eSefarad Noticias del Mundo Sefaradi
Djohá i la orasión
La madre de Djoha lo alevantava kada demanyana presto, diziéndole: «Ayde Djohá, alevanta va a rogar a la mishkita!»
Ma a Djohá no le agradava ir a rogar i topava siempre una eskuza. Alhad le dizía: «No oy no puedo. Tengo lisión de jimnastik…»
Lunes le dizía: «No, oy no puedo. Tengo un examén!»
Martes le dizía: «No, oy kale ke vayga al charshí.»
I ansina kada día, asta ke vino viernes. Viernes le disho la madre: «Ayde Djohá, oy es viernes, alevanta i va a rogar…».
«Bueno,» disho Djohá i se fue para la mishkita. Kuando arivó ayá, vido ke las puertas de la mishkita están serradas.
Kon un suspiro de alivio Djohá disho: «Bueno ke vino de El i no de mí!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
