Muestra lingua: TERRORISMO KONTRA DJUDYOS (KONTINUASYON, MALOROZAMENTE) por Edmond Cohen

Keridos amigos,
Mi emisyon del djueves 15 de enero no pudiya ser otra koza ke la kontinuasyon, malorozamente, de la ke aviya echo en 2011 sovre el terrorismo kontra djudyos.

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

TERRORISMO KONTRA DJUDYOS (KONTINUASYON, MALOROZAMENTE)

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.

Despues de todo lo ke se paso en Paris esta terrivle semana pasada, de kualo avlarvos oy, sino de muevo del terrorismo kontra los djudyos?

El 8 de septyembre 2011, vos aviya echo una emisyon intitolada Terrorismo kontra los Djudyos en el Mundo, i a esta okazyon vos avli de los ocho atentados sigientes :

• el kal Copernic en Paris el 3 de oktobre 1980
• el kal de la Ghriba en la isla de Djerba, en Tunisia, el 8 de oktobre1985
• el kal Neve Shalom en Estambol el 6 de septyembre 1986
• el Sentro AMIA en Buenos Aires el 18 de julyo 1994
• yene el kal de la Ghriba en Djerba el 11 de avril 2002
• Casablanca el 16 de Mayo 2002
• de muevo Neve Shalom en Estambol el 15 de novyembre 2003
• Bombay el 26 de novyembre 2008

Me olvidi de avlarvos del atentado en el restorante djudyo de la rue des Rosiers en Paris el 9 de agosto 1982, ke izo 6 muertos i 22 firidos.

No avli tampoko de la profanasyon del semetaryo de Carpentras el 8 de mayo 1990, tambyen en Fransya, porke, afillu si fue un haliz atentado antisemit, no uvo viktimas bivyentes.

No avli tampoko de la muerte de Ilan Halimi, torturado i matado en 2008,  porke no fue egzaktamente lo ke se puede yamar un atentado, afillu si yene fue un krimen antisemit.

Ya aviyan sido kometidos en el mundo, kuando ize mi emisyon en 2011, muy muncho mas atentados ke estos mueve, kuando seriyan solo los atentados del 11 de septyembre 2001, ama yo kije limitarme a los solos atentados kontra djudyos, kometidos no en Israel, ni kontra israelyanos afuera de Israel. Estos mueve atentados fueron kometidos afuera de Israel, i solo kontra djudyos, eyos mismos sin atadijo (salvo, por siguro, de amistad) kon el Estado de Israel, lo ke aze ke estos atentados no se pueden dizir antiisraelyanos o antisyonistos. Fueron atentados antisemites i nada mas.

Eskapava mi emisyon de 2011 dizyendovos: Aki me vo kedar de mi lista, dezeando ke no ayga mas otros atentados en el mundo kontra djudyos ni kontra otros. Lo dezeo, ama malorozamente no so siguro ke mi lista sea eskapada.

I de fakto, me tengo malorozamente oy de kontinuar de avlarvos, ensima de lo ke me teniya olvidado de dizirvos en 2011, de los trajikos evenimyentos ke se pasaron sovre todo en Fransya, ama tambyen en Beljika, desde 2011.

Oy vos tengo de avlar en primero del atentado de la rue des Rosiers en 1982, ke yo aviya olvidado en mi emisyon de 2011. I despues de unos kuantos byervos sovre Carpentras i Halimi, vos avlare del atentado del 19 de marso 2012 kontra una eskola en Toulouse, del atentado kometido el 24 de mayo 2014 en Bruxelles (despues de munchos otros en Beljika), i del atentado del vyernes pasado, 9 de janvier 2015, en una botika kasher de Paris.

El 9 de agosto 1982, a la ora de komer (una i diez), ombres armados entran en el restorante Goldenberg, restorante muy konosido ande me fui a komer munchas vezes, ke se topa rue des Rosiers, en medyo del pletzel, la male djudiya la mas vyeja de Paris. Travan i echan una granada. Un povereto de moso arabo del restorante aprova de fuirse, un ombre le korre detras i eskapa por matarlo.

En manko de tres minutos, los matadores azen 6 muertos i 22 firidos, i despues se fuyen sin ser aferrados, ni mismo identifyados. Kyen eran?

Primera ipoteza: el grupo de Abu Nidal. Ama en jeneral este grupo se englorese de sus atentados, i aki disho ke no es el

Sigunda ipoteza: unos testigos disheron ke los matadores eran de tipo evropeo. Halbuki el 8 de agosto 1982, dunke el diya antes del atentado, dos terroristos neo-nazis Odfried Hepp i Walter Kexel, vinyeron en Metz de Almanya. Kale dizir tambyen ke Odfried Hepp fue myembro del FLP (frente de liberasyon de la Palestina). Nunka fueron aferrados por esto (lo fueron, ama por otros atentados), ama el uno (Kexel) se mato de si mismo tres anyos mas despues, en 1985. De toda manera, no lo vo yorar demaziya.

Enfin, tresera ipoteza: el djusgo Trevidic a identifyado en 2011 dos ombres del grupo de Abu Nidal eskondidos en Jordaniya ke los proteja, afillu si el rey de Jordaniya manifesto alhad pasado al lado de François Hollande para la memorya de las viktimas del terrorismo.

Esto dicho, vos akodro ke el Prezidente Mitterrand se fue a komer en el restorante Goldenberg despues del atentado.

Agora tengo tambyen de dizir dos byervos sovre la profanasyon del semetaryo djudyo de Carpentras, en la noche del 8 al 9 de mayo 1990. En esta noche, no solo 34 tombas fueron rompidas, ama ensima de esto el puerpo de un djudyo de 81 anyos fue travado de su serkolyo i deshado ansina sovre la tyerra. Mijor es no saver lo ke le izyeron.

200.000 personas, inkluyendo el prezidente de la republika, Mitterrand, manifestaron kontra el antisemitismo, ama no se saviya en vedra kyen eran los kulpavles.

Al kavo, despues de sesh anyos sin toparlos, es el uno de los 5 antisemites ke se va denunsyar el mismo a la polisiya i denunsyar sus amigos. El kapo de los antisemitos ya se muryo tres anyos antes en un aksidente de araba. Los otros van a ser djusgados i kondenados a prezo.

Agora vos kyero avlar tambyen del martiryo del povereto de Ilan Halimi, un manseviko djudyo de 23 anyos , aferrado el 21 de janvier 2006 por una banda de bandidos antisemites, guadrado prezonero, atado, torturado, kuchiyado, kemado bivo, i deshado muryendose el 13 de fevrero, despues de 24 diyas de sufriyensas terrivles, de ambre i de friyo.

El 28 de fevrero, uvo una manifestasyon ande fui, por la memorya del povereto. Yo pensava ver muncha djente; muncha djente ya uvo, ama kaji todos djudyos.

Los bandidos, dirijidos por un syerto Yusuf Fofana, fueron topados por la polisiyia, aferrados, djuzgados i kondenados (Fofana a prezo a vida, lo ke kyere dizir 22 anyos a lo manko).

I agora vos tengo de avlar del atentado del 19 de marso 2012 en la eskola djudiya Ozar Hatorah en Toulouse, en Fransya.

Un franses arabo-islamisto yamado Mohamed Merah aviya empesado el 11 de marso por matar en Toulouse a Imar Ibn Zlaten, un asker franses de orijen marroki, despues de dizirle: «Matas a mis ermanos, te mato».

4 diyas despues, el 15 de marso en Montauban, el mismo Merah mata de la misma manera (un kurshum en la kavesa) a dos askeres: Abel Chennouf, un franses katoliko de orijen aljeryana, i Mohamed Legouad, franses muzulmano el tambyen de orijen aljeryana, i trava un treser kurshum en la kavesa de un treser asker, Loïc Liber, un preto de las Antillas, ke el va sovrebivir, ama kedando paralizado para el kusur de su vida.

Syendo ke el matador (dainda no se save kyen es) a matado tres arabos i aprovo de matar un preto, la polisiya al empesijo pensa ke el matador es un rasisto.

En vedra, es un antisemit, i esto se va ver el 19 de marso, dunke otros kuatros diyas despues, yene en Toulouse. A las 8 de la manyana, kuando las kriyaturas entran en la eskola djudiya, Merah entra en la eskola i mata a un haham i profesor de 30 anyos, Jonathan Sandler, i sus dos ijikos ke estavan kon el, Gabriel, 3 anyos, i Aryeh, 6 anyos. Despues korre detras de Myriam Monsonego, la ijika de syete anyos de Yaakov Monsenogo, el direktor de la eskola, la aferra por los kaveyos, aprova de travarle un kurshum en la kavesa, ama el revolver no kamina. Troka de revolver i esta vez la mata de un kurshum en la kavesa.

Despues se fuye, firyendo a Aaron Bryan Bijaoui, 15 anyos i medyo, ke podra salir del ospital el 12 de avril.

El diya de despues, 20 de marso, el matador es identifikado komo syendo Mohamed Merah, un ombre de Al Kaida, i la polisiya lo topa el 21 de marso i enserra su kaza. El trava i fyere dos pulises. La polisiya aspera, i el diya despues, 22 de marso, ataka. Merah les trava ama la polisiya reushe de matarlo.

Uvo seremoniyas kon el prezidente de la Republika, Nicolas Sarkozy.

Las kozas, ya lo savesh, no se eskaparon kon esto.

El shabath 24 de mayo 2014, un syerto Mehdi Nemmouche va matar a kuatro personas en el Muzeo djudyo de Bruxelles.

Ama antes de avlar de esto, kale ke sepash ke ya aviya sido munchos atentados kontra djudyos en Beljika.

El 27 de djulyo  1980, un komando palestinyano echa granadas sovre un grupo de 60 kriaturas djudiyas en Anvers. Un franseziko de 15 anyos, David Kohane, va ser matado. 15 otros son firidos. El rey de Beljika Baudouin no se va a ver a las viktimas. Se dize ke era muy favoravle a los Palestinyanos. Dos myembros del Fatah de Abou Nidal van a ser aferrados i uno, Said Nasser, trokado en 1990 kontra una famiya beljikana tomada komo rehen en Levanon.

Tambyen en Anvers una araba patladeo delantre un kal el 20 de oktovre1981, matando dos mujeres i firyendo 95 otras personas.

I el anyo despues, en 1982, un ombre veniya travar en el grande kal de Bruxelles, firyendo a kuatro djudyos.

En 2002, travaron kon mitrayadora sovre el kal de Charleroi.

Despues de tener akodrado esto todo, aboltaremeos al Muzeo djudyo de Bruxelles, el shabath 24 de mayo 2014, a las tres i medya despues de mediudiya. Un ombre trava de la kaye verso el muzeo djudyo i mata marido i mujer, dos turistos israelyanos, Emanuel i Miriam Riva, 54 i 53 anyos. Entra en el muzeo, i yene trava sovre una franseza, Dominique Sabrier, 66 anyos, ke lavorava aya por de baldes, i la mata. I trava tambyen sovre un Beljikano de 25 anyos, Alexandre Strens, ke lavorava para resivir la djente. El va ser firido i va morir de sus firidas unos kuantos diyas despues, el 6 de junyo.

Lo todo no sureo dos minutos. El matador se fuye i dezaparese.

Va ser yene aferrado en Fransya por la dogana franseza en Marseille, ke va topar sovre el las armas de la matansina. En djulyo 2014, a sido remetido por la Fransya a la djustisya beljikana ke dainda, por lo ke se, no lo djuzgo.

Kale saver ke las kozas no se van a kedar ansina en Beljika. El shabath 15 de novyembre 2014, un mansevo djudyo sufu de Anvers a sido kuchiyado al garon por un ombre ke se fuyo. El djudyo fue embiyado al ospital, firido ma no matado.

I agora, komo no avlar de la matansina del Hypercacher a la frontera entre Paris, Saint-Mandé i Vincennes, el vyernes pasado 9 de janvier, ke izo kuatro muertos djudyos?

Las kozas empesaron el myerkoles 7 de janvier, kon la matansina de Charlie Hebdo por los ermanos Saïd i Cherif Kouachi. Vo pasar presto sovre esto porke no fue un atentato antisemit, afillu si a lo manko dos djudyos fueron matados en este atentato, Wolinsky i la sola mujer, la psikanalista Elsa Cayat. Ama los matadores no miraron a la relijyon de los matados. Entre los dodje matados del 7 de janvier, ay  tambyen  un pulis muzulmano, Ahmed Merabet, i un ovrero (korektor), Mustapha Ourad.

Los dos matadores toman sus araba i se van, deshan la araba mas leshos, trokan de araba, bushkados por la pulisiya. En la araba deshada, la pulisiya va topar una karta de identidad de uno de los matadores, i va ambezarse ansina ke son los ermanos Kouachi.

El diya despues, djueves 8 de janvier, en la demanyana del diya ande yo vos estava avlando a esta misma radyo, un amigo de los ermanos Kouachi, Amedy Coulibaly, trava kon un kalashnikov sovre una pulis preta no armada porke de la polisiya munisipala, Clarissa Jean-Batiste, ke estava azyendo su lavoro a la okazyon de un aksidente de araba. La mata por kurshumes en la espalda i fire un ovrero ke se topava aya kon eya. Parese ke Coulibaly se estava indo en una eskola djudiya para azer un atentado.

La noche de este mismo diya, el mismo Coulibaly aze patladear a una araba en Villejuif. Lo savemos porke es el mismo ke lo disho en una video.

I ansina yegamos al vyernes 9 de janvier. La polisiya enserra los ermanos Kouachi en una basmaane de Dammartin en Goele. Al kavo van a pueder matar a los dos ermanos Kouachi.

Este mismo diya, verso la una despues de mediodiya, serka de la serradura de la botika Hyper cacher de la Porte de Vincennes por shabat, unos vente mushteris estan en la botika. Coulibaly entra en la botika i aya trava sovre la djente. Mata a kuatro personas, i fire munchas otras. Entre los matados, Yohan Cohen, 23 anyos, empyegado de la botika. Aprova de tomar uno de los tufenkes de Coulibaly, para travar sovre el, ama Coulibaly aze mas presto i lo mata de un kurshum en la kavesa.

Otro matado, Yoav Hattab, 22 anyos, ijo del haham bashi de Tunisiya.

Philippe Braham, 45 anyos, era el ermano del haham del kal de Pantin

François-Michel Saada, 63 anyos, tunizyano, era retirado. Su ija i su ijo biven en Israel.

Kale avlar de un otro empyegado de la botika, un preto muzulmano yamado Lassana Bathily, ke eskondyo a unos kuantos mushteris en la kamareta de yelo despues de tener serrado la konjelasyon. El mismo reusho a fuirse i a dar a la polisiya las yaves de la botika i munchos haberes presyozos.

4 largas oras despues ke Coulibaly entro en la botika, la polisiya atako, entro i mato a Coulibaly, salvando ansina los rehenes, entre los kualos un ombre kon su kriatura de 3 anyos.

Los  muertos an sido enterrados en Yerushalayim, en prezensya de Segolene Royal reprezentando la Fransya.

El alhad 11 de janvier, uvo manifestasyones de milyones de djente, inkluyendo yo.  Ama no kale yerrarse: la djente manifesto por los gazeteros de Charlie Hebdo muncho mas ke por los muertos djudyos.

Me kansa de azer emisyones sovre el terrorismo kontra djudyos. Ama kualo azer? No es kolay de ser djudyo…

Al djueves ke vyene si kyere el Dyo!

Edmond Cohen
Paris – Fransya