eSefarad Noticias del Mundo Sefaradi
Ver todos los artículos de esta sección >>
El filmo «Song of the Sephardi»
De meustro amigo Izak (Isaac) Azose en Seattle, tomi el avizo ke el maraviyozo filmo «Song of the Sephardi» esta agora en Youtube. Ke alegria! Yo lo tengo en videocasette, ke agora no tengo ni el ekipaje para mostrarlo.
Este fue el primer filmo (a mi saver) echo sovre la istoria i kultura sefaradi en inglez, echo por el Dr. David Raphael, autor de varios livros sovre la istoria sefaradi. «Song of the Sephardi» se mostro por primera vez en Seattle el 10 septembre de 1978, en el «Seattle Center Playhouse», asegun verash en el avizo ke me mando Izak.
Izak no solo ke esta en el filmo, ma tambien fue el prezentador, o M.C. komo dizen en inglez, del filmo en su «premier.» En el filmo ay munchos de la komunidad de Seattle de akeyos anyos, entre eyos munchos ke ya no estan mas en vida.
Despues de una introduksion de 14 minutos del Dr. Raphael sovre la istoria sefaradi, el filmo tiene lugar en Seattle. La sinagoga es Sephardic Bikur Holim (de los turkanos) ma kon djente de Ezra Besarot (de los Rodeslis) tambien. La ke kanta es Rivka Raz, de Israel, ke dio tambien konserto en Seattle.
Vos aseguro ke vash a tomar plazer de ver este filmo de 74 minutos
Rengrasiamos al Dr. Raphael por su lavor, i por su buendad de meterlo en Youtube en memoria del Dr. Jose A. Nessim, z»l, fondador del Sephardic Educational Center de Los Angeles i Yerushalayim.
Rachel Amado Bortnick
Dallas, Texas
Ladinokomunita
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
