Muestra lingua: UN ANYO DE RADYO 2010

Keridos amigos, vos do el teksto de la proksima emisyon del programa.

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos

Edmond Cohen – Paris, Fransya

UN

UN ANYO DE RADYO 2010

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina. 

Afillu si ya lo ize la semana pasada, otruna vez es un plazer para mi de embiyarvos por las ondas mis mijores dezeos de anyada buena, kon salud i kon vida, i para munchos i buenos. 

I tambyen, komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 20 de janvier, ke va kaer en diya de Tu Bishvat, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. 

El anyo pasado, mi primera emisyon fue el djueves 7 de janvier ande vos akodri las 35 emisyones ke ize en 2009. 

Oy tambyen, me pensi ke puediya ser interesante de akodrarmos en djuntos de las 34 emisyones ke ize durante el anyo pasado, 2010. Deke 34 i no 52? En primero porke uvo un djueves, el 11 de fevrero, ande izimos kon Vidas Largas una vijita de la ekspozisyon sovre los de Camondo en el Muzeo de Arte i de Istorya del Djudaismo en Paris, en sigundo porke el djueves 20 de mayo kaiya sigundo diya de Shavuot, en trezen por modo ke teniya de guadrar a mis inyetizikos kadal diya de junyo i ke manki por modo de esto tres djueves de djunyo, en kuatren porke   no ize emisyones durante djulyo, agosto, i el primer djueves de septyembre, sea 10 djueves, a la vez por modo de las vakansas i por modo del luto ke tuve en fin de agosto kon la pedrita de mi kerida madre, enfin no uvo tampoko emisyones los 9 , 23 i 30 de septyembre por modo de Rosh Ashana, Sukot i Shemini Atseret. Esto todo aze 18 emisyones de manko : de 52, kedan 34. 

La primera de mis emisyones de 2010 fue, komo vos dishe, sovre las 35 emisyones ke ize en 2009. Los dos djueves de despues vos avli de la istorya de los djudeo-espanyoles  en Paris, de 1909, kuando avriyeron el kal de la rue Popincourt, asta oy : la primera emisyon era de 1909 asta 1945, i avli kon una grande admirasyon de estos giborim, no ay otro byervo para yamar a estos ombres ke en plena okupasyon, se kedaron para deshar dos kales avyertos i azer las orasyones ; munchos (Behar Parali, Elie Danon, Robert Bahsi, Israel Razon, ke esten en Ganeneden,) pagaron de su vida un tal koraje. 

Komo ya lo savesh, muestros amigos Alain de Toledo i su primo Laurent Gattegno, fundaron una asosyasyon yamada Muestros Dezaparesidos, para azer una bushkedad por la memorya de todos los miles de djudeo-espanyoles de Fransya asasinados entre 1942 i 1945. 

De esto avli i de munchas otras kozas en la sigunda emisyon, sovre los djudeo-espanyoles de Paris de 1945 asta oy. 

El djueves despues, 28 de enero, kaiya el diya del Olokosto, i dos diyas antes de Tu Bishvat, i afillu si una koza no teniya nada de ver kon la otra, me esforsi de avlar de las dos : unos kuantos byervizikos sovre Tu Bishvat, i el kusur de la emisyon sovre la marcha de la muerte, ke se paso en este tyempo de fin enero 1945, kuando los SS, a la yegada de los Rusos, travaron a los deportados sovrebivyentes de Auschwitz i otros kampos para yevarlos mas a l’oeste, verso los kampos de Buchenwald, Bergen Belsen, ets. Lo ke fue esta marcha, no lo puediya kontar yo kon mis byervos de mi. Meldi lo ke eskrivyeron los ke la bivyeron eyos mismos. 

El djueves despues, para trokar un poko de tanto apretamyento de korason, meldi dos kuentizikos travados de El Amaneser : Hayimiko el gayiko de Kirlareli, eskrito por Isaac Haskiya, i Un perro dormyente, eskrito por Rivka Abiry.

I para aboltar a kozas mas seryozas, avli el djueves despues de los eskritos de la Mar Muerta, ke agora fueron entaramente puvlikados, lo le tomo mas de sinkuenta anyos. Se podriya pensar ke agora savemos mas sovre los ke los eskrivyeron ? A la rovez ! Mas se deskuvren kozas muevas, mas espeso se aze el misteryo sovre la identidad de esta sekta ke eskrivyo los pergaminos topados serka de un sityo yamado Kumran. En primero se diziya komo koza sigura  ke eran Esenyanos bivyendo en Kumran. Agora ni se save kon siguro si esta sekta era esenyana ni si biviya en Kumran. Los savyos se pelean mas i mas fuerte sovre esta kuestyon tan misteryoza. 

Despues, komo era Purim, avli de Purim, no de la istorya de la Reyna Ester, ke ya aviya kontado munchas vezes, ama de los rekodros de lo ke era la fyesta de Purim ande los djudyos del tyempo de los Osmanlis i un poko despues. Rekodros de un tyempo pasado… 

El djueves despues, avli de un grande djudyo ke bivyo siglo entero,  Sir Moses Montefiore, un muy grande djudyo, ke uzo de su rikeza para ayudar a los djudyos de todas partes del mundo, i no solo a los djudyos. 

I la semana ke sigyo, avli del kavzo Mortara, la istorya de este ijiko djudyo tomado por los papazim del papa Pio IX, i ke nunka dyeron atras. Mismo el grande Montefyore ke se fue a Roma para aprovar de ver el papa no pudo azer nada. Es por modo de esto ke los djudyos fransezes fundaron la Alliance Israelite Universelle aze 150 anyos de esto. 

I el djueves despues estavamos en tyempo de Pesah i avli del seder kon los byervos tan ermozos de ladino : « ke en todas las noches, nos komyentes levdo i sesenya (hamets o matsa) i la noche la esta todo el sesenya ». Todo el i no toda eya porke laila es maskolino i ke el ebreo dize kulo matsa. 

El djueves mas despues vos avli de los djudyos de Etyopiya. Eramos el primo de avril i vos diziya ke si la gran mayoriya de los djudyos de Etyopiya, yamados Beta Israel, pudyeron irse en Israel, kedavan dainda en los kampos serka de Adis Abeba miles de Falash Muras asperando ke el estado de Israel los tome eyos tambyen, afillu ke no son Beta Israel, ama konvertidos al kristyanismo, unos bene anusim si se puede dizir. Agora oyi en las informasyones ke lo ke asperavan ya se izo : el governo de Israel acheto ofisyalmente, en novyembre 2010, de resivirlos. Son 8.000 bivyendo en el Gondar en Etyopiya, en un kampo de refujyados dirijido por la Adjensiya Djudiya. Ama va surear tres anyos porke van a tomar solo 200 kada mes. 

El djueves despues kaiya el yom ashoa, i eskoji de avlar de un grande avokato djudyo de Paris, Pierre Masse, senator, yeno de medayas militares por su koraje en la armada franseza durante la primera gerra, i ke fue aferrado por la polisiya franseza, echado en los kampos de Compiegne i Drancy, i embiyado en Auschwitz. Los avokatos de su tyempo no izyeron muncho para salvarlo, ama los de oy izyeron una grande seremoniya a su memorya. 

El djueves despues, avli del Birobidjan i de sus djudyos. El Birobidjan, mas grande ke Israel i mas chiko ke la Suisa, se topa en Siberiya al lado de la Kina. Fue un tyempo, muy ofisyalmente, una Rejyon otonoma djudiya, salvo ke muy pokos djudyos se fueron aya, i me parese pekado, porke se topo syempre muy leshos de los Almanes, i me digo ke munchos djudyos rusos se uvyeran salvado de los Almanes si aviyan ido aya. Esto dicho, dainda kedan unos kuantos miles de djudyos ke biven aya oy en diya. 

El djueves despues, konti la vida de David Ben Gurion, el padre de Israel, el ombre ke durante su vida entera lucho para sus ideas sionistas asta ke fraguar kon nada un estado kapache de rezistir a syete armadas arabas i ganar kontra eyas.  Al modo de unos Einstein, Churchill o de Gaulle, me parese, i no solo a mi, ke Ben Gurion fue una de estas figuras muy altas del siglo 20 ke uvyera sido otro sin eyos. 

De un gibor kon meoyo, Ben Guryon, pasi el djueves despues a la istorya de un gibor sin meoyo, Shimshon . Sin meoyo, ama tan romantiko kon su amor por la negrinyada de Delila. 

El djueves despues, kije avlar del kal eskondido de Abraham Seneor, una istorya kontada por una mujer dizyendose su desendyente. Ya se save ke Avraham Seneor, ke era en 1492 el gran rabino de Espanya frente a los reyes katolikos, despues de aprovar kon su amigo Don Isaac Abravanel de azer trokar el orden de ekspulsyon de los djudyos, sin reushir, komo lo savemos, se konvertyo al katolisismo en junyo 1492 i troko de nombre. Ama guadro en sekreto la relijyon djudya, i teniya su kal sekreto ande su kaza, komo lo konta esta mujer. 

El djueves despues avli de los marineros djudyos ke lucharon en las mares del mundo, en jeneral kontra los espanyoles, al lado de los inglezes o de los turkos. Egziste en las islas karaibas las tombas de korsaryos djudyos ke lucharon kontra los Espanyoles i fueron enterados en tombas ande se ven el magen David ama tambyen el krano i los uesos krusados de los piratos… 

I despues de esto tomi dos djueves para kontar la vida i las ovras del profesor Haïm Vidal Sephiha, el ke empeso en 1985 las emisyones ke esto kontinuando agora, i las mantuvo durante 25 anyos…Esto syendo una muy chika parte de su ovra ke todos konosen agora en favor de muestra lingua, ke sea el ladino su espesyalidad, o el djudeo-espanyol avlado ke no kale yamar ladino porke el ladino no se avla. 

La istorya de su vida es un romanso ke empesa por una trajediya, syendo ke fue aferrado por los almanes i yevado en Auschwitz, i despues tomaron a su padre i su madre. Su padre no sovrebivyo. En kuanto a Haïm, todos le dezeamos de kontinuar su ovra otros munchos anyos, kon salud i kon vida. 

Es despues de kontar esto todo ke me kedi por unos diez djueves en verano, i despues avli de los bene anusim, los ijos de los forsados, forsados de konvertirsen, en jeneral al kristyanismo, i en jeneral en Espanya i Portugal, i ke los espanyoles yaman marranos. Agora en munchos paizes estos bene anusim salen a la vista i demandan a aboltar muy ofisyalmente al djudaismo de sus antepasados. Ay en Israel una organizasyon yamada Shavey Tsion ke se okupa de eyos. 

Despues avli de Rachel, una famoza komedyante del teatro franses en el siglo 19, ke era djudiya i ke se muryo de tuberkuloz a la edad de 36 anyos. A su enterramyento van a venir serka de syen mil personas. 

I despues de Rachel avli el djueves ke sigio del ojo malo, i de las varyas maneras de topar remedyo kontra el. Lo mas interesante eran las palavras ke diziya la prekantera para kurar a alguno tokado de nazar. 

El djueves despues, vos meldi un kuento travado del Meam Loez, intitulado un pan inesperado, en el komentaryo de Rahamim Menahem Mitrani del livro de Yeoshua. 

I el djueves de despues, aprovi de avlar del vino ande los djudyos, ke a la vez , no solo son permetidos de bever vino, ama indimas son ovligados por razones relijyozas de bever a lo manko un poko, i a la vez en jeneral no son bevedores. 

I esto me yevo a avlar de la kasherut en el vino, empesando por la kuestyon : kualo aze ke un vino puede no ser kasher ? I deke kale ke sea echo por un djudyo sufu para ke sea kasher? 

En mi emisyon de despues, ke fue en franses, arresivi a una muy ermoza eskrivana,ermoza de kara i ermoza de lo ke eskrive, kyero avlar de Evelyne Lagardet, ke ya aviya resivido antes por un livro Un rêve français, sovre su papu Bohor Leon, adovador de tapetes, i ke esta sigunda vez eskrivyo un livro filozofiko intitulado Contes de la Diversité. 

I la semana despues, resivi a dos mujeres : Angèle Saül ke ya aviya eya tambyen arresivido antes por su livro de kuentos Djoha i Djohaya, i su amiga Sylvie Cohen, kantadera i muzikante. Angèle melda sus konsejikas i Sylvie kanta entre dos pedasos meldados. 

I el djueves despues vos teniya de avlar de una figura muy importante en muestra kultura :el kazamentero, i todas las shakas ke se kontan sovre su ofisyo. Es vedra ke no es koza kolay ke de kerer kazar ombre i mujer ke no se konosen, i el kazamentero deve ser buen avokato pora konvenser no solo a los interesados, ama tambyen a sus famiyas. 

I el djueves despues, avli de la sivdad ande nasyeron mi padre sefaradi i mi madre lehliya, una sivdad ke tyene una muy larga istorya, kyero avlar de Estambol, ande uvo syempre djudyos, ke sean gregos, romanyotes o espanyoles . Avli de los djudyos del tyempo de los romanos, de los turkos osmanlis, i de la republika turka. 

El djueves despues, vos meldi un artikolo eskrito en la gazeta El Amaneser por el senyor Hernan Rodriguez Fisse, ke bive en Santiago de Chile, i akodrandomos unas dichas muy savrozas en muestra lingua. Por esto intituli mi emisyon Estambol en el Chile. 

El djueves despues, vos avli de la istorya kuryoza de este reyno djudyo en lo ke se yama oy el Kurdistan de Irak, i ke se yamava Adiabene del tyempo de los Romanos. Reyno djudyo porke la reyna de aya, yamada Elena, i sus dos ijos Izates i Monobazos, se konvirtyeron al djudaismo, al punto ke Monobazos i los ijos de Izates lucharon kontra los Romanos al lado de los djudyos durante la rebuelta  de 66-70. 

I el djueves despues, vos avli de los djudyos de Bayonne, una sivdadika al sur-oeste de Fransya ande los djudyos fuidos de Portugal vinyeron en medyo del siglo 16, dizyendosen kristyanos konversos…lo ke ya eran, salvo ke en sekreto se aviyan kedado djudyos. 

El djueves despues, yene vos ize una meldadura del Meam Loez, esta vez un komentaryo de Yaakov Khuli sovre el ultimo pasuk del primer kapitulo de Shemot, el pasuk ande Paro da el orden a todo su puevlo de echar al riyo los ijos rizin nasidos, ama de abediguar las ijas. 

I para trokar de lakirdi i eskapar el anyo 2010 kon rizas, vos meldi el djueves pasado, ke era el ultimo djueves de 2010, unas kuantas shakas ke mos troken de todos estos apretamyentos de korason de munchas de mis otras emisyones. 

I ansina es ke eskapi el anyo pasado. Mi eskopo fue, komo syempre, a la vez de azervos oir muestra lingua, de interesarvos, i en vezes de ambezarvos syertas kozas ke no saviyash…ni yo tampoko antes de aparejar la emisyon. 

Agora ya vino el tyempo de eskapar, i vos desho dizyendovos al djueves ke vyene, si kyere el Dyo!