Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 12 VAYIGASH (48 a 50)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

12 – VAYEHI

²⁸I bivyo Yaakov en la tyerra Ayifto dyez i syete anyos; i fueron los dias de Yaakov, los anyos de su vida, syento i kuarenta i syete anyos. ²⁹I se ayegaron los dias de Yisrael para murir, i yamo a su ijo Yosef, i le disho: si agora ayi grasya en tus ojos, te rogo ke pongas tu mano debasho de mi anka. I aras konmigo mersed i verdad; te rogo ke no me entyerres en Ayifto. ³⁰I yazere kon mis padres, i me yevaras de Ayifto, i me enterraras en su enterramyento. I el disho: yo are segun tu palavra. ³¹I disho: djurame. I lo djuro. I Yisrael se enkorvo sovre la kavesera de la kama.

48

¹I akontesyo despues de estas kozas ke fue dicho a Yosef: ek, tu padre esta hazino. I tomo kon el a sus dos ijos, Menashe i Efrayim. ²I dyeron avizo a Yaakov, i disheron: ek tu ijo Yosef vyene a ti. I Yisrael se esforso, i se asento sovre la kama. ³I disho Yaakov a Yosef: el Dyo Todopoderozo se aparesyo a mi en Luz en la tyerra de Kenaan, i me bendisho. ⁴I me disho: ek, yo te are fruchiguar, i te muchiguare, i te pondre por kompanya de puevlos; i dare esta tyerra a tu semen despues de ti, por posesyon de syempre. ⁵I agora tus dos ijos, ke te nasyeron en la tyerra de Ayifto antes ke yo vinyese a ti a Ayifto, mios son; Efrayim i Menashe komo Reuven i Shimon, seran mios. ⁶I tu endjendramyento ke endjendraste despues de eyos seran tuyos; por el nombre de sus ermanos seran yamados en su eredad. ⁷I yo, kuando venia de Padan, Rahel me se muryo en la tyerra de Kenaan en el kamino, avyendo solamente una medida de tyerra para venir a Efrat; i la enterri ayi en el kamino de Efrat, ke es Bet-Lehem. ⁸I vido Yisrael los ijos de Yosef, i disho: ¿kyen son estos? i disho Yosef a su padre: mis ijos son, ke el Dyo me dyo aki. ⁹I el disho: traemelos agora, i los bendizire. ¹⁰I los ojos de Yisrael se apezgaron de vejez ke no podia ver. I los izo ayegar a el. I el los bezo, i los abraso. ¹¹I disho Yisrael a Yosef: no pensava ver tus fases, i ek, el Dyo me izo ver tambyen a tu semen. ¹²I Yosef los sako de entre sus rodiyas. ¹³I se enkorvo, sus fases a tyerra. ¹³I tomo Yosef a ambos eyos, a Efrayim en su derecha a la izkyerda de Yisrael, i a Menashe en su izkyerda a la derecha de Yisrael, i los izo ayegar a el. ¹⁴I Yisrael estendyo su derecha, i la puzo sovre la kavesa de Efrayim, i el era el menor, i su izkyerda sovre la kavesa de Menashe; kon entendimyento gio sus manos, aunke Menashe era el primodjenito.

¹⁵I bendisho a Yosef, i disho: el Dyo delante del kual anduvyeron mis padres Avra’ham i Yitshak, el Dyo ke me governo dezde mi ser asta esta dia, ¹⁶el andjel ke me regmyo de todo mal, bendiga a los mosos, i sea yamado en eyos mi nombre, i el nombre de mis padres Avra’ham i Yitshak; i kreskan a muchedumbre entre la tyerra. ¹⁷I vido Yosef ke su padre ponia su mano derecha sovre la kavesa de Efrayim, i pezo en sus ojos; i asofryo la mano de su padre, para kitarla de sovre la kavesa de Efrayim a la kavesa de Menashe. ¹⁸I disho Yosef a su padre: no ansi, mi padre; porke este es el primodjenito; pon tu derecha sovre su kavesa. ¹⁹Ma no kijo su padre, i disho: lo se, mi ijo, lo se; tambyen el sera por puevlo i tambyen el se grandesera; ma de syerto su ermano el chiko se engrandesera mas ke el, i su semen sera inchimyento de djentes. ²⁰I los bendisho akel dia, dizyendo: en ti bendizira Yisrael, dizyendo: pongate el Dyo komo a Efrayim, i komo a Menashe. I puzo a Efrayim antes de Menashe. ²¹I disho Yisrael a Yosef: ek, yo muero; ma el Dyo sera kon vozotros, i vos ara tornar a la tyerra de vuestros padres. ²²I yo te di una parte sovre tus ermanos, ke tomi de mano del Emorio kon mi espada i kon mi arko.

49

¹I yamo Yaakov a sus ijos, i disho: apanyadvos, i vos denunsyare lo ke vos akontesera en los dias postreros. ²Adjuntadvos, i oid, ijos de Yaakov; i eskuchad a Yisrael vustro padre.

³Reuven, mi primodjenito eres tu, mi fuersa, i el prinsipyo de mi fortaleza, ventaja de enshalshamyento, i ventaja de fortaleza: ⁴presurozo komo las aguas, no seras aventajado; porke suviste a la kama de tu padre; entonses enkonaste: a mi estrado suvyo.

⁵Shimon i Levi ermanos; instrumentos de adolme sus armas. ⁶¡en su sekreto no entre mi alma; en su apanyamento no se aune mi onra! porke en su fulor mataron varon, i en su veluntad desjaretaron buey. ⁷Maldicho su fulor, porke era fuerte; i su sanya, porke se enduresyo. Los espartire en Yaakov, i los esparzire en Yisrael.

⁸Ye’huda, tu, te loaran tus ermanos; tu mano en la serviz de tus ermanos; se enkorvaran a ti los ijos de tu padre. ⁹Kachorro de leon Ye’huda. De la arrevatadura suviste, ijo mio. Arrodiyo, yazyo komo leon i komo leona. ¿kyen lo levantara? ¹⁰No se kitara la vara de Ye’huda, ni [1]ledjislador de entre sus pyes, asta ke venga Shilo; i a el sera la ovedyensya de los puevlos. ¹¹Atando a la vid su borriko, i a la vid eskojida el ijo de su azna; lavo en el vino su vestido, i en la sangre de uvas su kuvyerta. ¹²Los ojos vermejos de vino, i los dyentes blankos de leche.

¹³Zevulun a puerto de mares morara; i sera por puerto de naveos: i su termino sera asta Tsidon.

¹⁴Yissahar azno guesodo yazyen entre los korales. ¹⁵I vido ke el deskanso era bueno, i le la tyerra era agradavle; i akosto su ombro para soportar, i fue a pecha sodjiftado.

¹⁶Dan djuzgara a su puevlo, komo uno de los trivos de Yisrael. ¹⁷Sera Dan kulevro sovre el kamino, bivora sovre el sendero, ke morde los karkanyales del kavayo, i kaye atras su kavayador. ¹⁸A tu salvasyon espere, o ¡A’¡. ¹⁹Gad, fonsado lo vensera, i el vensera al fin.

²⁰De Asher grueso sera su pan, el dare visyos de rey.

²¹Naftali syerva soltada; el dara dichos ermozos.

²²Ramo fruchiguozo Yosef, ramo fruchiguozo sovre fuente; las ramas pasan sovre el muro. ²³I lo amargaron, i lo asaetearon, i lo aborresyeron los arkeros. ²⁴Ma kedo en fortaleza su arko, i se esforsaron los brasos de sus manos por las manos del fuerte de Yaakov; de ayi el pastor, la pyedra de Yisrael: ²⁵del Dyo de tu padre, i el te ayudara, i de Todopoderozo, i el te bendizira, kon bendisyones de los syelos de arriva, kon bendisyones del abismo ke yazye abasho, kon bendisyones de los pechos i de la bulba. ²⁶Las bendisyones de tu padre se mayorgaron sovre las bendisyones de mis endjendradores, asta el termino de las kuestas de syempre: seran sovre la kavesa de Yosef, i sovre la meoyera del apartado de sus ermanos.

²⁷Binyamin komo lovo arrevatara; por la manyana komera la prea, i a la tarde espartira el espojo.

²⁸Todos estos son los dodje trivos de Yisrael: i esto es lo ke su padre les avlo, i los bendisho; a kada uno segun su bendisyon los bendisho. ²⁹I les enkomendo, i les disho: yo sere apanyado a mi puevlo; enterradme kon mis padres en la kueva ke esta en el kampo de Efron el Hitio; ³⁰en la kueva ke esta en el kampo de Mahpela, ke esta enfrente de Mamre, en la tyerra de Kenaan, la kual kompro Avra’ham kon el kampo de Efron el Hitio por posesyon de enterramyento. ³¹Ayi enterraron a Avra’ham i a Sara su mujer; ayi enterraron a Yitshak i a Rivka su mujer; i ayi enterri a Lea. ³²La kompra del kampo i de la kueva ke esta en el, fue de kon los ijos de Het. ³³I kuando akavo Yaakov de enkomendar a sus ijos, enkojyo sus pyes en la kama, i se transyo i fue apanyado a sus puevlos.

[1] azedor de fueros

50

¹I Yosef se echo sovre las fases de su padre, i yoro sovre el, i lo bezo. ²I enkomendo Yosef a sus syervos los medikos para embalsamar a su padre; i los medikos embalsamaron a Yisrael. ³I se kumplyeron por el kuarenta dias; porke ansi kumplian los dias de embalsamados; i lo yoraron los Aisyanos setenta dias. ⁴I kuando pasaron los dias de su luto, avlo Yosef a los de la kaza de Paro, dizyendo: si agora ayi grasya en vuestros ojos, vos rogo ke avlesh en oidos de Paro dizyendo: ⁵mi padre me kondjuro, dizyendo: ek, yo muero; en mi fuesa ke kavi para mi en la tyerra de Kenaan, ayi me enterraras. Rogo pues ke suva, yo agora, i entyerre a mi padre, i tornare. ⁶I disho Paro: suve, i entyerra a tu padre, komo el te kondjuro. ⁷I suvyo Yosef para enterrar a su padre; i suvyeron kon el todos los syervos de Paro, los vyejos de su kaza, i todos los vyejos de la tyerra de Ayifto, ⁸i toda la kaza de Yosef, i sus ermanos, i la kaza de su padre: solamente desharon sus famiyas, i sus ovejas, i sus vakas, en la tyerra de Goshen. ⁹I suvyeron kon el kuatriguas i kavayeros, i fue el real muy grande. ¹⁰I vinyeron asta la era de Atad, ke esta de la otra parte del Yarden, i endecharon ayi kon endecha grande i muy pezgada: i izo a su padre limunyo syete dias. ¹¹I vyeron los moradores de la tyerra, los Kenaanios, el limunyo en la era de Atad, i disheron: limunyo pezgado es este a los Aisyanos; por tanto se yamo su nombre Avel-Mitsrayim, ke esta de la otra parte del Yarden. ¹²I izyeron sus ijos kon el komo les enkomendo, ¹³I lo yevaron sus ijos a la tyerra de Kenaan, i lo enterraron en la kueva del kampo de Mahpela, la ke kompro Avra’ham kon el kampo por posesyon de enterramyento, de Efron el Hitio, enfrente de Mamre, ¹⁴i se torno Yosef a Ayifto, el i sus ermanos, i todos los ke suvyeron kon el para enterrar a su padre, despues de aver enterrado a su padre.

¹⁵I vyendo los ermanos de Yosef ke su padre era muerto disheron: kizas nos aborresera Yosef, i tornar nos tornara todo el mal ke le gualardonimos. ¹⁶I enbiaron a dizir a Yosef: tu padre enkomendo antes de su muerte, dizyendo: ¹⁷ansi diresh a Yosef: te rogo ke perdones agora el revilyo de tus ermanos, i su pekado; porke mal te gualardonaron; i agora te rogamos ke perdones el revilyo de los syervos del Dyo de tu padre. I yoro Yosef kuando lo avlaron. ¹⁸I anduvyeron tambyen sus ermanos, i se echaron delante de el, i disheron: ek, somos a ti por syervos. ¹⁹I les disho Yosef: no temash; porke ¿estoy yo en lugar del Dyo? ²⁰I vozotros pensastesh mal sovre mi; ma el Dyo lo penso por byen, para azer komo esta oy, para abidiguar mucho puevlo. ²¹I agora no temash; yo governare a vozotros i a vuestras famiyas. I los konorto, i les avlo al korason.

²²I moro Yosef en Ayifto, el i la kaza de su padre; i bivyo Yosef syento i dyez anyos. ²³I vido Yosef a los ijos de Efrayim asta el terser djerenansyo; tambyen a los ijos de Mahir, ijo de Menashe, fueron nasidos sovre las rodiyas de Yosef. ²⁴I disho Yosef a sus ermanos: yo muero, ma el Dyo vizitar vos vizitara, i vos ara suvir de esta tyerra, a la tyerra ke djuro a Avra’ham, a Yitshak, i a Yaakov. ²⁵I kondjuro Yosef a los ijos de Yisrael, dizyendo: vijitar vos vijitara el Dyo, i aresh suvir mis guesos de aki. ²⁶I muryo Yosef de edad de syento i dyez anyos; i lo embalsamaron, i fue puesto en una arka en Ayifto.

Continúa >> 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.