eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
EL OMER ENTRE PESAH I SHAVUOT
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 5 de mayo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Kuando digo atelye de la asosyasyon Vidas Largas, esto no kyere dizir ke esta serrado i rezervado a los solos myembros de esta asosyasyon. Es un atelye avyerto a kada uno ke kyere oir la lingua de su vava, i aprovar de avlarla el tambyen, i si no kyere avlar, se keda sin avlar, oyendo solo, komo aziya yo en primero. A poko a poko me enkoraji, empesi de avrir la boka, i es ansina ke eskapi por avlar a esta emisyon, en la lingua ke oiya de chiko, ama ke kaji no avli nunka. Akonsejo a mis oyentes de Paris, si son mis oyentes es ke me entyenden i ke les agrada de oir muestra lingua, ama puede ser no se atriven, les akonsejo de vinir una vez a muestros atelyes, i si no les plaze no vendran otra vez, ama a lo manko una vez avran aprovado.
Esto dicho, oy djueves, estamos en medyo de la fyesta de Pesah, en lo ke se yama los medyanos, los diyas ande se puede lavorar, savyendo ke sovre ocho diyas de Pesah, los dos primeros i los dos ultimos son diyas de fyesta, kuando los kuatro d’en medyo, dichos de hol a moed, son tambyen diyas de fyesta ama ande se puede lavorar.
Si vaj a ver un kalendaryo djudyo, verash ke oy djueves estamos en el sigundo diya del omer. Kualo es el omer ?
La semana pasada, vos avli de Pesah i de lo ke dizen los syentifikos a su propozito, ay un anyo de esto vos avli de Shavuot, i ay kuatro anyos de esto vos avli de la fyesta de Lag Baomer ke se topa entre Pesah i Shavuot, i ke se yama Lag Baomer porke kae el trenta i treser diya del omer. Ama del omer el mismo, estos 49 diyas del omer ke se kontan entre Pesah i Shavuot, no vos avli nunka direktamente. Es lo ke vo aprovar de azer oy, afillu si vyene muy yuch para mi, syendo ke son kozas de haham, i ke no so haham.
Komo syempre, empesaremos por el empesijo: kualo kyere dizir el byervo ebreo omer? En ladino, el byervo omer es trasladado por gaviya. Puede ser, keridos oyentes, ay algunos entre vozotros ke s’estan demandando: i kualo es una gaviya? Una gaviya es una mezura de trigo.
Para entender kualo vyene azer esta gaviya, esta mezura de trigo, entre Pesah i Shavuot, kale empesar por meldar Vayikra, kapitulo 23, pesukim 9 a 16, ke vyenen djusto despues de las leyes sovre la fyesta de Pesah:
« Y fablo Adonay a Moseh, por dezir: Fabla a hijos de Ysrael, y diras a ellos: quando vernedes a la tierra ke yo dan a vos, y segaredes a su segadura (segar es kortar el trigo) y traeredes a gavilla de primicia de vuestra segada (dunke la primera mezura de la kortadura de trigo, el omer del empesijo de la segadura) al sacerdote. Y mecera ( mecer es menear de un lado al otro) a la gavilla delante Adonay por vuestra voluntad, del otro dia del Sabbath (kijo dizir el diya de demanyana despues Shabath) lo mecera el sacerdote. Y faredes en dia de vuestro mecer a la gavilla carnero sano de edad de su anyo por alçacion (sakrifisyo) a Adonay. Y presente dos diezmos de semola embuelta en el azeite, offrenda a Adonay olor recebible, y su templacion vino, quarto de la medida (puede ser algunos se akodran de la emisyon ke ize el 28 de oktovre del anyo pasado – 2010 – sovre el vino i los djudyos, ande ya vimos este byervo templacion, ke kyere dizir libasyon, verter un likido, para beverlo o no). Y pan, y tostado, y tierno no comeredes fasta mismedad del diya este, fasta traer a allegacion de vuestro Dio, fuero de siempre (fuero es regla, ley) a vuestros generancios en todas vuestras moradas. Y a vos del otro dia de Sabath, del dia de vuestro traer a gavilla de la mecedura (el omer ke menea el Cohen) , siete semanas complidas seran. Fasta del otro dia del sabbath el seteno contaredes cincuenta dias, y faredes allegar presente nuevo a Adonay. »
Despues de Vayikra, vos kyero meldar tambyen el pasuk 9 del kapitulo 16 de Devarim, kon el empesijo del pasuk 10:
« Syete semanas kontaras a ti ; de empçsar hoz en la miesse (kijo dizir del empesijo ke tu kuchillo kortara tu trigo) empesaras por kontar syete semanas. I faras paskua (fyesta) de las semanas (en lashon hag shavuot) a Adonaï tu Dyo ».
Aki me kedo de mi meldadura, i penso ke pishin vos dash kuento de munchas kozas:
La primera koza, es ke nunka se dize en lo ke vos meldi ke el ultimo diya del omer, ke es la fyesta de Shavuot, es para fyestar el dono de la ley. En el tanah, la fyesta de Shavuot es solo una fyesta agrikola. Son los hahamim ke izyeron koinsidar Shavuot kon el Matan Tora (el dono de la Tora).
Ama no kale kreervos ke si Shavuot se fyesta sinkuenta diyas despues de Pesah, esto kyere dizir ke el Matan Tora, el dono de la ley, se tuvo sinkuenta diyas despues de Pesah i de la salida de Ayifto. Kreer esto seriya un yerro, syendo ke el primer pasuk del kapitulo 19 de Shemot mos dize ke los ijos de Israel ayegaron al dizyerto de Sinaï en el treser mez despues de la salida de Ayifton. En el treser mez, mos aze entre sesenta i noventa diyas despues de Pesah, de toda manera mas de sinkuenta.
La sigunda koza ke puditesh ver, es ke tampoko el Tanah mos dize ke el omer se konta desde Pesah. No dize nada sovre Pesah. Lo ke solo mos dize, es ke se konta del « otro dia de Shabath », kijo dizir de la demanyana despues de Shabath.
I kual shabath? El Shabath despues Pesah? O el Shabath antes de Pesah? El Tanah no mos avla de esto. Mos avla del shabath despues de la primera segadura.
Halbuki, la primera segadura puede ser diferente asigun el ke lavora la tyerra i ande se topa; el ke tuvo luvya i sol kuando kale podra azer su segadura antes del ke no tuvo sol o no tuvo luvya.
Si es ansina, la fyesta de Shavuot no podriya ser una fyesta unika para todos en djuntos: uviera munchos alhades (sinkuenta diyas despues de shabath kae un alhad) para la fyesta de Shavuot.
La tresera koza, es ke mismo si mos tomamos Pesah komo tyempo de la segadura para todos, el tanah mos avla del Diya despues shabath, no del diya despues Pesah. El empesijo del omer se devriya kontar del diya despues el shabath de Pesah, i no despues de Pesah mismo. I es ansina ke aziyan los Saduseanos del tyempo ande aviya Saduseanos, vamos a dizir del tyempo del Kristo, i ansina es tambyen lo ke azen asta oy los Karaïm. Para eyos Shavuot kaye syempre diya de alhad.
I por tanto, no es ansina ke dechizaron los hahamim del Talmud: Para eyos, de lo ke se avla del omer en Vayikra djusto despues de Pesah, es ke el Shabath del kual avla el tanah es el de Pesah. I mismo, el byervo shabath lo tomaron komo diya de fyesta i no komo Shabath mismo. Para eyos, shabath kyere dizir diya de la fyesta de Pesah. De tal manera ke para los djudyos komo mozotros, ke no semos karaïm, el omer se empesa de kontar el diya despues de Pesah, i por esto empesi esta emisyon dizyendovos ke oy djueves estamos en el sigundo diya del omer, es porke se empeso de kontar desde myerkoles, el diya despues Pesah, ke este anyo kayo un martes.
Tomar syempre sinkuenta diyas despues de Pesah, ke kaye el 15 de Nisan, aze ke Shavuot, sin ke el Tanah lo diga, kae syempre el 6 de Sivan, sinkuenta diyas despues del 15 de nisan.
Agora la kuestyon ke mos keda es : deke dizimos ke Shavuot fyesta el matan tora, el dono de la Tora Ya vos dishe, kuando ize una emisyon sovre los djudyos de Etyopiya, ke para eyos el matan tora no se fyesta en Shavuot, ama en la fyesta del Segd al kavo de Heshvan. I komo vos dishe, lo ke es siguro, es ke el matan tora no se izo sinkuenta diyas despues de Pesah, despues de la salida de Ayifto.
En la emisyon ke ize sovre Shavuot aprovi de dar una repuesta. Vo la vo dar de muevo : « A mi me parese ke lo ke kijeron amostrar los hahamim en fyestando el matan tora el diya de Shavuot, es ke si ay un tal atadijo entre Pesah i Shavuot, ke se ve kon la komputasyon del omer, kon el fakto ke la fyesta de Shavuot kaye un diya ke se refyere a Pesah (sinkuenta diyas despues Pesah) este atadijo es para amostrar ke la fyesta de Pesah no es kompleta sin Shavuot ke la syerra. I esta serradura, atseret, no se aze solo por razones agrikolas, asigun los hahamim. Es para amostrar ke la salida de Ayifton tuvo su razon en la akseptasyon de la Tora. Los syervos ebreos no fueron liberados en Pesah solo para ser ijos foros, fueron liberados para pueder despues resivir la Tora. Es solo kon el matan Tora fyestado en Shavuot ke la salida de Ayifton fyestada por Pesah tyene su pleno kumplimyento. »
Lo ke dizen los hahamim es ke Pesah fue una liberasyon fizika, ke se kumpliyo solo kon la liberasyon espituala ke vino del matan tora en Shavuot.
Puedesh pensar: Edmond mos disho ke mos iva avlar del omer, i mos avla o de Pesah, o de Shavuot, i no de lo ke se pasa entre las dos fyestas, kijo dizir el tyempo del omer. Ya vengo, ya vengo.
Vos puedesh demandar : ke menester agora de kontar los diyas entre Pesah i Shavuot, savyendo kada anyo ke de toda manera Shavuot va kaer el 6 de Sivan? Agora ke ya se save, ke menester de kontar?
Por siguro, la manera mas kolay de respondervos, es de dizirvos : ansina es el « fuero de syempre » (la regla eternal) komo vos meldi. El tanah dize : « contaredes », tenemos de kontar.
Ay una repuesta mas mistika, ke se topa en el Zohar, el livro de la kabala. Asigun el zohar, los syervos ebreos ya estavan kaidos en Ayifton en el kuarenta i mueven grado de impureza. Solo kedava el sinkuenten grado, ande no aviyan kaido : no aviyan olvidado la aliansa de Avraham avinu kon el Dyo, i lo ke el Dyo le aviya prometido : ke su desendensya saldriya de Ayifton. En otro lugar meldi tambyen ke aviyan guadrado sus nombres, kijo dizir sus identidad.
Agora se entyende mijor deke se konta diya despues de diya. Kada diya deve entenderse komo un eskalon ke mos aze suvir de en basho ande estavamos kaidos asta la pureza ke tenemos menester para resivir el matan tora, el dono de la ley.
El haham Ribbi Moshe Ben Yaakov Cordovero (1522 -1570) ke fue elevo de Yosef Karo, famozo por su Shulhan aruh, i de Shelomo Alkabets, famozo por su Leha Dodi, i ke fue el maestro de Itshak Luria, grande kabalisto, mos desho un komentaryo mistiko sovre la preparasyon del ombre entre Pesah i Shavuot.
Asigun este haham, en kada semana el ombre tyene de lavorar sovre si mismo i sovre las midot , las maneras de ser, ke son las midot de hesed (buendad), de gevura (fuersa), de tiferet (ermozura), de netsah (seguridad), de hod (esplendor) , de yesod (unyon fekonda) i de malhut (kumplimyento real). Es este lavoro del ombre sovre si mismo, una semana despues de la otra en las syete semanas del omer, ke lo va alsar asta la pureza ke tyene menester para ayegar a Shavuot.
Sin suvir asta estas alturas mistikas, se dize tambyen ke esta manera de kontar marka muestra impasensya de ayegar al diya tan asperado ande vamos a resivir la ley.
I por tanto, esta epoka del Omer entre Pesah i Shavuot, esta epoka de impasensya de resivir la ley, ke devriya ser una epoka de alegriya, es una epoka de medyo luto , a la eksepsyon del trenta i treser diya del omer, lag ba omer, dunke el 18 de yar, ke es diya de fyesta.
En tyempo de omer, no se puede ni kazarse, ni oir muzika, ni kortarse los kaveyos, todo lo ke se puede azer en diya de Lag Baomer.
Deke este medyo luto, i deke esta fyesta en medyo del luto, de esto todo ya avli ay kuatro anyos de esto, kuando vos ize una emisyon sovre lag baomer. Vos tengo de akodrar en unos kuantos byervos lo ke vos aviya dicho:
El Talmud Bavli mos konta ke del tyempo de Rabi Akiva, kijo dizir del tyempo de la sigunda rebuelta de los djudyos kontra los Romanos en 132, del tyempo del emperador romano Adriano, 24.000 elevos de Ribi Akiva, o por ser mas presizo, 12.000 pares de elevos, kada elevo tenyendo un kompanyero de estudyo, se muryeron durante la Sefira (la komputasyon) del omer, de una hazinura misteryoza embiyada por el Dyo, porke, mos dize el Talmud, no se davan kavod (onor, konsiderasyon) el uno por el otro. I esta hazinura s’eskapo el trenta i treser diya de la sefira, en lag baomer. Por esto fyestamos Lag Baomer.
El luto no es solo por la muerte de estos elevos. Es tambyen porke malorozamente el kapo militar de estos elevos, Bar Kohba, pedriyo la bataya de Betar en 135, i de este anyo empesaron todas las angustyas ke sufrieron los djudyos astal renasimyento de un estado djudyo independyente en su tyerra.
Puede ser es tyempo de eskapar agora este luto. Es a lo hahamim de ver. Yo echo solo la idea…
El haham Leon Ashkenazi, de buena memorya, mistiko mas konosido kon el nombre de Manitou, mos da a ver ke en esta epoka del omer vinyeron agora diyas de fyesta o de luto atadas kon la istorya de muestro puevlo o del muevo estado de Israel. En el tyempo del Omer tenemos agora el yom aschoa, el yom azikaron, el yom aatsmaut, el yom Yerushalaïm. Fyesta i luto mesklados, ansina es el omer…i ansina me vo kedar yo tambyen, deshandovos astal djueves ke vyene, si kyere el Dyo!
