Avladino kon Albert Israel en Yerushalayim: Kindertransport (3)

Ver todos los artículos de esta sección 

Kindertransport (3)

En 9/11/1938 akontesyeron los pogromes de la «Noche de Kristal» i los pasos suivantes kontra los djudyos. El mundo entero estava merrekiado. Kaliya kitar de la Almanya a lo manko a los ijikos, ke kedaron sin eskolas. Wilfrid Israel lucho muncho para trayer este konsepto a la konosensya del opinion publiko inglez. Entre otros, avlo kon su amigo Lord

Letra a Neville Chamberlain

Herbert Samuel. En 15/11/1938 un grupo de djudyos de la «Komunita Para Los Djudyos en la Almanya», akompanyados kon el Lord Herbert Samuel, se enkontraron kon el primo ministro Neville Chamberlain i trusheron este sujeto delantre de el. Una semana dospues, en el 22/11/1938 tomo luguar una diskusyon grande en el parlamento inglez i finalmente el ministro de interior aksepto a dar permision a kriaturas almanas ke puedan entrar a la Ingletyerra komo «refujidos pasanjeros». Kon las kondisyones:

1. Tyenen de ser de 5-17 anyos.
2. Se van a topar famiyas Inglezas ke estan prontas de dar abrigamyento a los ijikos.
3. Los ijikos van a tornar a la Almanya dospues de «las desgrasyas».
4. Los ijikos no van a lavorar i no van a tomar los luguares de lavoro de los inglezes. 
5. Se pueden ambezar ofisyo.

De la otra vanda Adolf Eichmann ke era el responsable de la «emigrasyon djudia» aksepto ke los ijikos salgan de la Almanya kon las kondisyones:

1. Todo se va azer en kayades.
2. Los ijikos pueden tomar kon eyos solo una validja, solo una foto i solo 10 Reichsmark de paras.
3. No pueden tomar kon eyos livros i djuguetes.
4. No pueden tomar kon eyos kozas valorozas.
5. Las famias no los pueden akompanyarlos a la istasyon del treno.

Wilfrid peno i realizo los transportos. Estos transportos, yamados «kindertransport», traversaron la Almanya entera, la Holanda entera i arivaron a Hoek van, oy en Roterdam. De aya los ijikos pasaron kon vapor a la Ingletyerra.  El primer transport de 196 ijikos arivo a la ingletyrra en 2/12/1938. En seguida salyeron de la Almanya kaji 12,000 ijikos, 10,000 de eyos djudyos. Una parte de estos ijikos toparon abrigamyento en syertas famiyas ke akseptaron a tomarlos kon eyas. Entre estas los paryentes de Margaret Thatcher. Munchos no toparon famias i ayegaron a institutos, kazas de guerfanos, monastires i otros. Munchos obligaron a los ijikos ke lavoren sin ke fueran pagados. Los ijikos chikos no estavan entendyendo lo ke estava afitando. Unos se estavan kreyendo ke sus famiyas van a vinir detras de eyos i se van a adjuntar. Malorozamente, las famiyas se ivan a undir en los krimatoryos. Solo dospues de la gerra entendyeron los ijikos el paso heroiko de sus paryentes.

Los transportos se aretaron en 1/9/1939 kon el empesijo de la sigunda gerra modial.

En los anyos de 2000, uno de estos ijikos Frank Meisler, artisto i eskultor, fue eskojido para eskultar kuatro monumentos de bronzo en la memorya de esta salvasyon:

En 2006 en Londra, en la kaleja Liverpool, a la salida de la istasyon del treno.
En 2008 en Berlin, en la kaleja friedrichstrasse, a la salida de la istasyon del treno.
En 2009 en Dancing, la sivdad ke el nasyo en Polonia, en la istasyon del treno (aya vido a sus paryentes la ultima ves).
En 2011 en Hoek va Holanda, en el debarkader.

A kontinuar…