eSefarad Noticias del Mundo Sefaradi
Ver todos los artículos de esta sección
Kindertransport (7)
Major Francis (Frank) Edward Foley
Francis nasyo en 1884 en Highbridge, Somerset. Komo ya fue dicho, el posto de «Ofisyer Responsable a 
Kontrolar Los Pasaports» en el konsolato inglez en Berlin era solo un kamuflaj para Francis (Frank) Edward Foley ke era mandado de parte de MI6, i ke vino a espionar en la Almanya.
Francis entuguerto las leyes de su pais, metyo en risko su karyera, metyo en risko su vida (malgrado ke no tenia inmunita diplomatika), kolaboro kon Israel Wilfrid i salvo dyezes de miles djudyos kitandolos de la Almanya. Francis entro a los kampos de konsentrasyon i kito de aya djudyos, eskondyo djudyos en su kaza, les abastesyo pasaportos, a las vezes verdaderos i a las vezes falsos, les abastesyo permisyones de pasanjeros i otros dokumentos para ke puedan salir de Almanya. Kuando no pudiya obtener dokumentos de su ambasada se aderesava a ambasadas de otros paises i obtenia permisyones para djudyos. Dospues de la gerra torno Francis a Berlin para ayudar a aferrar kriminales nazistos.
Francis se retiro del servisyo en 1949, torno a su kaza en Stourbridge, Worcestershire (Aya tyene una estatua afirmando pasaportos para los djudyos) i muryo en 1958.
En 1999 fue dekorado kon el titolo «British Hero of the Holocaust» (Eroiko Britaniko del Holokosto) i en 2010 fue rekonosido komo «Djusto Entre Las Nasyones».
Bill (Werner Feodor) Barazetti
Bill nasyo en 1914 en Aarau, Suis. En 1933 era elevo de la universita en Hamburg. En 1934, dospues ke vido el komporto de los nazistos, se adereso a los servisyos sekretos de Chekoslovakya i empeso a kolaborar kon eyos en la Almanya. Aya fondo un laboratuar de parfumeria i empeso a espionar kon el preteksto ke esta bushkando yervas para su laboratuar. En 1936 fue forsado de fuirse. En la frontyera de la Chekoslovakya los nazistos lo aferraron i lo aharvaron una haftona buena fin ke les paresyo ke ya esta muerto. Una kazalina (Anna) lo topo a Barazetti en los kampos, kaji muerto, lo arekojyo, lo tomo a su ombro, lo arrasto a su kaza i lo melezino. Dospues se kazaron. Bill i Anna pasaron a bivir en Suis aya nasyo sus ijo. En 1937 Bill desido de mandar a su mujer i su ijo al kazal de su famiya i tornar a Prag para kontinuar la kolaborasyon kon los servisyos sekretos chekoslovakos kontra los Almanes. Sus paryentes, ke tomavan la parte de la Almanya, lo disposaron de sus erensyas. Su padre se adereso a las otoridadas Suisas i demando de anular la suditansa Suisa de la famia entera. Esto lo izo para tomar la suditansa Almana. En esta manera Bill peryo la suditansa suya de Suis. De la otra vanda Bill reusho a tomar la suditansa chekoslovaka achakes las koneksyones familyaras ke teniya kon Tomas Garigue Masaryk.
En los kavos del 1938 Bill enkontro a Nicholas Winton en Prag i los dos empesaron a kolaborar para realizar los transportos de los ijikos.
En marso 1939 los Almanes entraron a prag. El governo Chekoslovako entero se fuyo a Londra. Winton ya estava en Londra. Bill kedo en Prag, malgrado la situasyon danjeroza, i izo todo lo ke pudo azer para realizer los ultimos transportos de los ijikos fin al empesijo de la gerra. A la fin se fuyo i el a la Ingletyerra. En la Ingletyerra empeso Bill otro kapitolo de kolaborasyon kon el servisyo intelijente Inglez, durante la gerra, kontra los Almanos.
En 1993 Bill fue rekonosido komo «Djusto Entre Las Nasyones». Bill muryo en el anyo 2000.
A kontinuar…
