La rubrika de Gad Nassi – Estorias de los tiempos biblikos: David Insultado por Shimi

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

David Insultado por Shimi 

Shimi era un Benyaminito, era de mismo un serkano del Rey Shaul. David kuando se estava fuyendo de Yerushalayim a la Valeya de Yarden, durante la revolta de su ijo Avshalom avia pasado por Bahurim, ande rezidava Shimi.

En esto, Shimi se aserko de David i de sus ayudantes, les echo piedras i tierra, i a David lo yamo:

«Suzyo! Suzyo! Asasino! Malisiozo!»

Kon estas palavras estuvo mirando kon dedenyo a David en detreso, komo si keria eksprimir ke David fue kastigado por toda la sangre de la Kaza de Shaul, ke aviya vazyado. En esto, Avishay ke era uno de los komandantes de David ke se estava topando allado d’el, kijo matar a Shimi en este mizmo momento. Ma, David lo empidio.

Kuando David avia vinsido a Avshalom i su armada, Shimi i mil Binyaminites, kon Ziva la servante de la Kaza de Shaul, kon sus kinze ijos i vente servidores, i kon munchos del Trivo de Yuda, arivaron a Yarden – antes de todos los serkanos de David – para demandar su klemensia.

Shimi se prosterno delantre de David:

«Nome deisgrasies, no te akodres de lo ke tu servidor te izo el diya ke salites de Yerushalayim, i no lo tomes a tu korason. Porke tu servidor no savia ke estava pekando. Vine kon la Kaza de Israel para abokarme delantre del Rey de Israel«.

David le respondio:

«No te va matarte«. I, le djuro.

Portanto, David antes de murirse se avia adresado a Shelomo kon estas palavras:

«Akodrate ke Shimi ijo de Gera, el Binyaminito de Bahurim, ke me insulto de una manera grava, kuand parti a Mahanaim… Yo, le djuri ke no lo iva matarlo kon la espada. Agora observalo sin kulparte… Kale ke abashes a la tomba su kavesa enviejesida kon su sangre«.

Despues ke suvio al trono, Rey Shelomo izo yamar a Shimi:

«Fraguate una kaza en Yerushalayim, i mora ayi, i no te aleshes de ayi. Porke el diya ke saliras de tu kaza i traverseras el Rio Kidron, siguro sera tu muerte i tu sangre sera sovre tu kavesa«.

Shimi le respondio:

«Tus palavras son sakras, i tu servidor se sumetra«.

Despues de tres anyos, afito ke dos de los esklavos de Shimi se fuyeron a Akish. Entonses, Shimi partio a Akish para bushkarlos, i los trusho atras.

Kuando Shelomo lo supo a esto, izo yamar de muevo a Shimi:

«No telo tengo dicho, i te lo ize djurar delantre del Dio, ke si partiras leshos de ande estas, ke por siguro seras muerto? I tu me lo prometites? Deke no tenites tu promeso i lo ke yo te komendi?

Ya saves muy bueno la pena ke izites a David, mi padre. I el Dio te pagara por esto kon tu kavesa. Ke el trono del Rey Shelomo sea bendicho. Ke el trono de David seya establisido por syempre delantre del Dio «.

I, kon estas palavras, Shimi topo su muerte por la mano de Benayau, el Komandante de Shlomo.

* * *

David, al lugar de matar a Shimi avia preferado de pardonarlo. Esto es eksplikado por el fakto ke David mismo se estava sintiendo kulpable de no aver ajisado asigun la Ley durante su reyno, i kijo kalmar el sanyo del Dio. De mismo ke avia kijido unifiar a su puevlo en empidiendo la kontinuasion de los litijos.

Portanto, antes de murirse se avia akodrado del insulto de Shimi, i de la pena ke este insulto le aviya provokado, en unos de los mas difisiles momentos de su vida.

—————————————–

Gad Nassi