eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LA ISTORIA DE YERUSHALAÏM (2º parte)
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 13 de desyembre, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet o Poissonnière. La entrada es la del lokal i no la del han. Salvo ke, komo ya lo dishe la semana pasada, ambezandosen de esto, los sindikatos antisemites dechidaron por pizma de azer este diya de martes 13 de desyembre movimyentos sosyales en la Fransya entera. La lucha es la del katramis de tyerra kontra el de fyerro. Puede ser vamos a trokar de diya i tener muestro atelye el lunes 12. Vos diré.
Esto dicho, vos aprometi, la semana pasada, ke vos eskapariya oy la istorya de Yerushalaïm, ke aviya deshado en medyo el otro djueves kon la venida de los arabos en 638.
Komo vos dishe, Yerushalaïm, en 638, era okupada por los Romanos kristyanos de Oryente, ke aviyan reushido en 629 de tomarla atras a los Persos sassanides.
Ama en 636, solo kuatro anyos despues de la muerte del profeta Mohamed, ayegan los arabos muzulmanos, dirijidos por el kalif Omar, para enserrar Yerushalaïm. El emperador Heraclius se fuye antes, i abolta en Constantinopla. (Entre parantezas, Heraclius se espantava de tomar una nave, mismo si era djusto para traversar el Bosfor, i se kedo un anyo en la parte azyatika de Estambol sin pueder morar en su Palasyo ke era en la parte evropea d’Estambol. Los Romanos tuvyeron de fraguar un puente de naves una al lado de otra para ke Heraklius pueda aferrar la Evropa. Syerro la paranteza). Esto dicho, en Yerushalaïm los Romanos de la sivdad rezisten dos anyos, ama al kavo la sivdad kaye en 638 entre las manos de los arabos (en Fransya, es el anyo de la muerte del rey merovinjyano Dagobert). El kapo spritual de los Romanos kristyanos, Sophronos, trata kon el Kalif Omar i obtyene la kondisyon de Dhimmis para los kristyanos, los djudyos, i los Zoroastrianos.
Los djudyos, ama solo 70 famiyas ke biviyan en Tiberiade, son otorizados a instalarse en Yerushalaïm. (Omar era d’akodro para 200 famiyas, ama Sophronos grito, i fueron solo 70).
En 650 i durante un siglo, Yerushalaïm va ser basho la dominasyon del kalifat Omeyyade, de Damas.
En 691, los arabos fraguan el Domo de la Roka, primer monumento del arte muzulmano, i verso 710 la Meshkita Al Aksa, estos dos monumentos son fraguados ande estava el Bet Hamikdash, arriva del Kotel Maaravi, i de aya vyene la orijen de un peleo entre muzulmanos i djudyos ke dainda no se eskapo (vos akodro ke la sigunda intifada empeso kuando Ariel Sharon kijo entrar en la Esplanada de las Meshkitas, ama dainda no estamos en esto).
En 750, Yerushalaïm pasa basho la dominasyon del kalifat abbasside, de Bagdad.
En los anyos 800, el Kalif Harun al Rashid, ke mora en Baghdad, se mete d’akodro kon Charlemagne, Emperador de los kristyanos de Oksidente, para otorizar los pelegrinos kristyanos a vinir orar en Yerushalaïm.
En 969, Yerushalaïm pasa basho la dominasyon del kalifat fatimide del Kayro .
No topi munchas kozas sovre la vida en Yerushalaïm del tyempo de los arabos, en partikolar para los djudyos, antes de la venida de los turkos.
En 1055 los turkos Seldjukis, kondusidos por Tugrul Bey, toman a Bagdad. Guadran el Kalif abbasside, ama basho de Tugrul Bey, ke se aze Sultan.
En 1071 empesa una epoka de grandes movimyentos politikos i militares en Yerushalaïm, ke dainda se topa basho un kalif fatimide del Kayro, yamado Al Mustansir. Vyene , en 1071, un turko Seldjuki, Atsiz ibn Abaq, un jeneral de Malik Shah, ijo del Sultan Seldjuki Arp Arslan, i toma Yerushalaïm al kalif fatimide Al Mustansir, matando a 3.000 personas.
En 1078, Atsiz es matado por otro Seldjuki, i los Seldjukis meten a su lugar, komo governador de Yerushalaïm, a Ortoq Ibn Aksab. Este Ortoq no permite mas a los pelegrinos kristyanos de entrar en Yerushalaïm, i aki tenemos la mayor razon, ama no la sola, de la primera Kruzada, ke va empesar unos vente anyos mas despues.
Ama dainda no estamos en esto : los Muzulmanos kontinuan de pelearse entre eyos.
Ortoq se muere en 1091, i es su Ijo Soqman ke es governador de Yerushalaïm en nombre de Tutush, Sultan Seldjuki.
Entremyentres a empesado la primera Kruzada. Las Kruzadas meresen una emisyon entera, sino munchas. Fueron una trajediya para los djudyos de Evropa i del Oryente. Aki no vos vo kontar la Primera Kruzada. Solo vos dire ke los Kristyanos ayegan en 1097 delantre de Antioche, en Sirya. Soqman, ke komo vos dishe es un Seldjuki governador de Yerushalaïm, se va a luchar kontra los Kruzaderos para aprovar de salvar a la sivdadAntioche enserrada, ama pyedre la bataya el 9 de fevrero 1098. De muevo en julyo aprova de luchar en Antioche kontra los kruzaderos, ama yene pyedre la bataya, i se abolta en Yerushalaïm. Esta vez, no son los kruzaderos ke atakan a Yerushalaïm, ama los arabos fatimides, kondusidos por el vizir Al Afdhal, ijo de Badr Al Jamali, vizir de Al Mustansir ke aviya pedrido Yerushalaïm 20 anyos antes, en 1078, kontra los Seldjukis. Al Afdhal toma a Yerushalaïm el 26 de agosto 1098. Soqman el turko Seldjuki se fuye, i Al Afdal el arabo fatimide, despues de tener konkistado a Yerushalaïm, la fiya a uno de sus zabites, Iftikhar al Dawla. Al Afdal se pensa ke los kruzaderos son amigos, syendo ke tyenen el mismo enemigo ke el, kijo dizir los turkos seldjukis. Esto es un grande yerro. Los kruzaderos no vinyeron asta Yerushalaïm para azer amistad kon los Muzulmanos.
Ambezandose ke los kruzeros estan vinyendo desde Antioche ke an deshado en enero 1099, Iftikhar al Dawla se apareja para defender Yerushalaïm kontra los kruzaderos, ke ayegan delantre de las paredes de Yerushalaïm el 7 de junyo 1099. Malgrado la rezistansya de Iftikhar,los kruzados toman la sivdad el 15 de julyo i matan a los muzulmanes i djudyos. Asigun la kronika de Ibn Al Kalanisi, los kruzaderos enserraron todos los djudyos en un kal, metyeron el fuego i los kemaron todos (lo ke mos aze pensar a la manera de azer de los SS, por enshemplo en Oradour en Fransya, i en tantas sivdadikas de Polonya).
Los Kruzaderos kristyanos van a okupar Yerushalaïm un poko menos de 100 anyos, de 1099 asta 1187, kuando va kaer basho la dominasyon de Salaheddin. Puede ser unos oyentes se akodran de muestro amigo Binyamin de Tudela, este vyajador djudyo venido de Espanya, ke vijita a Yerushalaïm verso 1165. Mos dize ke ay unos 200 djudyos morando en Yerushalaïm, lavorando para la tintura.
Salaheddin es un Kurdo ke se va azer a poko a poko kapo de un reyno arabo en el oryente. En 1187, despues de tener tomado todas las kales kristyanas salvo Tyr, vyene atakar YerushalaÏm, defendida por un kruzadero yamado Balian, ke reziste byen asta ke Salaheddin i el empesen a tratar i baratar las kondisyones de una reddisyon. Balian acheta de pagar lo ke le demanda Salaheddin para ke los abitantes de Yerushalaïm tengan vida salva.
Yerushalaïm kaye basho la dominasyon de Salaheddin, ama empesa la tresera Kruzada. Salaheddin i Richard Korason de Leon topan un akodro : la sivdad keda muzulmana, ama keda avyerta a los pelegrinos kristyanos.
En 1229, el Emperador Frederiko II del San Imperyo Jermaniko i el Sultan de Ayifton Al Kamel toman un muevo akodro, i esta vez la sivdad es de muevo para los kristyanos. Ama este akodro no surea muncho, i en 1244, dunke 15 anyos despues, la sivdad abolta a los Muzulmanos, i lo va kedar asta 1917, kon la yegada de los Inglezes.
Ama antes de los Inglezes, kale dizir ke la sivdad, si keda basho dominasyon muzulmana, troka muncho de kapos. Kale saver ke en 1249, los Mamelukes de Ayifton toman el poder de la dinastiya ayubita, la de los desendyentes de Salaheddin.
I entre los Mamelukes, los Burjites toman en 1382 el poder de los Bahrites. Un siglo mas despues, son los Turkos osmanlis ke se pelean kontra los Mamelukes, i el 30 de desyembre 1516, el Sultan osmanli Selim Iero, ijo de muestro grande amigo el Sultan Beyazit II, entra en Yerushalaïm tomada a los Mamelukes, i de este diya los osmanlis se van a kedar en Yerushalaïm asta 1917. Suleyman el Magnifiko, ijo de Selim, va embeleser muncho la sivdad, i los djudyos tresalidos van a ayudar al Sultan.
Pasa el tyempo, i en Evropa los djudyos sufren del antisemitismo, i empesa el movimyento de ritorno a Sion. Ya vos avli munchas vezes del nasimyento del sionismo, de Montefiore ke fragua un molino en la male de Yemin Moshe, afuera de las paredes. En 1855, los djudyos empesan a fraguar hanes a fuera de las paredes i la sivdad se engrandese.
En 1914 empesa la Primera Gerra Mundyal, i los Turkos se topan ser alyados de los Almanes, kontra los Inglezes ke son interesados por el Medyo Oryente. La armada Ingleze de Oryente es yevada por el Jeneral Allenby, ke entra en Yerushalaïm el 9 de desyembre 1917. En su lettra de kapitulasyon, Izzat, el kapo de los Osmanlis, eskrive : « Esperamos ke vash a protejar a Jerusalem komo la protejimos por mas de sinko siglos » (Entre parantezas, Izzat se yerra de un siglo : de 1516 a 1917, aze un anyo mas de kuatro siglos, i no sinko).
Ya vos akodrash ke, este mismo anyo 1917, un mes antes, el 2 de novyembre, Arthur Balfour, ministro Ingles de los Echos Ajenos, aviya eskrito a Lord Rothschild una deklarasyon dizyendo ke el governo ingles estava d’akodro para el establesimyento de un ogar en Palestina para el puevlo djudyo, i ke empleariya todos sus esfuersos para realizarlo.
Los syonistos djudyos son tresalidos. Malorozamente, el Gran Mufti de Yerushalaïm , Hadj Amin El Huseini, va empesar de solevantar los arabos kontra los djudyos, en mismo tyempo ke Hitler toma el poder en Almanya en 1933.
Penso ke no tengo menester de apesgarme muncho sovre lo ke se paso despues i ke vozotros ya savesh, keridos oyentes. Malorozamente, la djente, eya, no save nada, i a kada vez so ovligado de eskrivir a gazetas o a sityos internet para luchar kontra la dezinformasyon. No puedesh imajinar los yerros ke topi sovre internet en preparando mi emisyon.
Kada uno de vozotros ke meldash en una gazeta kozas yerradas, syempre en favor de los arabos i kontra los djudyos, tenesh el dever de eskrivir para protestar. Mismo si ya savemos ke es una gota de agua en la mar, yene kale azerlo. Komo diziya Elie Wiesel, no para trokar a los otros, ama para ke los otros no vos troken a vozotros…
Solo vos akodrare ke despues de una sigunda gerra mundyal ke kosto la vida de sesh milyones de djudyos de Evropa, i malgrado la serradura de las mares por los Inglezes, los djudyos vinyeron en Erets Israel i en Yerushalaïm. Tambyen moravan aya los vyejos djudyos de syempre, o venidos desde muncho tyempo de Bukhara. Munchos biviyan en la male djudiya de la Vieja Sivdad.
Los arabos enserraron a los djudyos de Yerushalaïm en 1947, i los enserraron dos vezes : los djudyos de afuera de las paredes, i los Djudyos de la Vieja sivdad. Los djudyos de la Vyeja Sivdad se rendyeron i fueron arondjados el 27 de mayo 1948. Los de la mueva sivdad rezistyeron i fueron salvados el 6 de junyo por la Hagana grasyas a un kamino yamado el kamino de Birmaniya, fraguado para doblar el kamino ke pasava por Latrun i Bab el Wad, i ke los arabos teniyan.
Despues de la gerra de Independensya, los djudyos izyeron de esta mueva sivdad la kapitala del muevo estado de Israel, ama kedava kortada en dos, i el Kotel era en las manos de los arabos sin ke dingun djudyo tenga derecho de ir en la parte araba de Yerushalaïm. Ama en 1967, kon la gerra de los 6 diyas, los Israelyanos tomaron toda la sivdad de Yerushalaïm inkluyendo la Vyeja Sivdad i el Kotel maaravi. Agora Yerushalaïm, la Yerushalaïm del rey David, de Yeuda Makabi o de Bar Kohba, despues de ser okupada por los Romanos, los Persos, los arabos, los turkos seldjukis, los turkos osmanlis, los inglezes, esta sivdad tan kerida abolto a sus moradores djudyos , aze parte de Israel i es su kapitala, afillu si los otros paizes no lo rekonosen.
Desde 1948 la sivdad se engrandesyo, se embelesyo ; miles i miles de turistos i de pelegrinos del mundo entero vyenen para ver la Sivdad Santa. Desde poko tyene un tramvay moderno, i tantos monumentos modernos al lado de los antikos.
Los arabos kyeren azer de Yerushalaïm la kapitala de Palestina. Ama para esto kale ke agan la paz kon Israel, i esto no kyeren.
Alora kale ke asperen.
Aki vos vo deshar agora, porke ya vino la ora de eskapar mi emisyon, i vos digo al djueves ke vyene, si kyere el Dyo !
Edmond Cohen
