eSefarad Noticias del Mundo Sefaradi
La Ketuba de la Ley
Karos amigos i amigas
Vos sueto a kada uno i una de vozotros Shabat Shalom i Moed alegre i bueno !
Al onor del moed de Shavuot vos do aki un «link» para eskuchar al hazan Meir Nahum kantando la primera estrofa de la Ketuba de la Ley (eskrita en el siglo 18 por Ribi Yehuda Leon Kalayi).
http://www.piyut.org.il/tradition/2852.html?currPerformance=3697
Tambien otra gravasion kon las primeras linyas del piyut.
Ayinda aki abasho vos do el teksto del primer paragrafo del piyut.
Es razon de alavar a el Dio grande i poderozo
Kon temoridad de korason i alegria i gozo
En el dia el este santo i temerozo.
En este dia abasho el Dio en Sinay
I milarias de mallahim kon El
A dar la Ley a su puevlo, Kaza de Yisrael,
Por mano de Moshe Rabenu pastor fiel.
Non kijo abashar sovre ningun monte alto
Salvo en monte de Sinay ke se arrebasho tanto
Porke deprenda el ombre i tome la anava por manto.
Yamo i disho el Dio Baruh-U a los djudios
Mi kompanya ermoza
Azme ver tu vista enshemplada a la roza
Ke tu boz savroza i tu vista donoza.
Yisrael ke oyeron la boz del Dio Bendicho
Disheron: estaremos siempre a Su komando i a Su dicho.
Izo partido on eyos de darles la Ley
Kon kenes dieron fiansa
Eyos dieron a los ijos ke es la mas emportansa
De afirmar la Ley santa kon provesa komo tener muncha bonansa
Viendo el Dio Baruh-U ke lo amimos a’hava raba
Tambien El mos aplazo komo novio kon grande hiba
Esta es la Ketuba.
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
