eSefarad Noticias del Mundo Sefaradi
Keridos amigos,
Mi emisyon de amanyana djueves va ser sovre Simon Wiesenthal (kon dos byervos en primero a la memorya de Meir Rosenne, ke mos desho la vida el 14 de este mes)
Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SIMON WIESENTHAL
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke el proksimo atelye de konversasyon de Vidas Largas se tendra el lunes 4 de mayo, de las tres a las sinko, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Antes de empesar la emisyon de oy, me pensi de dizirvos unos kuantos byervos sovre un djudyo ke mos desho la vida el 14 de avril, a la edad de 84, el grande diplomato Meir Rosenne.
Mozotros fransezes konosimos a Meir Rosenne kuando vino en Fransya en 1979 komo embashador de Israel. Yo lo vide a una resepsyon de la Federasyon syonista en Paris. Avlava un franses impekavle kon este aksento ke le kedava de sus orijenes de Rumaniya.
La Fransya en 1979 no era mas la Fransya de 1956, amiga de Israel. Las kozas aviyan trokado i la Fransya se aviya tomado una politika de amistad kon los arabos. Un diya ke Tsahal a atakado una baza de terroristos de la OLP en Levanon, el embashador Rosenne es konvokado por el Ministeryo franses de los echos ajenos para dizirle la dzaprobasyon de la Fransya. Vyene el embashador i lo deshan asperar ora entera antes ke sea resivido por un diplomato franses en un buro ande no ay dinguna siya para losvijitadores.
Rosenne, muy kyeto, dize al diplomato: «Resivyendome ansina, es un estado sovereno ke estash insultando a traves mi persona. Esto aki komo reprezentante del Estado de Israel. Es en esta kualita ke me vo. No vos saludo». I se va, deshando el otro solo en su buro. El diplomato se ve ovligado de korrer detras de el, i, soflamado, en la eskalera , de rogar sus ekskuzas.
Syempre Rosenne fue ansina. Nunka se desho eskaer de la onor. Ijo orgulyozo del estado de Israel. Ke este en Gan Eden.
Esto dicho, oy pensi de avlarvos de Simon Wiesenthal, famozo luchador kontra los Nazis, komo lo fue Klarsfeld, i ke no tuvo la vida de kada uno. Me parese ke la istorya de su larga vida vos puede interesar (nasido en 1908, se muryo en 2005, a la edad de 96).
Para avlarvos de el, vos diré ke sovre todo bushki sovte Wikipedia. Ay filmos i livros sovre el, ama no meldi estos livros ni tampoko vide estos filmos, a parte de uno ay muncho tyempo a la televizyon, ke ya me olvidi…Afillu si no los meldi, kale ke vos diga kualos son estos livros: en primero, el livro eskrito por Wiesenthal el mismo en 1967, intitolado:»The murderers among us» (Los asasinos en medyo de mozotros), i tambyen dos byografiyas: una por Guy Walters en 2009, otra por Tom Segev en 2010.
Ama kon internet penso tener bastante para kontarvos durante lo ke mos keda de los vente minutos de esta emisyon.
Kale saver ke Simon Wiesenthal nasyo el 31 de desyembre 1908, medya ora antes del anyo muevo, en una sivdadika de Galisiya ke pertenesiya al Imperyo Ostro-Ungares, sivdadika yamada Buczacz, ke agora se topa en Ukranya. Vos digo el nombre de la sivdadika porke ansina lo meldi, ama ya lo puedesh olvidar sin gran danyo…En vedra su padre, Asher Wiesenthal, merkader djudyo, se aviya fuido los pogromes de Rusia solo kuatro anyos antes.
Vyene la gerra en 1914, su padre es tomado komo asker, es embiyado kontra los Rusos i muere a la gerra el anyo despues. Kedan Simon, su madre i su ermaniko Hillel, ke se fuyen de los Rusos i se van en Viena, ande las dos kriaturas van en una eskola djudiya de lingua almana. En 1917, se eskapa la gerra kontra los Rusos, i la famiya abolta en Buczacz. Esta vez los chikos se van en una eskola ande se avla polako.
Hillel, el ermaniko de Simon, se fire la espalda en una kaida en 1923 i se muere el anyo despues. Su madre toma muevo marido, Isack Halperin, en 1926, i se va kon el en Dolyna (serka de Lvov, en una parte de la Polonya ke agora aze parte de la Ukranya) myentres ke Simon, ke agora tyene 18 anyos i se espoza kon una mansevika, Cyla Müller, se keda en Buczacz en la famiya de su espoza. Se kyere ambezar la arkitektura i se va a la Universidad nasyonala politeknika de Lvov, ama no puede entrar porke ay demaziya djudyos (aviya quotas para los djudyos en las universidades, afillu si no eran ofisyales. En 1935, mismo los estudyantes djudyos ke pudyeron entrar en la Universidad de Lvov, la ke no tomo a Wiesenthal, deviyan asentarse en bankos a parte de los otros, ke fueron yamados «bankos ghettos». Estos bankos para los estudyantes djudyos ke puediyan entrar fueron legalizados ofisyalmente en todas las universidades de Polonya en 1937).
Simon se va dunke a Praga, en Tchecoslovaquia, para pueder entrar en la Universidad, ande aze sus estudyos de arkitektura entre 1928 i 1932. Despues se va lavorar en Odessa, se kaza kon Cyla en 1936 i abolta en Galisiya. Despues no se save byen lo ke izo, syendo ke a kada vez mos konta otra koza. Lo ke parese siguro es ke se fue en Unyon Sovietika, en Odessa, asta 1941, kuando los Almanes atakaron a la Urss.
Myentres esto en 1939, asigun el pakto germano-sovyetiko los Rusos entraron en la rejyon de Lvov ande se topava la madre de Simon kon su muevo marido Isack Halperin, el kual fue aferrado komo kapitalisto por los Rusos, echado en prezo ande presto se muryo. La madre de Simon se va ande su ijo i su mujer en Buczacz. Reushen a eskabuir de la deportasyon por los Rusos ama en 1941 vyenen los Almanes ke toman a Simon i a los djudyos de Lvov para los lavores forsados de fraguamyento del ghetto de Lvov. Miles de djudyos son asasinados, ama Simon reushe a eskabuir de la muerte.
Al kavo de 1941, Simon i su mujer son embiyados en el kampo de lavoro de Janowska serka de Lvov. Simon obtyene falsos papeles para su mujer, ke va ser embiyada en otros kampos de lavoro ama va reushir a eskabuir de la muerte. Simon podra toparla biva despues de la gerra.
A la kontra, la madre de Simon es aferrada en agosto 1942 i embiyada en el kampo de Belzec ande es matada. En el mismo tyempo, la madre de Cyla es matada en Buczacz por un pulis Ukranyano. En todo Simon i su mujer van a pedrer ansina 89 personas de sus paryenté durante la Shoah.
Wiesenthal es embiyado del kampo de Janowska en un otro un poko mijor, ande lavora komo arkitekto. Puede mismo syertas vezes salir del kampo para merkar kozas para el buro, i lo aprovecha para merkar tambyen armas para la rezistansya i dos revolveres para el mismo.
Ama el komandante en sigundo del kampo de Janowska dechida el 20 de avril 1943, diya del 54en aniversaryo de Hitler, de matar a 54 djudyos, i toma tambyen Wiesenthal i dos otros djudyos en el kampo ande estavan. Al momento de ser matado, su kapo lo yama porke tyene menester de el para pintar la kavesa del Fuhrer para su aniversaryo.
Poko tyempo despues, Wiesenthal reushe de fuirse del kampo i eskonderse en el kazal de Kulparkow ande se keda astal kavo de 1943. Despues se va eskonder aki i aya asta ke, el 13 de djunyo 1944, sea aferrado por dos pulizes polakos i embiyado de muevo al kampo de Janowska.
Ama vinyendo los Rusos, los prezoneros son embiyados al kampo de Przemysl i despues, en septyembre, al kampo de Plaskow, mas al oeste, i despues, en oktovre, en Gross-Rosen. Aya Wiesenthal en lavorando resive una godra pyedra sovre el pye derecho i su dedo godro deve ser kortado.
En janvier 1945, los prezoneros son embiyados a pye a Chemnitz. Simon, kon su pye ferido kamina sirvyendose de un palo de eskova komo baston, i sovrebive a esta marcha de la muerte. De Chemnitz, es embiyado kon treno a Buchenwald i de aya por kamyon a Mauthausen en fevrero. Medyo muerto, va ser liberado por los Amerikanos el 5 de mayo 1945. Su pezgo: 41 kilos.
Pishin, en las semanas ke sigen su liberasyon, Wiesenthal eskrive para los Amerikanos la lista de unos syen kriminales nazis (guardyas, komandantes de kampos, ombres de la Gestapo). Despues ayuda a los Amerikanos komo tardjuman i afillu su hal akompanya a los askeres para los aferramyentos de nazis.
En julyo 1945 Mauthausen kaye basho la okupasyon sovyetika i el buro Amerikano de los krimenes de gerra se va a Linz, i Wiesenthal tambyen. Wiesenthal lavora para arrekojer informasyones sovre las viktimas i los kriminales de la Shoah.
Ayuda tambyen a la Beriha, un grupo klandestino ke organiza la emigrasyon de djudyos sovrebivyentes verso la Palestina, dandolos falsos papeles, komidas o trasportes.
En fevrero 1947, es uno de los fundadores de un sentro de dokumentasyon en Linz ke arrekoje unos 3.300 testimonyos de deportados.
Despues Wiesenthal se apersive ke los Amerikanos no se okupen mas de bushkar a los nazis , i dechida ke esto va ser su lavoro a el.
Wiesenthal eskrivyo: «Kuando los Almanes yegaron en mi sivdad, la mitad de la povlasyon era djudiya: 150.000 djudyos. Kuando se fueron, kedavan 500. Munchas vezes me pensi ke kada koza en la vida tyene un presyo, dunke kedarse en vida deve tambyen tener un presyo. I mi presyo era, si biviya, de reprezentar a los ke no son mas.»
Uno de sus lavoros va ser de bushkar a Eichmann, uno de los kapos nazis kon Himmler ke aviya organizado la deportasyon de los djudyos. Aviya reushido kon falsos papeles a fuir verso la Argentina, komo miles de nazis akojidos por Peron.
En 1953 Wiesenthal se ambeza ke Eichmann bive en Buenos Aires kon una falsa alkunya, i en 1954 da la informasyon al konsulado de Israel en Viena. Kuando el padre de Eichmann se muere en 1960, Wiesenthal aze tomar fotografiyas de toda su famiya, inkluyendo el ermano Otto, ke asemaeja muncho a su ermano Adolf. Wiesenthal trasmete estas fotos al Mossad el 18 de fevrero. Estas fotos van a ayudar a los ombres del Mossad para estar siguros de la identidad de Eichmann. El 11 de mayo 1961, Eichmann es aferrado en Buenos Aires por los ombres del Mossad, traido en Israel i djuzgado un anyo despues. Wiesenthal ayudo kon su dokumentasyon a la akuzasyon i asistyo a una parte del proseso. Komo ya lo savesh, Eichmanno fue kondenado a muerte i enforkado en 1962.
Por siguro, Wiesenthal no se va okupar solo de bushkar a Eichmann, ama tambyen munchos otros kriminales nazis komo Erich Rajakowitsch, el ke se okupo de la deportasyon de los djudyos de Holanda o Franz Murer, el komandante del ghetto de Vilnius. Malorozamente sus esforsos no son syempre rekompensados. Rajakowitsch mismo aferrado va ser liberado. En kuanto a Murer, una vez djuzgado por los Austriakos, va ser akitado…
Otras vezes Wiesenthal tuvo mas reushita. Franz Stangl, kapo de los kampos de Sobibor i despues de Treblinka, fue responsavle de la muerte de unos 900.000 deportados. Aferrado por los Amerikanos, aviya reushido a fuirse. Roma, la Syria, el Brasil en 1951. Wiesenthal se ambeza ke esta en Sao Paulo, reushe a azerlo aferrar en fevrero 1967 i en junyo embiyar en Almanya, ande va ser djuzgado i kondenado a prezo a vida. Se muere en prezo en 1971.
Hermine Braunsteiner era guardya en Majdanek i Ravensbruck. Le plaziya aharvar a los deportados asta la muerte. Fue kondenada a tres anyos de prezo en Austria i liberada, lo ke le permetyo de irse en Amerika i mismo de azerse amerikana. Wiesenthal la topo aya, la izo en primer pedrer la nasyonalita amerikana, lo ke permityo ke sea embiyada en 1973 en Almanya ande fue djuzgada i kondenada a prezo a vida. En vedra fue liberada en 1996 por razones de salud i se muryo en 1999.
A la kontra, kuando Kurt Waldheim fue yamado Sekretaryo General de las Nasyones Unidas en 1971, Wiesenthal disho ke asigun el no aviya sido nazi. Despues, en 1986, el mismo Waldheim fue elijido Prezidente de la Austria. Anyo i medyo despues, un grupo de istoryanos eskrivyo ke si no partisipo a atrosidades, ya las konosiya. Entonses Wiesenthal aprovo de obtener la demisyon de Waldheim ama no reusho. A lo manko los Amerikanos dechidaron de no permeter a Waldheim de entrar en los Estados Unidos.
En 1985, 40 anyos despues de la gerra, se pensava ke el Nobel de la paz iriya a un ombre atado kon la Shoah. Wiesenthal pensava ser elijido, ama fue Elie Wiesel, lo ke no plazyo a Wiesenthal.
Kontinuo de lavorar en Viena asta los 90, kijo dizir 1999. El ultimo nazi ke bushko fue Julius Viel, kondenado en 2001 por aver matado syete deportados djudyos en el kampo de Theresienstadt.
Cyla, la mujer de Simon, se muryo en 2003 a los 95, i Simon se muryo en 2005 a la edad de 96 anyos. «Ya eskapi mi lavoro», disho Wiesenthal poko antes de murir.»Les sovrebivi a todos, i si kedan, son demaziya vyejos para ser djuzgados».
Despues de su muerte, el istoryano israelyano Tom Segev se fue en el buro de Wiesenthal en Viena, i aya topo mas de 300.000 tefteres yenos de dokumentos, pedasos de gazetas, fotos, ets. «Era, mos dize Segev, un raton ke grita komo un leon. Se prezentava komo si era el kapo de una grande organizasyon, en vedra era el solo. En un tyempo ande no aviya komputaderas, aviya arrekojido kon papeles una dokumentasyon inkreivle.»
Su vida entera despues de la gerra fue konsagrada a bushkar ande los kriminales nazis se aviyan eskondido, para azerlos aferrar i traer a la justisya.
Esto dicho, Wiesenthal no se okupo solo de los nazis. Se okupo tambyen de muestro amigo Cristobal Colon, i eskrivyo en 1972 un livro, Segel der Hoffnung (La vela de la esperansa, la misyon sekreta de Cristogal Colon) ande mos dize sus ideas sovre Colon. Asigun Wiesenthal, (i no el solo)Colon era de orijen djudya i bushkava en el Oryente ande pensava irse los diez trivos pedridos de Israel. Ama esto es otra istorya ke ya vos konti en otras emisyones.
Al djueves ke vyene, si kyere el Dyo!
Edmond Cohen
Paris – Fransya
