Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 11 VAYIGASH (45 a 47)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

11 – VAYIGASH

¹⁸Entonses Ye’huda se ayego a el, i disho: rogo mi senyor, ke avle agora tu syervo una palavra en las orejas de mi senyor, i no se ensyenda tu fulor kontra tu syervo; porke tu eres komo Paro. ¹⁹Mi senyor pregunto a sus syervos, dizyendo: ¿tenesh padre, o ermano? ²⁰i dishimos a mi senyor: tenemos un padre vyejo, i un ninyo de su vejez, chiko, i su ermano es muerto, i el solo kedo de su madre, i su padre lo ama. ²¹I dishiste a tus syervos: azeldo desender a mi, i pondre mi ojo sovre el. ²²I dishimos a mi senyor; el muchacho no puede deshar a su padre; porke si deshare a su padre, su padre murira. ²³I dishiste a tus syervos: si vuestro ermano chiko no desendyere kon vozotros, no veresh mas mis fases. ²⁴I akontesyo, ke komo suvimos a tu syervo mi padre, le kontimos las palavras de mi senyor. ²⁵I disho nuestro padre: tornad, kompradnos un poko de komida. ²⁶I dishimos: no podemos desender. Si nuestro ermano chicko fuere kon nozotros, entonses desenderemos; porke no podemos ver las fases del varon, si nuestro ermano chiko no estuvyere kon nozotros. ²⁷I tu syervo mi padre nos disho: vozotros savesh ke dos me paryo mi mujer: ²⁸i el uno salyo de konmigo, i disho: de syerto arrevatar fue arrevatado; i no lo vide asta agora. ²⁹I si tomaresh tambyen a este de delante de mi, i le akontesyere algun dezastre, aresh desender mi kaneza kon dolor a la fuesa. ³⁰I agora kuando vinyere yo a tu syervo mi padre, i el muchacho no fuere kon nozotros, syendo ke su alma esta atada kon el alma de el, sera, ³¹ke en vyendo ke el muchacho no esta kon nozotros, murira; i tus syervos aran desender la kaneza de tu syervo nuestro padre kon ansya a la fuesa. ³²Porke tu syervo se afianso por el muchacho kon mi padre, dizyendo: si no te lo trushere, entonses sere kulpozo a mi padre todos los dias. ³³Te rogo pues ke kede agora tu syervo en lugar del muchacho por syervo a mi senyor; i suva el muchcho kon sus ermanos. ³⁴Porke ¿komo suvire yo a mi padre, i el muchacho no fuere konmigo? no sea ke vea el mal ke alkansara a mi padre.

45

¹I Yosef no podia esforsarse delante de todos los ke estavan serka de el, i grito: azed salir a todo varon de konmigo. I no estuvo ninguno kon el al darse a konoser Yosef a sus ermanos. ²I dyo su boz kon yoro; i oyeron los Aisyanos, i oyo la kaza de Paro. ³I disho Yosef a sus ermanos: yo soy Yosef; ¿bive dainda mi padre? i sus ermanos no lo pudyeron responder; porke fueron torvados delante de el. ⁴I disho Yosef a sus ermanos: ayegadvos agora a mi. I se ayegaron. I disho: yo soy Yosef vuestro ermano, el ke vendistesh a Ayifto. ⁵I agora no vos atristesh, i no peze en vuestros ojos ke me vendistesh aki; porke por bivyenda me enbio el Dyo delante de vozotros. ⁶Porke estos dos anyos uvo ambre en la tyerra. I dainda ay sinko anyos en ke no avra arada ni segada. ⁷I el Dyo me enbio delante de vozotoros para ke kedarash remanesimyento en la tyerra, i para abidiguarvos por eskapadura grande. ⁸I agora no me enbiastesh vozotros aki, sino el Dyo; i me puzo por padre a Paro, i por senyor a toda su kaza, i podestador en toda la tyerra de Ayifto. ⁹Apresuradvos, i suvid a mi padre, i dizeldo: ansi dize tu ijo Yosef: el Dyo me puzo por senyor de todo Ayifto; desyende a mi, no te detengas. ¹⁰I moraras en la tyerra de Goshen, i estaras serka de mi, tu i tus ijos, i los ijos de tus ijos, i tus ovejas, i tus vakas, i todo lo ke tyenes. ¹¹I te mantenere ayi; porke dainda ay sinko anyos de ambre; no sea ke seas empovresido, tu i tu kaza, i todo lo ke tyenes. ¹²I ek, vuestros ojos ven, i los ojos de mi ermano Binyamin, ke mi boka es ke vos avla. ¹³I aresh saver a mi padre todo mi onra en Ayifto, i todo lo ke vistesh; i vos apresuraresh i aresh desender a mi padre aki. ¹⁴I se echo sovre la serviz de Binyamin su ermano, i yoro; i Binyamin yoro sovre su serviz. ¹⁵I bezo a todos sus ermanos, i yoro sovre eyos; i despues de esto sus ermanos avlaron kon el.

¹⁶I la notisya fue oida en la kaza de Paro, dizyendo: vinyeron los ermanos de Yosef. I plazyo en los ojos de Paro, i en los ojos de sus syervos. ¹⁷I disho Paro a Yosef: di a tus ermanos: esto azed; kargad vuestras bestyas, i andad, tornad a la tyerra de Kenaan; ¹⁸i tomad a vuestro padre i vuestras famiyas, i venid a mi; i vos dare lo bueno de la tyerra de Ayifto, i komeresh la grosura de la tyerra. ¹⁹I tu eres enkomendado, esto azed; tomad para vozotros de la tyerra de Ayifto karretas para vuestros ninyos, i para vuestras mujeres, i tomad a vuestro padre, i venid. ²⁰I no tengash kuydado por vuestros atuendos; porke el byen de toda la tyerra de Ayifto sera para vozotros.

²¹I izyeron ansi los ijos de Yisrael; i Yosef les dyo karretas segun el dicho de Paro, i les dyo vianda para el kamino. ²²A todos eyos dyo a kada uno modas de vestidos; i a Binyamin dyo tressyentos pezos de plata, i sinko modas de vestidos. ²³I a su padre enbio esto, dyez aznos kargados de lo mejor de Ayifto, i dyez aznas kargadas de sivera i pan, i mantenimyento para su padres para el kamino. ²⁴I enbio a sus ermanos, i se fueron; i les disho: no agash pleyto por el kamino.

²⁵I suvyeron de Ayifto, i vinyeron a la tyerra de Kenaan a Yaakov su padre. ²⁶I le dyeron las nuevas, dizyendo: Yosef bive dainda, i el es podestador en toda la tyerra de Ayifto. I se desmayo su korason, por ke no los kreia. ²⁷I le avlaron todas las palavras de Yosef ke el les avia avlado; i kuando vido las karretas ke Yosef enbio para tomarlo, se rebivyo el espirito de Yaakov su padre. ²⁸I disho Yisrael: basta; Yosef mi ijo dainda bive; ire i lo vere antes ke yo muera.

46

¹I partyo Yisrael kon todo lo ke tenia, i vino a Beer-Sheva; i sakrifiko sakrifisyos al Dyo de su padre Yitshak. ²I avlo el Dyo a Yisrael en vizyones de la noche, i disho: ¡Yaakov, Yaakov! i el disho: ekme. ³I disho: yo soy el Dyo, el Dyo de tu padre; no temas de desender a Ayifto, porke por djente grande te pondre ayi. ⁴Yo desendere kontigo a Ayifto, i de syerto yo tambyen te are suvir; i Yosef pondra su mano sovre tus ojos. ⁵I se levanto Yaakov de Beer-Sheva; i los ijos de Yisrael yevaron a Yaakov su padre, i a sus chikitos, i a sus mujeres, en las karretas ke Paro avia enbiado para yevarlo. ⁶I tomaron sus ganados, i su azyenda ke avian ganado en la tyerra de Kenaan, i vinyeron a Ayifto, Yaakov i todo su semen kon el: ⁷sus ijos, i los ijos de sus ijos kon el, sus ijas, i las ijas de sus ijos, i todo su semen trusho kon el a Ayifto.

⁸I estos son los nombres de los ijos de Yisrael, ke vinyeron a Ayifto, Yaakov i sus ijos. El primodjenito de Yaakov, Reuven. ⁹I los ijos de Reuven; Hanoh, i Palu, i Hetsron, i Karmi. ¹⁰I los ijos de Shimon; Yemuel, i Yamin, i O’had, i Yahin, i Tso’har, i Shaul, ijo de la Kenaanita; ¹¹i los ijos de Levi; Gershon, Ke’hat, i Merari. ¹²I los ijos de Ye’huda; Er, i Onan, i Shela, i Perets, i Zerah; ma Er i Onan muryeron en la tyerra de Kenaan, i los ijos de Perets fueron Hetsron, i Hamul. ¹³I los ijos de Yissahar; Tola, i Puva, i Yov, i Shimron. ¹⁴I los ijos de Zevulun; Sered, i Elon, i Yahlael. ¹⁵Estos fueron los ijos de Lea ke paryo a Yaakov en Padan-Aram, i a Dina su ija. Todas las almas de sus ijos i de sus ijas fueron trenta i tres, ¹⁶I los ijos de Gad; Tsifyon, i Hagi, i Shuni, i Etsbon, Eri, i Arodi, i Areli. ¹⁷I los ijos de Asher; Yimna, i Yishva, i Yishvi, i Beria, i Serah su ermana. I los ijos de Beria; Hever, i Malkiel. ¹⁸Estos fueron los ijos de Zilpa, la ke Lavan dyo a Lea su ija; i paryo estos a Yaakov, dyez i sesh almas. ¹⁹Los ijos de Rahel, mujer de Yaakov; Yosef i Binyamin. ²⁰I nasyeron a Yosef, en la tyerra de Ayifto, Menashe i Efrayim, los ke le paryo Osnat, ija de Poti-Fera saserdote de On. ²¹I los ijos de Binyamin; Bela, i Beher, i Ashbel, Gera, i Naaman, Ehi, i Rosh, Mupim, i Hupim, i Arad. ²²Estos fueron los ijos de Rahel, ke nasyeron a Yaakov; todas las almas katorze. ²³I los ijos de Dan; Hushim. ²⁴I los ijos de Naftali; Yahtseel, i Guni, i Yetser, i Shilem. ²⁵Estos fueron los ijos de Bil’ha, la ke dyo Lavan a Rahel su ija, i paryo estos a Yaakov; todas las almas syete. ²⁶Todas las almas ke vinyeron kon Yaakov a Ayifto, ke salyeron de sus lumbos, afuera de las mujeres de los ijos de Yaakov, todas las almas fueron sesenta i sesh. ²⁷I los ijos de Yosef, ke le nasyeron en Ayifto, dos almas. Todas las almas de ka kaza de Yaakov ke vinyeron a Ayifto fueron setenta.

²⁸I enbio a Ye’huda delante de si a Yosef para ke le mostrara a Goshen; i vinyeron a la tyerra de Goshen. ²⁹I Yosef ato su kuatrigua, i suvyo a resivir a Yisrael su padre a Goshen, i se prezento a el; i se echo sovre su serviz, i yoro sovre su serviz bastante. ³⁰I disho Yisrael a Yosef: muera yo agora, syendo ke vide tu kara, ke dainda bives. ³¹I disho Yosef a sus ermanos, i a la kaza de su padre: suvire i are saver a Paro, i le dire: mis ermanos i la kaza de mi padre, ke estavan en la tyerra de Kenaan, vinyeron a mi. ³²I los varones son pastores de ovejas, porke varones de ganado eran; i trusheron sus ovejas, i sus vakas, i todo lo ke tenian. ³³I sera, ke kuando vos yamare Paro, i dishere: ¿ke es vuestro ofisyo? ³⁴Diresh: varones de ganado fueron tus syervos dezde nuestra mosedad asta agora, tanto nozotros komo nuestros padres; para ke moresh en la tyerra de Goshen; porke abominasyon es todo pastor de ovejas a los Aisyanos.

47

¹I vino Yosef, i dyo avizo a Paro, i disho: mi padre i mis ermanos, i sus ovejas, i sus vakas, i todo lo ke tyenen, vinyeron de la tyerra de Kenaan; i ek, estan en la tyerra de Goshen. ²I de parte de sus ermanos tomo sinko varones, i los prezento delante de Paro. ³I disho Paro a sus ermanos: ¿ke es vuestro ofisyo? i disheron a Paro: pastores de ovejas son tus syervos, tanto nozotros komo nuestros padres. ⁴I disheron a Paro: por pelegrinar en la tyerra venimos; porke no ay pasto para las ovejas de tus syervos, porke la ambre es pezgada en la tyerra de Kenaan; i agora te rogamos ke moren tus syervos en la tyerra de Goshen. ⁵I avlo Paro a Yosef, dizyendo: tu padre i tus ermanos vinyeron a ti. ⁶La tyerra de Ayifto esta delante de ti, en la mejor de la tyerra az morar a tu padre i a tus ermanos; moren en la tyerra de Goshen; i si saves ke ay entre eyos varones de kapasidad, los pondras por mayorales de ganado sovre lo ke es mio. ⁷I trusho Yosef a Yaakov su padre i lo prezento delante de Paro; i Yaakov bendisho a Paro. ⁸I disho Paro a Yaakov: ¿kuantos son los dias de los anyos de tu vida? ⁹I disho Yaakov a Paro: los dias de los anyos de mi pelegrinasyon son syento i trenta anyos; pokos i malos fueron los dias de los anyos de mi vida i no alkansaron a los dias de los anyos de la vida de mis padres, en los dias de sus pelegrinasyones. ¹⁰I Yaakov bendisho a Paro, i salyo delante de Paro. ¹¹I Yosef izo morar a su padre i a sus ermanos, i les dyo posesyon en la tyerra de Ayifto, en la mejor de la tyerra, en la tyerra de Ramses, komo enkomendo Paro. ¹²I governo Yosef a su Padre, i a sus ermanos, i a toda la kaza de su padre, de pan, segun la famiya.

¹³I no avia pan en toda la tyerra, porke la ambre era muy pezgada, i se kanso la tyerra de Ayifto i la tyerra de Kenaan por kavza de la ambre. ¹⁴I akojyo Yosef toda la moneda ayada en la tyerra de Ayifto, i en la tyerra de Kenaan, por la sivera ke kompravan; i trusho Yosef la moneda en kaza de Paro. ¹⁵I se akavo la moneda de la tyerra de Ayifto, i de la tyerra de Kenaan, i vinyeron todos los Aisyanos a Yosef, dizyendo: danos pan; ¿i porke muriremos delante de ti por lo ke se akavo la moneda? ¹⁶I disho Yosef: dad vuestros ganados, i vos dare por vuestros ganados, si se akavo la moneda. ¹⁷I trusheron sus ganados a Yosef, i Yosef les dyo pan por kavayos, i por el ganado de las ovejas, i por el ganado de las vakas, i por aznos; i los mantuvo de pan por todos sus ganados akel anyo. ¹⁸I kuando se akavo akel anyo, vinyeron a el segundo anyo, i le disheron: no enkuvriremos de mi senyor, ke de syerto se akavo la moneda, i el ganado de las kuatropeas ya es de mi senyor; nada kedo delante de mi senyor sino nuestros kuerpos i nuestra tyerra. ¹⁹¿Porke muriremos delante de tus ojos, tanto nozotros komo nuestra tyerra? kompranos a nozotros i a nuestra tyerra por pan i seremos nozotros i nuestra tyerra syervos a Paro; i da simyente, para ke bivamos, i no nos muramos, i no sea desolada la tyerra. ²⁰I Yosef kompro toda la tyerra de Ayifto para Paro; porke los Aisyanos vendyeron kada uno su kampo, porke se enfortesyo sovre eyos la ambre; i fue pasada la tyerra a Paro. ²¹I el puevlo lo izo pasar a las sivdades dezde el un kavo del termino de Ayifto asta su otro kavo. ²²Solamente la tyerra de los saserdotes (ko’hanim) no kompro; porke los saserdotes tenian una porsyon taksada de Paro, i komian su porsyon ke Paro les dava; por tanto no vendyeron su tyerra. ²³I disho Yosef al puevlo: ek, yo vos kompri oy a vozotros i a vuestra tyerra para Paro; ek, aki ay simyente para vozotros, i sembraresh la tyerra. ²⁴I sera ke en los renuevos daresh el kinto a Paro, i las kuatro partes seran para vozotros, por simyente del kampo, i por vuestra komida, i para los ke estan en vuestras kazas, i por komida para vuestras famiyas. ²⁵I disheron: nos abidiguaste; ayimos grasya en ojos de mi senyor, i seremos syervos a Paro. ²⁶I Yosef lo puzo por fuero asta el dia de oy sovre la tyerra de Ayifto, ke seria para Paro el kinto; salvo la tyerra de los saserdotes a sus solas no fue de Paro. ²⁷I moro Yisrael en la tyerra de Ayifto, en la tyerra de Goshen, i se aposesyonaron en eya, i fruchiguaron, i muchiguaron mucho.

Continúa >> 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.