Sefer Tora en Djudeo Espanyol – Transkrivida kon letras latinas del livro por Ye’huda Sidi / BERESHIT: 1 BERESHIT 1 a 6

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

1-BERESHIT

1

¹En el prinsipyo krio el Dyo los syelos i la tyerra. ²I la tyerra era vana i vazia; i eskuridad estava sovre las fases del abismo: i el espirito del Dyo se movia sovre las fases de las aguas. ³I disho el Dyo, sea luz, i fue luz. ⁴I vido el Dyo la luz ke era buena: i aparto el Dyo entre la luz i la eskuridad. ⁵I yamo el Dyo a la luz dia, i a la eskuridad yamo noche: i fue la tarde i la manyana un dia.

⁶I disho el Dyo, sea espandidura en medyo de las aguas, i aparte entre aguas i aguas. ⁷I izo el Dyo la espandidura, i aparto las aguas ke estan debasho de la espandidura, de las aguas ke estan arriva de la espandidura: i fue ansi. ⁸I yamo el Dyo a la espandidura syelos: i fue la tarde i la manyana el dia segundo.

⁹I disho el Dyo, se apanyen las aguas debasho de los syelos en un lugar, i se apareska lo seko: i fue ansi. ¹⁰I yamo el Dyo a lo seko tyerra, i al apanyamyento de las aguas yamo mares: i vido el Dyo ke era bueno. ¹¹I disho el Dyo, aga ermoyeser la tyerra ermoyo, yerva ke aga simyente, arvol de fruto ke aga fruto segun su manera, ke su simyente este en el sovre la tyerra: i fue ansi. ¹²I sako la tyerra ermoyo, yerva ke aze simyente segun su manera, i arvol ke aze fruto, ke su simyente esta en el segun su manera: i vido el Dyo ke era bueno. ¹³I fue la tarde i la manyana el dia tersero.

¹⁴I disho el Dyo, sean luzeros en la espandidura de los syelos para apartar entre el dia i la noche, i sean por senyales, i por plazos, i por dias i anyos: ¹⁵i sean por luzeros en la espandidura de los syelos para alumbrar sovre la tyerra: i fue ansi. ¹⁶I izo el Dyo los dos luzeros grandes, el luzero grande por podestania del dia, i el luzero pekenyo por podestania de la noche, i las estreyas. ¹⁷I los puzo el Dyo en la espandidura de los syelos, para alumbrar sovre la tyerra, ¹⁸i para podestar en el dia i en la noche, i para apartar entre la luz i la eskuridad: i vido el Dyo ke era bueno. ¹⁹I fue la tarde i la manyana el dia kuarto.

²⁰I disho el Dyo, syerpan las aguas de syerpe de alma biva, i ave bole sovre la tyerra, sovre las fases de la espandidura de los syelos. ²¹I krio el Dyo las bayanas grandes, i toda alma biva ke se remoeve, de ke serpyeron las aguas, segun su manera, i toda ave alada segun su manera: i vido el Dyo ke era bueno. ²²I los bendisho el Dyo, dizyendo, fruchiguad, i muchiguad, i inchid las aguas en las mares, i el ave se muchigue en la tyerra. ²³I fue la tarde i la manyana el dia kinto.

2

¹I fueron akavados los syelos i la tyerra, i todo su fonsado. ²I akavo el Dyo en el dia seteno su ovra ke izo, i olgo en el dia seteno de toda su ovra ke avia echo. ³I bendisho el Dyo al dia seteno, i lo santifiko; porke en el olgo de toda su ovra ke krio el Dyo para azer.

⁴Estos son los nasimyentos de los syelos i de la tyerra kuando fueron kriados, en el dia ke A’ Dyo izo la tyerra i los syelos, ⁵i toda planta del kampo antes ke fuera en la tyerra, i toda yerva del kampo antes ke ermoyesyera; porke no izo yover A’ Dyo sovre la tyerra, i no avia ombre para lavrar la tyerra. ⁶I un bafo suvia de la tyerra, i arregava todas las fases de la tyerra. ⁷I formo A’ Dyo al ombre del polvo de la tyerra, i suplo en su nariz areflo de vida, i fue el ombre en alma biva.

⁸I planto A’ Dyo un guerto en Eden al oryente, i puzo ayi al ombre ke avia formado. ⁹I izo ermoyeser A’ Dyo de la tyerra todo arvol agradavle a la vista, i bueno para komer, i el arvol de la vida en medyo del guerto, i el arvol del saver byen i mal. ¹⁰I un rio salia de Eden para arregar el guerto, i de ayi se espartia, i era en kuatro kaveseras. ¹¹El nombre del uno es Pishon; este es el ke rodea toda la tyerra de Havila, onde ay oro: ¹²i el oro de akeya tyerra es bueno: ayi ay bediyo i pyedra de oniks. ¹³I el nombre del segundo rio es Gihon: este es el ke rodea toda la tyerra de Kush. ¹⁴I el nombre del terser rio es Hidekel: este es el ke va al oryente de Ashur. I el kuarto rio es Eufrates.

¹⁵I tomo A’ Dyo al ombre, i lo puzo en el guerto de Eden para lavrarlo i para guardarlo. ¹⁶I enkomendo A’ Dyo al ombre, dizyendo, de todo arvol del guerto komer komeras; ¹⁷ma del arvol del saver byen i mal, no komas de el; porke en el dia de tu komer de el, murir muriras.

¹⁸I disho A’ Dyo, no es bueno ke Adam este solo; lo are ayuda konvenyente a el. ¹⁹I formo A’ Dyo de la tyerra todo animal del kampo, i toda ave de los syelos, i los trusho a Adam, para ver komo los yamaria: i todo lo ke Adam yamo a toda alma biva, esto era su nombre. ²⁰I puzo Adam nombres a toda kuatropea, i a ave de los syelos, i a todo animal del kampo; ma para Adam no ayo ayuda konvenyente a el. ²¹I A’ Dyo izo kaer adormemyento sovre Adam, i se durmyo; i tomo una de sus kostiyas, i serro la karne en su lugar: ²²i fraguo A’ Dyo la kostiya ke tomo de Adam, en mujer, i la trusho a Adam. ²³I disho Adam, esta vez, gueso de mis guesos, i karne de mi karne: esta sera yamada mujer, porke de varon fue tomada esta. ²⁴Por tanto deshara el varon a su padre i a su madre, i se apegara a su mujer, i seran por una karne. ²⁵I estavan ambos desnudos, Adam i su mujer, i no se avergunsavan.

3

¹I el kulevro era agudo mas ke todo animal del kampo ke A’ Dyo avia echo; i disho a la mujer, ¿es verdad ke disho el Dyo, no komash de todo arvol del guerto? ²I disho la mujer al kulevro, del fruto de los arvoles del guerto komemos: ³ma del fruto del arvol ke esta en medyo del guerto , disho el Dyo, no komash de el, ni tokesh en el, no sea ko murash. ⁴I disho el kulevro a la mujer, murir no muriresh; porke el Dyo save, ⁵ke en el dia ke komyeresh de el, se avriran vuestros ojos, i seresh komo dyozes [andjeles; וִהְיִיתֶם כֵּאלֹהִים], savyendo byen i mal.

⁶I vido la mujer ke el arvol era bueno para komer, i ke era agradavle a los ojos, i arvol kovdisyavle para azer entender; i tomo de su fruto i komyo. I dyo tambyen a su marido kon eya, i el komyo. ⁷I se avryeron los ojos de ambos eyos, i supyeron ke estavan desnudos; i kuzyeron ojas de igera, i se izyeron senyideros. ⁸I oyeron la boz de A’ Dyo, ke se paseava en el guerto al ayre del dia; i se eskondyo Adam i su mujer de las fases de A’ Dyo entre los arvoles del guerto.

⁹I yamo A’ Dyo a Adam, i le disho, ¿onde estas tu? ¹⁰I el disho, oi tu boz en el guerto, i tuve myedo, porke estava desnudo i me eskondi. ¹¹I disho, ¿kyen te disho ke estavas desnudo?¿Komiste del arvol de ke te enkomendi ke no komyeras? ¹²i disho Adam, la mujer ke me diste para estar konmigo, eya me dyo del arvol, i komi. ¹³I disho A’ Dyo a la mujer, ¿ke es esto ke iziste? i disho la mujer, el kulevro me sombayo, i komi. ¹⁴I disho A’ Dyo al kulevro, por lo ke iziste esto, maldicho eres mas ke toda kuatropea, i mas ke todo animal del kampo; sovre tu pecho andaras, i polvo komeras todos los dias de tu vida; ¹⁵i enemistad pondre entre ti i la mujer, i entre tu semen i su semen; el te erira la kavesa, i tu le eriras el karkanyal.

¹⁶A la mujer disho, muchiguar muchiguare tu tristeza, i tu prenyez, kon dolor pariras ijos, i tu marido sera tu dezeo, i el podestara sovre ti.

¹⁷I a Adam disho, por lo ke eskuchaste a la boz de tu mujer, i komiste del arvol de ke te enkomendi, dizyendo, no komas de el: maldicha es la tyerra por tu kavza; kon dolor komeras de eya todos los dias de tu vida: ¹⁸i espinos i kardos ara ermoyeser a ti, i komeras la yerva del kampo: ¹⁹kon el sudor de tus fases komeras pan asta ke tornes a la tyerra, porke de eya fuiste tomado: porke polvo eres, i al polvo tornaras. ²⁰I yamo Adam el nombre de su mujer, Hava, por kuanto eya era madre de todo bivo. ²¹I A’ Dyo izo para Adam i para su mujer tongas de kuero, i los vistyo.

²²I disho A’ Dyo, ek, Adam es komo uno de nos, savyendo byen i mal; i agora, no sea ke estyenda su mano, i tome tambyen del arvol de la vida, i koma, i biva para syempre. ²³I lo enbio A’ Dyo del guerto de Eden, para lavrar la tyerra, de ke fue tomado. ²⁴I desterro a Adam, i puzo al oryente del guerto de Eden a los Keruvim, i una espada flamante ke se trastornava, para guardar el kamino del arvol de la vida.

4

¹I konosyo Adam a Hava su mujer; i eya se ensinto i paryo a Kayin, i disho, resivi un varon de A’. ²I otra vez paryo a su ermano ‘Hevel. I fue ‘Hevel pastor de ovejas, i Kayin fue lavrador de la tyerra.

³I akontesyo al kavo de dias, ke Kayin trusho del fruto de la tyerra un prezente a A’. ⁴I ‘Hevel, tambyen el trusho, de los primodjenitos de sus ovejas, i de sus mejores: i miro A’ a ‘Hevel i a su prezente; ⁵ma a Kayin i a su prezente no miro. I Kayin se ensanyo mucho, i kayeron sus fases. ⁶I disho A’ a Kayin, ¿porke te ensanyaste? ¿i porke kayeron tus fases? ⁷si byen izyeres, ¿no seras resivido? i si no izyeres byen, a la puerta yaze el pekado: i a ti sera su dezeo, i tu podestaras sovre el.

⁸I avlo Kayin kon ‘Hevel su ermano: i akontesyo, ke estando eyos en el kampo, Kayin se levanto kontra ‘Hevel su ermano, i lo mato. ⁹I disho A’ a Kayin, ¿onde esta ‘Hevel tu ermano? i el disho, no se; ¿soy yo guardador de mi ermano? ¹⁰I disho ¿ke iziste? la boz de la sangre de tu ermano esklama a mi de la tyerra. ¹¹I agora maldicho eres de la tyerra, ke avryo su boka para resivir la sangre de tu ermano de tu mano; ¹²kuando lavrares la tyerra, no te dara mas su fuersa: meneado i esmovido seras en la tyerra. ¹³I disho Kayin a A’, mas grande es mi delito de lo ke se puede soportar. ¹⁴Ek, me desterraste oy de sovre las fases de la tyerra, i de tus fases sere enkuvyerto, i sere meneado i esmovido en la tyerra: i sera, ke kualkyera ke me topare, me matara. ¹⁵I le disho A’, por tanto kualkyera ke matare a Kayin, syete tantos sera vengado; i A’ puzo senyal a Kayin, para ke no lo eryera kualkyera ke lo topara.

¹⁶I salyo Kayin de delante de A’, i moro en la tyerra de Nod, al oryente de Eden. ¹⁷I konosyo Kayin a su mujer, i eya se ensinto i paryo a Hanoh; i estava fraguando una sivdad, i yamo el nombre de la sivdad segun el nombre de su ijo Hanoh. ¹⁸I a Hanoh nasyo Irad; i Irad endjendro a Mehuyael; i Mehuyael endjendro a Metushael; i Metushael endjendro a Lemeh.

¹⁹I tomo para si Lemeh dos mujeres; el nombre de la una fue Ada, i el nombre de la otra Tsila. ²⁰I paryo Ada a Yaval; el fue padre de los ke moran en tyendas, i ke tyenen ganado. ²¹I el nombre de su ermano fue Yuval; el fue padre de todos los ke tanyen arpa i flauta. ²²I Tsila, tambyen eya paryo a Tuval-Kayin, asekalador de toda ovra de alambre i de fyerro: i la ermana de Tuval-Kayin fue Naama. ²³I disho Lemeh a sus mujeres: Ada i Tsila, oid mi boz; mujeres de Lemeh, eskuchad mi dicho: ke varon mate por mi erida, i mansevo por mi tolondro: ²⁴si syete tantos sera vengado Kayin, entonses Lemeh sera setenta i syete.

²⁵I konosyo de nuevo Adam a su mujer, i paryo un ijo, i yamo su nombre Shet; porke disho, el Dyo me puzo otro semen en lugar de ‘Hevel, al kual mato Kayin. ²⁶I a Shet tambyen le nasyo un ijo, i yamo su nombre Enosh. Entonses fue empesado a yamar en el nombre de A’.

5

¹Este es el livro de los djerenansyos de Adam. En el dia ke krio el Dyo al ombre, en la semejansa del Dyo lo izo. ²Macho i embra los krio; i los bendisho , i yamo su nombre Adam en el dia ke fueron kriados.

³I bivyo Adam syento i trenta anyos, i endjendro un ijo en su semejansa, segun su forma, i yamo su nombre Shet. ⁴I fueron los dias de Adam, despues ke endjendro a Shet, ochosyentos anyos, i endjendro ijos i ijas. ⁵I fueron todos los dias de Adam ke bivyo, novesyentos trenta anyos, i muryo.

⁶I bivyo Shet syento i sinko anyos, i endjendro a Enosh. ⁷I bivyo Shet, despues ke endjendro a Enosh, ochosyentos i syete anyos, i endjendro ijos i ijas. ⁸I fueron todos los dias de Shet novesyentos i dodje anyos, i muryo.

⁹I bivyo Enosh noventa anyos, i endjendro a Kenan. ¹⁰I bivyo Enosh, despues ke endjendro a Kenan, ochosyentos i kinze anyos, i endjendro ijos i ijas. ¹¹I fueron todos los dias de Enosh novesyentos i sinko anyos, i muryo.

¹²I bivyo Kenan setenta anyos, i endjendro a Ma’halalel. ¹³I bivyo Kenan, despues ke endjendro a Ma’halalel, ochosyentos i kuarenta anyos, i endjendro ijos i ijas. ¹⁴I fueron todos los dias de Kenan novesyentos i dyez anyos, i muryo.

¹⁵I bivyo Ma’halalel sesenta i sinko anyos, i endjendro a Yered. ¹⁶I bivyo Ma’halalel, despues ke endjendro a Yered, ochosyentos i trenta anyos, i endjendro ijos i ijas. ¹⁷I fueron todos los dias de Ma’halalel ochosyentos i noventa i sinko anyos, i muryo.

¹⁸I bivyo Yered syento i sesenta i dos anyos, i endjendro a Hanoh. ¹⁹I bivyo Yered, despues ke endjendro a Hanoh, ochosyentos anyos, i endjendro ijos i ijas. ²⁰I fueron todos los dias de Yered novesyentos i sesenta i dos anyos, i muryo.

²¹I bivyo Hanoh sesenta i sinko anyos, i endjendro a Metushelah. ²²I kamino Hanoh kon el Dyo, despues ke endjendro a Metushelah, tressyentos anyos, i endjendro ijos i ijas. ²³I fueron todos los dias de Hanoh tressyentos i sesenta i sinko anyos. ²⁴I kamino Hanoh kon el Dyo, i no se topo, porke el Dyo lo tomo.

²⁵I bivyo Metushelah, syento i ochenta i syete anyos, i endjendro a Lemeh. ²⁶I bivyo Metushelah, despues ke endjendro a Lemeh, syetesyentos i ochenta i dos anyos, i endjendro ijos i ijas. ²⁷I fueron todos los dias de Metushelah novesyentos i sesenta i nueve anyos, i muryo.

²⁸I bivyo Lemeh syento  i ochenta i dos anyos, i endjendro un ijo, ²⁹i yamo su nombre Noah, dizyendo, este nos konortara de nuestro echo, i de la lazerya de nuestras manos, por kavza de la tyerra ke A’ maldisho. ³⁰I bivyo Lemeh, despues ke endjendro a Noah, kinyentos i noventa i sinko anyos, i endjendro ijos i ijas. ³¹I fueron todos los dias de Lemeh syetesyentos i sesenta i syete anyos, i muryo.

³²I fue Noah de edad de kinyentos anyos, i endjendro Noah a Shem, a Ham, i a Yefet.

6

¹I akontesyo kuando empesaron los ombres a muchiguarse sovre las fases de la tyerra, i les nasyeron ijas, ²ke vyeron los ijos del Dyo a las ijas del ombre ke eran ermozas, i tomaron para si mujeres de todo lo ke eskojyeron. ³I disho A’, no djuzgara mi espirito en el ombre para syempre, porke el tambyen es karne: ma seran sus dias syento i vente anyos. ⁴Los djigantes estavan en la tyerra en akeyos dias; i tambyen despues ke vinyeron los ijos del Dyo [ijos de los grandes; בְּנֵי הָאֱלֹהִים] a las ijas del ombre, i les paryeron ijos, estos fueron los barraganes, ke dezde la antiguedad fueron varones de fama.

⁵I vido A’ ke se muchiguo la malisya del ombre en la tyerra, i ke todo apetite de los pensamyentos de su korason era solamente malo todo el tyempo. ⁶I se arrepentyo A’ de aver echo al ombre en la tyerra, i se atristo en su korason. ⁷I disho A’, arrematare al ombre ke krei de sovre las fases de la tyerra, dezde el ombre asta la kuatropea, asta la removilya, i asta el ave de los syelos; porke me arrepenti de averlos echo. ⁸Empero Noah ayo grasya en los ojos de A’.

Continúa >>

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.