eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí.
Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita
INTELIJENSIA ESPIRITUAL
Los «Yamim norayim» se estan aserkando.
Los Yamim Norayim son los diez dias «de arrepentimiento» entre Rosh- aShana i el dia de Kippur. Ma, segun la tradision de los sefaradim, los aparejos psikolojikos al enkontro de estos dias temerozos, ya empesan un mez antes.
Desde el empesijo del mez de Elul (oganyo, en 12 de Agosto 2010) se levantan judyos kreentes a dizir Selihot en oras de la madrugada, dia por dia, durante 40 dias.
Es verdad ke este echo parese un bien kargo, ma el fato es ke ay djente ke lo azen kon veluntad.
– Pero, es ke ay algun otro remedio, tal vez algun akurtamiento del proseso para ganar en el dia de la sentensia?
– No lo se, asi ke no vos puedo dizr algo.
Ma mirando aki lo ke se topa eskrito en la Gemara («Rosh aShana» 17):
«Disho Raba: Todo el ke «da de pasada», el ke es induljente i perdonador, ( i no es eskrupulozo kon la djente ke lo ofenderon i lo blesaron), se les perdona de los sielos todos sus delitos».
Sierto ke este pensamiento de Raba esta bazado sovre lo ke dize el profeta Miha (7, 18) alavando a Adonay: «Kien es Dio komo tu, ke perdona delito, i ke pasa (olvida) sovre el reveyo».
La Gemara trae unos kuantos relatos prezentandomos kavzos en el mismo konteksto. Uno de eyos es sovre Rav Huna ke kayo hazino perso, serka para murirse. Ma, malgardo todo se rekupero.
A los ke le demandavan kon maraviya komo fue ke se sano, disho el Rav Huna: «Avia sovre mi una gezera (una sentensia) kondanandome a la muerte; ma vieron en los sielos ke yo uzo dar de pasada, i no so eskrupulozo kon kualker ke me insulta. Dunke, me alargaron a mi vida».
Es kuryozo komo muchas ideas ke estan sembradas en los eskritos del judaismo topan el kamino para «muevas» teorias sientifikas i semi-sientifikas (naturalmente, despues de separar i sakar la kuviertura mistika o relijioza).
Una de estas teoriyas es la ke desbrocho en los anyos de alkavo: «Intelijensia Espiritual».
Una etapa antes de arrivar a la «Intelijensia Espiritual» ya notaron unos psikologos i filozofos del prezente milenio, ke mucha djente, afilu kon un alto grado de intelijensia (IQ), no reushen en la vida porke les falta empatia i solidaridad kon la djente, komo tambien kontrol de impulsos, kompetensia sosial, etc. Entonses, eyos mos konsejan de dezvelopar i enrezyar la dimension emosional de la intelijensia.
Lo ke derive de esto, un paso mas adelantre, es de rekonoser ke la verdadera intelijensia tiene una dimension psikolojika, la intelijensia de la alma, ke mos da perfeksion i integridad. Esta es la intelijensia espirituala. Mezo esta intelijensia semos kapaz de demandar las preguntas fondamentalas, i tambien enkontrar las repuestas. Esta es muestra aksesibilidad a terminos komo signifikasion, vision, valores, i komo los uzamos en muestros pensamientos i en la ora de tomar desiziones.
Es muy posivle, entonses, ke djente ke tienen esta kalidad de Intelijensia Espiritual tienen la abilidad de evaluar mijor si algun tal paso en la vida sera mas sinyifikante ke del otro; ansi planear mijor el futuro.
Kada uno de mozotros puede dezvelopar i obtener su intelijensia espiritual i aplikarla en todas fazas de la vida. Uno de los konsejos es de mantener un diario, i en konkluzion de kada dia eskrivir en el diario lo ke mos gusto i lo ke mos dizilusiono durante el dia; lo ke tenemos de lamentar o arrepentir (o, ke seria mijor de azerlo en otra manera).
Ma, primero de todo esto es el saver dar de pasada, i de tener el vigor i la fuersa a perdonar a los otros.
