eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
13 El viyaje en Rusiya
Estamos, kale akodrarlo, en medyo de la gerra de 14-18, la Turkiya syendo alyada de los Almanes kontra los Franezes, los Anglezes i los Rusos. Ama na ke la revolusyon patladea en Rusiya en 1917, eskapando por la paz separada firmada por Lenin en Brest-Litovsk. Es el momento ke Willy djuzga interesante para ir a azer komersyo en Rusiya, sozde en paz, a lo manko kon la Turkiya. Fia la botika, i sus dos ijas, a su madre, i se va. Una vez en Rusiya, se topa tomado en la tormenta de la gerra sivil ke no teniya previsto, i su viyaje de komersyo torna presto al suenyo negro. Su ropa es konfiskada, toda otorizasyon de aboltar en Turkiya le es refuzada, i se topa retenido en Rusiya por un tyempo indeterminado.
La situasyon de la Rusiya en esta tormenta es de espantar. El eskapa por kaer hazino del tifus, i, a lo ke me konto, lo tomaron por muerto i su puerpo fue echado mesklado kon los otros. I yene…se sale bivo, komo, nunka lo savré, ma syempre blokado sin posibilitad de aboltar a kaza.
Al kavo dechida de fuir de Rusiya por las montanyas, kon el ayudo de salvajes montanyeros, los Lazes, ke le sirven de pasadores, i para esto le toman todo lo ke le keda de paras para pagar sus servisyos. Una vez enfin en Turkiya, se apresura de embiyar a su famiya un telegram anunsyando su ritorno : este telegram nunka yegara a destinasyon. El ayega dunke en kaza en Estambol, i topa una kriaturika, Bertha, ke no rekonose a su padre porke era demaziya chika kuando se fue, i ke le dize « Buenos diyas, Senyor… » Su absensya avra turado serka de tres anyos.
A kontinuar…
Edmond Cohen
Paris, Fransya
Fuente: LK/eSefarad
