eSefarad Noticias del Mundo Sefaradi
Avril/15/1945/ SALAMONIKO 11 ANYOS DE EDAD
Mi papu YAKO i mi nona ANULA kon sus dos ijos aze largo tyenpo ke ya se mudaron a ESTANBOL. Ya se arekojeron kon sus dos ijas ke se estavan yindo a eskolas adelantadas.
Se aresentaron en una kazika en KASIMPASA, una area en ESTANBOL. Durante este tyenpo uvo un chiko kambyo en su famiya.. Una de las ijas buchukas (jumelle) RASHEL se kazo kon YESHADYA VENTURA, i esta pareja se aresentaron en Ortakoy/istanbul.La otra ija, JANTI, se kazo kon YEHUDA PASI ise aresentaron en KUSKUNCUK/istanbul.
Oy esto triste kon munchas ganas de yorar…
Esto parado en frente de un vaporiko en el porto de CHANAKKALE kon mi famiya. El vaporiko es uno de los 4 vapores de karga ke azen viajes entre Chanakkale…Gelibolu/Galipo i Estanbol. Ama este barko trampa ke yo esto mirando es mas chikitiko.
Kon un direk (mast) enfrente de la kamareta del kapitan del barko. Parese ke avren velos en su viyaje.. Este vapuriko es el ke esta yevando a mi padre i a madre a Estanbol.
Kon lagrimas en sus ojos mi padreziko mos asento en sus dizes i mos disho a pretandomos a el,a mi ermaniko YAKO i a mi, i mos disho :
– Kuando mos vamos aresentar mama i yo en Estanbol pishin vash a vinir a mozotros.
Mama estava asentada en la valija de viyaje kon lagrimas koryendo de sus ojos komo mabul. Mos supliko ke mos komportemos buenos, ama muy buenos kon el onkli SOMOEL I LA TANT FORTUNE en este kurto tyenpo ke ivamos a bivir kon eyos. Iiiiiiii ke vijitemos el tiyo NISIM el syego i ke le ayudemos.
El vapuriko echo grande umo preto de la chimeneya ensenyandomos ke ya estava pronto para su viaje, ke sus kalderas estavan muy kayentes para dar vapor.
MAS ABRASOS ENTRE MOZOTROS, MAS LAGRIMAS, MUNCHOS DEDOS ALARGADOS SOVRE MOZOTROS I MAMA ECHANDO MUNCHOS BEZOS KON SUS MANOS DE LA BOKA.
El vapuriko tyene una grasya enorme despartyendose del porto… Komo una nokta mavi lo vemos aleshandose.
Lo ke me esta pasando de mi mente en TURKOÑ BABACIM ANNECIM, BIR GUN OLSUN KOLLARINIZA GINE
ATILMAK ISTERiM……..CANLARIM BENIM (Papiko i Mamimka, Un diya kijyera echarme de muevo a vuestros brasos… Almas miyas)
Sal Amira
SALAMONIKO MUNCHOS REKUERDOS
CHANAKKALELI, EN MIAMI USA.
Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.
Fuente: Publicado en Sefaradimuestro – https://groups.yahoo.com/neo/groups/Sefaradimuestro
