eSefarad Noticias del Mundo Sefaradi
El balo de Purim oganyo, tuvo lugar noche de Djueves, en la sala del Bet Avot Leon Recanati, Petah-Tikva.
Unos 150 partisipantes, Ladino simpatizantes, kaji todos kon vestidos de varios vestimientas de Purim, incheron la sala.
Despues ke mos bezimos , abrasimos i tomimos fotos, muestro amigo, el talentozo, Kobi Zarko, tomo el mikrofono i ordeno una ermoza tadrada, yena de kantes, shakas i komplas de purim, kon muncho umor i alegria.
Mos gozimos de oyir un duet ,parte de la opereta «Ester» ke fue eskrita en Salonik en 1930, kantada de bokas de Kobi i muestra amiga Orit Salinas.
Un grupo de amigas bailaron dansas populares de los Balkanes.
I los tratamientos uzo muestro no mankaron, las mezas bien enkargdas de todo lo bueno; Pasteles, Borekas, Boyos, Sfongatos, varios de salatas, mezes i dulsurias de chupar los dedos.
El ambiente fue muy kalorozo i alegre, komo ke se siente ande los Sefaradim.
I por terminar, vos kontare sovre mi vestido de Purim;
Djoha es una figura konosida en el mundo Sefaradi, ansi ke desidi a vestirme de Djoha. Todos konosen el referan ke dize:»Djoha se fue al banyo tuvo ke kontar sien i uno anyos» entonses, komo ke vesh en el foto, me vesti el burnu de mi marido, me meti un chapeo, me apegi una barva blanka i en la mano travi un bogo kon shavon, espondja, furcha, maraman/pishtamal, i ansina me abolti de Sara a Djoha.
Grasias a todos los moderadores de esta tadrada maraviyoza.
Ke esta tadrada tenga muchos ermanos !!
Eskrito por:
Sara Sufrin Baruch de Israel
