El Kanton de Edmond: PASTOR ANDE LOS DJUSTOS Kapitolo 15. Mina i los Garih por Edmond Cohen

Ver todos los artikolos de esta seksion

Saludes a todos
Edmond Cohen
Paris – Fransya

______________________________________________________________

15. Mina i los Garih

Es ke el Rodolphe sefardi ke Mina toma komo marido no es otro ke el sovrino de Sultana Cohen, ke sera mas tadre mi vava, ma ke por agora es muy leshos de esto todo i bive en Paris, ande, komo lo vimos, emigro en 1922. Ama aboltaremos un poko atras, en 1895, antes del kazamyento de Sultana. Eya teniya, en mas de tres ermanos, tres ermanas mas mansevas de eya, Rachel, Marie i Ventura Hayon. Rachel era una magnifika morena kon ojos de un blu de porselana. Halbuki, aviya en la eskola de la Alyansa Israelita Universala de Estambol, en estos anyos, un mansevo institutor vinyendo de Bagdad, ke se yamava Jacques Garih. Se aviya visto demandar de dar lisyones partikolares de fransez a una de las ermanas Hayon, Sultana puede ser. I kuando veniya en kaza, era la ermoza Rachel ke le avriya la puerta. Un amor les vino entre los dos, i el demando de kazarla. Ma se topo frente a un refuzo kategoriko de Bohor Hayon, padre de Rachel, al motivo ke dinguna de las ijas Hayon seriya de kazar antes de su ermana bohora Sultana ( kon una kara manko presyoza). Indimas, el povre Jacques se topava aharvado por un handikap : le mankava el uzo de un braso, puede ser despues de un aksidente. La situasyon era sin solusyon…i se eskapo por un arrevatamyento, i el kazamyento de Jacques i de Rachel se paso en 1895, afuera de los paryentes de la kazada, i sin sus otorizasyon, lo ke para esta epoka era totalmente revolusyonaryo… Ama kuantas asemejansas kon la istorya biblika de los amores de Yakov i de Rachel (es ke es menester de prechizar ke el nombre djudyo de Jacques Garih, su haliz nombre, era Yakov ?) amores kontraryados por el fakto ke el padre de Rachel keriya kazar en primero la bohora, ke teniya una aparensya menos presyoza… Aki se eskapan las asemejansas, eskrivi en mi livro en franses. Me olvidi otra asemejansa : un pretendyente era sakat, el otro kosho! Es vedra ke kuando Yakov se topo kosho, despues de su lucha kon un andjel, ya era kazado, ma yene no kale olvidar ke desde su nasimyento su nombre de Yakov era nombre de karkanyal, komo si desde su nasimyento era eskrito ke un diya kosheariya (esto es miyo, no lo topi en los komentaryos, ma puede ser no bushki bastante…) Esto dicho, kon esto se kedan las asemejansas, syendo ke en la istorya biblika, Yakov eskapa por kazarse kon las dos ermanas (sin tenerlo kerido en vedra, zaten !)

De esta unyon van a salir un ijo, Rodolphe, i kuatro ijas. Malorozamente, dos lutos terrivles van a aharvar esta famiya : Gentille, la ija bohora, va morir en 1914, a la edad de 18 anyos, despues es su padre Jacques Garih ke va morir en 1916, a 46 anyos, echado a basho por un tramvay.

(I antisipo aki para anunsyar ke Flor, la ija la mas chika, va morir en 1942, a 30 anyos, asasinada kon su marido en deportasyon). Rodolphe tyene solo 15 anyos a la muerte de su padre, i es agora el solo ombre de la famiya ; temerozo privilejyo ke tener a esta edad una madre bivda i tres ermanas, la mas chika, Flor, tenyendo solo 4 anyos. Lo va reushir, i en 1926 tyene 25 anyos kuando se kaza kon Mina Braun.

Al enverano 1929, Rodolphe dechida de emigrar en Fransya. Se va solo, para avrir el kamino, i topa de morar Boulevard Voltaire (syempre el onzen arrondissement, syempre serka de la « chika Turkiya ») i de lavorar ande uno de sus tiyos, dyamantero (komo mi papu Nissim). Puede, estonses, demandar a Mina, su mujerika, de venir a el, lo ke aze en 1930, el anyo de despues. Despues de esto va azer venir a toda la famiya Garih, agora Garé, kijo dizir su madre Rachel, i sus tres ermanas. Mina entra komo vendedera en las Galeries Lafayette, kon un salaryo majorado de primas de lingua, syendo ke, en mas del fransez, eya pretende konoser el alman, el ingles, el espanyol, el turko i el grego. Por lo ke es del espanyol i del turko, su savidurya es inkompleta i aproksimativa, ma yene reushe a komunikar en estas linguas kon los mushteris ; dunke no arrova sus primas. Indimas, komo resive komisyones sovre las venditas, i ke le embiyan lo mas de los mushteris ajenos, tyene un salaryo interesante.

Por lo tanto, no konta a kada uno ke es turka. I se topa muy sorprendida de oyerse dizir por una kompanyera de lavoro, « Ah, no agas tu kavesa de turka ! » Komo lo supo ? se demanda Mina, no savyendo ke es una manera franseza de dizir kavesa budak…

A kontinuar…

Edmond Cohen
Paris, Fransya

Fuente: LK/eSefarad