yishmael, syento i trenta i syete anyos: i se transyo i muryo, i fue apanyado a sus puevlos. ¹⁸I moraron dezde Havila asta Shur: ke esta enfrente de Ayifto vinyendo a Ashur: delante de todos sus ermanos moro.

Continúa >>

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.

—————————————-

6. TOLDOT (26 a 28)