eSefarad Noticias del Mundo Sefaradi
Un programa kompleto sovre las Biblias romanseadas i sus primeras traduisiones.
Kompartimos destakadas investigasiones de Matilda Gini Barnatán sovre estas primeras traduisiones de las Biblias romanseadas. El sentimiento del Puevlo Evreo yamado El Puevlo del Livro por su literatura sagrada se reflektó en las primas traduisiones al ladino de la Biblia, komo meldamos en la mezma por odren del Dió «No se kitará de tu boka la palavra de la Ley ni de día ni de noche». En este programa kompartimos investigasiones istórikas sovre literaturas i te kontamos las diferentes tiempos de traduisiones de la Biblia de Ferrara i unotros tekstos Bíblikos. La rikeza de los djéneros de Livros Sagrados i las Koleksiones impresas. Indemás informasiones sovre traduisiones ke fueron fraguadas por estudiosos, ofresemos el enshemplo de la traduisión
del «Tratado de Pirke Avot», «Tratado de Nuestros Padres» Livro de étika djudía, vinien de la Koleksión del sefardí Albert Adatto, (Seattle) livrito editado en Viena en 1897. Meldado (lektura) en Ladino. I si keres saver kuala fue la primera traduisión de la Torá (Viejo Testamento) i ken la izo siente este interesante programa istóriko. Los kantes ke akompanyan este programa son el kante kontemporáneo sefardí «La Novia» autoría i interpretasión Viviana Rajel Barnatán i el kante de bodas sefardí tradisional de Grecia i de Turquía «Skalerika de oro» en la versión de Marlène Samoun. Kurunamos el programa kon el romanse «Diego León» en la versión de la kantadera Fortuna.
«En Emisión Sefarad las investigasiones sovre la Biblia del Puevlo del Livro»
________________________________________________
Domingo a las 07.30 horas UTC. Lunes a las 10.04 y 20.00 horas UTC
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
