eSefarad Noticias del Mundo Sefaradi
Keridos amigos, aki toparesh el teksto de mi emision del djueves 25 de avril, ande vo avlar del Bund.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
OTROS DJUDYOS PARTIKOLARES (JAPONEZES, LEMBA, DANITOS)
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 7 de mayo, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
El Alhad pasado, a la demanyana, mirando la emisyon djudiya a la televizyon, tuve la grande sorpreza de ver una emisyon de tres kuartos de ora konsagrada a un trivo de sivdadanos pretos de Côte d’Ivoire, los mas kristyanos, ama tambyen unos kuantos animistos i muzulmanos, ke son unos tres milyones i biven al nordoeste del pais, en medyo de los muzulmanos de la parte del prezidente Ouatara. Deke esta emisyon ? porke se yaman los Danitos, i dizen desender del trivo de Dan.
Los ke entyenden el franses pueden dainda ver esta emisyon asta shabath indose sovre internet sovre Google kon los byervos France 2 replay chemins foi source vie, i ansina van a pueder topar la video de la emisyon, ke se yama La tribu de Dan (1ère partie).
Yo ya vos aviya dado una emisyon el 4 de septyembre 2008 intitolada Los djudyos partikolares, i al kavo de los vente minutos vos aviya dicho ke no teniya eskapado sovre todos, i ke si keriya el Dyo, vos dariya otra emisyon sovre otros djudyos.
Me parese ke ya vino este tyempo, porke en la misma semana, vide esta emisyon, i arresivi un teksto sovre los japonezes ke me parese mereser ke avle de muevo de estos afillu si ya aviya avlado de eyos en mi presedente emisyon.
Agora, para aboltar a los Danitos de la Côte d’Ivoire, es un pastor, ke se yama Robert Dion, ke desde vente anyos se interesa a las orijenes de su trivo, ke se topa en un lugar yamado las 18 montanyas, ke asemeja un poko a la Suisa i por esto es diferente de los otros lugares de Afrika. Este pastor eskrivyo (en franses) dos livros para azer konoser lo ke asigun el amostra las orijenes israelitas de su trivo, ama mismo si pudo ver el embashador de Israel, la djente en jeneral no se intereso a lo ke el sosteniya.
I un diya, en 2010, el govyerno de Côte d’Ivoire fraguo en Abidjan un muzeo de las sivilizasyones del pais, i un haham se hue a vijitarlo, i aya aviya una parte konsagrada a la etniya de los Danitas. I este djudyo fue muy enkantado de ver el vestido sagrado de los papazes danitas, syendo ke este vestido, ke se puede ver en la emisyon ke vos dishe, asemeja muncho a un taleth. Esto le travo la atensyon, se metyo a estudyar los livros del pastor Dion, i vyendo ke aviya de mirar esto todo de mas serka, avlo de esto a los hahamim de Israel ke se okupan de los djudyos partikolares, i eskaparon por embiyar aya una delegasyon de dos hahamim avlando franses, i un sineasto ke ya aviya echo un dokumentaryo sovre los djudyos del Mizoram, entre Indya i Birmanya, ke dizen desender del trivo de Menashe. Ya vos avli de estos en mi vyeja emisyon de 2008. I djustamente es la primera parte del filmo echo por este sineasto ke vide alhad. Kuando los hahamim israelyanos ayegaron en Côte d’Ivoire, dainda no aviya la paz, porke el Prezidente era Gbagbo, kontestado por Ouatara i sus partezanes . No fue kolay de viajar.
Esto dicho, los hahamim israelyanos feron enkantados i tresalidos de ver el entuziasmo de la djente ke les demandavan sus bendisyones. «Kuando kamino en Yerushalaïm, dinguno me demanda de bendizirlo, ama aki si ! » I el haham les aziya la beraha de los kohanim… Los hahamim fueron arresividos kon muncha konsiderasyon por los kapos de la etniya, i admetidos de entrar en sus salas de palavra, kon la kondisyon de vestir el vestido asemejante a un taleth, lo ke izyeron.
Tyenen munchos uzos ke dizen venir de sus orijenes israelitas : la sirkonsizyon, i tambyen una koza kuryoza, kale ver komo tokan el shofar, i otras kozas. Komo va aver mas despues una sigunda parte de la emisyon ke dainda no vide, me vo kedar aki por la ora, i puede ser vos avlaré de muevo de estos Danitos ke se yaman tambyen Yakuba, ke se asemeja al nombre de Yaakov avinu.
Ama, a propozito de los djudyos de Afrika ke se dizen desender de los diez trivos pedridos, o solo de uno de eyos, kale ke vos avle de los Lemba, ke moran en Afrika al sur, a la frontera entre el Zimbabwe in Sudafrika.
Esta etniya de unos 70.000 Pretos se yama Lemba. I eyos tambyen, ke ofisyalmente son kristyanos o muzulmanos, se dizen israelitos. Komo se puede ser ? Dizen ke una parte de los israelitos ke se fuyéron a la kaida del reyno de Israel se fueron verso el sur, i eskapaon por ayegar, en primero en el Yemen, i despues ande estan agora.
Es vedra ke los Lemba tyenen munchos uzos ke se aserkan de los uzos djudyos :
- Observansya del Shabath
- Kreensya en un dyo uniko, yamado Nwali, ke los a eskojido
- Onor a padre i madre
- Mila, ama asigun la tradisyon afrikana i a la edad de diez anyos
- No komen puerko ni animales proibidos por el Tanah, i no mesklan karne i leche. Los animales son matados por un shohet profesyonal.
- El kalendaryo sige la luna
- Meten Magen David sovre las tombas.
- Se kazan solo entre eyos.
Es siguro ke esto todo aze pensar a los uzos de los djudyos ; indimas, entre eyos ay una kongregasyon de unos 4.000 en la sivdad de Rusape, ke se konsideran komo halizes djudyos, afillu si pensan ke Jesus, sin ser el Mashiah, yene era un profeta.
Los Lemba, malgrado lo ke vengo de dizir, no son konsiderados komo halizes djudyos por los hahamim. Syendo ke yo no so haham, no tengo kompetensya para dizir si tyenen razon o no.
Ama por lo ke es de perteneser por la sangre al puevlo djudyo, los lemba tyenen un argumento muy fuerte : es el ADN. Munchos lemba tyenen en la sangre lo ke se yama el aplotipo de los Cohanim. No kale demandarme lo ke es un aplotipo, syendo ke, en mas de no ser haham, no so tampoko savyo en biolojiya. Ama asigun lo ke meldi, estos lemba tyenen el mismo tipo de sangre ke los djudyos Cohen, ke son konsiderados los mas puros desendyentes de los antiguos djudyos, syendo las leyes sovre los kazamyentos del Cohen, ke, entre otras interdiksyones, no puede kazarse kon una konvertida. A la rovez, i por otras razones, un Cohen se kazava munchas vezes kon una Cohen. I si me demandash kualos son estas otras razones, kreo ke ya lo sé : una ija Cohen no topava de kazarse kon un otro ke un Cohen, porke un otro ke Cohen le deviya onor vida entera por modo ke era Cohen, i esto, un orgulyozo no lo soportava. I yo me akodro ke mi vava era muy kontenta de aver tenido tres ijos i no ija, porke era un grande dert para un Cohen de topar de kazar a su ija. Kaliya topar un Cohen.
Agora desharemos aki los lemba i aboltaremos a los japonezes . Los japonezes ? Si, los japonezes . Aki vos vo meldar lo ke yo ya aviya dicho en mi emisyon de septyembre 2008:
Komo ! I los japonezes son israelitos ? A esta kestyon no vos dare una repuesta sigura, ama…el haham Avihail mos konta kozas kuryozas…
Asigun el livro del haham Avihail, en los templos shinto, ay imajenes ke amostran el viaje del emperador Jomei-Tenno en 660, kavalkando sovre una mula, kon su puevlo i munchos animales, i entre eyos gameyos, ke no se topan en el Japon.
Yo miri en internet ke el emperador Jomei-Tenno se muryo en 641, puede ser ay un yerro sovre el anyo 660, ama komo no konosko la istorya del Japon, me vo kedar sin bushkar de maziya . Dize ke estas imajenes los amostran tambyen sovre naves kon armas (eskudos, arkos, filechas,ets) ke se ven en jeneral sovre imajenes asiryanas.
Los templos shinto tyenen una partikularidad ke se topa solo en el templo de Yerushalaïm : son divididos en tres partes : la primera para todos, le sigunda para los Cohanim, i la tresera para el Cohen gadol. El templo tyene una arka santa yamada tambyen palasyo del livro, afillu ke no ay dingun livro. Esta arka tyene palos para transportarla, komo era para el mishkan, la arka santa de los djudyos.
Se dize mismo ke egzisten 50 kantos japonezes ke los japonezes no entyenden porke son en lashon. I asigun el profesor Eidelberg, ay 3.000 byervos japonezes ke se asemejan al ebreo.
A los ijos del emperador de Japon se aze mila en su ochen diya.
En el kinzen diya del primer mes, los Hadas, un puevlo japonez, fraguan una suka i se asentan aya. Salen tambyen en las kayes kon varyas yervas.
Ay tambyen munchas kostumbres del luto i de la muerte ke se asemejan kon las muestras.
Por esto todo ay japonezes ke se aunyeron en una asosyasyon de los diez trivos, ansina yamada por eyos mismos. No son djudyos, ama se an aserkado de los djudyos para Jesus…Diremos ke ya es un primer paso, ama kale ke agan mas para aboltar a mozotros…
Ansina yo diziya en 2008.
Agora resivi de mi amigo José Molho un artikolo sovre las asemejansas entre los ritos relijyozos de los japonezes i de los djudyos ke vyene enforteser lo ke vos aviya dicho. Por egzemplo meldi ke Simon Wiesenthal mos konta en su livro La voile de l’espoir la istorya de un asker amerikano ke se topa en 1945 en el Japon okupado. Esta vijitantando un templo shintoisto, i se aserka de un grande espejo enkuadrado kon madera presioza. Abolta alderedor de este espejo i va mirarlo por atras, i topa los restos de un desen ke le parese muy antiguo. Frega la madera para ver mijor, i kon sorpreza deskovre ke son 4 ombres yevando la arka de aliansa.
Agora vos vo meldar tambyen, trasladado por mi del franses, otra koza tal ke la meldi en este artikolo :
En la prefektura de Nagano, en el Japon, ay un sanktuaryo shinto de grande reputasyon, el Suwa-Taisha (el shintoismo es la relijyon tradisyonala propya al Japon). En el Suwa-Taisha, el festival tradisyonal yamado Ontohsai se da el 15 de avril de kada anyo. Este festival konta la istorya de Itshak en el kapitulo 22 de Bereshit en el Tanah, kuando Avraham suvyo para sakrifikar su ijo Itshak. El festival Ontohsai se dyo desde la Antiguedadi fue konsiderado komo el mas importante festival de Suwa-Taisha.
Al lado del altar Suwa-Taisha, ay una montanya yamada Monte Moriya (Moriya-san en japones). Durante le seremoniya, un manseviko es yevado sovre esta montanya i es atado a un palo de madera, i metido sovre una tavla de kanya. Un papas shintoisto se prezenta en este momento kon un largo kuchiyo. Kuando el papas aze hadra ke va degoyar al manseviko, un otro papas vyene i lo impide. La djente yama esta fyesta el fesytival para Misakuchi-Dyo. Misakuchi podriya ser mi – isaku – chi. Mi kyere dizir grande, Isaku deve de ser Itshak i chi es un sovre de kavo de byervo. Parese ke la djente de Suwa izo de Itshak un Dyo, deve de ser kon la influensa de adoradores de imajenes.
Agora este uzo del manseviko serka de ser sakrifikado i despues liberado, no es mas praktikado desde unos dos siglos.
Israel i el Japon son los solos paizes en el mundo ande se mete un chiko kuti (los tefillin para los djudyos) sovre la frente.
Ay tambyen el Yamabushi ke se sirve de una kashka komo de un shofar. I la manera komo se chufla , el sonido, se asemejan al sonido del shofar. Komo no ay kodreros en el Japon, el yamabushi tuvo ke tomar una kashka en vez de kuerno de barvez.
Ay tambyen ande los japonezes el omikoshi ke los japonezes yevan sovre sus ombros kon palos, komo aziyan los israelitos kon el mishkan, la arka de alyansa. Eyos kantavan bailavan en frente del arka, i los japonezes kantan i bailan en frente del omikoshi.
Los fostanes de los papazim japonezes se asemejan al vestido de los cohanim de Israel. A basho del fostan del papas japones ay largas frangas de unos 20 sentimetros a kada kyenar del fostan. Komo los tsitsit de los djudyos.
Menear una gaviya para la mueva rekolta es tambyen un uzo en el Japon, komo lo es ande los djudyos, durante el omer.
I, komo lo dishe en 2008, la fragua del templo shinto es la misma, en tres partes, ke la del templo de Yerushalayim. La puerta del templo djudyo se yamava, en arameo, taraa. La puerta del templo shinto se yama torii.
Kuando el japones entra en el templo, deve tanyer una kampanika de oro al sentro de la entrada. Tambyen ande los Ebreos, el Cohen yevava cascaveles (kampanikas) de oro para ke se oiga kuando entravava en la Santidad (Shemot, kapitulo 28, pesukim 33 a 35).
Ay tambyen el uzo de la sal para sanktifikar el altar (i la meza del kidush) ande los djudyos, i el uzo de la sal ande los japonezes, lo ke vemos komo azen los sumos ke echan sal antes de luchar.
Kualo se puede travar de esto todo ? Yo no se…ama kuryozo ya es !
Vos desho sovre esta kuryozidad, i vos digo al djueves ke vyene, si kyere el Dyo !
Edmond Cohen
