Muestra lingua: LOS DIEZ MANDAMYENTOS por Edmond Cohen

Keridos amigos,
Mi emisyon de djueves va ser sovre los diez mandamyentos, ke en vedra son las diez palavras, ke fueron dichas por el Dyo el mismo al puevlo arrekojido a basho de la montanya de Sinaï, i despues eskritas sovre tablas de pyedra.

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

LOS DIEZ MANDAMYENTOS

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Edris en la kabina.

Vos akodro ke el proksimo atelye de konversasyon de Vidas Largas se tendra el lunes 15 de djunyo, de las  tres a las sinko, en el Centre Communautaire.

Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

Ya ay unos kuantos anyos de esto, avri un blog sovre internet, ke pensava inchir del teksto de mis emisyones, ama no  supe azerlo i se kedo vaziyo in sin dinguna vida durante anyos, asta ke el vyernes pasado, me ambezi ke un djudyo me aviya eskrito sovre este blog para saver si yo puediya darle a konoser el teksto en djudeo-espanyol de los Diez Mandamyentos. Le arrespondi dandole el teksto en ladino de la Biblia de Ferrara i el teksto en djudeo-espanyol de la Biblia de los Protestantes, editada al empesijo del siglo 20 i ke me aviya regalado el profesor Sephiha.

A esta okazyon, me apersivi ke nunka aviya echo una emisyon sovre los Diez Mandamyentos, ke portanto forman la espina sentrala de muestra relijyon. Ya ize emisyones sovre Shavuot, ke selebra el Matan Tora, el dono de la Tora, ama sovre los Diez Mandamyentos no.

Vo aprovar de avlarvos oy sovre esto.

Vos akodro ke, en muestra relijyon, tenemos 613 mitsvot, plural del byervo ebreo mitsva, ke kyere dizir orden i ke se traslada en muestra lingua por mandamyento. Estos 613 mandamyentos son lo ke los hahamim travaron de todo lo ke el Dyo enkomendo a los djudyos, lo mas muncho a traves de Moshe Rabenu. A kada vez se melda en la Tora Vaydaber Adonay el Moshe lemor: I avlo el Senyor a Moshe por dizir: i sigen varyos mandamyentos, savyendo ke asigun todos los hahamim, no ay de tener una ierarkiya entre los mas importantes i los manko importantes. Todos los mandamyentos deven ser observados kon alegriya i sin preferensya. Ama kale dizir ke munchos de estos mandamyentos valen solo para los Cohanim, sovre todo del tyempo de los sakrifisyos en el Templo de Yerushalayim. Otros valen solo por el nazir, el ke izo neder de no bever vino o kortarse los kaveyos (komo Shimshon, por egzemplo). De tal manera ke el djudyo ordinaryo de oy no es ovligado por 613 mandamyentos, ama un poko manko. Los 613 se dividen en  248 de azer, i 365 de no azer.

Por egzemplo, meter una mezuza a su puerta es mitsva de azer. A la kontra , no komer sangre o no komer trefa son mitsvot de no azer.

Esto dicho, yene ay, entre estos 613 mandamyentos, unos 14 (i no solo 10, komo lo vamos a ver mas leshos) ke no fueron solo avlados a Moshe Rabenu por dizir, ama  fueron dichos por el Dyo el mismo a todo el puevlo, i despues  eskritos por el dedo mismo del Dyo sovre tavlas de pyedra kuando Moshe se topava solo kon el Dyo arriva del monte de Sinaï.

Komo se pasaron las kozas?

Tres mezes despues de tenerse fuido de Ayifton, los ebreos ayegan al dezyerto de Sinaï, al pye de la montanya. El Dyo yama a Moshe desde la punta de la montanya, i Moshe se suve verso El, i el Dyo le manda de dizir al puevlo ke si entran en su aliansa, van a ser al Dyo «thesoro mas que todos los pueblos», un reyno de cohanim i una nasyon santa. Moshe lo dize al puevlo, il el puevlo responde ke van a azer todo lo ke el Dyo va dizir.

I el Dyo disho: yo en tres diyas vo abashar sovre la montanya. I el treser diya a la demanyana,  uvo tiruelos i relampagos i bozes de trompetas. La montanya era entera de umo por modo del fuego.

I el dyo avlo, i todos los ebreos arrekojidos lo oyeron, i disho (vos meldo lo ke disho en ladino):

«Yo Adonay tu Dio que te saqué (travi) de tierra de Egypto de casa de siervos.
No sea a ti dioses otros delante mi. No hagas a ti doladizo (idolo) o toda semejança que en los cielos de arriba  y que en la tierra de abaxo, y que en las aguas de abaxo a la tierra. No te encorves a ellos y no los sirvas, que yo Adonay tu Dio, Dio celoso, visitan delito de padres sovre hijos, sobre terceros y sobre quartos (jeneransyos) a mis aborrecientes. Y fazien merced a miles, a mis amantes y a guardantes mis encomendanças.
No jures a nombre de Adonay tu Dio a vanidad, que no perdonara Adonay al que jurare a su nombre a falsedad.
Membrar al dia de Sabbath por santificarlo. Seys dias labraras y faras toda tu obra. Y dia el seteno  Sabbath a Adonay tu Dio; no fagas toda obra, tu y tu hija, tu siervo y tu sierva, y tu quatropea, y tu peregrino que en tus villas (tus puertas). Que seys dias hizo Adonay a los cielos y a la tierra, a la mar y a todo que en ellos, y holgo en el dia el seteno; por tanto bendixo Adonay al dia del Sabbath y santificolo.
Honrra a tu padre y a tu madre, porque se alarguen tus dias sobre la tierra que Adonay tu Dio dan a ti (te da).
No mates.
No forniques.
No hurtes (no arrroves; hurtes vyene de furtes, ke vyene del latino furtum, rovo).
No testigues en tu compañero testigo de falsedad.
No cobdicies casa de tu compañero, no cobdicies muger de tu compañero, y su siervo y su sierva, y su buey y su asno, y todo lo que a tu compañero».

Estas son las famozas «palabras las diez», mas konosidas komo «Diez mandamyentos». Son palavras porke es el Dyo el mismo ke las disho a todo el puevlo arrekojido para oirlas, i no a Moshe el solo. I son palavras diez i no mandamyentos diez porke en vedra son mas de diez los mandamyentos arrekojidos en estas diez palavras, komo lo vamos a ver mas despues.

Esto dicho, despues de tener avlado al puevlo entero, el Dyo avlo a Moshe solo i le enkomendo varyas mitsvot (varyos mandamyentos) ke se topan en los kapitulos 20 a 23 de Shemot.

Despues Moshe eskrivyo todo lo ke el Dyo le aviya dicho (el «libro del firmamiento» (de la aliansa, berith en ebreo) i lo meldo al puevlo ke disho de muevo: «todo que fablo Adonay, haremos y oiremos»(en ebreo naase venishma). Los hahamim no mankaron de topar kuryozo ke se aga en primero i se oiga despues.  No es oy el diya para diskutir de esto, solo vos diré ke lo ke entendyeron de esto es ke en primero kale azer lo ke el Dyo ordeno, i solo despues ay de pensar sovre lo ke ordeno. La aksyon prima sovre el penseryo. Otros dizen ke es en azyendo las mitsvot ke se entyenden.

Despues el Dyo dize a Moshe de suvir solo sovre la montanya, i adjusta:» daré a ti a tablas de la piedra (luhot aeven en ebreo), y la ley (tora) i la encomendança (mitsva) que escrivi para amostrarlos».

I Moshe suve solo ensima de la montanya, en medyo del umo i del fuego, i aya se keda kuarenta diyas i kuarenta noches. De muevo el Dyo da varyos mandamyentos a Moshe, del kapitulo 25 al kapitulo 31, pasuk 17.

I el kapitulo 31 se eskapa por un ultimo pasuk 18 ke vos vo meldar en ladino:» Y dio a Moseh, como su atemar (eskapar) por fablar con el en monte de Sinay, dos tablas del testamento  (testimonyo en djudeo-espanyol, luhot aedut en ebreo), tablas de piedra eskritas con dedo del Dio».

Si me oitesh byen, lo ke Moshe eskrivyo es el libro del firmamiento (sefer a berith) i lo ke el Dyo eskrivyo son las tablas del testamento (luhot aedut). No kale konfundir. Las tablas eran «escritas de dos sus partes, de aqui y de aqui ellas escritas. Y las tablas, hechura del Dio ellas; y la eskritura, eskritura del Dyo ella, esculpida sovre las tablas»( Shemot, XXXII, 15 i 16).

Moshe abasha del monte de Sinaï kon las tablas en su mano, y kualo topa abasho? Ve ke kansados de asperarlo, los ebreos, ayudados por su propyo ermano  Aaron, an fraguado kon sus djoyas un «bezerro de fundicion» (egel maseha en ebreo, el chiko de la vaka fundido en metal para servir de idolo). Por siguro, a Moshe le suve  la birra de ver esto: despues de dizir vamos azer todo lo ke el Dyo enkomendo, los ebreos an rumpido la aliansa kon el Dyo i echo djusto la rovez de lo ke les aviya enkomendado el mizmo kon su boz. Moshe es tan arravyado ke echa a basho las tablas ke se rompen. Toma el bezerro i lo echa al fuego i lo kema, i kon la siniza la mete en agua i ovliga los ebreos a bever esta agua. Yama a los ke kedaron de su vanda, i todos los del trivo de Levi (su trivo) vyenen al lado de el, i Moshe les ordena de matar a los kulpavles, i matan a tres mil personas este diya.

Despues Moshe se va a ver al Dyo para demandarle pedron por el pekado ke izyeron. El Dyo acheta i dize a Moshe: » Dola (eskulpe) a ti dos tablas de piedras como las primeras, y escriviré sobre las tablas a las palabras que fueron sobre las tablas las primeras que quebraste».

Moshe lo aze, i suve kon las tablas.  I aya el Dyo pasa delantre de el, i aki ay un teksto ke dizimos munchas vezes en las selihot el diya de Kipur, i ke vo meldarvos en ladino  (Shemot, XXXIV, 5 a 7) : «Y descendio Adonay en la nuve i estuvo con el alli, y llamo en nombre de Adonay. Y passo Adonay sovre sus fazes y llamo: Adonay, Adonay, dio piadoso y gracioso, luengo de yras, y grande de merced y de verdad. Guardan merced a milles, perdonan delito y rebello y peccado; quitar (aki s’eskapa la meldadura en las selihot, ama en vedra el teksto kontinua) no quitara, secutan delito de padres sobre hijos y sobre hijos de hijos, sobre terceros y sobre quartos».

Moshe demanda pedron para su puevlo, un puevlo «duro de cerviz» asigun el Dyo el mismo.

I el Dyo acheta de azer de muevo aliansa kon el puevlo ebreo. Da sus enkomendansas, i «dixo Adonay a Moseh: escrive a ti a las palabras estas, que por dicho de las palabras estas tajé contigo firmamiento, y con Ysrael. Y fue ahi con Adonay quarenta dias y quarenta noches,  pan no comio y aguas no bevio, y escrivio sovre las tablas a palabras del firmamiento, diez las palabras» (Shemot XXXIV, 27 i 28)

Kyen eskrivyo las sigundas tablas? Asigun lo ke vengo de meldar, es Moshe ke las eskrivyo, esta vez. Por tanto, un poko antes, vos meldi ke el Dyo disho «escriviré sobre las tablas». I kuando se melda Devarim, X,4, es dicho por Moshe ke es el Dyo ke eskrivyo las sigundas tablas.

Ay un midrash ke dize ke es Moshe ke eskrivyo, ama despues el Dyo paso la mano para firmar.

En Wikipedia (agora ay los hahamim, i ay Wikipedia) dizen ke lo ke eskrivyo el Dyo son las diez palavras, i lo ke eskrivyo Moshe es el sefer a berith, lo ke el Dyo disho a Mosheh del pasuk 10 al pasuk 26 del kapitulo 34 de Shemot (por dar un egzemplo, no gizar el kavretiko en la leche de su madre).

Mos vamos a kedar sovre esta interogasyon. Lo ke es siguro, kual ke sea el eskrivedor, es ke lo ke era eskrito sovre las tablas eran «diez las palabras» tal ke vos las meldi al empesijo de esta emisyon.

Vos dishe al empesijo de mi emisyon ke si las palavras son diez, los mandamyentos son un poko mas. Deke? Porke, asigun Rambam (Maimonides) en la sigunda palavra ay 4 mitsvot:

1 Kreer en digun otro dyo ke el Dyo

2 No azer un idolo

3  No enkorvarse en signo de idolatriya

4  No adorar a un idolo de la manera en ke esta adorado

I, yene asigun Rambam, en la kuatrena palabra ay dos mitsvot:

1 Membrar el diya de Shabat para santifikarlo

2 azer dingun lavoro en diya de Shabat (los hahamim toparon 39 lavoros ke no se deven de azer el diya de Shabat)

Esto todo mos aze , en las diez palavras, 14 mitsvot sovre las 613 en todo.

Komo ya lo dishe, estas diez palavras, eskritas sovre Tablas de pyedra por la mano mismo del Dyo, forman la espina dorsala de muestra relijyon. Por tanto, kuando Flavius Josephe eskrive sus Antikidades Judaikas en 93, sea 23 anyos despues de la kaida de Yerushalayim i la estruisyon de su Templo,  kuando vyene para avlar de las diez palavras, mos dize: «No me es permetido de dizir estas propyas palavras, solo vos puedo dar sus sentido» . Por kyen no le era permetido? I  deke? Esto no lo dize. Yo meldi sovre Wikipedia ke la razon puedriya ser para ke el djudezmo no sea limitado a los diez mandamyentos. Yo no so konvensido, porke nunka los hahamim defendyeron la meldadura de las diez palavras. I afillu si lo uvyeran defendido, no teniyan dingun poder kontra Flavius Josephe. Yo me demando si no son los Romanos ke lo defendiyan. Ya savemos ke despues de la rebuelta de Bar Kohba el ensenyamyento de la Tora a sido proibido por los Romanos. Es vedra ke del tyempo de Flavius Josephe, dainda no estamos en esto, ama puede ser ke yene las kozas aviyan empesado.

Esto dicho, es vedra ke asigun el Talmud (Avot 2,1) no ay yerarkiya entre las mitsvot. Por tanto, a mi me parese ke la mitsva de no matar es mas importante ke la de no kortar los peot. Ama yo no so haham…

Agora ke ya mos aserkamos de la fin de esta emisyon, keda una kuestyon: ke se izyeron estas tablas? Fueron metidas en la Arka Santa, esto lo savemos por el livro 1 de los Reyes, kapitulo 8, pasuk 10:» No en la arca salvo dos tablas de las piedras qua avia dexado alli Moseh en Horeb». Esta arka, metida despues en el Templo de Yerushalayim, dezaparesyo kon sus tablas kon la estruisyon del primer Templo, el Templo de Shelomo, por Nebuhadnetsar en 587 antes del Kristo. Pekado, kon eyas pedrimos la posibilita de ver la eskritura del Dyo, o a lo manko de Moshe Rabenu.

Al djueves ke vyene, si kyere el Dyo!

Edmond Cohen
Paris – Fransya