Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 21 KI TISA (31 a 34)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

21 – KI TISA

¹¹I avlo A’ a Moshe, dizyendo: ¹²kuando tomares el nombre de los ijos de Yisrael por sus kontados, daran kada uno el reskato de su alma a A’, kuando los kontares, i no avra en eyos mortaldad kuando los kontares. ¹³Esto daran todos los ke pasaren entre los kontados, medyo siklo segun el siklo del santuvaryo. El siklo es vente geras; la mitad de un siklo sera la apartadura a A’. ¹⁴Todo el ke pasare entre los kontados de edad de vente anyos i arriva, dara la apartadura de A’. ¹⁵El riko no dara mas, i el povre no dara menos de medyo siklo, kuando dyeren la apartadura de A’ para azer ekspiasyon por vuestras almas. ¹⁶I tomaras la moneda de las ekspiasyones de los ijos de Yisrael, i la daras para el servisyo de la tyenda del plazo; i sera por membrasyon a los ijos de Yisrael delante de A’, para azer ekspiasyon por vuestras almas.

¹⁷I avlo A’ a Moshe, dizyendo: ¹⁸i aras un agua-manil de alambre, kon su asyento de alambre, para lavar, i lo pondras entre la tyenda del plazo i el ara, i pondras en el agua. ¹⁹I de el A’haron i sus ijos lavaran sus manos i sus pyes. ²⁰Kuando entraren en la tyenda del plazo, se lavaran kon agua, i no muriran; o kuando se ayegaren al ara para ministrar, para saumar ofrenda kemada a A’. ²¹I lavaran sus manos i sus pyes, i no muriran. I esto les sera por fuero de syempre, a el i a su semen por sus djerenansyos.

²²I avlo A’ a Moshe, dizyendo: ²³i tu tomate espesyas prinsipales, de almeskle fino kinyentos siklos, i de sinamon golorozo la mitad de esto, dossyentos i sinkuenta, i de kanela goloroza dossyentos i sinkuenta, ²⁴i de kasya kinyentos, segun el siklo del santuvaryo, i de azeyte de oliva un ‘hin. ²⁵I aras de eyo el azeyte de la santa untasyon, konfesyon konfesyonada de echura de konfesyonador, el kual sera el azeyte de la santa untasyon. ²⁶I untaras kon el la tyenda del plazo, i el arka del Testimonyo, ²⁷i la meza i todos sus atuendos, i la almenara i sus atuendos, i el ara del saumeryo, ²⁸i el ara de la alsasyon i todos sus atuendos, i el agua-manil i su asyento. ²⁹I los santifikaras, i seran santisimos; todo lo ke los tokare, sera santifikado. ³⁰I untaras a A’haron i a sus ijos, i los santifakaras para servirme en el saserdosyo. ³¹I avlaras a los ijos de Yisrael, dizyendo: este sera el azeyte de la santa untasyon a mi por vuestros djerenansyos. ³²Sovre karne de ombre no sera vazyado, ni aresh otro semejante, segun su kompozisyon; santo es, santo sera a vozotros, ³³Kualkyera konfesyonare otro komo el, i el ke puzyere de el sovre estranyo, sera tajado de sus puevlos.

³⁴I disho A’ a Moshe: tomate espesyas, goma, i unya, i galvano golorozo, i ensensyo limpyo; de egual pezo seran; ³⁵i aras de eyo saumeryo, konfesyon de echura de konfesyonador, mezklada, limpya, i santa. ³⁶I moleras de el menudo, i pondras de el delante del Testimonyo en la tyenda del plazo, onde sere aplazado a ti; koza santisima vos sera. ³⁷I el saumeryo ke aras, no agash para vozotros otro segun su kompozisyon; te sera koza santa para A’. ³⁸Kualkyer ke izyere otro komo el para goler kon el, sera tajado de sus puevlos.

31

¹I avlo A’ a Moshe, dizyendo: ²mira, yo yamo por nombre a Betsalel, ijo de Uri, ijo de Hur, del trivo de Ye’huda. ³I lo inchi de espirito del Dyo, en saveduria, i en entendimyento, i en sensya, i en toda ovra: ⁴para inventar inventos, para ovrar en oro, i en plata, i en alambre; ⁵i en maestria de pyedras para inchir, i en maestria de madero, para ovrar en toda ovra. ⁶I ek, yo puzi kon el a O’holiav, ijo de Ahismah, del trivo de Dan. I en el meoyo de todo savyo de korason puzi saveduria, para ke agan todo lo ke te enkomendi: ⁷la tyenda del plazo, i el arka para el Testimonyo, i el kuvertero ke estara sovre eya, i todos los atuendos de la tyenda, ⁸i la meza i sus atuendos, i la almenara limpya i todos sus atuendos, i el ara del saumeryo, ⁹i el ara de la alsasyon i todos sus atuendos, i el agua-manil i su asyento, ¹⁰i los panyos del servisyo, i los vestidos santos para A’haron el saserdote, i los vestidos de sus ijos, para servir en el saserdosyo, ¹¹i el azeyte de la untasyon, i el saumeryo golorozo para el santuvaryo, aran segun todo lo ke te enkomendi.

¹²I avlo A’ a Moshe, dizyendo: ¹³i tu avla a los ijos de Yisrael, dizyendo: kon todo esto guardaresh mis shabatot; porke es senyal entre mi i vozotros por vuestros djerenansyos, para ke sepash ke yo soy A’ vuestro santifikador. ¹⁴I guardaresh el shabat, porke santo es a vozotros; el ke lo ezbivlare, matar sera matado; porke todo el ke izyere en el, akeya alma sera tajada de entre sus puevlos. ¹⁵Sesh dias se ara ovra, ma en el dia seteno es el shabat de olgansa, santo a A’; todo el ke izyere ovra en el dia del shabat, matar sera matado. ¹⁶Guardaran pues el shabat los ijos de Yisrael, para azer el shabat por sus djerenansyos, por firmamyento de syempre. ¹⁷Senyal es para syempre entre mi i los ijos de Yisrael; porke en sesh dias izo A’ los syelos i la tyerra, i en el dia seteno olgo, i repozo.

¹⁸I dyo a Moshe, komo akavo de avlar kon el en el monte de Sinay, dos tavlas del Testimonyo, tavlas de pyedra eskritas kon el dedo del Dyo.

32

¹I vyendo el puevlo ke Moshe se tardava de desender del monte, se adjunto el puevlo sovre A’haron, i le disheron: levantate, az a nos dyozes ke vayan delante de nozotros; porke a este Moshe, el varon ke nos izo suvir de la tyerra de Ayifto, no savemos ke le akontesyo. ²I A’haron les disho: kitad los anyazmes de oro ke ay en las orejas de vuestras mujeres, de vuestros ijos, i de vuestras ijas, i traedmelos. ³I todo el puevlo kitaron los anyazmes de oro ke tenian en sus orejas, i los trusheron a A’haron. ⁴I el los tomo de mano de eyos, i lo afiguro kon el buril, i izo de eyo un bezerro de fundisyon. I disheron: estos son tus dyozes, ¡o Yisrael ! ke te izyeron suvir de la tyerra de Ayifto. ⁵I kuando A’haron lo vido, fraguo una ara delante de el; i apregono A’haron, i disho: manyana sera fyesta de A’. ⁶I al otro dia madrugaron, i alsaron alsasyones, i ayegaron sakrifisyos de pases; i se asento el puevlo a komer i a bever, i se levantaron a djugar.

⁷I disho A’ a Moshe: anda, desyende; porke se danyo tu puevlo ke iziste suvir de la tyerra de Ayifto: ⁸se apartraron presto del kamino ke les enkomendi; izyeron para si un bezerro de fundisyon, i se enkorvaron a el, i sakrifikaron a el, i disheron: estos son tus dyozes, ¡o Yisrael! ke te izyeron suvir de la tyerra de Ayifto. ⁹I disho A’ a Moshe: vide a este puevlo, i ek, es puevlo duro de serviz. ¹⁰Agora pues deshame, ke se asyenda mi fulor en eyos, i los konsumire; i a ti te are por djente grande. ¹¹I Moshe rogo delante de A’ su Dyo, i disho: ¡o A’! ¿por ke se ensendera tu fulor en tu puevlo, ke sakaste de la tyerra de Ayifto kon gran fortaleza, i kon mano fuerte? ¹²¿Por ke an de dizir los Aisyanos, dizyendo: para mal los sako, para matarlos en los montes, i para konsumirlos de sovre las fases de la tyerra? tornate de la ira de tu fulor, i arrepyentete del mal sovre tu puevlo. ¹³Akordate de Avra’ham, de Yitshak i de Yisrael, tus syervos, a los kuales djuraste por ti mizmo, i les avlaste, dizyendo: muchiguare vuestro semen komo las estreyas de los syelos, i toda esta tyerra de la kual avli, dare a vuestro semen, i la eredaran para syempre. ¹⁴I A’ se arrepentyo del mal ke avlo de azer a su puevlo.

¹⁵I se bolvyo i desendyo Moshe del monte, kon las dos tavlas del Testimonyo en su mano, tavlas eskritas por sus dos lados, de una parte i de otra eran eskritas. ¹⁶I las tavlas eran ovra del Dyo, i la eskritura era eskritura del Dyo, kavakada sovre las tavlas. ¹⁷I oyo Ye’hoshua la boz del puevlo kuando aulavan; i disho a Moshe: sonido de pelea ay en el real. ¹⁸I disho Moshe: no es boz de grito de baragania, ni es boz de grito de flakeza; boz de kantar oygo yo. ¹⁹I fue, ke komo se aserko al real, vido el bezerro, i los bayles; i se ensendyo el fulor de Moshe, i echo las tavlas de sus manos, i las kevro al pye del monte. ²⁰I tomo el bezerro ke avian echo, i lo kemo en el fuego, i lo molyo asta ke desmenuzo, i lo esparzyo sovre las fases de las aguas, i lo dyo a bever a los ijos de Yisarel

²¹I disho Moshe a A’haron: ¿ke te izo este puevlo, ke trushiste sovre el tan grande pekado? ²²I disho A’haron: no se ensyenda el fulor de mi senyor; tu konoses al puevlo ke es pronto para mal. ²³I me disheron: az a nos dyozes ke vayan delante de nozotros; porke a este Moshe, el varon ke nos izo suvir de la tyerra de Ayifto, no savemos ke le akontesyo. ²⁴I yo les dishe: kyen tyene oro kitaldo. I me lo dyeron, i lo echi en el fuego, i salyo este bezerro.

²⁵I vyendo Moshe ke el puevlo estava desreglado; porke A’haron lo avia desreglado para verguensa entre sus  enemigos; ²⁶se paro Moshe en la puerta del real, i disho: ¿ kyen es por A’? venga a mi. ²⁷I se adjuntaron a el todos los ijos de Levi. ²⁷I les disho: ansi dize A’, el Dyo de Yisrael: poned kada uno su espada sovre su anka, pasad i tornad de puerta a puerta por el real, i matad kada uno a su ermano, i kada uno a su kompanyero, i kada uno a su serkano. ²⁸I los ijos de Levi izyeron segun la palavara de Moshe; i kayeron del puevlo en akel dia komo tres mil varones. ²⁹I disho Moshe: inchid vuestras manos oy a A’, aun kada uno en su ijo, en su ermano, para ke el de bendisyon oy sovre vozotros.

³⁰I fue, ke al otro dia Moshe disho al puevlo: vozotros pekastesh un gran pekado; i agora suvire a A’; kizas afalagare por vuestro pekado. ³¹I se torno Moshe a A’, i disho: ¡rogo! peko este puevlo un gran pekado, i izyeron para si dyozes de oro. ³²I agora si perdonares su pekado, i si no, arrematame agora de tu livro ke eskriviste. ³³I disho A’ a Moshe: kualkyera ke peko kontra mi, a el arrematare de mi livro. ³⁴I agora anda, gia al puevlo onde te dishe; ek, mi andjel andara delante de ti; empero en el dia de mi vijitasyon vijitare sovre eyos su pekado. ³⁵I A’ eryo al puevlo, por lo ke izyeron el bezerro ke izo A’haron.

33

¹I disho A’ a Moshe: anda, suve de aki, tu i el puevlo ke iziste suvir de la tyerra de Ayifto, a la tyerra ke djuri a Avra’ham, a Yitshak, i a Yakov, dizyendo: a tu semen la dare. ²I enbiare un andjel delante de ti, i desterrare al Kenaanio, al Emorio, i al Hitio, i al Perizio, al Hivio, i al Yevusio: ³a una tyerra ke mana leche i myel; porke yo no suvire en medyo de ti, porke eres puevlo duro de serviz, no sea ke te konsuma en el kamino. ⁴I oyendo el puevlo esta mala palavra, se atristaron, i ninguno puzo su afeyte sovre si. ⁵I disho A’ a Moshe: di a los ijos de Yisrael: vozotros sosh puevlo duro de serviz; en un punto suvire en medyo de ti, i te konsumire; kita pues agora tu afeyte de sovre ti, i savre lo ke te tengo ke azer. ⁶I los ijos de Yisrael kitaron sus afeytes al monte de Horev. ⁷I Moshe tomo la tyenda, i la tendyo afuera del real, leshos del real, i la yamo la tyenda del plazo. I era, ke todo el ke bushkava a A’, salia a la tyenda del plazo, ke estava afuera del real. ⁸I era, ke kuando salia Moshe a la tyenda, se levantavan todo el puevlo, i se paravan, kada uno a la puerta de su tyenda, i miravan detras de Moshe, asta ke entrava en la tyenda. ⁹I era, ke kuando Moshe entrava en la tyenda, desendia el pilar de la nuve, i se parava a la puerta de la tyenda, i el Senyor avlava kon Moshe. ¹⁰I todo el puevlo veia el pilar de la nuve parado a la puerta de la tyenda, i todo el puevlo se levantava. I se enkorvavan, kada uno a la puerta de su tyenda. ¹¹I avlava A’ a Moshe kara a kara, komo un varon avla a su kompanyero; i se tornava al real; ma su ministro Ye’hoshua, ijo de Nun, mansevo, no se apartava de entre la tyenda.

¹²I disho Moshe a A’: mira, tu me dizes a mi: az suvir a este puevlo; i tu no me iziste saver a kyen enbiaras konmigo; kon todo tu dishiste: te konosi por nombre, i tambyen ayaste grasya en mis ojos. ¹³Agora pues, si agora ayi grasya en tus ojos, te rogo ke me mostres tu kamino, para ke te konoska, para ke aye grasya en tus ojos; i mira ke tu puevlo es esta djente. ¹⁴I el disho: mis fases andaran kontigo, i te are deskansar. ¹⁵I le disho: si tus fases no andaran konmigo, no nos agas suvir de aki. ¹⁶¿i en ke sera savido aki ke ayi grasya en tus ojos, yo i tu puevlo, sino en andar tu kon nozotros? I seremos apartados, yo i tu puevlo, de todos los puevlos ke estan sovre las fases de la tyerra.

¹⁷I disho A’ a Moshe: tambyen are esta koza ke avlaste; porke ayaste grasya en mis ojos, i te konosi por nombre. ¹⁸I el disho: te rogo ke me mostres tu onra. ¹⁹I disho: yo are pasar todo mi byen delante de ti, i yamare por el nombre de A’ delante de ti, i engrasyare al ke tengo de engrasyar, i apiadare al ke tengo de apiadar. ²⁰I disho: no podras ver mis fases; porke no me ve ombre, i bive. ²¹I disho A’: ek aki lugar djunto a mi, i estaras sovre la penya. ²²I sera, ke kuando pasare mi onra, yo te pondre en un reskisyo de la penya, i te kuvrire kon mi palma asta ke ayga pasado. ²³I kitare mi palma, i veras mis espaldas, ma no se vera mi kara.

34

¹I disho A’ a Moshe: alizate dos tavlas de pyedra komo las primeras; i eskrivire sovre estas tavlas palavras ke estavan sovre las tavlas primeras ke kevraste. ²I se aparejado para la manyana, i suve por la manyana al monte de Sinay, i prezentate ayi a mi sovre la kavesera del monte. ³I no suva varon kontigo, i tambyen no se apareska varon en todo el monte; tambyen ni ovejas ni vakas paskan delante de akel monte.

⁴I alizo dos tavlas de pyedra komo las primeras; i madrugo Moshe por la manyana, i suvyo al monte de Sinay, komo A’ le avia enkomendado, i tomo en su mano las dos tavlas de pyedra. ⁵I A’ desendyo en la nuve; i estuvo kon el ayi, i yamo por el nombre de A’. ⁶I paso A’ delante de el, i yamo A’, A’ Dyo, piadozo i grasyozo, longo de fulores, i grande de mersed i de verdad; ⁷ke guarda mersed a miles, ke perdona delito, revilyo, i pekado, i ke livrar no livrara al kulpozo; ke vijita el delito de los padres sovre los ijos, i sovre los ijos de los ijos, sovre los terseros i sovre los kuartos djerenansyos. ⁸I Moshe se apresuro, i se umilyo a la tyerra, i se enkorvo. ⁹I disho: si agora ayi grasya en tus ojos, ¡o Adonay! vaya agora Adonay en medyo de nozotros, porke es puevlo duro de serviz, i perdona nuestro delito i nuestro pekado i eredanos.

¹⁰I disho, ek, yo taje firmamyento; delante de todo tu puevlo are maraviyas, ke no fueron kriadas en toda la tyerra, ni en ninguna nasyon; i vera todo el puevlo, entre el kual tu estas, la ovra de A’; porke es koza terivle ke yo ago kontigo. ¹¹Guarda tu lo ke yo te enkomendo oy. Ek, yo desterro delante de ti al Emorio, i al Kenaanio, i al Hitio, i al Perizio, i al Hivio, i al Yevusio, ¹²guardate ke no tajes firmamyento kon los moradores de la tyerra sovre la kual tu vyenes, porke no sea por enkampamyento en medyo de ti. ¹³Ma derrokaresh sus aras, i kevraresh sus estansyas, i tajaresh sus ashrot. ¹⁴Porke no te enkorves a otro dyo; porke A’, zelozo su nombre, Dyo zeloso es. ¹⁵No sea ke tajes firmamyento kon los moradores de la tyerra, i eskaren detras de sus dyozes, i sakrifiken a sus dyozes, i alguno te konbide, i komas de su sakrifisyo; ¹⁶i tomes de sus ijas para tus ijos, i eskaren sus ijas detras de sus dyozes i agan eskarar a tus ijos detras de los dyozes de eyas. ¹⁷No agas para ti dyozes de fundasyon. ¹⁸La fyesta de las sensenyas guardaras: syete dias komeras sensenyas, komo te enkomendi, al plazo del mez de Aviv; porke en el mez de Aviv saliste de Ayifto. ¹⁹Toda avertura de bulba es mia, i todo tu ganado ke sera macho, avertura de vaka o de oveja. ²⁰Ma la avertura de azno regmiras kon karnero; i si no la regmyeres, entonses la desservigaras. Todo primodjenito de tus ijos regmiras; i no se apareskan delante de mi vazios. ²¹Sesh dias travajaras, ma en el dia seteno olgaras; aun en la arada i en la segada olgaras. ²²I la fyesta de las semanas te aras, de las primisyas de la segada del trigo; i la fyesta del apanyamyento a la buelta del anyo. ²³Tres vezes en el anyo se aparesera todo macho tuyo delante del Senyor A’, el Dyo de Yisrael. ²⁴Porke yo desterrare las djentes delante de ti, i ensanchare tu termino; i ninguno kovdisyara tu tyerra en tu suvir para apareserte delante de A’ tu Dyo tres vezes en el anyo. ²⁵No degoyas sovre levdo la sangre de mi sakrifisyo; i no kede asta la manyana el sakrifisyo de la fyesta de la paskua. ²⁶El prinsipyo de las primisyas de tu tyerra traeras a la kaza de A’ tu Dyo. No kozines el kavrito kon leche de su madre.

²⁷I disho A’ a Moshe: eskrive tu estas palavras, porke segun estas palavras taji frimamyento kontigo i kon Yisrael. ²⁸I estuvo ayi kon A’ kuarenta dias i kuarenta noches; no komyo pan, ni bevyo agua; i eskrivyo sovre las tavlas palavars del firmamyento, los dyez mandamyentos.

²⁹I fue, ke en desendyendo Moshe del monte de Sinay kon las tavlas del Testimonyo en la mano de Moshe, kuando desendia del monte, no savia Moshe ke el kuero de sus fases reluzia myentras ke avlava kon el. ³⁰I vido A’haron i todos los ijos de Yisrael a Moshe, i ek, el kuero de sus fases reluzia; i temyeron de ayegarse a el. ³¹I Moshe los yamo; i tornaron a el A’haron i todos los mayorales de la kompanya; i Moshe les avlo. ³²I despues se ayegaron todos los ijos de Yisrael, i les enkomendo todo lo ke A’ le avia avlado en el monte de Sinay. ³³I akavo Moshe de avlar kon eyos i puzo un velo sovre sus fases. ³⁴I kuando venia Moshe delante de A’ para avlar kon el, kitava el velo asta ke salia. I salia, i avlava a los ijos de Yisrael lo ke le era enkomendado. ³⁵I veian los ijos de Yisrael las fases de Moshe, ke reluzia el kuero de las fases de Moshe; i tornava Moshe a poner el velo sovre sus fases, asta ke entrava a avlar kon el.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.