eSefarad Noticias del Mundo Sefaradi
Rekuerdo de un Enverano
de Silva Filiba
Kuando la persona entra en edad, su espirito se bola verso evenimyentos pasados komo un filmo de nostaljia en kolor ke mos akodra oras de muestra manseves.
Era una enveranada kemadera. Komo kada anyo mos topavamos en Burgaz (Su nombre antiguo, ANTIGONI). Burgaz es una izla muy agradavle, ande todos se konosen i se abrasan mizmo si se ven 7 vezes al diya. Todos saven lo ke gizo el vizino sigun el panire ke tyene en la mano. I viernes demanyana en el bodre de la mar se peleyan las gayás, pishkado muy kerido por los Judyos, i sigun la kantidad ke se toma ya se save si va tener musafires akeya noche. En Burgaz, todos saven si te estas indo a una vijita sigun el fostan ke yevas. Kurto, esta izla asemeja a un Kibuts.
Un diya resivi una invitasion de una amiga muy kerida para el Bat-Mitsva de su ija ke se va fiestar en la Keila de Büyükada (PRINKIPO). Me apareji kon grande alegriya.
Dopies blu emprime, kalsados kon talonikos bien altos, kaveyos peynados por el uniko kuafor de Burgaz, makyaj, i parfum i todo djusto.
El Shabat demanyana, abashi de las alturas ande moravamos mirando de no eskalavrarme kon los kalsados muevos i me fui al debarkader. En el kamino topi una amiga i eya vistida i atakanada ke me avlo de un Bar-Mitsva. Endjuntos entrimos al vapor muy kontentes de ir endjuntos a la fyesta. Despues de unos kuantos puntos vide ke el vapor se esta akostando en lugar yerrado. Me alevanti en gritando a mi amiga, aki no es Prinkipo! Eya gritando mas fuerte: “Si, si este vapor se va a CaddeBostan i mozotros al Bar -Mitsva de mi sovrino. Koryendo abashi del vapor ke ya estavan travando la eskala i demandi ke oras ay un vapor para Prinkipo.
Ora i medya despues, me respondyeron. Triste i sola me meti a kaminar en el bodre de la mar. Kuando en frente veygo una kara konosida kon doz mansevikas de 15-16 anyos kon una fusta mini mini. Amigas de anyos mos echimos en los brasos komo si eramos Robinson Cruzoe en tierras ajenas. La veygo tratando kon un preto mustachudo ke iva yevar karpuzes a Yalova.
Paresiya el i sus kompanyeros bandidos. No ay nada, ir a la Bat-Mitsva un punto mas presto. Ma para alkansar a los karpuzes kaliya saltar por enriva de 3 barkas. Vos puedesh imajinar el tablo, deskalsas, las fustas aremangadas, alkansimos ansi a los karpuzes enriva de kualos mos asentimos. I tomimos kamino arezvalandomos, i meneyandomos de las olas de la mar. Arrivando despues de 45 puntos a Büyük Ada, komo el debarkader era muy alto mos travaron ariva kon mil males. Las ijikas estavan tresalidas de esta aventura. Las dos amigas deskalsas, los kaveyos embrolyados i la fusta tuguerta, koryimos a tomar una talika (karrosa kon kavayos). I la ora se izo 11; hal ke estamos, fuyidas del Ginnam.
Presto, yegaremos a la Keila! Suvimos las eskaleras en koryendo, arepushando a los ke estavan indosen, a lo manko felisitar la famiya i amostrar ke ya vinimos. Todos estavan en pies, chafteyi la espalda de la patrona de la fyesta, se abolto echo un grito, de ande estash salyendo, ke vos afito? En el Kokteyl en el salon bevimos una limonata yelada, i kontimos muestras peripesiyas. Kada uno entendyo a su manera!
Mi amiga i yo tomimos kamino para tornar a Burgaz muertas de kanserya. Mos prometimos de no kontar nada en kaza para ke muestros keridos maridos no ampesen a dar doktrina. Ma kuando metimos pies en Burgaz, a kada paso mos aretaron para dizir “Pasado ke seya, pasado ke seya”. De boka a boka ya se izo una istorya de Gangster, i mozotros meneyando la kavesa sin komentaryos. Fuimos adelantre kon batimyentos de korason, ande topimos los maridos kon kara de ravya, porke kada uno estuvo kontando a su manera lo ke mos afito. Kavesa abokada, espalda en korkovada, pachas tremblando de kanserya tornimos kada una a muestro nido.
Esto era el tyempo de muestra manseves kuando todo se aboltava en rizas i burlas. Antes ke el destino no mos chafteye kruelamente a mi amiga i a mi. Antes ke no se abolte la alegriya en lagrimas de nostajia.
_________________
Esta es una de las 3 konsejas GANADORAS del KONKURSO DE KOMPOZISION 2024 en la kategoria AVANSADOS.