Muestra lingua: MEAM LOEZ CAIN I HEVEL por Edmond Cohen

Keridos amigos,
Mi emisyon de djueves va ser sovre la matansa de Hevel por su ermano Cain, vista por el Meam Loez.

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

MEAM LOEZ CAIN I HEVEL

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke el proksimo atelye de konversasyon de Vidas Largas se tendra el lunes 18 de mayo, de las  tres a las sinko, en el Centre Communautaire.

Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

Oy me pensi de meldar lo ke mos konta el Meam Loez de Yaakov Huli sovre la matansa de Hevel por su ermana Cain.

Vos akodro ke asigun lo ke mos konta la Tora en el kapitulo 4 de Bereshit, kuando Adam i Hava su mujer fueron arondjados del Gan Eden, tuvyeron tos ijos, en primero Cain el bohor, i despues Abel. Cain era agrikultor i Abel pastor.

Malorozamente, ya savesh lo ke se paso despues. Cain, selozo de ver ke el Dyo keriya mas a Hevel, mato a su ermano.

Agora vamos a ver lo ke mos dize el Meam Loez sovre esto todo:

Dia de 14 del mes de Nisan les disho Adam Arishon (el primer ombre) a sus ijos: Savresh ke son aparejados Israel de ayegar korban en este diya, ke se yama korban Pesah (si pensash, keridos oyentes, ke esto es un anakronismo, tenesh vente vezes razon. Ama los hahamim tyenen una idea del tyempo ke no es la muestra. Asigun eyos, los djustos de la Tora tyenen un dono de profesiya ke aze ke ya son djudyos i kumplidos en la Tora antes ke naskan ni Avraham avinu ni indimas Moshe Rabenu. Syerro la paranteza). I siendo ansi, veresh kada uno de vozotros de traer korban (sakrifisyo) delantre del Shem Itbarah.

I ay kien dize ke esto era en Rosh hashana. I ay kien dize en diya de 50 a la kryansa del mundo, ke el ke dize ke se kreo en Nisan era esto en diya de Shavuot. I kien dize ke se kreo en Tishri, era esto en 15 de Marheshvan, ke ya avizi en kapitulo 8 ke en 25 del mes de Elul se empeso a kriar el mundo. I ay kyen dize ke esto fue despues de 190 diyas a la kryansa del mundo, ke si diremos ke se kreo el mundo en Tishri,  era esto en dyes de Nisan; i el ke dize ke se kreo en Nisan, era esto en diez del mes de Tishri, ke es diya de Kipur.

Dito Cain el prezente ke trusho fue simiente de lino; i Evel trusho de las primeras ovejas i las mas godras, ke ainda no se aviya traskilada (arapado) su lana. I todos los dos ayegaron su korban en el propyo mizbeah ke lo fraguo Adam Arishon kuando ayego su korban. I syendo el Shem Itbarah buen pagador a kada uno sigun merese, por esto abasho fuego del syelo i se resivyo el korban de Hevel kon veluntad, siendo tuvo virtud de traer de lo mijor ke teniya; lo kual Cain, syendo ke fue eskaso i trusho lo mas peor ke teniya, i ansi no se resivyo su korban.

Ke syerta mente kyen yeva preszente al rey deve de ser de lo mijor ke tyene, i lo propyo es la sedaka de tener kargo de dar moneda sana, i de poko a muncho no ay diferensya, ke syendo buen korason tanto estima el Shem Itbarah la para del medyano kuanto el grosh del riko, sola mente ke sea buena. I es menester dizirlo esto syendo munchas vezes el gabay ke arrodea por el kaal para akojer para tallitot i tefilin, o para aniyim tsenuim (proves diskretos) o  bikur holim (vijita a los hazinos), se topan munchas paras hazinas i kortadas, el kyen tal dyo no basta ke no izo sedaka, sino tambyen tomo de azyenda de kodesh syendo lo ke dyo no vale un as i el tomo dos. I tanto fue aboresido el korban de Cain i agradesido el korban de Hevel, ke asetensyo el Shem Itbarah ke no tengamos orden de mesklar uno kon otro nunka. I esto es el taam (la razon) del kilayim (interdiksyon de la meskla), ke no se puede yevar lino kon lana junta mente, sigun avizaremos en su parasha.

Vyendo Cain ke su korban no se resivyo, se ensendyo komo una braza de fuego i le pezo muncho. Le disho el Shem Itbarah: Deke te aravyas? Savete ke si seras patron de daat i tornaras en teshuva de tu pekado, tente por siguro ke no tendras ningun danyo. I si no adovas tus maasim (aksyones) savete ke tu pekado esta byen guardado para vengarme de ti en diya del djuzgo. Por esto, torna en ti i yo te perdonaré, ke sabras ke el yetser ara (dezeo negro) esta prekurando a entrompesarte, porke su dezeo es de azer pekar i tu, si kyeres ser bueno, en tu mano esta de mayorgarte sovre el.

I le dyo a entender ke el yetser ara a los prinsipyos es muy flako komo la embra, i despues ke le azen su konsejo se mayorga komo el macho. I por esto dize el pasuk: lapetah hatat rovets (a la puerta pecado yazien), ke es avizo de dita avla. Ke savresh ke el yetser ara es korto de kara. Se asemeja a un forastero ke a los prinsipyos se averguensa de avlar o demandar lo ke tyene de menester syendo no konose las manyas de su baal abayit (amo de kaza) , i pasando tyempo ya se aze de kaza i entra i sale i demanda lo ke se le envelunta komo su kaza; ubifrat (indimas) si el baal abayit le amostra muncha kara, syerto ke no le impide ninguna koza. Lo mezmo es el yetser ara, ke a los prinsipyos es muy majo i verguensozo, ke no puede akometer ke syerva avoda zara (kulto pagano) o ke aga avera syendo ke save ke no le pasa la palavra, sino empesa akonsejarlo kon koza livyana, asta ke lo enkampa de modo ke no tenga remedyo; i asigun en el palamar de la nave, ke su prinsipyo es unos ilos delgados i adjuntandose uno kon otro se azen tan gordo, lo mizmo es en mos pekados. Dereh mashal (por egzemplo), si una vez kome sin lavar las manos, asegundando otra vez en eyo ya no lo tyene por pekado de komer sin lavar, i 4 danyos puede kovrar:

1 es ke si se sombalyo de azer algun pekado una vez al mes, akeyo lo traye ke lo venga a azer kada diya i no le parese pekado.

2 es ke aun ke la primera vez tyene verguensa del pekado ke aze, es syendo ke ya save su kulpa i le peza por eyo; i si se alevanta tadre, lo va enkuvriendo de la djente ke no lo sepan ke ainda no disho tefila, pero despues lo aze befarhesiya (en publiko), syendo no le embarasa nada.

3 es ke la primera vez ke peka puede ser beones (por fuersa major) ke lo vensyo el yetser ara, pero despues el de suyo lo va azyendo i no tyene hehreah (menester) el yetser ara de sombayirlo.

4 es ke se le serran los kaminos de la teshuva por dos sibot (razones) ke syendo ya esta uzado en akel pekado, no pensa en azer teshuva syendo ke el no se tyene por pekador; i tambyen ke syendo su kulpa grande de embatakarse ( ensuzyarse: por una vez un byervo turko, batak es mancha) munchas vezes, aun ke despues kyere tornar en teshuva pena muncho asta dezuzarse de su negra manya. Esto fue el dotrino ke le dotrino el Shem Itbarah a Cain.

Agora sentiresh el pleito ke uvo entre los dos ermanos. Onde savresh ke por kuatro sibot (motivos) tuvyeron pleito uno kon otro:

1 es syendo ke Adam arishon entonses no teniya mas ijos i ya tenesh sentido ke se aviya apartado de Hava entendyendo ke ansi deviya de kedar syempre, kon ke la yerusa (erensya) de deve de espartir entre Cain i hevel; Estando tratando en esto, disho Cain: Yo so behor i a mi toka dos partes, i akel lugar ke ayegastes en el tu korban i se resivyo, kiero ke me lo des por parte de la behora. I el restante espartiremos mitad por uno.

Ma no se kontento Hevel de darle dito lugar.

2 es ke kuando espartieron el mundo entre los dos, izieron partido ke ninguno se meskle en la parte del otro, sino kada uno su parte; i dito Cain tomo los karkaot (immovles), i Hevel los mitaltelim (mobilya). Kuando fue Hevel a pasentar sus ovejas, lo grito Cain dizyendo ke no teniya lisensya de azerlo syendo la tyerra suya. I Hevel le respondyo: I tu tambyen no tyenes orden de vestirte, syendo ke todos los mitalelim son miyos.

3 es ke kada uno diziya: En mi tehum (territoryo) se tyene de fraguar la Kaza Santa. Ke ya konosiyan el lugar en el ke se tyene de fraguar  de lo ke oyeron de Adam arishon ke ayego su korban en akel propyo lugar. I syendo lugar tan santo, kada uno keriya tenerlo por suyo, ke pensavan de bivir asta entonses.

4 es ke tenesh sentido arriva kual mente kon Cain nasyo una ermana, i kon Hevel nasyeron dos.  I Cain diziya: A mi me toka, syendo so behor.

Hevel diziya:  Syendo ke kon mi nasyo, miya es.

I ay kyen dize ke disho Cain a Hevel: Vamos a pasear en el kampo. I se fueron juntos. Entonses disho Cain: Esto mirando ke ay maso panim (preferensya, parsyalidad), syendo ke tu korban se resivyo i el miyo no.

Respondyo Hevel dizyendo: Has veshalom. Ke es lo ke tu dizes? Ma syendo yo mijor ke ti i mi korban mas estimado ke el tuyo, por esto se resivyo.

Disho Cain: No ay djusgo i no ay otro mundo, ni los buenos tendran buen pago ni los malos seran apenados.

Hevel le arifto (kontesto) dizyendo ke no saviya lo ke diziya, ke syerta mente el Shem Itbarah tyene kargo de azer byen a los buenos en el otro mundo, i de apenar a los malos sigun meresen.

Esto fue el vikuah (pleito) ke paso entre eyos, i empesaron a pelear. I syendo Hevel mas forsudo, fue bastante a tomarlo a Cain debasho de el. Kompeso (empeso) Cain a rogarle dizyendo : Apiyadate de mi, ke al kavo kavo tu ermano so. I mas ke si me matas, ke repuesta daras al Senyor, ke syendo no ay mas jente en el mundo, no ternas (tendras) dinguna repuesta ? (lo mas, Huli eskrive ningun, ama de vez en kuando dingun – a lo manko en esta edisyon)

I ansi lo solto Hevel i se apiyado de el. Pero Cain, topandose suelto, se vino en supito a Hevel i lo echo en basho i se le suvyo ensima i le fue dando punyadas kon los pyes i las manos porke no saviya de ke modo se mata. Alkavo se akodro del korban ke ayego su padre, ke vido lo degoyo de la garganta en los simanim. Lo mizmo izo el a Hevel.

I ay kyen dize ke lo fue mordyendo komo el kulevro asta ke lo mato. I ansi kedo Hevel en medyo del kampo ke no supo Cain ke azer de el, syendo era primera vez ke tal vido muerte. Pensando en esto, vido un par de hayot (animales) tehorot (puros) i ofot (pasharos) ke se pelearon uno kon otro i se mato uno de eyas i kavaron la tyerra i lo enterraron. De eyos deprendyo (se ambezo) Cain, i entero a Hevel. I por esto fueron zohim (konsiderados) las hayot i ofot ke se dize dos berahot en eyas, una al ashehita (sovre la matansa) i otra al kesuy adam (sovre la kuvyerta de la sangre)

I ay kyen dize ke Adam arishon i Hava, syendo ke lo vyeron a Hevel muerto no supyeron ke azer de el, i vino una graja (kuervo) i kavo la tyerra delantre de eyos i entero a su kompanyera, i de eya deprendyeron eyos  i lo enteraron a Hevel .  I ansi tyene la graja dos avantajes: uno es ke kuando pare, son blankos i pensando ke no son suyos, se aparta de eyos, i el Shem Itbarah tyene su karga de mantenerlos; sigundo es ke kuando gritan i demandan luvya, les responden de los syelos.

I despues kijo Cain fuirse, dizyendo: si vo a kaza, syerto ke mi padre i mi madre lo demandan de mi syendo ke no ay otro en el mundo.

I se le aparesyo el Shem Itbarah i le disho: si de tu padre te puedes fuir, de mi no puedes. I le demando: Onde esta Hevel, tu ermano? Desdichado de el, ke por tenerte piyadad de no matarte, tenyendote de basho, la buena paga tuya fue de matarlo tu a el.

I lo ke le demando: Onde esta tu ermano? es por dos sibot:

una es asigun dishimos arriva, ke kuando uno aze algun yerro no es derecho de kastigarlo sin preguntarle, syendo puede ser ke tyene alguna diskulpa;

sigunda es para ke atorgara su pekado, i si era bueno deviya de responder: «El yetser ara me sombalyo i lo mati, hatati, awiti, pashati (tres vezes peki) . I no basta ke no izo komo la djente, sino ke se izo del bovo, dizyendo: No se. Por ke, guardyan de mi ermano so yo?

Disho el Shem Itbarah: Ke izistes? La boz de la sangre de tu ermano i de tu semen estan esklamando de la tyerra.Ke savete ke uno ke mata a su kompanyero no entyenda ke mata una alma, ke sepase ke mata munchas almas ke deviya de enjendrar el i sus ijos de kontinuo. I mas sabras ke su tsaar de tu ermano es muy grande, porke su alma no tyene lugar ande estar, ke a los syelos no puede ir porke ainda no fue ninguna alma. Aki a basho tyene tsaar de ver su sangre echada en la tyerra sovre los maderos i las pyedras.

Disho Cain:

Syendo ke tu sos patron del mundo i shomer de todos, aun ke yo so negro, ke tengo yetser ara ke me va kitando del mundo, kaliya ke vos no me desharas matarlo, ke si resiviyas mi korban sigun resivistes el suyo no veniyamos en esto, ke sierto el selo kita al ombre del mundo.

Sovre esta repuesta de Cain vino el tyempo de eskapar la emisyon.

Al djueves ke vyene, si kyere el Dyo!

Edmond Cohen
Paris – Fransya