eSefarad Noticias del Mundo Sefaradi
Ver todos los artículos de esta sección
Kindertransport (1)
En 18/6/1815 peryo la arma del imperyo Fransez, dirijada por Napoleon Bonaparte, la gerra importante kontra las armas de los imperyos, el inglez i el prusyano, en los kampos de Waterloo, situados en la Beljika de oy. Justo en estos dias de glorya por los prusyanos, avrio Natan Israel una butika chika de vistidos empleados en el sentro de la sivdad Berlin. Pasaron mas de 100 anyos. La butika paso de padre a ijo. De Natan a Yakov, de yakov a Berthold i de Berthold a los ermanos Herbert i Wilfrid. El komersyo de vistidos se engrandesyo bastante i en el empesijo del sieglo 20 akeya butika chika se izo «Kaufhaus Nathan Israel». 
Un sentro komersyal kon 2600 emleyados, situado en el «korason» de la sivdad, en Spandauer Strasse, serka de la plasa Aleksander, justo enfrente del adifisyo korolado de la munisipalidad de Berlin. 
Kada uno ke se aparava de una de las ventanas de la munisipalidad via delantre de sus ojos el sentro pompozo de «N.Israel». En esta epoka, la industria entera de la Almanya sovra vistimyentas esteva en las manos de 5 famias: Israel, Gershon, Hertsog, Levy i Manhaymer. No ay ke dizir ke la famia Israel era famia muy, muy rika. Los emleyados se gozavan de siguritad sosyala (pension, sanedad) kuando akeyos tyempos este modo de kozas no egzistian en Evropa.
Wilfrid nasyo en 1899. Su madre ensistyo de parirlo en la ingletyerra dunke Wilfrid obteniya dos pasaportos. El Inglez i el Alman. Moravan en Bendlerstrasse, en Berlin. Kuando tenia 22 anyos entro a los komersyos de la famia. En 1925 Wilfrid de 26 anyos, komo todos los ijikos buenos de oy, tomo un anyiziko de «vakansa de la vida», para pasear en el oriente antes de echerse demuevo a la «mar de los komersyos». Esto fue el empesijo de un arekojimyento de una koleksyon de arte oriental, muy muy valorozo, ke oy en dia no se save el presyo. 
Kuando estava en India konosyo al ijo de Mahatma Gandhi i dospues a Gandhi mizmo.
Kuando torno del paseo se dediko de sus komersyos i obteno relasyones kon munchos de los miembros de la sosyeta alta de Berlin. Kaji kada uno de eyos tenia kuento en Kaufhaus N.Israel. Entre eyos, miembros de la partida nazista. Ya se savia ke estos no van a pagar sus devdas ama este fakto le iva dar a Wilfrid un montante de poder en sus dikusyones futuros.
Durante el tyempo Wilfrid konosyo munchas figuras renomadas i fraguo kon eyas relasyones intimas, komo el Dr. Chaim Weizmann, los profesores Martin Buber i Albert Einstein, el haham Leo Baeck i mas… Albert Einstein aviya dicho ke Wilfrid es la persona la mas noble ke tyene konosido en su vida.
Los nazistos entraron al poder, en el 30/1/1933. Komo ya se save no tadraron de empozar sus ideas, sovre todo estas ke eran publikadas de mano de Adolf Hitler en su livro « Mein Kampf «(el kombate mio) en 1925, indimas kontra los djudyos.
Kuando el kapitan Francis Edward Foley entro a la kamareta de su komandante en el buro de MI6 (servisyo sekreto de intelijensya) no se puedia imajinar ke buelta iva tomar su vida en el futuro. Las komandas eran klaras. El tyene de tomar el posto de «Responsable de los pasaportos» en el konsolato inglezo en Berlin i kon este kamuflaj espiyonar lo mas ke puede en las tyerras de Almanya.
El rolo de Wilfrid Israel en la istorya empesa en esta epoka.
A kontinuar…
