eSefarad Noticias del Mundo Sefaradi
Keridos amigos i amigas.
En el Jewish News de esta semana la Rabanit Ell i se Borghi prezentó un artíkolo en la okazión de la Parashat Ekev. Komo una madre ke se okupa de su kriatura pasando mucho tiempo en una siya «Rocking Chair» akunando a su bebé en sus piernas. De vez en kuando mira al “Facebook Marketing» i se da kuento ke ay mezas de kozina ke se venden lo más por 50 dólares i mizmo debaldes.
Se puede tomar una meza de kozina de tavla ke akomoda 6-8 personas, komo miembros de la famiya i los nietos. Esto amostra ke si las mezas son tan baratas, es por el valor ke tienen en muestra sosiedad.
30% de las famiyas australianas se asentan kada día a la meza para la sena. En djeneral, preferen komer afuera en lugar de komer en la kozina o en el komedor endjuntos kon todos de la famiya. En la vida loka de oy, kén tiene tiempo para kompartir la komida kon otros?
La desparisión de la meza de la kozina me aze pensar a una otra meza en el Templo Djudío el Beit Amikdash, ande avía una meza sakramental yamada «Shulhán», ande se metían panes – «Lehem Apanim» – echo por los leviim. Desde la destruksión del Templo los hahamim mos ambezaron ke muestras kazas tomaron este rolo i ke son templos chikos: «Mishkán Meat». La meza es un lugar ande mos ambezamos kozas sovre mozotros, komo lo ke keremos azer en muestras vidas étikas i komo konektar kon la saviduría de muestro puevlo i avantajar al Divino.
La intuisión ansina es apoyada por la peskuza kontemporánea. Se topó ke kriaturas ke komparten la komida kon sus famiyas tienen benefisios grandes en sus desvelopamiento. La oportunidad de konversar, de ser espozados a la lingua ke apoya el vokabulario para kreser i luego yegar a un nivel akadémiko. Se topa también ke las kriaturas ke komen kon adultos tienen endemás un benefisio psikolójiko i se komportan mijor. En una era de solusiones teknolójikas sin fin, el kresimiento sano i la resiliensia de las kriaturas representa una intervensión remarkavle i simple, ke es asentarse alderedor de la meza i kompartir una komida endjuntos.
Fue en rekonosimiento del poder de la meza en kozina ke mi marido i yo formamos un ekipo kon otros apasionados de la edukasión i los líderes de la komunidad ke kreamos la nueva eskuela djudaía «Beit Hillel Community College» en la Australia. Kada día akí en muestra «Home Style Kitchen» (kozina komo de kaza) preparan el té demanyana i tadre, asentados endjuntos estudiantes i profesores, para kompartir una komida echa en kaza. Muestra meza kompartida es el lugar ande los estudiantes se ambezan la nutrisión en un entorno natural sin konfrontasión kon sus amigos, teniendo konfiensa en lo ke se kome. Lo ke se pasa oy afuera, es ke munchos estudíantes komen de sus «Lunch Boxes», asentados en sus bankos sin kompartir la komida, sin avlar, mirando videos o “smart board”.
Deskojemos el tiempo de komer adientro i afuera. Mizmo la práktika djudía de berahot enrikese esta esperiensa i ofrese a los estudíantes la nutrisión para el kuerpo i la mente.
La Parashá de esta semana, «EKEV», mos aklara ke la komida es más ke nutrisión. Moshé disho a los israelitas, «Kome i seas satisfecho i bendise al Senyor, él Dió» [Devarim 8:10]. Ke la komida eskape en rengrasiamiento, es en la meza kompartida ke las kriaturas aprenden esta lisión. Ke vean ke la komida no aparese de nada i ay ke apreciar la abondansia. Munchos anyos antes ke la kriatura entiende la filosofía de valores, puede tener la esperiensa alderedor de la meza kompartida.
La meza de la kozina es un moble de poder. Es en muestra meza ke empesamos la konversasión de fraguar un kamino muevo de edukasión i es akí ke el Board se topa para giar a la komunidad de la eskola. Un kamino ke se aze endjuntos. Es también en esta meza ke mos metemos en famiya kada Shabat i invitamos a la djente a muestra visión: “BETE’AVON, KOL TOV LE KULAM”.
Traduisido por Simon Geron de Sydney
Fuente: Ladinokomunita
