Muestra Lingua: UN PAN INESPERADO por Edmond Cohen

UN PAN INESPERADO

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Despues de akodrarvos ke los ateles de konversasyon de la asosyasyon Vidas Largas empesaran el djueves 4 de novyembre.

Oy vos kyero meldar un kuento travado del Meam Loez sovre el livro de Yeoshua, eskrito por Rahamim Menahem Mitrani en Selanik en 1851. No vos vo enganyar en azyendovos kreer ke lo meldi direktamente en la ovra orijinal en karakteres rashi. Por dizirvos la vedra, lo topi trasliterado en karakteres latinos en un livro del Profesor Pascual Pascual Recuero, intitulado Antologia de cuentos sefardies, puvlikado en Barcelona, Ameller Ediciones,  en 1979. Es un regalo ke me izo mi ijo mas chiko, ke konose mi atadijo ke ya se izo hazinura, por muestra lingua en jeneral i el Meam Loez en partikolar.

El kuento ke vos eskoji a sido intitulado por Recuero “Un pan inesperado”. Mitrani esta komentando el kapitulo 22, pesukim 1 a 6, del livro de Yeoshua ke konta komo Yeoshua rengrasya i bendize a los trivos de Reuven, Gad i Menase, ke sigieron las enkomendansas del Dyo. I para amostrar ke todo vyene del Dyo, mos konta esto :

Dos aniyim (proves, sedakeros)) ke saviyan kantar i teniyan boz savroza, kada diya se ivan i se asentavan en el kortijo del saray del rey, i kantava el uno de eyos lo ke aparejo, i despues kantava el otro ; i los manteniyan de poder del rey de onde komen sus meshartim (servidores) ; i los dukes i senyores ke entravan i saliyan en el saray del rey, les davan sedaka a estos aniyim, i de esto manteniyan a sus kazas kon sus famiyas. I kada noche se ivan a sus kazas ; i al dia tornavan a sus lugares. I el un ani era yere shamayim (el ke tyene temor del Dyo i ke es sufu) , i todo su kantar era alavando al Patron del mundo, dizyendo ke el Santo Yitbareh kreo los syelos i la tyerra, i todo el mundo kon sus kreados, i dando shevahot (alavasyones) a su Nombre, el Santo, ke lo engrasyo en ojos del rey i sus esklavos, ke kon esto se esta mantenyendo a si mezmo i a su famiya ; i alkavo mentava el nombre del rey i lo bendeziya. En este sinyo de avlas era lo ke kantava kada diya.

I el otro ani (el otro prove) el ikar (el prinsipal) de su kante era alavasyones a el rey basar vadam (de karne i sangre) isus kondes i sus meshartim (servidores), i era kontan kantando los hasadim (las grasyas) ;  i al kavo mentava el nombre de el Santo Yitbareh, dizyendo ke el lo engrasyo en ojos del rey i su djente.

Un diya, el rey bushko de saver ke es lo ke kantan estos dos aniyim, i los oyo, i a el meleh (el rey) le plazyo en sus ojos el kante del seguno, si la boz del kante i si las avlas, ke todas eran alavasyones a el i su djente. I el primero, todas las alavasyones eran a el Santo Yitbareh, i alkavo fuel o ke bendicho ael rey. I disho el meleh :

-El segundo es ombre savyo, ke supo de onde le esta viniendo su mantenimyento, i esta dandomos agradisyones sovre la koza. Lo kual el primero es torpe, ke aki no es lugar de alavar a el Patron del mundo.

I syendo ke el meleh disho ansi, tambyen toda su djente atorgaron kon el, i de akel dia endelantre era estimado el ani segundo en ojo del meleh i toda su djente ; i el primero, entre ojos de todos. I dito ani, aunke ya entendyo ke lo ke kanto el no le plazyo al rey i toda su djente, i por esto lo aboresyeron ; kon todo esto, no se arepintyo i no demudo su kante ke uzava, i no se espanto no sea ke de esto le venga mal a la kavesa, ke tuvo avtaha (konfyansa) en el Santo Yitbareh, ke el estar en su ayuda. I el meleh, syendo ke topo grasya en el segundo ani, segun dishimos, fue su komando ke se venga delantre de el myoral de los ke azen pan para su saray, i en vinyendo delantre, le enkomendo :

– Aze dos panes grandes, iguales, de tanta mizura de arinasovre kada uno, i me los traes a mi sin kozer.

I en logo izo el mayoral su komando, i le trusho los dos panes iguales ; i el aparejo dos bolsas de seda. En la una bolsa echo el meleh delantre del mayoral, kon kuenta, tantos dukados i tantas djoyas presyozss komo poder de rey ; i en la otra bolsa, unos kuantos mangeres (komidas). I le enkomendo a dito mayorl :

– Mete agora, antes de kozersen, una bolsa de estas adyentro de kada pan, i aze dikat tu a saver en kual pan esta la bolsa de los dukados i djoyas,  i en kual esta la bolsa de los mangeres ; i kon partido ke por afuera de las bolsas ke no se vea ninguna senyal en kual pan esta la bolsa de los dukados i djoyas. I te enkomendo ke el pan ke en el los dukados i djoyas se los das a el segundo ani ke kanto mis alavasyones en primero ; i al otro le das el otro de mangeres. No sea ke te yeres i des los panes trokados. I si tal te yeras, savete ke tu pena es muy grande.

I el mayoral izo kozer los panes, i a la tadre le dyo el pan de los dukados i djoyas a el ani segundo, i el de mangeres le dyo al primer ani, segun le enkomendo el meleh.
 
I la kavana (la entisyon) de este meleh era muy negra, para amostrar ke el ke alavo a el tyene mas provecho grandede el ke alavo a su Dyo, has vehalila (leshos de mozotros). Ke ansi, el ani segundo, en tomando el pan de los dukados i djoyas, le vino muy pezgado en su mano ; disho ntre si mezmo :
 
 – Syerto ke este pan no esta kocho buenoi aze danyo a el ke lo kome. 
 
Le disho al otro:
 
– véré tu pan ke te dyeron.

Lo vido livyano. Disho entre si mezmo:

– Este pan ya esta kocho bueno.

Le disho al primer ani :

– Te rogo, si puede ser, trokaremos los panes.

I le izo su palavra, i trokaron los panes. I aunke este tambyen entendyo ke el pan de su haver no esta kocho bueno, i el ke kome ay safek ke le endjidea (le aga mal), kon esto todo se kontento por trokar por azer byen kerer por el, syendo ya supo ke su haver esta agradesido del rey i toda su djente ; por esto, le izo su plalavra, i troko.

A la noche, endose a su kaza, el ani primero yere shamayim, en partyendo el pan, le salyo la bolsa de dukados i djoyas ke metyo el meleh ; i dito ani vido ke ay suma grande de valuta ke de eyo se mantuvo el kon toda su famiya todas sus vidas. En akea ora, aboko su kavesa sovre sus rodiyas, i alevanto plantas de sus manos a los sielos, i avrio su boka i empeso a dezir kon boz de kante loores i alavasyones a el Santo Yitbareh, ke vido su provedad (en franses pauvreté i no probité, afillu si este sigundo byervo uvyera  sido meresido tambyen) i se apiyado de el. I entendyo ke el Santo Yitbareh enveluto (l’avait exaucé) en su kantar shirot ve tishbahot el Santo Yitbareh (kantares i alavansas al Dyo) en lo ke era en el kortijo de el meleh. I dito ani, de akel diya endelantre, mas no fue al kortijo del meleh ; pero despues ke deziya tefila, veniya a su kaza i kantava kada diya shirot vetishbahot el Santo Yitbareh, shiur (la misma kantidad) de lo ke kantava en el kortijo de el meleh, i despues se iva a su echo.

I el meleh demando por este ani ke es la siba (la razon) ke no a venido. I no uvo en su djente kyen supyera koza de este ani. En akea ora embiyo el meleh a yamar a el mayoral de los panes, i le disho :

– Amostra la koza ke tu yerrates i dates los panes trokados.

Le respondyo, dizyendo :

– Has veshalom, yo ize tu komando kumplido, i tal no yerré, ke meti simanim (sinyales) para no yerrarme.

Le disho el meleh al mayoral :

– Abasha, i demandale al ani ke esta abasho en el kortijo : « El pan ke te di, ke lo izites ? »

I el le konto lo ke les paso entre eyos :

– I ya supe ke en el pan ke me dates a mi era adyentro bolsa de dukados i djoyas, i sovre esto me esto kemando en braza biva por lo ke ize yo.

En logo fue el mayoral i le konto a el meleh lo ke le disho el otro ani ke era en su kortijo. En akea ora disho el meleh :

– Agora supe ke lo ke se enfiuzyo akel ani en el Santo Yitbareh de eyos, es verdadero, i el ke se enfiuzya en El, su kavo es bueno ; i el ken se enfiuzya en basar vadam (carne i sangre) no es nada.

Ansina s’eskapa este kuento muy moral, i kon el mi emisyon. Me keda de desharvos dizyendovos al djueves ke vyene, si kyere el Dyo !