eSefarad Noticias del Mundo Sefaradi
Keridas amigas i keridos amigos, profesores,estudiantes del sentro, estimada Odelya Fridman, direktora general del teatro nacional Habima, kerida Yonit Weiss,organizadora del Festival Ladino en este teatro, onoravle asistensia.
Buenos días, shalom rav ve bruhim habaim le marathon esrim u shtayim.
Una ves mas organizamos muestro marathón anual, ahuera de la Universitad Bar Ilan. El tema komo ya lo konosesh es el teatro sefaradí, sujeto poko konosido del publiko de Israel i también entre los sefaradim en el mundo. Mos azemos un dover especial de darvos a konoserlo en esto sublimo Teatro en el kual mos topamos. Abima es el simbol djudio del teatro nasyonal i universal, ke ovra dizde munchos anios. Es kon grande plazer i alegría ke mi esposa i yo, fundadores del Sentro Ladino de la Universitad Bar Ilan, vos damos la bienvinida en estas salas presiozas, onde se presentan kada dia ovras magnifikas del mundo entero. Dizde mas de diez anios ke la kultura sefaradí esta en vog al nivel nasyonal i es achakes del interés del publiko ke se esta organizando en muestro país i mismo en diferentes paizes del mundo el dia Ladino i festivales sefaradís. La inisiativa del renomado prof. Shmuel Refael de organizar 3dias enteros de teatro del mundo sefaradí mos alegra muncho visto ke el mas famoso teatro de Israel, Abima ,se enkarga de este proyekto el kual presenta dizde muncho tiempo el Bustan Sefaradi del presidente Navon i de repetirlo kada anio.
En Estambol sivdad de mi chikes me akodro de los vodviles ke se jugavan por artistas amatores en salas de teatro tenian un grande sukseso, tradisyon ke se kontinua oy en dia al seno de la komunidad de los turkanos en Israel. Ay de azer una investigasyon a este sujeto, i espero ke uno de los estudiantes de kargara un dia de azerlo. Ademas vos dire ke la prof. Elena Romero de Madrid explora las ovras deskonosidas del teatro sefaradí i será interesante de meldar lo ke mos prezento en sus investigasyones. Oy vamos a oyir varias konferensias sovre temas relacionadas al mundo sefaradí i al teatro. Espero ke este marathón va dar un empujo a los estudios del teatro sefaradí i a mi otoridad modesta sin profetisar, si un dia desidamos todos endjunto de tener un teatro profesional Ladino en Israel, ken de vozotros se kerera azer el líder ke venga i ke mos tope.
Tenemos un programa kargado , por esta razón no kero tomar mas de vuestro tiempo, keridos participantes espero ke pasaraj un dia fruktuozo i interesante.
Shalom i pas en los korasones.
Dr. Selim Salti
