eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Montserrat Franco
Aktrís, kantadera, kompozitora i bayladera
(Paraguay)
Montserrat Franco nasió en Paraguay 32 anyos antes. Su karriera de ijika prodijio empesó en su chikés kon una versatilitad ekléktika. Eya tiene un grande talento en diversos estiles muzikales ke van del jazz a la World Sound en las siete linguas ke avla fluentemente, entre eyas el inglés, el espanyol, el portugés, el italiano i el ebreo. Eya es graduada komo profesor vokal i interpret de teatro (Opera i drama) por la W.A. Mozart Conservatory of Arts i el Julio Correo School of Arts, en Asunsion, Paraguay. Montserrat interpretó kompozisiones klásikas i folk en konsertos en el mundo, kon prestijiozas orkestras sinfónikas i de kamera, a solo i a kapela, i kon grupos jazz i folk. Asta agora kaptivó los korasones de sus audiensias en Brazil, Italia, Las Izlas Karibianas, Espanya, Israel, Kroatzia, Australia, i agora en Estados Unidos. En los anyos pasados produsió i enrejistró en Israel unos kuantos CDs kon el ayudo del Estado de Israel i el Governo Espanyol en el kampo de la múzika sefaradía, i en Paraguay sovre la múzika i la kultura del grupo étniko Guaraní. Otras produksiones de Montserrat inkluyen el «Ethnic Jazz Project», «Songs of Inspiration» i «Sephardic Romances and Cantigas». Del 1995 al 1998 dio konsertos en Asunsión komo solista kon la Orkestra Sinfónika i la orkestra de Kamera de Asunsión. En los programas de sus konsertos se topan las mas ermozas kantigas de la Dióspora sefaradía kantadas en ladino, sigún los estiles de las diferentes komunitás: Gresia, Turkía, Maroko i Yerushaláyim kon grupos orientales. Además se topa la múzika de la alma de los nativos del Guaraní, en una fuzión de flamenko, múzika árabo-andaluza, i un gusto latino. Montserrat resivió bekas de los Ministerios del Eksterior de Espanya, Italia i Israel. Durante su karriera resivió krítikas muy pozitivas en jurnales de Israel, Fransia, Italia, la Repúblika Domenikana i Paraguay, komo por exemplo la del jurnal Il Messaggero de Italia, 1997: «Una kantante kon un grande talento i una grande personalidad. Sus performansias demonstran maestría, sigureza de sí i un riko senso de umor».
