eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
10 – MIKETS
41
1I akontesyo al kavo de dos anyos ke Paro sonyo; i le [1]paresia ke estava serka del rio. 2I ek, del rio suvian syete vakas ermozas de vista, i gruesas de karne, i pasian en el prado. 3I ek, otras syete vakas suvian detras de eyas del rio, feas de vista. I minudas de karne, i se paravan serka de las otras vakas sovre la oriya del rio. 4I las vakas feas de vista, i minudas de karne, tragavan a las syete vakas ermozas de vista i gruesas. 5I se desperto Paro. I se durmyo, i sonyo segunda vez; i ek; syete espigas suvian en una kanya, gruesas i buenas. 6I ek, syete espigas minudas, i abatidas del solano, ermoyesian despues de eyas. 7I las espigas minudas englutian a las syete espigas gruesas i yenas. I se desperto Paro, i ek, era suenyo. 8I fue ke a la manyana se kevranto su espirito; i enbio, i yamo a todos los magos de Ayifto, i a todos sus savyos; i Paro les konto sus suenyos; ma no avia kyen los soltara a Paro.
9Entonses el mayoral de los eskansyanos avlo a Paro, dizyendo: de mis pekados me akordo oy. 10Paro se ensanyo kontra sus syervos, i me metyo en guardya en la kaza del mayoral de los degoyadores, a mi i al mayoral de los panaderos. 11I sonyimos suenyo en una mizma noche, yo i el, kada uno segun la soltura de su suenyo, sonyimos. 12I avia ayi kon nozotros un moso Ebreo, syervo al mayoral de los degoyadores, i se lo kontimos, i el nos solto nuestros suenyos, a kada uno segun su suenyo solto. 13I akontesyo ke komo el nos solto, ansi fue; a mi me izo tornar a mi asyento, i a el lo enforko.
14Entonses enbio Paro i yamo a Yosef , i lo izyeron korrer de la prizyon. I se traskilo, i mudo sus vestidos, i vino a Paro. 15I disho paro a Yosef: sonyi suenyo, i no ay kyen lo solte; i yo oi dizir de ti, ke entyendes suenyos para soltarlos. 16I respondyo Yosef a Paro, dizyendo: no esta en mi; el Dyo responda paz a Paro. 17I disho Paro a Yosef: en mi suenyo me paresia ke yo estava sovre la oriya del rio. 18I ek, del rio suvian syete vakas, grueasas de karne, i ermozas de forma, i pasian en el prado. 19I ek, otras syete vakas, suvian despues de eyas, magras i feas de forma mucho, i flakas de karne; nunka vide otras tales en toda la tyerra de Ayifto en fealdad. 20I las vakas flakas i feas tragavan a las primeras syete vakas gruesas. 21I entravan en sus entranyas i no se konosia ke avian entrado en sus entranyas. Ma su vista era mala komo al prinsipyo; i me desperti. 22I vide en mi suenyo. I ek, syete espigas suvian en una kanya, yenas i buenas. 23I ek syete espigas marchitas, minudas, abatidas del solano, ermoyesian despues de eyas; 24i las espigas minudas englutian a las syete espigas buenas. I lo dishe a los magos, ma no ay kyen me lo deklare.
25I disho Yosef a Paro: el suenyo de Paro es uno mizmo: lo ke el Dyo va a azer, a mostrado a Paro. 26Las syete vakas buenas son syete anyos; i las syete espigas buenas son syete anyos: el suenyo es uno mizmo. 27I las syete vakas flakas i feas, ke suvian detras de eyas, son syete anyos; i las syete espigas vazias abatidas del solano seran syete anyos de ambre. 28Esta ez la koza ke avli a Paro: lo ke le Dyo va a azer, a mostrado a Paro. 29Ek vyenen syete anyos de grande artura en toda la tyerra de Ayifto. 30I se levantaran syete anyos de ambre despues de eyos; i toda la artura sera olvidada en la tyerra de Ayifto, i la ambre konsumira la tyerra. 31I la artura no sera konosida en la tyerra por kavza de akeya ambre de despues; porke sera muy pezgada. 32I el ser asegundado el suenyo a Paro dos vezes kyere dizir ke la koza es syerta de parte del Dyo, i ke el Dyo se apresura a azerla. 33I agora provea Paro un varon entendido i savyo, i pongalo sovre la tyerra de Ayifto. 34Ke aga ansi Paro, i ordene ofisyales sovre la tyerra, i tome una de sinko ke de la tyerra de Ayifto en los syete anyos de la artura. 35I apanyan toda la komida de estos buenos anyos ke vyenen, i amontonen sivera debasho de la mano de Paro, i guarden komida en las sivdades. 36I la komida sera por guardya a la tyerra para los syete anyos de la ambre, ke seran en la tyerra de Ayifto, para ke no sea tajada la tyerra kon la ambre.
37I la koza paresyo byen en ojos de Paro, i en ojos de todos sus syervos. 38I disho Paro a sus syervos: ¿toparemos otro komo este varon, en kyen ay espirito del Dyo? 39I disho Paro a Yosef: pues ke el Dyo te izo saver todo esto, no ay entendido ni savyo komo tu. 40Tu seras sovre mi kaza, i por tu dicho se governara todo mi puevlo: solamente en la siya sere yo mas grande ke tu. 41I disho Paro a Yosef: mira, yo te puzi sovre toda la tyerra de Ayifto. 42I Paro kito su aniyo de sovre su mano, i lo metyo sovre la mano de Yosef, i lo vistyo de ropas de lino fino, i puzo un kolyar de oro sovre su serviz. 43I lo izo kavayar en la segunda kuatrigua ke tenia, i apregonaron delante de el, arrodiyadvos; i lo puzo sovre toda la tyerra de Ayifto. 44I disho Paro a Yosef: yo soy Paro, i sin te ninguno alsara su mano ni su pye en toda la tyerra de Ayifto. 45I yamo Paro el nombre de Yosef, Tsafnat-Paeneah; i le dyo por mujer a Osnat, ija de Poti-Fera, saserdote (ko’hen) de On. I salyo Yosef sovre la tyerra de Ayifto.
46I Yosef era de edad de trenta anyos kuando estuvo delante de Paro, rey de Ayifto. I salyo Yosef de delante de Paro, i paso por toda la tyerra de Ayifto. 47I izo la tyerra en los syete anyos de la artura a punyados. 48I apanyo toda la komida de los syete anyos ke fueron en la tyerra de Ayifto, i metyo komida en las sivdades; en kada sivdad metyo la komida del kampo ke estava a sus derredores. 49I amontono Yosef sivera komo arena de la mar, muy mucho asta ke desho de kontar, porke no avia kuenta.
50I a Yosef nasyeron dos ijos antes ke vinyese el primer anyo de la ambre, los kuales le paryo Osnat, ija de Poti-Fera, saserdote de On. 51I yamo Yosef el nombre del primodjenito, Menashe; porke disho el, el Dyo me izo olvidar de toda mi lazerya, i de toda la kaza de mi padre. 52I el nombre del segundo yamo Efrayim; porke, disho el, el Dyo me izo fruchiguar en la tyerra de mi afriisyon.
53I se akavaron los syete anyos de la artura ke fue en la tyerra de Ayifto. 54I empesaron a venir los syete anyos de la ambre, komo Yosef avia dicho. I uvo ambre en todas las tyerras; ma en toda la tyerra de Ayifto avia pan. 55I kuando se enambresyo toda la tyerra de Ayifto, el puevlo esklamo a Paro por pan. I disho Paro a todas los Aisyanos: andad a Yosef; lo ke el vos dishere, azed. 56I la ambre era sovre todas las fases de la tyerra. I Yosef avryo todos los siyeros, i vendyo a los Aisyanos; i se enfortesyo la ambre en la tyerra de Ayifto. 57I de toda la tyerra venian a Ayifto para komprar de Yosef, porke la ambre se avia enfortesido en toda la tyerra.
[1] Ebreo: ek
42
1I vyendo Yaakov ke avia sivera en Ayifto, disho Yaakov a sus ijos: ¿porke estash mirando el uno al otro? 2I disho: ek, oi ke ay sivera en Ayifto; desended aya, i komprad para nozotros de aya, para ke bivamos i no nos muramos. 3I desendyeron los dyez ermanos de Yosef para komprar sivera de Ayifto. 4Ma a Binyamin, ermano de Yosef, no enbio Yaakov kon sus ermanos, porke disho: no sea ke le akonteska algun dezastre. 5I vinyeron los ijos de Yisrael a komprar entre los ke venian: porke la ambre era en la tyerra de Kenaan. 6I Yosef era el podestador sovre la tyerra; el era ke vendia a todo el puevlo de la tyerra. I vinyeron los ermanos de Yosef, i se enkorvaron a el las fases a tyerra. 7I kuando Yosef vido a sus ermanos los konosyo, ma se deskonosyo a eyos; i les avlo kon dureza, i les disho: ¿de onde vinistesh? i disheron: de la tyerra de Kenaan para komprar komida. 8I Yosef konosyo a sus ermanos, ma eyos no lo konosyeron. 9I Yosef se akordo de los suenyos ke sonyo de eyos, i les disho: espiones sosh; por ver la deskuvertura de la tyerra vinistesh. 10I le disheron: no mi senyor, ma tus syervos vinyeron a komprar komida. 11Todos nozotros somos ijos de un varon; verdaderos somos; tus syervos no son espiones. 12I el les disho: no, ma por ver la deskuvertura de la tyerra vinistesh. 13I disheron: tus syervos somos dodje ermanos, ijos de un varon en la tyerra de Kenaan; i ek, el chicko esta oy kon nuestro padre, i uno no se topa. 14I Yosef les disho: esto es lo ke vos avli, dizyendo: espiones sosh. 15Kon esto seresh prevados, por la vida de Paro no saldresh de aki, sino kuando vuestro ermano el chiko vinyere aki. 16Enbiad uno de vozotros, i tome a vuestro ermano, i vozotros seresh enkarselados, i vuestras palavras seran prevadas, si ay verdad kon vozotros; i si no, por la vida de Paro ke sosh espiones. 17I los adjunto en guardya tres dias. 18I Yosef les disho al terser dia: esto azed i bivid; yo temo al Dyo. 19Si sosh verdaderos, sea enkarselado uno de vuestros ermanos en la kaza de vuestra guardya; i vozotros andad, yevad sivera para la ambre de vuestras kazas, 20ma traedme a vuestro ermano el chiko, i seran kreidas vuestras palavras, i no muriresh. I izyeron ansi. 21I dizian el uno al otro: en verdad somos kulpozos tokante a nuestro ermano, en lo ke vimos la angustya de su alma, kuando nos rogava, i no oimos; por tanto vino sovre nozotros esta angustya. 22I Reuven les respondyo, dizyendo: ¿no vos avli yo, dizyendo: no pekesh kontra el ninyo, i no oistesh? i ek, tambyen su sangre es rekerida. 23I eyos no savian ke entendia Yosef; porke avia tradjuman entre eyos. 24I se abolto de eyos, i yoro; i se torno a eyos, i les avlo, i tomo de eyos a Shimon, i lo enkarselo a vista de eyos.
25I enkomendo Yosef ke inchyeran sus sakos de sivera, i ke tornaran la moneda de kada uno de eyos en su sako, i ke les dyeran vianda para el kamino. I izo kon eyos ansi. 26I kargaron sus aznos de su sivera, i se fueron de ayi. 27I avryo uno de eyos su sako para dar sevada a su azno en el mezon, i vido su moneda; i ek, estava en la boka de su kostal. 28I disho a sus ermanos: fue tornada mi moneda, i ek, esta tambyen en mi kostal. I les sovresalto el korason, i se estremesyeron, dizyendo el uno al otro: ¿ke es esto ke nos izo el Dyo?
29I vinyeron a Yakov su padre a la tyerra de Kenaan, i le kontaron todo lo ke les avia akontesido, dizyendo; 30el varon, senyor de la tyerra, nos avlo kon dureza, i nos trato komo espiones de la tyerra. 31I le dishimos: verdaderos somos; no somos espiones. 32Dodje ermanos somos, ijos de nuestro padre; el uno no se topa, i el chiko esta oy kon nuestro padre en la tyerra de Kenaan. 33I el varon senyor de la tyerra, nos disho: kon esto savre ke sosh verdadores; deshad konmigo uno de vuestros ermanos, i tomad para la ambre de vuestras kazas, i andad. 34I traedme a vuestro ermano el chiko, i savre ke no sosh espiones, sino ke sosh verdadores. Ansi vos dare a vuestro ermano, trafikaresh en la tyerra.
35I akontesyo, ke vazyando eyos sus sakos, ek, en el sako de kada uno estava el atado de su moneda; i komo vyeron eyos i su padre los atados de sus monedas, se espantaron. 36I Yaakov su padre les disho: a mi desijastes; Yosef no se topa, i Shimon no se topa, i a Binyamin tomaresh. Sovre mi son todas esta kozas. 37I avlo Reuven a su padre, dizyendo: a mis dos ijos mataras, si no te lo trushere; entregalo en mi mano, i yo lo tornere a ti. 38I el disho: no desendera mi ijo kon vozotros; porke su ermano es muerto, i el solo remanesyo; i si le akontesyere algun dezastre en el kamino ke vash, aresh desender mi kaneza kon ansya a la fuesa.
43
1I la ambre era pezgada en la tyerra. 2I fue komo akavaron de komer la sivera ke trusheron de Ayifto, su padre les disho: tornad komprad para nozotros un poko de komida. 3I le respondyo Ye’huda, dizyendo: asegurar nos aseguro el varon, dizyendo: no veresh mis fases sin vuestro ermano kon nozotros. 4Si enbiares a nuestro ermano kon nozotros, desenderemos i te kompraremos komida. 5Ma si no lo enbiares, no desenderemos; porke el varon nos disho: no veresh mis fases sin vuestro ermano kon vozotros. 6I disho Yisrael: ¿porke me izistesh mal, en avizando al varon si teniash mas ermano? 7I disheron: demandar demando el varon por nozotros, i por nuestro parentesko, dizyendo: ¿bive dainda vuestro padre? ¿tenesh mas ermano? i lo kontimos segun estas palavras. ¿Saver saviamos ke diria: azed desender a vuestro ermano? 8I disho Ye’huda a Yisrael su padre: enbia al muchacho konmigo, i nos levantaremos, i iremos, para ke bivamos i no muramos, nozotros, i tu, i tambyen nuestras famiyas. 9Yo lo afiansare; de mi mano lo bushkaras; si no lo trushere a ti, i lo parare delante de ti, sere kulpozo a ti todos los dias. 10Porke si no nos uvyeramos detardado, syerto agora uvyeramos ya tornado dos vezes. 11I Yisrael su padre les disho: si pues tyene ke ser ansi, azed esto; tomad de lo mejor de la tyerra en vuestros atuendos, i yevad al varon un prezente, un poko de triaka, i un poko de myel, espesyas, i almasiga, pinyones, i almendras. 12I moneda doble tomad en vuestra mano, i la moneda tornada en la boka de vuestros kostales, yevalda atras en vuestra mano; kizas fue yerro. 13Tomad tambyen a vuestro ermano, i levantadvos, tornadvos al varon. 14I el Dyo Abastado vos de piadades delante del varon, i vos solte al otro ermano vuestro, i a Binyamin; i yo, si fuere desijado, desijado sere.
15I tomaron los varones akel prezente, i tomaron moneda doble en su mano, i a Binyamin; i se levantaron, i desendyeron a Ayifto, i se pararon delante de Yosef. 16I Yosef vido a Binyamin kon eyos, i disho al rejidor de su kaza: trae los varones en kaza, i degoya degoyao i apareja; porke los varones komeran konmigo al medyo dia, 17i izo el varon komo Yosef disho; i el varon trusho a los varones en kaza de Yosef. 18I temyeron los varones por lo ke fueron traidos en kaza de Yosef, i disheron: por kavza de la moneda tornada en nuestros kostales la primera vez somos traidos, para achakarse kontra nozotros, i para echarse sovre nozotros, i para tomarnos a nozotros por syervos, i a nuestros aznos. 19I se ayegaron al rejidor de la kaza de Yosef, i le avlaron a la puerta de la kaza, i disheron: 20rogo, mi senyor, desender desendimos al prinsipyo a komprar komida. 21I fue, ke kuando venimos al mezon, i avrimos nuestros kostales, ek, la moneda de kada uno estava en la boka de su kostal, nuestra moneda por su pezo; i la avimos tornado en nuestra mano. 22I otra moneda trushimos en nuestra mano para komprar komida. No savemos kyen puzo nuestra moneda en nuestros kostales. 23I el disho: paz a vozotros; no temash, vuestro Dyo, i el Dyo de vuestro padre, vos dyo tezoro en vuestros kostales, vuestra moneda vino a mi. I sako a Shimon a eyos. 24I el varon trusho a los varones en kaza de Yosef, i les dyo agua, i lavaron sus pyes; i dyo sevada a sus aznos. 25I aparejaron el prezente antes ke vinyera Yosef al medyo dia; porke oyeron ke ayi avian de komer pan.
26I vino Yosef a kaza, i le trusheron el prezente ke tenian en su mano, en la kaza, i se enkorvaron a el a tyerra. 27I el les pregunto komo estavan, i disho: vuestro padre, el vyejo ke dishistesh, ¿lo pasa byen? ¿bive dainda? 28I disheron: tu syervo nuestro padre esta byen, dainda bive. I se umilyaron, i se enkorvaron. 29I also sus ojos, i vido a Binyamin su ermano, ijo de su madre, i disho: ¿es este vuestro ermano chiko de kyen me dishistesh? i disho: el Dyo te engrasye, ijo mio. 30I se apresuro Yosef; porke se eskayentaron sus entranyas por su ermano; i bushko de yorar; i entro en la kamara, i yoro ayi. 31I lavo sus fases, i salyo, i se esforso, i disho: poned pan. 32I puzyeron para el aparte, i para eyos aparte, i para los Aisyanos ke komian kon el, aparte; porke los Aisyanos no podian komer pan kon los Ebreos; porke es abominasyon a los Aisyanos. 33I se asentaron delante de el, el mayor segun su mayoria, i el menor segun su menoria; i se maraviyaron los varones el uno al otro. 34I also de delante de si prezentes para eyos; i el prezente de Binyamin era sinko tantos mas ke el prezente de todos eyos. I bevyeron, i se alegraron kon el.
44
1I enkomendo al rejidor de su kaza, dizyendo: inche los kostales de los varones de komida, kuanto podian yevar, i pon la moneda da kada uno en la boka de su kostal. 2I mi kupa, la kupa de plata, pondras en la boka del kostal del chiko kon la moneda de su sivera. I el izo segun la palavra ke avia avlado Yosef. 3Luego ke la manyana esklaresyo, los varones fueron enbiados, eyos i sus aznos. 4Kuando salyeron de la sivdad, i dainda no se avian aleshado, disho Yosef al rejidor de su kaza: levantate, persige detras de los varones: i kuando los alkanseres diles: ¿porke pagastesh mal por byen? 5¿No es esta en la ke beve mi senyor, i kon ke adivinar adivina? mal avesh echo en lo ke izistesh. 6I komo el los alkanso, les avlo estas palavras. 7I le disheron: ¿porke avla mi senyor tales palavras? leshos sea de tus syervos de azer tal koza. 8Ek, la moneda ke topimos en la boka de nuestros kostales tornimos a ti de la tyerra de Kenaan. ¿Komo pues rovaremos de la kaza de tu senyor plata o oro? 9Akel de tus syervos kon kyen fuere ayada, ke muera, i tambyen nozotros seremos syervos a mi senyor. 10I el disho: tambyen agora sea segun vuestras palavras: akel kon kyen fuere ayada, sera mi syervo, i vozotros seresh livres. 11I se apresuraron, i abasharon kada uno su kostal en tyerra, i avryeron kada uno su kostal. 12I eskudrinyo, dezde el mayor empeso, i akavo en el menor; i la kupa fue ayada en el kostal de Binyamin. 13I razgaron sus vestidos, i kargo kada uno su azno, i tornaron a la sivdad.
14I vino Ye’huda i sus ermanos a kaza de Yosef; i el dainda estava ayi; i se echaron delante de el en tyerra. 15I Yosef les disho: ¿ke echo es este ke izistesh? ¿no supistesh ke un varon komo yo adivinar adivina? 16I disho Ye’huda: ¿ke diremos a mi senyor? ¿ke avlaremos? ¿i komo nos djustifikaremos? el Dyo ayo el delito de tus syervos. Ek, nozotros somos syervos a mi senyor, tanto nozotros komo el en mano de kyen fue ayada la kupa. 17I el disho: leshos sea de mi de azer esto; el varon en mano de kyen fue ayada la kupa, el sera mi syervo, i vozotros suvid en paz a vuestro padre.
Continúa >>
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
