eSefarad Noticias del Mundo Sefaradi
Keridos amigos
Por una razon desgrasyada, kijo dizir la vejes, una vez ke eskapi, myerkoles a la noche, de aparejar mi emisyon de oy djueves, me apersivi ke ya la teniya echo 4 anyos antes…i ke me lo teniya enteramente olvidado! En yidish se dize: todo me se izo preto delantre mis ojos…Por esto es ke agora solo, antes de irme a la radyo, vengo de eskapar otra emisyon…travada de la gazeta el Amaneser ke eya misma la teniya travado de un mesaj a LK de 2011 de muestro amigo Robert Cohen, de bendicha memorya, ke firmava Cobert Rohen
Edmond Cohen
Paris – Fransya
——————————————————————————————
DISKORSIKO DE UN INYETO
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.
http://www.radioj.fr/node/55
En kuanto a los atelyes de konversasyon de Vidas Largas, el ultimo de este anyo djudyo se tuvo antiyer martes 26 de junyo, el proksimo sera, si kyere el Dyo, despues de las fyestas.
Tambyen la prezente emisyon va ser la ultima antes de las vakansas. Si kyere el Dyo, la proksima sera el djueves 6 de septyembre, si tengo la salud i las ideas klaras… empesando el tredjen anyo de emisyones, ke empesi en septyembre de 2005. Era un manseviko de 68, agora so un vyejiziko de 81.
Esto dicho, nu tuve, la semana pasada, el tyempo de kontarvos ke, en el atelye del 19 de junyo, tuvimos la vijita de Evelyne Lagardet. Lagardet es el nombre de rezistansya de su padre lehli, i su madre era de los muestros, eya mismo ija de un adovador de tapetes venido de Turkiya en Fransya. Evelyne lo konto ay unos kuantos anyos en un muy ermozo livro intitolado Un rêve français (un suenyo franses), i agora paryo un otro livro, intitolado La maison Rozembaum (la kaza Rozembaum) del kual mos avlo en este atelye. Tengo la entisyon de azer kon eya mi emisyon del 20 de septyembre proksimo (el diya despues de Kipur). Sera en franses, porke no save avlar muestra lingua, ke oiya de sus papu i vava de parte de su madre, ma ke no entendiya.
Otro anunsyo ke vos tengo de azer, es sovre la muerte, el 7 de este mez de junyo, de una sovrebivyente de la shoa ke se yamava Gena Turgel, nasida Goldfinger el 1mo de fevrero 1923; teniya, kon solo tres diyas mas chika, la misma edad ke muestro Haïm-Vidal Sephiha, ke no mos manke.
Era la mas chika de mueve kriaturas nasidas en Cracovia en Polonya, en una famiya ke teniya un echo de teshidos. Kuando vyenen los Almanes en 1939, pishin les toman i el echo i la kaza. Gena se topa en el ghetto de Cracovia, i de aya, en 1942, es yevada en el kampo de lavoro de Plaszow, serka de Cracovia, kon su madre i dos de sus ermanas, Miriam i Hela. Miriam, a los 17, es matada por tener aprovado de traer komida en el kampo. Al invyerno 1944, su madre, su ermana Hela i eya son yevadas en Auschwitz-Birkenau. Hela es tomada para eksperyensas sözde sientifikas (komo benzina en la sangre) i se muere eya tambyen.
En janvier 1945, en mismo tyempo ke Vidal i otros, empesa, kon su madre, la marcha de la muerte, ke va turar 4 semanas asta ke se tope en marso en Bergen Belsen, ande va azer la konosensya de Anna Frank, ke a 15 anyos se esta muryendo del tifus. Eya ke tyene 22 anyos va aprovar de ayudarla a sovrebivir, malorozamente sin reushir, komo ya se save.
Son los inglezes ke van a liberar el kampo de Bergen Belsen en avril 1945. Entre eyos un djudyo, Norman Turgel, ke va aferrar al kapo del kampo, Josef Kramer, dizyendole: «so djudyo», para ke lo sepa. Kramer sera djuzgado i enforkado en este mismo anyo 1945.
En kuanto a Norman Turgel, se va espozar kon Gena Goldfinger, i kazarse kon eya sesh mezes despues, dainda en Almanya. El fostan blanko de kazamyento de Gena va ser kuzido kon el teshido de un parashut.
Va tener tres kriaturas i despues un alay de inyetos i bizinyetos. Astal kavo va dar su testimonyo en las eskolas i otros lugares, en nombre, komo disho, de sesh milyones de otros ke no pueden mas kontar.
Agora me vo kedar sovre la istorya de esta mujer para ayegar a lo ke vos keriya kontar para mi emisyon de oy.
Oy vos keriya avlar de un movimyento djudyo, el karaismo. Ya vos teniya avlado de los karaitos en una emisyon ke ize el 27 de desyembre 2007, kijo dizir djusto ay diez anyos i medyo, kon un solo diya de diferensya. Ma en estos dyez anyos i medyo syertas kozas se trokaron, sovre todo la importansya numerika de los karaitos, ke iva amenguandose anyo despues de anyo, i ke agora, a la kontra, va kresyendo. Lavorando sovre Wikipedia, vos aviya dicho, en 2007, ke en 2005 los karaitos eran, en el mundo entero, unos 30.000, i en Israel, entre 20.000 i 25.000. Agora, asigun Wikipedia, los karaitos son unos 40.000 en el mundo, inkluyendo unos 35.000 en Israel. Asigun yene Wikipedia, «el movimyento karaito es agora en grande renasimyento kon un numero mas i mas grande de djudyos». I Wikipedia adjunta ke no es por aliya, sino grasyas a munchos nasimyentos, si el numero de karaitos va kresyendo.
Por esto me pensi ke seriya bueno de vos abolte un poko a estos djudyos ke son diferentes a la vez de los ortodoksos i de los liberales. En vedra unos kuantos, los de Evropa del este, ke son oy muy pokos, son mismo diferentes de los djudyos en jeneral.
Ama una vez ke, ayer tadre, eskapi de aparejar mi emisiyon, me apersivi ke no solo la aviya echa en 2007, komo vos dishe, ma ensima, la aviya echo de muevo en 2014, i esto, vejes, vejes, me lo teniya enteramente olvidado! Azerla una tresera vez me paresyo demaziya, afillu si mi mujer me disho ke si yo mismo me la teniya olvidado, vozotros la deviash tener olvidado tambyen, keridos oyentes.
Ama yene no la vo azer. Solo vos vo dizir dos byervos, no de los karaitos, ama de los Saduseanos, el movimyento djudyo ke egzistiya del tyempo de los hashmonaim, frente a los farizyanos, i ke es un poko el antepasado del karaismo, ke vendra solo 700 anyos mas despues. Este movimyento, kompozado sovre todo de mis avuelos los Cohanim, ama tambyen de Leviyim, mos es konosido en syerta parte grasyas a Flavius Josephe, afillu si es muy evidente ke por su parte, mismo syendo el mismo Cohen, su preferensya va verso los Esenyanos, otro movimyento ke puedriya ser el de los ke eskrivyeron los manuskritos de la Mar Muerta.
Asigun Flavius Josephe, ande los Saduseanos, «las almas son ni kastikadas ni premyadas en un otro mundo.»
Una chika remarka: Flavius Josephe eskrivyo sus livros en grego; el teksto de Flavius Josephe ke yo konosko es su traduksyon al franses por Arnauld d’Andilly, en el siglo 17. Yo meldi «dans un autre monde» (en un otro mundo). Edmond Fleg, en su Antolojiya Djudiya, toma sin trokarla la traduksyon de Arnauld d’Andilly, salvo ke en vez de meldar «dans un autre monde» (en un otro mundo) melda «dans l’autre monde» (en el otro mundo). Maksus? o por yerro? No sé, i komo no konosko el grego i de toda manera no tengo el orijinal, no puedo saver lo ke eskrivyo Josephe en el orijinal grego.
Lo ke es siguro, es ke un otro mundo o el otro mundo, troka todo. Si se melda el otro mundo komo lo aze Fleg, esto kyere dizir ke el otro mundo egziste i ke las almas se van aya, dunke ay una vida despues de la muerte, salvo ke no ay aya premyo o kastigo.
A la kontra, si se melda un otro mundo, komo yo lo tengo en mi traduksyon de Arnauld d’Andilly, esto puede dizir ke no ay otro mundo, ni almas indosen aya para ser premyadas o kastigadas. Si no ay otro mundo para arresivir a las almas, kijo dizir ke no ay vida despues de la muerte.
La vida eternal o no asigun un o el… El uerko esta en los detalyos, diziya Nietzsche…
Kon esta remarka ke no aviya echo en 2014, desho los saduseanos i vos vo azer agora una meldadura travada del Amaneser.
Es, si entendi byen, la traduksyon al djudeo-espanyol del diskorso ke izo en franses, en marso 2011, uno de los myembros de Ladinokomunita, Robert Cohen, de bendicha memorya, kuando izo dar la medaya de los Djustos a la famiya del ombre i de la mujer ke, un tyempo, eskondyeron a su nono fuyendo la Gestapo. Robert Cohen traslado su diskorso i lo embiyo a Ladinokomunita. Fue despues puvlikado en el Amaneser de avril 2011.
Robert Cohen, nasido en 1936, se muryo en 2016. Bivyo en el sur de Fransya, ande nasyo (Marsilya, Toulon, Nice) Fue un eskrivano de livros de gerra, ke eskrivyo kon la alkunya Chabanac. Se interesava a los avyones de la sigunda gerra mundyal, i tambyen de las gerras de Israel. No lo konosiya yo personalmente, ma mos eskriviyamos de vez en kuanto, grasyas a Ladinokomunita.
I agora vos meldo lo ke Robert yamo el diskorsiko de un inyeto, ke izo en Roquefort les Pins (una sivdadika serka de Nice), el 6 de marso 2011:
DISKORSIKO DE UN INYETO
Despues de los grandes arrevantamyentos ke avian kastigado la povlasion judia de Marsilia, nuestra famiya estava esparzimyentada, kada uno se eskondiya onde puediya. Mi nono Ephraïm, deshando su grande kaza demaziado konosida, se fue a eskonderse en Laragne, una chika sivda en las Alpes Altas. Teniya aya un ermano, el tio Izak, kon la tia Ester, i los ijos mansevos, Benoit i Leon, ke se avian adjuntado a los partijanos del Maquis.
Mi nono morava en Laragne, en un chiko apartamento. La Gestapo lo vino a bushkar, el, i solo el, seguramente por denunsyasyon. Aferrado la manyana, a la abashada de la kama, pregunto ke lo deshen vestirse . Lo desharon solo en la kamareta. Pishin vestido, mi nono avrio la ventana, i salto del primer plano/kat. Teniya sesenta anyos, i pesava 95 kilos!
Kayo en la guerta del vizino, i kedo embasho, sin puederse alevantar. Es el vizino, Sr Albert Bonnet, ke lo alevanto, lo arekojo i lo eskondyo en su mahsen. Los guerkos de la Gestapo no bushkaron ande los kristyanos, i se fueron.
`
El sinyor Bonnet, ayudado por su mujer Marie-Louise, melezinaron mi nono, i despues lo eskondieron, mas alto en la montanya, en una kazika. En este tiempo, el kristiano ke ayudava a los jidios puediya ser egzilado kon el. Mi nono tenia miedo de aferrarse, komprometiendo sus salvadores.
Mi padre le izo saver ke puedia venir a eskonderse onde estavamos, serka de la sivdad de Aix (en Provence). El nono vino, kon la nona, i la tiya Suzanne, ke tenia 16 anyos. Moraron en una kazika, dependiende del vinias «Chateau Simone», en la karetera de Mereuil. Mozotros moravamos en la mizma karetera, en la kaza «la madonna blanka», onde mos aviya eskondido el Sr François Casanova, bendicha sea su memoria.
Estavamos aya, en este ermozo mes de agosto 1944 de la liberasion. Mi nono, despues de su salto, kaminava solo kon una kanya/baston. Ke se vea bien ke no puediya ser empiegado a duros lavoros. No teniya menester de kanya/baston, mi madre, riyendo, deziya ke keriya ke los polis de la Gestapo se adjideyen de el si lo topavan otra vez. Fina la fin, kedimos sovre el mito de los «kampos de lavoro en Polonya». Es solo despues de la liberasion ke supimos a ke aviamos eskapado.
Este 19 de agosto, vimos, en la grande karetera Nationale 7, el largo konvolio «kaki» kon las estreyas blankas. Korrimos todos para saludar a muestros liberadores. Yo teniya ocho anyos, i korriya presto! Estuve el primer… kon mi nono, tanto godro i viejo ke estava! En koriendo, echo su kanya/baston en el kampo, no teniya mas menester ke se adjidearan de el.
Los liberadores estavan serka, mos miravan korrer. Eran los solos Amerikanos ke yo aviya visto fina akel dia, los teniya visto solo en el sinema. Los ombres en «kaki» ke saludimos i bezimos no eran ni Gary Cooper ni Errol Flynn, ma eran para mozotros los mas ermozos ombres del mundo. Mi nono les disho «Bonjour Monsieur» antes de bezarlos.
Es la primera vez en mi vida ke vide yorar mi nono.
Ansina se eskapa este teksto del muy regretado Robert Cohen, i agora entendesh puede ser mijor deke lo eskoji para meldarvolo: su istorya no es la miya, ay diferensyas, mozotros no fuimos liberados por los Amerikanos, ma por los partezanos fransezes – en tres vezes kon sira… Ama mozotros tambyen eramos eskondidos por kristyanos, muestra famiya tambyen era «esparzimyentada», komo dize Robert, yo tambyen teniya ocho anyos, i yo tambyen, el solo kon mi prima Maryse i dos otros primos ke kedemos de esta epoka, me akodro de agosto 1944 komo uno de los mijores rekodros de mi vida.
Mozotros tampoko no eramos al koryente ke los kampos sözde de lavoro eran en vedra de matansa, pishin o a poko a poko. Si mozotros no lo saviyamos, es klaro ke los kristyanos ke mos salvivan no lo saviyan tampoko. I tengo la buendad de pensar ke si los denunsyadores saviyan ke embiyavan a la muerte la djente denunsyada, puede ser no uvyeran denunsyado. I de otra parte, uvyera sido mas salvadores, savyendo el haliz peligro.
Por esto es ke so muy arravyado kontra los kapos alyados ke, eyos, saviyan todo, i, por una razon ke nunka entendi, no lo disheron nunka a la radyo. Este haber nunka lo dyeron.
Komo vos dishe, los inyetos del senyor i de la senyora Bonnet ke eskondyeron ande eyos el nono de Robert Cohen, resivyeron en memorya de eyos la medaya de los Djustos. Kuanto meresida! El nono se aviya fuido por una ventana ke dava en la uerta de los Bonnet. Es un nes inkreivle ke los de la Gestapo no se fueron a bushkar ande eyos, ande lo uvyeran topado pishin. Los Bonnet tomaron un muy muy grande riziko, bendicha sea sus memorya.
Al lado del teksto de Robert Cohen, ay en esta gazeta El Amaneser de avril 2011 el teksto de un otro mesaj embiyado a Ladinokomunita, esta vez por Rosy Hemmo. No tengo agora tyempo de meldarlo, ma lo toparesh kon el de Robert Cohen indovos sovre el sityo de la Gazeta El Amaneser en el blog de sephardic center:
Rosy, ke era kombidada, mos konta komo se paso esta seremoniya de la medaya i mos dize: «La emosyon fue grande (…) de sintir (…) el diskorso de muestro Robert ke no ayego ni mismo a eskaparlo, porke le vinieron las lagrimas a sus ojos akodrandose de su nono kerido Efraim!»
Sovre esto vos desho dizyendovos: buenas vakansas ke tengash, i al 6 de septyembre si kyere el Dyo!
Edmond Cohen
Paris, Fransya
