Muestra lingua: LOS KIBUTSIM por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar  de mi lavoro el haham Farhi, i tambyen Tito Jacob, el kunyado de Liliane.

Saludos a todos
Edmond Cohen
Paris, Fransya

LOS KIBUTSIM

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Oy mos topamos entre Rosh Ashana, ke se eskapo antiyer martes a la tadre, i Kipur, ke empesara el martes ke vyene, 25, a la tadre. Estamos dunke en medyo de los yamim noraim, los diyas de espanto, entre el djusgamyento i la posibilitad de trokar la sentensya. Vos dezeo a todos, keridos oyentes, una anyada buena i dulse kon una buena eskritura sovre el grande livro de la vida.

Por lo tanto no vos kyero avlar de Kipur, syendo ke no so haham i todo lo ke yo saviya i puediya dizir, ya lo dishe aki en otras emisyones de antes.

Oy me pensi de avlarvos de los kibutsim, ke, afillu si no son mas lo ke konosimos sinkuenta anyos mas antes, dainda egzisten en Israel oy, son 270, kon 120.000 haverim, i reprezentan 40% de la produksyon agrikola i 9% de la produksyon industriala del pais.

Empesaremos por el empesijo : kualo kyere dizir en ebreo el byervo kibuts? El kibuts es la reunyon, por egzemplo el kibuts galuyot es la reunyon en Erets Israel de todos los egzilados aboltados del mundo entero.

Afillu si, komo lo dishe en otras emisyones, el syonismo, a la kontra de lo ke se kree la djente, nasyo de un haham de los Muestros, Yehuda Alkalay, ya savemos ke la idea syonista se dezaroyo sovre todo ande los djudyos laikos i ashkenazim de Evropa del este. A parte de unos hahamim komo Alkalay, Kalisher, i Kook despues de estos dos, kale dizir ke los djudyos sufus asperavan ke solo el Mashiah venga para yevarlos en Erets Israel. A la kontra, los laikos no keriyan asperar demaziya, vyendo las matansinas de los pogromes. De otra parte, estos laikos eran en grande mayoriya sosyalistos (esto avlando de la fin del siglo 19).

Lo ke keriyan estos syonistos sosyalistos, no era solo la emansipasyon del puevlo djudyo, ama tambyen el fraguamyento de una sosyeta asigun sus ideas sosyalistas, ande kada djudyo seriya al igual del otro.

Los unos, aunidos en el partido Poale Tsion, i el movimyento de mansevos Dror, detras del kapo Dov Beer Borochov, eran marksistos. Los otros, aunidos en el partido Hapoel Hatsair, eran sosyalistos i syonistos sin ser marksistos. Ama todos teniyan la misma idea, la mueva sosyeta ke kaliya fraguar en Erets Israel deviya ser agrikola.

Antes mismo de eyos, djudyos syonistos o pre-syonistos, komo los hoveve Tsion, aviyan empesado de lavorar la tyerra, ama no kon la ideolojiya komunista i egalitarya ke iva ser la del kibuts.

El primer kibuts, ke no se yamava dainda kibuts ama kvutsa, fue fundado al sur del lago Kineret (o de Tiberiade), en un lugar yamado Umm Juni, el 29 de oktovre 1910, ay dunke unos syen anyos, por un grupo de dodje mansevos, diez ombres i dos mujeres. Poko despues, el 6 de agosto 2011, trokaron el nombre de Umm Juni para yamar la kvutsa Degania « asigun los sinko djeneros de granos ke kresen aki »( kale saver ke deganim, en lashon, son sereales (trigo, ets). I poko despues vinyeron otros mansevos, entre los kuales un syerto Shmuel Dayan, i tambyen un ombre muncho mas aedado, el padre espiritual del movimyento, salvo ke el era relijyozo, Aaron David Gordon. (Vos akodro ke es en rekodro de este syonisto ke fue yamado el movimyento Gordonia, ande fue en su manseves beljikana muestro amigo el Profesor Sephiha).

En kuanto a Shmuel Dayan, el va tener su sigunda kriatura, ke va ser tambyen la sigunda kriatura nasida en Degania, en 1915, i va yamarla Moshe, en memorya de Moshe Barsky, otro myembro del kibuts, matado en novyembre 1913. Se topava solo, lavorando en los kampos, i arabos le travaron en la espalda. No tengo menester de dizir ke los kampos aviyan sido merkados un buen presyo por el Keren Kayemeth, i de esto vemos ke los arabos no achetavan djudyos serka de eyos por la sola razon ke eran djudyos, i no, komo se konta agora, porke vinyeron arrovarles sus tyerras.

Es este Moshe Dayan, nasido en Degania, ke va ser mas tadre el Moshe Dayan ke kada uno konose.

Lo ke fue la vida de estos halutsim, estos primeros fundadores de los kibutsim, no fue koza kolay. La tyerra era seka, yena de pyedras i no dava, los moskitos davan la malarya entre otras hazinuras, los arabos travavan i kaliya guadrar los kampos, syendo armado, salvo Gordon ke no keriya yevar arma i solo teniya su flauta para azer muzika…

Despues de este kibuts ke a poko a poko se va dezaroyar, otros kibutsim van a ser fundados, a kada vez kon mas i mas djente.

Los halutsim, al empesijo, van todos azerse lavoradores en los kampos. Kada uno lavora komo puede asigun su fuersa i su kapachedad, ama sin resivir dinguna para. El Kibuts le da lo ke tyene de menester, del vestido a la komida i la morada. Komo dizen los marksistos, « de kada uno asigun sus kapachedades, a kada uno asigun sus menesteres ».

La semana pasada, avlandovos de los hasidim, vos konti ke me ambezi de la egzistensya de los hasidim por mi profesor de istorya, Olivier Clément. Vos dire ke pokos anyos despues, en 1954, kuando yo era estudyante en derecho, mi profesor de ekonomiya, Louis Baudin, mos aviya ambezado ke el haliz komunismo, al kontraryo de lo ke se diziya i meldava en todas partes, no estava en la Rusia. El haliz komunismo, asigun el, aviya egzistido en el Peru del tyempo del imperyo Inca. El inca lavorava para la komunitad i resiviya sus menesteres del estado, su komida komo su vestimyenta.

I el sigundo i solo egzemplo de komunismo, era, asigun este profesor, el kibuts israelyano. Todo el kusur, los kolkhozes de Rusiya, ets, no era haliz komunismo. I si me puedo atrivir oy de ir un poko a la kontra de mi profesor, dire ke el Emperador de los Incas no biviya komo un sivdadino ordenaryo. A la kontra, no ay diferensya entre el sekretaryo del kibuts i sus otros haverim. No ay, en el kibuts, un ombre poderozo a la manera de un Stalin. Todos son, o a lo manko eran, iguales, al punto ke se kontava ke mismo los ministros Mapam del Governo ke eran kibutsnikim eran al igual de sus haverim. I los gazeteros eran enkantados de ver el ministro yevar la komida en el komedor porke, este diya, era su lavoro de eskudyar a los otros.

Yo tuve dos vezes la okazyon de bivir i lavorar en un kibuts : la primera vez en el kibuts Lehavot Abashan, en el norte de la Galilea, a la frontera de Siriya, en el agosto 1955 (teniya 18 anyos), i la sigunda vez en el kibuts Dan, otrun poko mas al norte, en el enverano 1967 (teniya 30 anyos).

En 1955, estavamos debasho de los kanones siryanos, arriva de muestras kavesas : las alturas del Golan eran siryanas. Biviyamos arrodeados por ilos barbelados illuminados noche entera, i guadrados por mansevikos i mansevikas armados ke kaminavan i miravan todo sin kedarse. Eramos un grupo de estudyantes djudyos fransezes, i lavoravamos solo la demanyana, de la sesh asta la medyudiya (a la diferensya de los kibutsnikim, ke eyos lavoravan tambyen una parte de la tadre). El sadran avoda era el ke dava a kada uno lo ke teniya de azer tal diya, por egzemplo akojer mansanas o uva, o ir a okuparse de los pishkados (en este kavzo kaliya alevantarse mas temprano, a las kuatro). Las komidas se aziyan en djuntos : el kave de la demanyana a las sesh en el hadar aohel, el komedor, despues a las diez en los kampos un dezayuno kon kozas de komer komo pipinos, tomates, lebeniya (una bevyenda de leche) i semola. La komida de la mediudiya era kaji la misma i se aziya en el hadar aohel, el komedor del kibuts. Kada kibutsnik teniya su tsrif, su morada individual, ama las kriaturas dormiyan, estudiavan i biviyan, eyas, todas en djuntos, en el gan yeladim, separadas de sus paryentes, ke veiyan solo dos oras sovre 24, entre sesh i ocho de la tadre. Era el tyempo konsagrado a las kriaturas. Estos kibutsim eran a la vez marksistos i syonistos, de tal manera ke, por egzemplo, me akodro ke en 1955 kada kibutsnik teniya, en la biblioteka de su tsrif, los mismos livros, dados por el kibuts : Marx, Engels, Lenin, Stalin, Mao Tse Tung, i la biblia inkluyendo el Muevo Testamento…Kuando aviya eleksyones en el pais – fue el kavzo en 1955- todos los kibutsnikim meldavan la misma gazeta, Al Amishmar (sovre la guarsya), votavan para el mismo partido, el Mapam, a la syedra del Mapaï, el partido de Ben Gurion. Todos? En vedra, no fue ansina kuando estuve. Uvo un voto sekreto, komo se deve, i en medyo de todos los votos Mapam, salyo un voto por el partido Maki, el partido komunisto. Todos miraron al mismo : tu sos ke votates Maki? Mos deves de dizir – No vos dire, el voto es sekreto. Voti para kyen kije. Lo echaron a fuera del kibuts…Kaliya ser marksisto, ama no komunisto, afillu si keriyan ke Israel sea una demokrasiya popular komo los paizes de Evropa del Este.

Afillu si eran marksistos, el vyernes a la tadre era tyempo de fyesta. Se metiya mantel blanko i se baylava la hora, la krakovyak i otros bailes de este tyempo. I no se lavorava diya de Shabath.

Lo ke vide en 1967 en el kibuts Dan era kaji lo mismo, kon una diferensya : Israel veniya de ganar la gerra de los sej diyas unas kuantas semanas antes. Se echaron los ilos barbelados, no aviya mas siryanos arriva de muestras kavesas, i no era mas menester de guadrar el kibuts la noche.

Tengo de dizir ke, si yo me topi en kibutsim marksistos, todos no eran ansina, afillu si la mayoriya era de la vanda del partido Mapam. Aviya tambien los kibutsim de la vanda del partido Mapaï, el partido de Ben Gurion, unos kuantos tambyen de la vanda del herut, el partido de Menahem Begin, enfin unos kuantos ke eran relijyozos, komo el kibuts Sde Eliahu ande se fueron mis amigos estudyantes sufus ke komiyan kasher.

No abolti en un kibuts desde 1967, i todo lo ke se paso despues, no lo vide de mis ojos, ama es siguro ke munchas kozas trokaron a poko a poko. En primero, los kibutsnikim se apersivyeron ke no se ganava bastante paras kon la agrikultura, i ke kaliya tambyen azer industriya. Mismo en 1955, en mi kibuts Lehavot Abashan, aviya un atelye ande lavori un diya, ke aziya botelyas de amatar los fuegos.

Fue muy yuch para los kibutsim de adaptarse a la ekonomiya de merkado ke es la de Israel, i los kibutsim se toparon en muy negra situasyon de paras. Tuvyeron de adaptarse ister istemes (ke lo kyeran o no) i de azer todo modo de aktividad : industria, turismo, servisyos, ets. Los kibutsnikim se metyeron a salir del kibuts para ir a lavorar afuera, mismo si despues teniyan de traer la para atras para el kibuts.

Tuvyeron tambyen, kon la industrializasyon, de dar lavoro a djente de afuera, djudyos al empesijo, i despues djente ke no son djudyos, sea arabos, sea djente de Asia. Estos lavoradores venidos de afuera del kibuts no son haverim. El kibuts es sus amo i los paga, lo ke es por siguro kontraryo a los ideales de la fundasyon.

De otro lado, los prinsipyos de vida del empesijo se trokaron eyos tambyen a poko a poko: las kriaturas se kedaron kon sus paryentes en vez del gan yeladim, las duchas se tomaron en privado i no en djuntos, i mismo la komida misma se toma en privado en syertos kibutsim. La vida kolektiva se izo solo ekonomika, i mismo en esto, la igualidad de los empesijos se troko a poko a poko.

Asigun lo ke meldi, sovre 270 kibutsim, solo 65, yamados shitufi, kedaron komunotaryos. Los mas de 200 otros, yamados mithadesh, renovados, se privatizaron mas o menos.

Malgrado esto todos esfuersos de adaptasyon, los kibutsim no tyenen mas la importansya ke teniyan antes. Sus povlasyon se envejesyo, syendo ke en 15 anyos, unos 20.000 mansevos se an ido del kibuts. Agora 2.500 an aboltado, i la povlasyon totala de los kibutsim se mantuvo mas o menos alrededor de 120.000 kibutsnikim. Ama no kale olvidar ke la povlasyon totala del pais, eya, a muncho pujado, de tal manera ke agora los kibutsnikim reprezentan solo unos 1,6% de la povlasyon totala del pais. Kuando renasyo el estado, en 1948, los kibutsnikim reprezentavan unos 10% de la povlasyon totala del muevo estado.

Esto dicho, los kibutsim djugaron, i djugan dainda, un rolo muy importante en la istorya del pais de Israel. Fueron un egzemplo para el mundo entero, i no solo para mi profesor Louis Baudin, de una sosyedad egalitarya konsentida sin vyolensya. Un alay de djente, munchos ke no eran djudyos, vino bivir syerto tyempo en el kibuts, por egzemplo el violonselisto franses kristyano Paul Tortelier kon toda su famiya se fue a bivir anyo entero en un kibuts, i kompozo en 1956 su Symphonie d’Israel.

En 1967, kon la gerra de los sesh diyas, fuimos miles de veluntaryos ke mos fuimos a lavorar en los kibutsim para remplasar en los kampos a los kibutsnikim azyendo el askerlik. La mayoriya eramos djudyos, ama no todos.

Kale saver ke son los kibutsim (i los moshavim, ama oy no esto avlando de los moshavim) ke kultivaron la tyerra del pais i salyeron komida del dezyerto.

I en el mismo tyempo son los kibutsim ke fueron las kalés a la frontera ke rezistyeron syempre i kon un koraje ekstraordinaryo a las invazyones arabas. Son los haverim de los kibutsim ke detuvyeron a las armadas enemigas i protejaron el pais. La mayoriya de los zabites de Tsahal, la mayoriya de los pilotes de avyones de gerra fueron i son dainda kibutsnikim.

No kale tampoko olvidarse ke munchos ministros i ombres importantes del estado vinyeron del kibuts, i por empesar Moshe Dayan, komo lo dishe, i de la otra vanda un ombre komo Ben Gurion se fue a eskapar su vida en el kibuts de Sde Boker en el dezyerto del Negev.

Me akodro de un diskorso de Ben Gurion en 1955, kuando yo estava en Israel, ande el diziya : ay demaziya djente en las sivdades : kale ir en los kibutsim i sembrar en el dezyerto.

Kuando oygo ke Israel vende tulipas a los Olandezes, me digo : ashkulsun Israel, ashkulsun los kibutsim!

Agora no son solo tulipas, es tambyen teknolojiya elektronika ke sale de los kibutsim. Yo ize aze poko la konosensya de uno de estos injenyeros lavorando en un kibuts, ama esto es otra istorya ke vos kontare un diya, una istorya ke tyene un atadijo kon mis emisyones.

Ama agora ya vino el tyempo de eskapar mi emisyon, de dezearvos de pasar un buen tanith de Kipur, i de dizirvos al djueves ke vyene, si kyere el Dyo!

Edmond Cohen