Muestra lingua: EL LIVRO DE RIVKA ABIRY por Edmond Cohen

Keridos amigos,
Konsagri mi emisyon de este djueves al muevo livro de Rivka Abiry
«Una lagrima Una riza, Lo ke mos konta Rivka”, i en el eskoji dos tekstos para meldarlos: Eskrita de una mujer de 90 anyos i El sekreto detras del kuadro de foto.

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

EL LIVRO DE RIVKA ABIRY

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke el proksimo atelye de konversasyon de Vidas Largas se tendra el lunes 18 de mayo, de las  tres a las sinko, en el Centre Communautaire.

Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

Estos diyas salyo sovre internet un livro de 185 pajinas ande muestra amiga Rivka Abiry, ke mora en Haifa en Israel, arrekojo unos syen de los tekstos suyos ke son puvlikados kada mes en pajina 10 de la gazeta El Amaneser. El titolo de este livro es «Una lagrima una riza Lo ke mos konta Rivka».

Yo no solo tomi muncho plazer de meldarlos, ama tambyen tuve la okazyon de meldar unos kuantos de eyos aki en la radyo. Los ke me oyen desde tyempo se akodran puede ser, entre otros, de «Nisimachi», ke meldi aki en novyembre 2007, «Los Dos Ermanos» ke meldi en 2009, «Dos madres, un nombre» ke meldi aki en junyo 2012, «Kon boda i pandero», «Ven bailar kon el internet» i «Kalsados», ke meldi los tres en oktovre 2012. I otros tambyen, komo «El Tostador», por egzemplo, ke meldi tambyen aki ya no se kuando.

Rivka nasyo en 1920 en Fransya, paso su chikez en Viena, izo su eskola en Bulgaria, de aya se fuyo en Iran, i agora bive en Haifa en Israel. «Una vida, mos dize, kon mucho lagrimas a pokos sonrizos». Es vedra ke konosyo munchos lutos, el mas terrivle syendo la pedrita de su ijo asker en la gerra de Kipur. Por tanto, la tristeza no se melda tanto en sus eskritos, i lo ke se ve es mas el umor i la sonriza. Rivka tyene un dono de kontar kozas ke bivyo, las troka a su manera i de su istorya aze una konseja.

Ama tambyen mos da a entender su filozofiya de vida, i vash a ver, komo lo dize eya misma, ke va adelantre, afillu kuando konta lo pasado.

Empesaremos por un eskrito ke vos va azer konoser a esta mujer:

ESKRITA DE UNA MUJER DE 90 ANYOS

Komo estas? Kualo estas aziendo después de pasar los 90 anyos? Vos kero dar un rezume chiko.

Yo esto meldando mas, eskriviendo mas, i mas poko okupandome kon la limpieza de la kaza i del gizar. Esto mas predispozada de asentarme a la tarasa de mi kaza i de mirar afuera, a los arvoles, a la nuves, a la djente ke pasan, a las kriaturas ke djugan. Me es una alegria de asentarme en frente de la komputadora i eskrivir e-mailes, o djugar bridj kon personas imajinarias, deskonosidas i elektrónikas. Kuando el tiempo lo permete, salo de kaza mismo si es solo para merkar un timbro de la posta. Yo esto pasando más tiempo a vijitar konosidos en las manyana, enkontrarme kon amigas en un kafé, i mucho más repozarme.

Yo no esto mas pensando a uzar o kulanear kozas para los otros días. Esto uzando mi mas bueno servisio de meza i las kupas mas ermozas de bever i no emplearlos solo por un evento ekstraordinaryo. Ama todo kon tabiet. No esto mas esperando de tener paras para merkar el programo muevo i moderno para la komputadora mía, de irme al sinema, al teatro, o viajar ande mi famiya al ajeno (solo ke me inviten). Todo lo deshado es perdido.

Bushko okaziones de kombidar amigos en un restaurante i pagarles la konsomasión, en lugar de asperar ke me inviten eyos. Bushko okaziones de dar regalos a mis inyetos en lugar de asperar un teléfono de eyos. Bushko de avlar mas ke prime, para tapar mi tristeza interiora, la infelisidat, i no afendentar la djente kon mi dolores chikas.

Si vienen musafires, los invito a komer en la sala grande, sin mucho tekilif, meto mantel ermozo sovre la meza, i no los kombido en la kozina. Si ago mis empleos en el “Super”, bushko komidas ke savorear la boka, komo “lakerda” “salmon”, “liches”, “kaviar o tarama kolorada”,”sushi”, kastanyas, langosta, shrimps, kezo de la Suisa o de la Fransia, vinos karos i karne freska, o siertas kozas delisiozas de komer. Endemas la teoría deve ser: “Si tienes paras, tomate un taksi después ke empleyates por 100 Shekel, no asperes al autobús, enkargada kon paketikos i bolsas. A muestros anyos no vale la pena de apretar la sintura.”

Yo no uzo perfumes, ma kero konsejar a las personas ke aman perfumes, de uzar os en lavorando en la ofisina, en la banka, o en una botika.

Si te gusta invitar unos kuantos amigos i pasar el tiempo, deke no yamar por teléfono otros, ke perdites de vista, i ansina estableser de muevo las relasiones?
Se dize ke amigos siempre son a tu lado, ma amigos verdaderos no prime darles la mano, por modo eyos son siempre a tu derecha.

Si te plazen siertos amigos, entra a sus kazas kon una sonriza, i trayeles una bavajada chika mismo si es solo una flor o un pedaso de torta, un tajiko de almendra, o una lektura ke meldates i ke te izo plazer.

Kero rekordarme de los nombres de personas, ma me es difísil, dezeo viajar a New Zealand i Australia, ma no puedo, kero vestirme kon jeans i chapeos grandes, ma no me van, kero ambezarme muevas kozas, ma no me entran en la kavesa, kero desbarasarme de kozas ke rekoji para ke se tope, ma no lo puedo, kero asuvirme munchas eskaleras ma no tengo la fuersa, me se toma el soluk, kero tantas kozas… ma no lo puedo. “Otra vez”, o “otro dia” piedreron sus valor en mi vokabulario. Si vale la pena de azerlo agora, si tienes gana de azerlo, no lo deshes para amanyana.

Kada dia kuando avro mis ojos, me digo ke es un dia espesial. Kada dia, kada punto, kada respirasión es un regalo. Kuanto pasates los 85, ya te ambezates bastante, ma kale solo akodrarte de eyos.

Yo no me kreo en maraviyas, yo los sostengo.

Si es posivle, la vida deve ser un desino de savorear las ekperyensas, no de soportar as. Yo kero rekonoser estos momentos i abrigarlos.

La vida non es solo el plazer ke esperámos, ma kuando esta aki, gozala i apresiala. Tu vida no la puedes prolongar, engrandeser, o azerla mas profunda. Goze kada momento, ke la vida no se puede tornar atrás, no se puede entender solo en mirando atrás, ma kale bivir adelantre.

Kale bivir adelantre, mos dize esta mujer de 90, ke me aze pensar a mi kerido papu, ke a los 95 me diziya:»Yo, kuando seré vyejo, me iré al kal.» Parese ke se topava dainda mansevo kuando se muryo a los 101, porke nunka se fue al kal…sino para mi kazamyento, i puede ser el suyo…

Agora un kuento ke eskoji entre munchos otros, porke me parese tipiko del estilo de Rivka. Nunka se save kon eya ande se eskapa la vedra, ande empesa la fiksyon. La istorya tyene por titolo:

EL SEKRETO DETRÁS DEL KUADRO DEL FOTO

Mi sovrina Fortune Melamed, ke yego en 1948 a venir kon la alya de Búlgaria a Israel, tuvo tres ijas, Lea, Malca i Irit. Después ke bivio en un kibbutz todos eyos se establesieron en Petah Tikva i bivieron ayi. Las kondisiones de vida después del kibbutz, en la sivdad fueron muy duras i todos lavoravan para ganarse una vida desente, ma las ijas estavan felises ke su madre fue en su visindado i siempre dispuesta a ayudarlos. Fortune ke se ambeso el ebreo por lo tanto topo i enkontro algunos empleyos komo niñeras, komo vendidora en la konditoria al lado de su kaza o komo kosinera en el restaurante en la kaye Florentin.

Pasa punto, pasa mundo. Un día Lea se aserkó a su madre, disiéndole ke kería ir se a Florida, en los Estados Unidos donde su marido avía enkontrado un trabaho lukrativo a la Universidad de Miami. Su madre entro en un shock, fue una koza inesperada pormodo ke eya tando dependia de su ija ke no sólo bivió endjuntos kon eya, pero también era muy adorable, enérgika, inteligente i amostrava kara i un grande amor a su madre.

Apenas Fortune se akostumbro de este estado i a la idea ke Lea partio al estranjero, kuando un día Malka, ke se avía kasada kon un ingeniero fransés, fue invitada por su familia en Grasse (Francia) a asumir el lavoro komo un ekperto de perfumes, en una de las empresas de fabrikasión ayi. Grasse es el sentro de la industria de perfume franss i es konosida i renomada komo la kapital del mundo de perfume. Los ekspertos ke golen los aromas diferentes se yaman la «nariz».

Después de la partensia de Lea i Malka, Irit, la más joven entre las ermanas, sentía kompasión por su madre i la invitó a venir bivir kon eya en su kaza. Fortune estava triste i amargada ma naturalmente por supuesto estava feliz de ver a sus ijas bien establesidas en el ajeno. Ma kualo akontesio después de unos kuantos anios ¿ Fortune tuvo ke sostener otro bokado amargo, kuando también Irit, acheto a un lavoro superbo a la Embasada de Israel en Berlín. Esto fue un movimiento insospechado, ke Fortuna nunka imagino ke algo le va akonteser a eya. No savia si tenia de alegrarse o yorar, te tomar sufisiente fuerza para sobrevivir esta aharvada o de ser en akuerdo kon su ija.

Lo úniko ke kosolava a Fortune fueron las promesas de sus ijas de venir de vez en kuando a vijitarla en Israel. En konklusion, las vijitas eran aresentados bien ante del tiempo, para el inverno, para las fiestas o para okasiones espesiales. En otras palavras i en kurto todos vinieron a vijitar a su madre. En realidad, los dias de la vijitas fueron enregistrados ermoso en el kalendarios de todos en kolor kolorado i se asperavan kon amor i alegria de Fortune, ke ya estava entrando en anios i agora estuvo solika después de la muerte de Jonathan.

Sin embargo kada una de las ermanas tuvian kontakto una kon la otra, se komunikavan i savian sovre sus aktividades i ke se pasa. Komo ermanas tenían una relasión saludable, kariniosa i interesante . Bien, ah me olvidi de kontarles ke la madre Fortune antes ke sus ijas desharon la kaza i salieros al ajeno, resivieron de eya una foto de eya misma, bien rodeada en un kuadro elegante i fino de plata.

La vida por Fortune, ke entremientes se akostumbro mas o menos solo a las vijitas de sus ijas se ajusto poko a poko, ma profundo en su korazón eya se aresento kon la absensia de sus ijas i de su esposo. Ansi Fortune ampeso de muevo sus enkontros kon la djiente de su visindado i sus amigas malgrado ke se via una tristesa profunda en sus ojos, ke se alumbravan de alegria kuando eya savia ke vana venir a vijitarla. Su apartamento fue siempre bien kuidado, malgrado ke de vez en kuanto pensava de entrar en una kasa de vejez.

Kon el pasaje de los anyos Lea, ke bivía en Florida venia solo a grandes intervalos vijitar Israel, mientras ke Malka i Irit ke bivien en Europa tuvieron mas possibilitates, les era mas fasile de venir a Israel por modo de las distansias mas kurtas de sus payises asta Israel.

Los ijos de las ermanas también kresieron, algunos de eyos entraron en echos, en universidades i más o menos la mueva jenerasion asieron sus proprios planos i preparasiones por el futuro. Todavía las relationes de todos las familias se mantenivan bivas, las muevas invensiones teknológikas también ayudaron a esto buto i kontribuyeron a las sanas relasiones entre eyos.

Komo a Lea se estava aziendo difísil de vijatar, todos se dezisaron un día ke Uri, el ijo mayor de Malka devia partir a Florida ir a ver a su tía. Kuando yegó Uri, a Florida esto fue una reunión muy enkantadora, i todos disfrutaron de la vijita de su primo. Kuando Uri finalmente devia partir, Lea le amostró la foto de su madre, ke todavía tenía un lugar importante en sumo del bufetikio en la grande sala.. Uri kon grande kudio tomó la foto, se dio kuento kuanto su madre se avia avejesida en los anios passados i sus dedos tokaron kon finesa el kuadro i a su alderedor. Demesmo el amostro una kuriosidad de aboltar el kuadro para ver la parte posteriora. Kon sierta destreza i levianes el avrio el kuadro i vido una nota chika entre el vidrio i el kartón. Kuando tomo la nota chika en su mano ampeso a meldarla en una voz basha.

“ Yo la afirmada Fortune Melamed deseo anunsiar ke Lea Serousy
no es la verdadera ermana de Malka i Irit. Kuando ayegi a Israel me mandaron al kibbutz Neot Mordehai donde lavori kon las gainas. Ayi me enkontetri kon Rafael, también un ole hadash desde Bulgaria i me enamoré de él en passando algún tiempo endjuntos
Kuando se oyo ke su esposa va venir al kibbutz, yo amargada lo dechi a Ráphael. Después de un tiempo muy kurto enkontro a Jonathan i komo era en estos tiempos kompartimos la misma kamareta i rápidamente mos dezisimos de kasarmos malgrado ke le konti ke yo estava embarazada de un otro ombre. Jonathan me amo mucho i me aksepto tal ke so. El fue un marido enkantador, él adorava a Lea , kuidava i la angrandesio komo su propia ija. Yo le di a Jonathan dos otros ijas, Malka i Irit. Nadie supo mi sekreto, ke no fue divulgado pormodo ke Jonathan yevo este sekreto mio kon si en su tomba.
Mi último deseo es demandar al lektor de esta nota de non deskuvrir su kontenido,
ma yo kero dar le a entender ke tiene dos posibilidades. Meter la nota ande la topo, o debaraserse de eya en kemando la. Yo desho a ti kerido lektor de dezidar lo ke el krea es la mishor solusion.. Aze lo ke pensas!!!! Puede ser seria de akordo kon ti.
Ke Dio te bendiga.”

No se kualo akontensio a la nota, ma desho a vosotros de espekular ke fue la fin de esta istoria.

Sovre esta interrogasyon se eskapa este kuentiziko de Rivka Abiry, i kon el mi emisyon de oy

Al djueves ke vyene, si kyere el Dyo!

Edmond Cohen
Paris – Fransya