Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 19 TRUMA (25 a 27)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

19 – TRUMA

25

¹I avlo A’ a Moshe dizyendo: ²avla a los ijos de Yisrael ke tomen para mi apartadura; de todo varon a kyen su korason dyere veluntad, tomaresh mi apartadura. ³I esta es la apartadura ke tomaresh de eyos: oro, i plata, i alambre; ⁴i kardeno, i purpura, i karmezi, i lino fino, i pelo de kavras; ⁵i kueros de barvezes envermejesidos, i kueros de tejones, i maderos de shitim; ⁶azeyte para la lumbrarya, espesyas para el azeyte de la untasyon, i para el saumeryo golorozo; ⁷pyedras de oniks, i pyedras de inchimyentos para el espaldar, i para el pechoral. ⁸I me aran santuvaryo, i, morare entre eyos. ⁹Segun todo lo ke yo te mostro, i la semejansa del tavernakulo i a la semejansa de todos sus atuendos, ansi lo aresh.

¹⁰I aran una arka de maderos de shitim; dos kovdos i medyo sera su longura, i kovdo i medyo su anchura, i kovdo i medyo su altura. ¹¹I la kuvriras de oro fino, por adyentro i por afuera la kuvriras; i aras sovre eya un serko de oro al derredor. ¹²I vazyaras para eya kuatro sortijas de oro, i las pondras sovre sus kuatro rinkones, dos sortijas sovre el un lado de eya, i dos sortijas sovre el otro lado de eya. ¹³I aras varas de maderos de shitim, i las kuvriras de oro. ¹⁴I meteras las varas en las sortijas sovre los lados del arka, para yevar el arka kon eyas. ¹⁵En las sortijas del arka estaran las varas; no se kitaran de eya. ¹⁶I pondras en el arka el Testimonyo ke yo te dare.

¹⁷I aras un kuvertero de oro fino; dos kovdos i medyo sera su longura, i kovdo i medyo su anchura. ¹⁸I aras dos Keruvim de oro, batidos los aras, a los dos kavos del kuvertero. ¹⁹I az el un keruv del kavo de aki, i el otro keruv del kavo de ayi; del kuvertero aresh los Keruvim sovre sus dos kavos. ²⁰I los Keruvim espandiran las alas por ensima, kuvryendo kon sus alas sovre el kuvertero, i sus fases la una a la otra; al kuvertero seran las fases de los Keruvim. ²¹I pondras el kuvertero sovre el arka por ensima, i en el arka pondras el Testimonyo ke yo te dare. ²²I ayi sere aplazado a ti, i avlare kontigo de sovre el kuvertero de entre los dos Keruvim ke estaran sovre el arka del Testimonyo, todo lo ke te enkomendare para los ijos de Yisrael.

²³I aras una meza de maderos de shitim; dos kovdos sera su longura i un kovdo su anchura, i kovdo i medyo su altura. ²⁴I la kuvriras de oro fino, i le aras un serko de oro al derredor. ²⁵I le aras una serradura de anchura de un punyo al derredor, i aras un serko de oro a su serradura al derredor. ²⁶I aras para eya kuatro sortijas de oro, i pondras las sortijas sovre los kuatro rinkones ke estan a sus kuatro pyes. ²⁷A eskuentra la serradure estaran las sortijas por lugares para las varas para yevar la meza. ²⁸I aras las varas de maderos de shitim, i las kuvriras de oro, i kon eyas sera yevada la meza. ²⁹I aras sus platos, i sus kucharones, i sus kupas, i sus templaderas kon ke sera templado; de oro fino las aras. ³⁰ I pondras sovre la meza pan de las fases delante de mi de kontino.

³¹I aras una almenara de oro fino; batida se ara la elmenara; su tronko, i sus brasos, sus vazos, sus mansanas, i sus flores, seran de si mizma. ³²I sesh brasos saldran de sus lados, tres brasos de la elmenara del un lado suyo, i tres brasos de la elmenara de su otro lado. ³³Avra tres vazos almendrados en el un braso, kon mansana i flor; i tres vazos almendrados en el otro braso, kon mansana i flor; ansi los sesh brasos salyentes de la elmenara. ³⁴I en la elmenara avra kuatro vazos almendrados, sus mansanas, i sus flores. ³⁵I una mansana debasho de los dos brasos, de si mizma, i una mansana debasho de los otros dos brasos, de si mizma, i una mansana debasho de los otros dos brasos, de si mizma, en los sesh brasos salyentes de la elmenara. ³⁶Sus mansanas i sus brasos seran de si mizma; toda eya batida de un pedaso de oro fino. ³⁷I aras sus syete kandeles; i ensenderan sus kandeles, i alumbrara a la parte de su delantera. ³⁸I sus tenazas i sus paletas seran de oro fino. ³⁹De un kintal de oro fino la aras, kon todos estos atuendos. ⁴⁰I mira, i az segun su semejansa, ke te fue mostrada en el monte.

26

¹I el tavernakulo aras de dyez kortinas de lino fino torsido, i kardeno, i purpura, i karmezi; kon Keruvim de echura de maestro las aras. ²La longura de la una kortina sera vente i ocho kovdos, i la anchura de la una kortina kuatro kovdos; una medida tendran todas las kortinas. ³Las sinko kortinas seran adjuntadas la una kon la otra, i las otras sinko kortinas adjuntadas la una kon la otra. ⁴I aras ojetes de kardeno sovre la oriya de la una kortina al kavo en la adjuntadera; i ansi aras en la oriya de la kortina del kavo en la adjuntadera segunda. ⁵Sinkuenta ojetes aras en la una kortina, i sinkuenta ojetes aras en el kavo de la kortina ke esta en la segunda aduntadera, los ojetes konfrontados el uno kon el otro. ⁶I aras sinkuenta korchetes de oro, i adjuntaras las kortinas las una kon la otra kon los korchetes, i el tavernakulo sera uno. ⁷I aras kortinas de pelo de kavras por tyenda sovre el tavernakulo; onze kortinas las aras. ⁸La longura de la una kortina sera trenta kovdos, i la anchura de la una kortina kuatro kovdos; una medida tendran las onze kortinas. ⁹I adjuntaras las sinko kortinas aparte, i las sesh kortinas aparte, i dublaras la kortina sejena delante de la faz de la tyenda. ¹⁰I aras sinkuenta ojetes sovre la oriya de la una kortina del kavo en la adjuntadera, i sinkuenta ojetes sovre la oriya de la kortina de la segunda adjuntadera. ¹¹I aras sinkuenta korchetes de alambre, i meteras los korchetes en los ojetes, i adjuntaras la tyenda, i sera una. ¹²I la demazia ke sovre en las kortinas de la tyenda, la mitad de la kortina ke sovra, sera enkolgada sovre las trazeras del tavernakulo. ¹³I el kovdo de aki, i el kovdo de ayi, ke sovra en la longura de las kortinas de la tyenda, sera enkolgado sovre los lados del tavernakulo, de la una parte i de la otra, para kuvrirlo. ¹⁴I aras una kuvyerta para la tyenda de kueros de barvezes envermejesidos, i una kuvyerta de kueros de tejones por ensima.

¹⁵I aras para el tavernakulo tavlas de maderos de shitim, paradas. ¹⁶Dyez kovdos sera la longura de kada tavla, i kovdo i medyo la anchura de kada tavla. ¹⁷Dos kisyos avra a kada tavla, enklavijados uno kon otro; ansi aras para todas las tavlas del tavernakulo. ¹⁸I aras las tavlas para el tavernakulo, vente tavlas a la parte del sud, al Teman. ¹⁹I kuarenta almirezes de plata aras para debasho de las vente tavlas, dos almirezes debasho de la una tavla para sus dos kisyos, i dos almirezes debasho de la otra tavla para sus dos kisyos. ²⁰I para el segundo lado del tavernakulo a la parte del norte, vente tavlas. ²¹I sus kuarenta almirezes de plata, dos almirezes debasho de la una tavla, i dos almirezes debasho de la otra tavla. ²²I para las trazeras del tavernakulo, al oksidente, aras sesh tavlas. ²³I dos tavlas aras para los kantones del tavernakulo, en las trazeras. ²⁴I seran unidas por abasho, i seran adjustadas auna sovre su kavesa a una mizma sortija; ansi sera a ambos eyas; para los dos kantones seran. ²⁵Ansi ke seran ocho tavlas, i sus almirezes de plata, dyez i sesh almirezes, dos almirezes debasho de la una tavla, i dos almirezes debasho de la otra tavla. ²⁶I aras serraderos de maderos de shitim, sinko para las tavlas del un lado de tavernakulo, ²⁷i sinko serraderos para las tavlas del otro lado del tavernakulo, i sinko serraderos para las tavlas del lado del tavernakulo a las trazeras, al oksidente. ²⁸I el serradero del medyo pasara por medyo de las tavlas de kavo a kavo. ²⁹I kuvriras las tavlas de oro, i aras sus sortijas de oro, por lugares para las serraderos; i kuvriras los serraderos de oro. ³⁰I levantaras el tavernakulo segun su muestra ke te fue mostrada en el monte.

³¹I aras un velo de kardeno, i purpura, i karmezi, i lino fino torsido; de echura de maestro sera echa kon Keruvim. ³²I lo pondras sovre kuatro pilares de shitim kuvyertos de oro, sus ganchos de oro, sovre kuatro almirezes de plata. ³³I pondras el velo debasho de los korchetes, i traeras ayi adyentro del velo el arka del Testimonyo; i el velo apartara para vozotros entre el lugar santo i el lugar santisimo. ³⁴I pondras el kuvertero sovre el arka del Testimonyo en el lugar santisimo. ³⁵I pondras la meza afuera del velo, i la almenara en frente de la meza al lado del tavernakulo al sud; i la meza pondras al lado del norte.

³⁶I aras una mamparansa para la puerta de la tyenda, de kardeno i purpura, i karmezi, i lino fino torsido, de echura de rekamador. ³⁷I aras para la mamparansa sinko pilares de shitim, i los kuvriras de oro, kon sus ganchos de oro; i vazyaras para eyos sinko almirezes de alambre.

27

¹I aras una ara de maderos de shitim de sinko kovdos de longura, i de sinko kovdos de anchura; kuadrada sera el ara; i su altura de tres kovdos. ²I aras sus kuernos sovre sus kuatro kantones; sus kuernos seran de si mizma; i la kuvriras de alambre. ³I aras sus oyas para dessenizarla, i sus paletas, i sus esparzideras, i sus pirones, i sus brazeros; todos sus atuendos aras de alamabre. ⁴I le aras una resha de alambre de echura de red; i sovre la red aras kuatro sortijas de alambre sovre sus kuatro kavos. ⁵I la pondras debasho del redondez del ara por abasho, i sera la red asta el medyo del ara. ⁶I aras varas para el ara, varas de maderos de shitim, i las kuvriras de alambre. ⁷I sus varas seran metedas en las sortijas, i estaran las varas sovre los dos lados del ara en yevandola. ⁸Gueka de tavlas la aras; komo te fue mostrado en el monte, ansi la aran.

⁹I aras la korte del tavernakulo; a la parte del sud, al Teman, avra para la korte syen kovdos de kortinas de lino fino torsido en la longura al un lado. ¹⁰I sus pilares vente, i sus almirezes vente, de alambre; los ganchos de los pilares i sus enfashaduras, de plata. ¹¹I ansi a la parte del norte, a lo largo avra syen kovdos de kortinas en la longura, kon sus vente pilares, i sus vente almirezes de alambre; los ganchos de los pilares i sus enfashaduras de plata. ¹²I para la anchura de la korte a la parte del oksidente avra sinkuenta kovdos de kortinas; sus pilares dyez, i sus almirezes dyez. ¹³I la anchura de la korte a la parte del Levante, al oryente, sera sinkuenta kovdos. ¹⁴I avra kinze kovdos de kortinas al un lado de la puerta; sus pilares tres, i sus almirezes tres. ¹⁵I al otro lado, kinze kovdos de kortinas; sus pilares tres, i sus almirezes tres. ¹⁶I a la puerta de la korte avra una mamparansa de vente kovdos, de kardeno, i purpura, i karmezi, i lino fino torsido, i echura de rekamador; sus pilares kuatro, i sus almirezes kuatro. ¹⁷Todos los pilares de la korte al derredor seran enfashados de plata; sus ganchos seran de plata, i sus almirezes de alambre. ¹⁸La longura de la korte sera syen kovdos, i la anchura [1]sinkuenta en todas las partes, i la altura sinko kovdos; sus kortinas de lino fino torsido, i sus almirezes de alambre. ¹⁹Todos los atuendos del tavernakulo en todo su servisyo, i todas sus estakas, i todas las estakas de la korte seran de alambre.

[1] Ebreo: sinkuenta kon sinkuanta

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.