KE DIZE EL RABINO SEFARADI trezladado por Simon Geron

Keridos amigos i amigas
Al resivir el Bulletin Sefaradi de la sinagoga,vide el message del Rabino Chriqui i pensi ke valia la pena de traduzirlo.
Saludes a todos.

ESTE ES MI DIO

El kommentator de la Biblia Espaniola i del Talmud ke era «El Ramban o Nahmanides» se topo en perplexo delantre tantos mandamientos assosiados kon la kommemorasion del Exodo de Ejipto. Aparte de komer Matsah i kumplir todas las praktikas de Pesah, nos kaia azer otras Mitsvot komo meter Tefillin, meter la Mezuza en las entradas de la kasa i onorar al primer nasido. Porke teniamos ke azer tantas kosas? La repuesta es porke Pesah representa la Fondasion Prinsipal de nuestra fe. El tiempo kuando nos izimos una Nasion. Porke el Dio se revelo kon unos milagros tremendos i alevanto Su manos para giar a Su Puevlo.

En akodrandonos de esto, se ve ke el Dio troka las leyes de la naturaleza, kontrola la naturaleza en kada momento de la istoria.Tenemos ke konoser ke el Dio esta kon nosotros en la lucha diaria en kada paso ke se toma en este kamino. Mismo kuando estamos en truble i tenemos la impresion ke el Dio esta eskondido. Esto es la tema del Seder i la razon porke las otras Mitsvot nos azen akodrarnos de esto kada dia. Pesah no es el solo tiempo para kommemorar estos milagros i evenementos istorikos. Se trata mas de developar una konneksion intima kon el Dio, komo el Dio lo aze kon nosotros. Una kosa ke se vido en el Exodo.

Las orasiones de «ADON OLAM» nos yevan a un viaje espiritual para despiertarnos, avren la mente a la idea ke el Dio es el Kreador. «El Fue i Sera Siempre». El no es solamente el Kreador del Universo Grande. Es tambien «MI DIO,MI SALVADOR, MI PROTEKTOR» Asi no tendre espanto de nada». La experiensia de Pesah es esto. Mi konneksion kon HASHEM no es abstrakta i leshana. El Dio se topa en kada aspekto de nuestras vidas. Por esta razon Pesah i el Seder son experiensias importantes.Nos da esperanza por el anio entero.

Vos sueto un Pesah Alegre.

——————————————
Trezladado  por Shimon Geron. Sydney

Fuente: Ladinokomunita