eSefarad Noticias del Mundo Sefaradi
Keridos amigos
El 21 de fevrero de 1944, 22 rezistantes ajenos de Paris, entre eyos a lo manko 8 djudyos i puede ser mas, fueron fuziyados endjuntos. Louis Aragon eskrivyo en 1955 una poeziya sovre eyos, i Leo Ferré la metyo en muzika i la kanto en 1959. Oy la poeziya es muy famoza i ambezada en las eskolas. Aprovi de trasladarla en muestra lingua. Mi emisyon de este djueves va ser sovre estos giborim, i sus kapo, un ermeni ke se yamava Missak Manouchian
Saludos a todos
Edmond Cohen
Paris – Fransya
——————————————————————————————
EL GRUPO MANOUCHIAN
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 15 de mais, a las dos i medya, en el Centre Communautaire. Venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.
http://www.radioj.fr/node/55
Oy es Lag Baomer, i a esta okazyon, vos dezeo una buena fyesta. Vos akodro ke oy la djente se puede kazar, afillu el medyo luto ke korre entre Pesah i Shavuot.
Esto dicho, ay unos kuantos mezes, vos avli aki de syertos djudyos komunistos ke kombatyeron kontra los frankistos i sus alyados fasistos durante la gerra de Espanya.
Kuando vino poko despues la sigunda gerra mundyala, unos kuantos entre eyos, djudyos o no, kontinuaron la lucha en Fransya, esta vez kontra los Almanes.
Oy me pensi de avlarvos de los 22 fuziyados (mas una mujer a kyen le kortaron la kavesa) de la ke se yamava eya misma Armada de la Liberasyon, ma ke fue mas komonosida kon el nombre de Grupo Manouchian, o tambyen los del Avizo kolorado.
Mas de mil rezistantes fueron fuziyados durante la gerra en un lugar serka de Paris yamado Monte Valérien, i entre eyos los 22 del grupo Manouchian, el 21 de fevrero 1944, kaji sesh mezes antes de la liberasyon de Paris.
El kapo de estos 23 (kon la mujer) se yamava Missak Manouchian, era ermeni. El grupo konosido por su nombre aziya parte de la organizasyon MOI-FTP. Los FTP (francs-tireurs et partisans, andartes i partezanos) eran los rezistantes komunistos, i entre eyos la MOI (main d’oeuvre immigrée, ovreros imigrados) era kompozada de ovreros komunistos ajenos bivyendo en Fransya.
Vo empesar por avlarvos de Manouchian, nasido en 1906, i ke dunke teniya 37 anyos kuando fue fuziyado. Nasyo en la sivdad turka de HisniMansur, ke se yamo despues Adiyaman. En 1915, kuando el ijiko tyene solo 9 anyos, su padre es matado por los turkos i su madre, deportada poko despues, muere de ambre. El ijiko es akojido i eskondido por una famiya kurda. Despues de la gerra, es akojido en una kaza para uerfanos en el Levanon. Aya le ambezan el ofisyo de duramadji (el ke lavora la madera) i el se ambeza de si para si la literatura ermeniya, tyene la gana de eskrivir.
En 1925, a la edad de 19, reushe a irse en Fransya, i aya topa un lavoro de duramadji serka de Marsilya. De aya se va a Paris, i topa un lavoro komo ovrero ande Citroen. A poko a poko, konose mas i mas artistos, entre eyos el pintor Carzou (un ermeni, de su haliz nombre Galik Zouloumian). Frekuenta las universidades ovreras de la CGT, se va kadal diya a la biblioteka Sainte-Geneviève. Eskrive poeziyas. Kon la krizis, pyedre su lavoro, topa lavorikos aki i aya. Se enskrive en la Sorbonne komo oyente libero, ambezandose literatura, filozofiya, ekonomiya politika i istorya. Funda kon un amigo revistas kulturalas, traslada en ermeni la poeziya de Baudelaire, Verlaine, Rimbaud.
En 1934, entra en el partido komunisto i tambyen en el komité de ayudo a la Armeniya, el tambyen komunisto i seksyon ermeniya de la MOI. Aya konose Mélinée Assadourian, ke va tomar por mujer.
Al empesijo de la gerra, el 2 de septyembre 1939, Manouchian es aferrado komo komunisto, ma liberado en oktovre, lo ke le permite de entrar komo veluntaryo en la armada franseza.
Kuando se topa en Paris en 1941, es de muevo aferrado, esta vez por los Almanes, yene komo komunisto, syendo ke agora la Almanya a atakado a la URSS. Ma es liberado poko tyempo despues. Entra en la rezistansya komunista, al lado de dos otros ermenis, los Aznavourian, padre i madre del kantador Charles Aznavour.
En fevrero 1943, entra en la FTP MOI, basho Boris Holban, djudyo de Bessarabiya. Se topa kon djudyos rumanos i ungarezes, i unos kuantos ermenis. En agosto es komisaryo militar de la rejyon parizyana, basho Joseph Epstein. Manouchian tyene basho el unos 50 ombres. Tyene por lavoro de matar a lo mas posivle de altos zabites almanes i de destruir los trenos almanes. Tres de sus ombres alkansan a matar, el 28 de septyembre 1943, el Standartenfuhrer SS Julius Ritter, kapo del STO (servisyo del lavoro ovligatoryo) por la Fransya.
Los grupos de Manouchian azen serka de trenta operasyones en Paris, solo entre agosto i novyembre 1943. Ama el 16 de novyembre 1943, Manouchian i su kapo Epstein son aferrados los dos en djuntos. Epstein va ser torturado durante munchos mezes i fuziyado en avril 1944. El diya de su egzekusyon, alkansa a ayudar un kompanyero a saltar del kamyon ke los yeva al Mont Valérien i a fuyirse.
Melinée, la mujer de Manouchian, reushe a eskabuir de la polisiya i a eskonderse ande los Aznavourian, los padre i madre de Charles Aznavour. Manouchian el, es torturado ma no avla. Yene 22 de sus ombres i una mujer son tambyen aferrados porke un otro a avlado.
Son djuzgados el 19 de fevrero por un tribunal militar alman en el otel Continental. Son prezentes gazeteros fransezes ke les gritan ensima, i Manouchian les responde: «La nationalité française, vous l’avez héritée; nous l’avons méritée» (la nasyonalidad franseza, la eredatesh; mozotros la meresimos. Kon la traduksyon se pyedre ke entre héritée i méritée ay una sola letra ke aze toda la diferensya ).
La sola mujer del grupo se yamava Olga Bancic, era una Rumana de 32 anyos. Djudiya? No sé. A sido yevada en Almanya porke sözde asigun la ley almana la Wehrmacht no fuziya a mujer. (Tengo yene de akodrarvos ke la Wehrmacht fuziyo en vedra no a una o a dos, ma a syenes de miles de mujeres i kriaturas; vos kombido a bushkar los krimenes de la Wehrmacht sovre Wikipedia; syerro esta chika paranteza). En Almanya kortaron la kavesa kon balta a Olga Bancic el 10 de mais 1944.
Por lo ke es de los 21 ombres komandados por Manouchian i ke fueron fuziyados en mizmo tyempo ke el, el 21 de fevrero 1944, meresen por siguro ke vos avle un poko mas de eyos.
Kale en primero dizir ke aviya un poko de todas las orijenes en este grupo, inkluyendo tres fransezes ke se topavan kon los otros en jeneral porke eran amigos kon tal o tal del grupo: Georges Cloarec, 20 anyos, Roger Rouxel, 18 anyos, Robert Witchitz, 19 anyos.
A parte de Manouchian, un solo otro ermeni, Armenak Manoukian, otras vezes yamado Tavitian, 44 anyos, el mas vyejo. Mal visto por los komunistos porke trotskisto.
- 1 espanyol, Celestino Alfonso, 27 anyos
- 5 Italyanos: Rino della Negra, 19 anyos, Spartaco Fontanot, 22 anyos, Cesare Luccarini, 22 anyos, Antoine Salvadori, 24 anyos, Amedeo Usseglio, 32 anyos
- 8 Polonezos: Maurice Fingercwajg, 19 anyos, Jonas Geduldig, 26 anyos, Léon Goldberg, 19 anyos, Szlama Grzywacz, 34 anyos, Stanislas Kubacki, 36 anyos, Marcel Rajman, 21 anyos, Willy Schapiro, 29 anyos, Wolf Wajsbrot, 18 anyos
- 3 Ungarezos: Joseph Boczov, 38 ans, Thomas Elek, 18 anyos, Emeric Glasz, 42 anyos
Kon Manouchian el mismo i Olga Bancic, eran 23 kondenados en todo. En estos 23, kuantos djudyos? Asigun mi i asigun los Almanes, 6 a lo manko sovre los 8 polonezos, 2 a lo manko sovre los tres ungarezos, lo ke aze 8 djudyos siguros. Kon el kapo de Manouchian, Joseph Epstein, tenemos mueve djudyos siguros.
Antes de morir Manouchian pudo eskrivir dos letras, una a su mujer Mélinée, otra a Armene, la ermana de Mélinée. Estas dos letras son de grande valor umana. Vos kombido de ir a meldarlas, indovos sovre Wikipedia en franses sovre el largo artikolo konsagrado a Mélinée Manouchian.
Aki no las vo meldar porke despues vos vo meldar la poeziya eskrita por Aragon sovre el grupo Manouchian, i en esta poeziya Aragon ya tomo lo mijor de las letras, sovre todo de la letra a Melinée, sin nada trokar.
La istorya del grupo Manouchian es konosida muncho grasyas a un avizo de propaganda eskrito en franses por los almanes kon estos titolos: «Liberadores? La liberasyon por la armada del krimen!» Unos 15.000 avizos fueron apegados sovre las paredes de las sivdades de Fransya, i sovre todo de Paris. La idea era de amostrar ke los rezistantes no son fransezes, son sovre todo djudyos suzyos. Mismo Wichitz, ke era kristyano i franses, fue amostrado komo «djudyo ungarezo». Sovre los 23, solo diez fueron amostrados en foto sovre el avizo, ke era kolorado, i este avizo kedo famozo komo «l’affiche rouge». En 1955, dunke onze anyos despues, una kaye del grupo Manouchian va ser inogurada en Paris, i el grande poeta komunisto Louis Aragon eskrivyo por esta okazyon una muy esmovyente poeziya. Kreo ke la meldo el mismo el diya de la inogurasyon, ama no esto siguro. Yo vo la vo meldar en primero en franses i despues en la traduksyon ke ize en djudeo-espanyol. Kale saver ke el kantador Leo Ferré kompozo el mismo en 1959 una muzika para kantar esta poeziya, i la kanto el mismo. Se puede ver i oir sovre internet.
Aragon aviya intitolado su poeziya Strophes pour se souvenir (versos para akodrarse). Ferré troko el titolo en L’Affiche rouge (el avizo kolorado)
Agora la poeziya de Aragon en franses:
Strophes pour se souvenir
Vous n’avez réclamé la gloire ni les larmes
Ni l’orgue ni la prière aux agonisants
Onze ans déjà que cela passe vite onze ans
Vous vous étiez servi simplement de vos armes
La mort n’éblouit pas les yeux des Partisans
Vous aviez vos portraits sur les murs de nos villes
Noirs de barbe et de nuit hirsutes menaçants
L’affiche qui semblait une tache de sang
Parce qu’à prononcer vos noms sont difficiles
Y cherchait un effet de peur sur les passants
Nul ne semblait vous voir français de préférence
Les gens allaient sans yeux pour vous le jour durant
Mais à l’heure du couvre-feu des doigts errants
Avaient écrit sous vos photos MORTS POUR LA FRANCE
Et les mornes matins en étaient différents
Tout avait la couleur uniforme du givre
À la fin février pour vos derniers moments
Et c’est alors que l’un de vous dit calmement
Bonheur à tous Bonheur à ceux qui vont survivre
Je meurs sans haine en moi pour le peuple allemand
Adieu la peine et le plaisir Adieu les roses
Adieu la vie adieu la lumière et le vent
Marie-toi sois heureuse et pense à moi souvent
Toi qui vas demeurer dans la beauté des choses
Quand tout sera fini plus tard en Erivan
Un grand soleil d’hiver éclaire la colline
Que la nature est belle et que le coeur me fend
La justice viendra sur nos pas triomphants
Ma Mélinée ô mon amour mon orpheline
Et je te dis de vivre et d’avoir un enfant
Ils étaient vingt et trois quand les fusils fleurirent
Vingt et trois qui donnaient leur coeur avant le temps
Vingt et trois étrangers et nos frères pourtant
Vingt et trois amoureux de vivre à en mourir
Vingt et trois qui criaient la France en s’abattant.
I agora mi povereta traduksyon
Versos para akodrarse
No tenesh reklamado la glorya ni las lagrimas
Ni el organon ni la orasyon a los agonizantes
Onze anyos ay, komo pasa presto onze anyos
Teniyash solo uzado vuestras armas
La muerte no asyega los ojos de los partezanes
Teniyash vuestros retratos sovre las paredes de muestras sivdades
Pretos de barva i de noche irsutos amenazantes
El avizo ke paresiya una mancha de sangre
Porke a pronunsyar vuestras alkunyas son yuches
Bushkava de dar espanto a los pasantes
Dingunos paresiya vervos fransezes de preferensya
La djente iva sin ojos para vozotros el diya durante
Ama a la ora del tapa-fuego dedos sorreteros
Aviyan eskrito basho vuestras fotos MUERTOS POR LA FRANSYA
I las pretas manyanas saliyan diferentes
Todo teniya la kolor uniforma del yelo
Al kavo fevrero para vuestros ultimos momentos
I estonses fue ke uno de vozotros disho kon kalmo
Azlaha a todos azlaha a los ke van a sovrebivir
Muero sin odyo en mi verso el puevlo alman
Adyo las penas i el plazer Adyo las rozas
Adyo la vida adyo la luz i el ayre
Kazate sea oroza i pensa en mi akorruto
Tu ke vas a kedar en la ermozura de las kozas
Kuando todo sera eskapado mas tadre en Erivan
Un grande sol de invyerno arrelumbra la kolina
Komo la natura es ermoza i komo mi korason se rompe
La djustisya vendra sovre muestros pasos trionfantes
Mi Mélinée o mi amor mi uerfanika
I te digo de bivir i de tener una kriatura
Eran vente i tres kuando los tufenkes enfloresyeron
Vente i tres ke davan sus korason antes del tyempo
Vente i tres ajenos i muestros ermanos portanto
Vente i tres amantes de la vida asta morir
Vente i tres ke gritavan La Fransya kaendosen
Penso ke ay un chiko yerro en la poeziya: fueron 23 kondenados a muerte, es vedra, ama solo 22 fueron fuziyados. Olga Bancic fue dekapitada.
Lo ke no dize la poeziya es ke los fuziyados refuzaron de tener los ojos tapados: keriyan ver la muerte de frente. Esto lo dize la poeziya: «la muerte no asyega los ojos de los partezanos».
Antes de desharvos vos tengo de kontar lo ke afito a Mélinée, la bivda a kyen Manouchian demandava de kazarse i de tener kriatura. Aviya sido aferrada en el metro el 15 de novyembre 1943, un diya antes de su marido. Teniya en su chanta armas ke Olga Bancic veniya de darle. Kualo ay en tu chanta? le demanda el polis. Armas, responde Mélinée. El polis no mira, i la desha irse, dizyendole ke no es bueno azer shakas kon esto. El diya de despues, vyendo ke su marido no abolto de su randevu, entyende ke a sido aferrado i se fuye de su kaza i va eskonderse ande su amiga, la madre de Charles Aznavour.
Va kontinuar la lucha komo rezistante. Es kondenada a muerte en absensya. Va sovrebivir asta la Liberasyon, ama no va obedeser a su defunto marido, no se va kazar. Va konsagrar el resto de su vida – se muryo en 1989 a la edad de 76 – a la memorya de su marido.
Sovre esto me vo kedar, dizyendovos al djueves ke vyene, si kyere el Dyo!
Edmond Cohen
Paris, Fransya
